阅读NIA 12

NIA12

Karama me Kato

¹Rwot owaco bot Moses ki Aron ki i lobo Ejipt ni,²“Dwe man aye bibedo dwewu mukwongo i mwaka.³Tit bot lwak jo Icrael ducu ni, ikom nino dwe apar me dwe man, ladit wi ot acel acel bikwanyo latin romo nyo latin dyel acel pi ot acel acel, ikit ma dogola pa kwarogi tye kwede.⁴Ka ot mo tidi, ma pe romo tyeko ringo latin romo ci won ot meno ki ladogolane ma ode cok kwede gibikwanyo latin romo ma oporo wel dano ma gin tye kwede. Wubipoko malube ki wel dano ma bicamo.⁵Wutwero kwanyo latin romo nyo latin dyel makome pe kimwonyo, nyok madite romo mwaka acel.⁶Wugwok nio wa inino dwe apar wiye angwen me dweni ka lacen, ka lwak jo Icrael ducu gucoke kacel, gibineko romigi otyeno.⁷Guter remo manok, gucwiny ikom okar me dogola ryoryo, ki ikom rii wiye malo i dog odi ma kibicame iye.⁸Gucam ringo i dyewor meno, ma kibulu abula; gucam ki Mugati ma Tobi Pe iye, ki pot dek mogo makec.⁹Pe wumwod mo manumu, nyo ma kitedo ki pii, ento kibul abula, wiye kacel ki tyene ki jam iye.¹⁰Pe wuwek gin mo odong nio odiko; ka gin mo odong nio odiko, ci wubiwango woko.¹¹Wubicamo aruya, kun nongo wutweyo pyerwu, dok nongo wuruku war ityenwu, ki nongo bene wumako odo i cingwu, meno aye Karama me Kato me wora, an Rwot.¹²Pien i dyewor meno, abikato ki i dye lobo Ejipt, ci abineko lutino kayo ma co ducu, pa dano ki pa lee ma i lobo Ejipt, ci abipwodo lubanga ducu pa jo Ejipt. An a Rwot.¹³Remo bibedo lanyut mewu, ikom odi ma wutye iye; ka aneno remo, ci abikato lamal ki kawiwu. Gemo mo pe bipoto ikomwu ma binekowu, ikare ma abipwodo iye lobo Ejipt.”

¹⁴“Wubikwero nino man me poyo wiwu ikom gin ma atimo pirwu. Wubikwerone wun ki likwayowu ducu. Man bibedo nino madit bot Rwot, dok bibedo cik matwal.”

¹⁵Ci Rwot owaco ni, “Wubicamo mugati ma pe kirubu ki tobi pi nino abiro; ikom nino mukwongo wukwany tobi ki i ot, wuony woko. Ka ngat mo bicamo mugati ma tobi tye iye, nia inino mukwongo nio wa inino me abiro, dano meno pe kibikwaneni en obedo Laicrael.¹⁶Ikom nino mukwongo wubibedo iye ki gure maleng; ki inino me abirone bene wubibedo iye ki gure maleng; pe kibitiyo tic mo inino meno ducu; ento gin ma dano ducu camo, meno aye wuyubi.¹⁷Wubikwero nino madito me Mugati ma Tobi pe iye, pien ikom nino meno kikome en aye yam akwanyo iye bucawu ki i lobo Ejipt; ma omiyo wubikwero nino meno, wun ki likwayowu ducu, wek obed cik matwal botwu.¹⁸Idwe mukwongo, ikom nino dwe apar wiye angwen otyeno, wubicamo Mugati ma Tobi Pe iye, nio wa inino dwe pyere aryo wiye acel otyeno.¹⁹Pe kinong tobi mo i odiwu ikom nino abironi; pien ka ngat mo bicamo gin ma kirubu iye tobi, dano meno kibiryemo woko ki ikin lwak pa jo Icrael, kadi bed en labedo nyo anywali me Icrael.²⁰Pe wubicamo gin mo ma kirubu iye tobi. Kama wubibedo iye ducu wubicamo Mugati ma Tobi Pe iye.”

²¹Moses olwongo ludongo pa jo Icrael ducu, ci owaco botgi ni, “Wuyer lutino romi muporo dogolawu, ci wunek latin romo me Kato.²²Wujak oboke anyero, wek wulut iremo matye ibecen, wucwiny ikom rii dogola ki ikom okar me dogola ryoryo. Dok ngat mo ikinwu pe okat woko ki idogola ode nio wa odiko,²³pien Rwot bikato cito kaneko jo Ejipt. Ka en bineno remo ikom rii dogola, ki ikom okar me dogola, ci Rwot pe bidonyo i odiwu ka nekowu.²⁴Wugwok lok man obed cik pirwu ki pi likwayowu matwal.²⁵Ka wubio i lobo ma Rwot bimiyowu, macalo yam ociko, ci wubilubu kit tic man.²⁶Ka lutinowu gibipenyowu ni, ‘Kit tic man teloke ango?’²⁷Ci wubiwaco botgi ni, ‘Man gitum me Kato pa Rwot, pien yam okato lamal iwi odi pa jo Icrael i Ejipt, ikare ma oneko jo Ejipt, ci obwoto odiwa.’” Ci dano gukulu wigi piny, guworo Lubanga.

