ICAYA59
Icaya onyutu bal pa jo Icrael
1Nen, bad Rwot pe odoko cek, ma pe dong twero laro dano, ite bene pe oding ma pe rome winyo lok.2Ento timwu marac aye opokowu woko ki Lubangawu, balwu omiyo wange dong oume woko i komwu, omiyo dong pe winyo kokowu.3Pien remo dong onywano cingwu woko, ki lwet cingwu opong ki tim me bal keken; dok bene wuloko lok goba ki dogwu, ki lebwu bene mungu lok me timo tim maracu.4Pe tye dano mo ma doto lawote ilok matye ada, pe tye ngat mo ma cito i otkot ci pido pido kakare; dano ducu gijenge ilok ma tere peke kun giloko lok goba keken, wuparo pi timo gin maracu makelo can bot luwotwu.5Dano ducu ginywalo tim marac calo tong lacocodo, giciko obwogi calo oboropyen; ngat ma camo tonggi to woko, ento ka onyono anyona ororo a iye.6Ento obwogi macalo meno pe bikonyogi wa ki acel, pe bikonyogi me aruka kadi ki me ume, ticgi ma gityero obedo tic me bal, ki cinggi bene timo tim bwami.7Tyen gi yot giringo kwede madwir katimo gin marac, giwile awila me cito oyotoyot ka neko jo ma peke ki bal. Gitamo meggi tam me cito katimo gin marac keken; kama giwoto iye ducu giyako dok gibalo jami woko matye kunu.8Pe gingeyo yo me kuc, timo gin matye atir bene peke i gudugi, gin gilubu yo ma ogom woko, pe tye ngat mo ma wok ki iye ma nongo kuc.Jo Icrael gutucu balgi
9Dano giwaco ni, “Meno omiyo tiyo gin ma atir botwa dong peke, wayenyo lengpiny ci wanongo mutu, maka woto i ceng wawoto i colpiny.10Wabedo kabongo kor ot ki cingwa calo lutowang, wabongo calo jo ma wanggi oto; wayoke kawot ma piny pud leng calo watye kawot i dyewor, wanen calo jo ma oto ki ikin jo ma komgi tek.11Nen dong watye kangur angura calo lee, wabedo kakok akoka calo amam, wakuru timo tim atir ento pe wanongo; wakuru lare, ento tye kamabor kwedwa.12Pien balwa dong odure mapol inyimi, roc ma watimo aye dong obedo caden ikomwa; pud wapo ikom balwa, wangeyo gin marac ma watimo.13Wakalo wi cik, wakwero Rwot woko, waweko bene lubu kor Lubangawa, kun waloko lok me unu dano kijemo. Wagamo lok goba bedo i cwinywa, ci waloko bene kamaleng.14Ento ngolo kop atir kidwoko woko cen, kit ma atir bene pe dong nyiko cok ingetwa, ki ada bene opoto woko i kabedo ducu idye gang, gin mo matye kakare pe dong nongo yo me donyo.15Ada dong peke matwal, ngat ma kwero timo tim marac kitime marac.” Rwot oyube me laro joneRwot oneno ci cwinye ocwer matek, pien ngolo kop atir dong peke. Ngat ma konyo jo ma kiunugi dong peke.16Rwot ouru mada pien ngat mo dong peke matwero larogi. Ci en kikome aye dong bilarogi ki teke kene, kit ma atir bimiyo en cobo timo man.17Oruku kit ma atir macalo gin me gengo kore, ki otang nyonyo me lar bene oruku i wiye; cwiny me culu kwor bibedo macalo bongo arukane, dok akemo biboyo kome woko calo jor.18En biculugi kun poro kit macalo timgi tye kwede, akemo bot lumonene, ki cul bot lukwore; dok biculu cul marac bot lobo matye i dog nam.19Meno bimiyo kibilworo nying Rwot cake ki tung kupotoceng, ki deyone cake ki itung kunyango; pien biruyu bino oyotoyot calo pii ma mol mager, mayamo pa Rwot aye ma twago.20Rwot dok owaco bot jone ni, “An abibino i Cion ka kokowu ki i gwokwu, wun jo pa Yakobo ma wuweko timo bal.21Dong ki tung bota, man en aye obedo gicike ma acike kwede kwedwu: tek ma mera ma dong atyeko miyo botwu, ki loka ma dong atyeko keto i dogwu, pe dong bia ki i botwu, kadi ki i dog lutinowu, nyo i dog lutino pa lutinowu, cake tin cito kwede anyim kun bedo bene nakanaka.”
Bible Society of Uganda