ROMAWECHA /toc 1ROMAWECHA /toc 2 ROM /mt YARA NDIKTI BULUS KƏMƊI /mt1 ROMAWECHA14
1Thlam nafɗi nawaktǝ fǝr kit yan kwaˈkwa. Kǝ wumowunchi asˈinda ha tǝ yowuna wa kǝ ɗar ǝnɗi naa kaɗatˈyo tǝ yaˈan sam samǝn wa.2Fǝr kit i yowuna, nan ngǝmandǝs kǝ sǝmtǝ chik yen ɗǝsǝmnda, yowun paɗ thla nawakchǝ kwaˈkwa hur fǝr kit ˈyan, wan ɗǝftǝ ndak thlǝ sǝmndǝn.3Nafɗi thlǝ sǝmchǝ chik yen ɗǝsǝmnda kǝ njǝr tǝ thla thlǝ sǝmwakchǝ koha ɗǝsǝmnda wa. Thla thlǝ sǝmchǝ wan ɗǝftǝ ndak kǝ chakan tǝ mee thla thlǝ sǝmchǝ koha ɗǝsǝmnda, kǝthlǝm tapi thlǝ Farta ndi.4Wun nako hacha natu chakan mee mafati yowuna? Ndu mafaɗan kǝ thlarha ndu kǝ hǝmha nat nechan ɓǝrati thlǝ wǝrˈyan, nan mbahǝn thlartǝ ha, kǝthlǝm chinda nan mbahǝn ɗǝf ndi kǝ thlar ha.5Yowun thlǝ mananchan fartǝ arta mǝni kwaˈan farchaˈan. Yowun paɗ thlǝ tǝrchan Fartaˈan nat arta mǝɗiyan. Chik wuni kǝ thlarha kǝ ɗar ǝnɗi sǝndǝnsi hur wanɗikaɗatˈyan.6Nat thla thlǝ tǝrchi fartǝ arta kǝ kappa fartǝ ǝ mǝɗˈyan, thlǝ chichan kǝɗu kǝ manan tǝ Farta. Nat thla thlǝ kangchǝ chik yen thlǝwa thlǝ chikan kǝɗu kǝ manan te Farta, nakan thlǝ chanchan usoko Farta. Nat thla thlǝ kang wakchǝ chik yen thlǝwa, chikan kǝɗu kǝ manan te Farta, nakan thlǝ chanchan usoko Farta.7Yowunsǝ hur mǝn nech nat ha ndu mǝrtǝ kaɗ tǝ alkǝt indiyan wa.8Ma ngamǝn nat ha nechamǝn nat ha kǝthlǝm kǝ manamǝn Farta. Ma mǝrmǝn, kǝ mǝrmǝn paɗ kǝthlǝm kǝ manamǝn Farta. Kǝthlǝm kǝt ndaˈan, ndu tǝ namǝn nat ha, ndu mǝrtǝ kaɗi, tǝ namǝn kǝ yi chinmǝn.9Kǝthlǝm kǝt ndaˈan, mǝr Kǝristi, paɗ thleˈ tǝ shishingnda, kǝthlǝm kǝ chok kǝ chin fee nech kǝ mǝmatecha, tǝ fee nech nat ha.10Chikǝni, thlǝ sǝmchǝ wan ɗǝftǝ ndak, mǝ chich thlǝ natu chakan mee fowuna? Chi paɗ, thla thlǝ sǝmchǝ chik yen ɗǝsǝmnda, mǝ chich thlǝ njǝr tu fee paɗ fǝrchǝ kit? Natmǝn, namǝn thlartǝha pangngǝn Farta, mǝthlan nech chakamǝn mee.11Nechan kǝ yaraɗan hur laulawaɗan, ndat wa,“Ngǝt nech kǝ chinda Farta thlǝ shishingnda, ndakǝwa,‘Chik yen weɗa nan cham kuruminchiha ǝ pangǝnna,chik wan shenuˈta paɗ kǝ ndawa ngǝt nech kǝ Farta.’ ”12Kǝthlǝm ndaˈan, chikwun nefa nan mbuˈ ǝnɗi chitǝn tǝ indiyan pangngǝn Farta.13Kǝthlǝm ndaˈan, malaman naa ɓǝɓifati raˈan ha. Chik wun kǝ tǝrtǝ sheɗan hur wanɗǝkaɗat ˈyan, ndat wa, ngen chok kǝ ɗakwan che wansartiyanwa, thla thlǝ ɗǝf chǝ sheɗan kǝ ɓǝɓifata wa.14Sǝninchi, paɗ nii mbahǝn mbuˈta hur thlǝm chinda Yesu, ndat wa, ngǝ ǝnsi tǝ indiyan nawakchǝ chǝɗchǝɗ wa. Paɗ ma tǝr yowun wa ǝnsi nawakchǝ chǝɗchǝɗ, chǝɗchǝɗ mǝɗˈyan wa.15Ma ɗǝsǝmǝnɗi thlǝ sǝmndu thlǝ ɗǝfchan kǝ sǝɓ hwiri wanmu kaɗi, chi chok kaafata wa. Kǝ nggǝmen ɗǝsǝmǝnɗi thlǝ sǝmndu kǝ ɓǝlan tǝ wanmu thla mǝrtǝ Kǝristi kǝ ɗaran wa.16Kǝ nggǝmen ǝnɗi nech ndiˈchan, kǝ ndik fee sǝɓtaˈan kǝ ɗaran wa.17Kǝthlǝm kutǝrakti Farta, nga ndiktǝ sǝmnda, tǝ sata wa, nechan kǝ ndiktǝ kaakǝta, kǝɓikaɗi, tǝ mbǝn fata, hur Shemeti Farta.18Nat thla thlǝ mananchǝ Kǝristi tǝ mban ɗiya, thlǝ tǝranchan hwiri Farta ha, paɗ naa nafchǝ thlǝt ndi.19Kǝthlǝm kǝt ndaˈan, kweˈyamha tǝ ichiɗi nech ɓat tǝ kǝɓikaɗi, tǝ ndǝkˈsandǝ raˈan.20Kǝ sǝɓawun teri Farta kaɗ kǝthlǝm sǝm ɗǝsǝmndiyowunwa. Chǝkayen ɗisǝmnda nechan chǝɗchǝɗ, nat tǝ kǝɗu sǝɓtǝ ǝna ma ɗǝsǝmǝnɗi thlǝ sǝmndu nech ɗǝf wanmawa kǝ che wansarta.21Ndǝɗˈwa suwa, kǝ kengngǝn thlǝwa wa, ndu sa ˈyam innabi, ndu kǝ chin chǝkamǝ nat, thla nech ɗǝf wanmu kǝ hǝmha wa.22Fǝr kit ˈyo suwa? Kǝsu har pathlthlang wa tǝ Farta. Thlǝ mbǝs ǝnhar thla pǝnandǝ wanɗikaɗatˈyan ǝnɗi chǝtǝn ndiˈchan.23Thla hunawaktǝ wanɗikaɗatˈyan, paɗ ǝ sǝmi, chǝt ɓǝɓifata. Kǝthlǝm sǝmchan hur kumi fǝr kit. Nat ǝnɗi chǝt fee ngga hur fǝr kit wa, ɓǝɓifata.
The Seed Company