²⁸Jo Icrael gucito gutimo kitmeno; kit macalo Rwot ociko Moses ki Aron.

Gemo me agiki: To pa lutino kayo ma co

²⁹Icwiny dyewor, Rwot oneko lutino kayo ma co ducu ma i lobo Ejipt: okwongo ki ikom latin kayo pa Parao mayam obedo ikomkere, oo kwede wa ikom latin kayo ma laco pa ngat ma kiyako matye i ot kol, ki lutino kayo ma co pa lee makwo ducu.³⁰Parao oa malo i dyewor, en ki lutice ducu ki jo Ejipt ducu; koko obedo malik mada i Ejipt, pien pe odong ot mo ma dano pe oto iye.³¹Parao olwongo Moses ki Aron ki i dyewor, ci owaco botgi ni, “Wua, wucit woko ki ikin lwaka, wun kacel ki jo Icrael ducu; wuciti, wuwor Rwot, kit macalo wuwaconi.³²Wucit ki romiwu ki dyangiwu kit macalo wuwaconi, wucit giwu; wulama gum bene!”

³³Jo Ejipt gubedo karuyu dano pi cwalogi woko ki i lobogi pi oyotoyot; gubedo kalok ni, “Wabito dong watum woko ducu ka pe wua.”³⁴Kitmeno omiyo dano gutingo moko mapeya kirubu iye tobi, gutweyo otako lanywange ki bongo umgi, gutingo kwede iwi gwokgi.³⁵Jo Icrael gutiyo kit macalo nene Moses ocikogi, gubedo kalego atego ryal ki atego jabu, ki bongi, ki bot jo Ejipt.³⁶Rwot omiyo cwiny jo Ejipt opwoyogi, ci gubedo ka miyogi gin ducu ma gulego. Kitmeno guyako jo Ejipt.

Jo Icrael gua woko ki i Ejipt

³⁷Jo Icrael gucako wotgi nia ki i Ramcec nio i Cukot; co ma guwoto ki tyen guromo alip miya abicel, ma pe iye mon ki lutino.³⁸Ki lwak kwayi rok mapatpat bene gucito kwedgi, ki lwak lee makwo mapol tutwal, romi, dyegi ki dyangi.³⁹Ci gutedo capat ki moko ma gunyobo i otako labongo tobi ma gutero ikare ma gua ki i Ejipt, pien onongo pe guyubu tobi; pien kibedo kacwalogi woko ki tek nia ki i Ejipt, kun pe dong gutwero dike, pe bene guyubu peke mo.

⁴⁰Kare ma jo Icrael gubedo kwede i Ejipt oromo mwaka miya angwen ki pyere adek.⁴¹I agiki me mwaka miya angwen ki pyere adeke, ikom nino meno kikome, en aye mony ducu pa Rwot gua gumol woko ki i lobo Ejipt.

⁴²En aye obedo dyewor ma Rwot okuru iye piny me kwanyogi woko ki i lobo Ejipt; dyewor meno en aye dyewor ma jo Icrael, gin ki likwayogi ducu, gikuru iye Rwot.

Cik mukene ma mako Karama me Kato

⁴³Ci Rwot owaco bot Moses ki Aron ni, “Man aye cik ma mako Karama me Kato: larok mo pe bicamo,⁴⁴ento opii ducu mayam ki wilo ki lim bicamo ka onongo dong kityeko lirogi.⁴⁵Labedo mo nyo lapakaca mo pe bicamo.⁴⁶Wubicamo ki i ot acel; pe wubikato ki ringo mo woko nia ki i ot, cogone bene pe kibituru iye.⁴⁷Lwak jo Icrael ducu gibikwero nino man.⁴⁸Ka larok mo bedo ikinwu ce mito kwero Karama me Kato bot Rwot, wek kong kilir kom co ducu matye bote, ka dong onyik cok kalubu kit kwer man. En dong kibinene macalo anywali me Icrael. Ento dano ma pe kiliro pe bicamo.⁴⁹Cik bibedo acel pi anywali ki pi lurok ma bedo ikinwu.”

⁵⁰Ci jo Icrael ducu gutimo kit macalo yam Rwot ociko Moses ki Aron kwede.⁵¹Ikom nino meno kikome en aye yam Rwot okwanyo iye mony pa jo Icrael woko ki i lobo Ejipt ki bucagi.

Bible Society of Uganda

https://app.library.bible/content/1618808970a5a3ca