ቆረ፥ ዳታነነ አቤሮ
1ሌወ ኮቻፈ ቃሃታ ኮቸ ግድዳ ይስአራ ናአይ ቆረይ፥ ሮቤላ ኮቻፈ ኤልኣባ ናይት ዳታነይነ አቤሮይ ቃስ ፋለታ ናአይ ኦን፥2ሙሰ ቦላ ደንድዶሶና። ኤንታራ ናምኡ ፄታነ እሻታሙ አሳት ደኦሶና፤ ሄ አሳት አሳን ኤረትዳይሳታነ ማባራ ካለይሳታ።3ኤንቲ ሙሰነ አሮና ስን ሺቅድ፥ “ህንተ ዳርስደታ፤ ማባራ ኡባይ ጌሽ፤ ጎዳይ ኤንታራ ደኤስ። ያትን፥ ጎዳ ማባራ ቦላ ህንተና አይስ ቁ ቁ ኦቲ?” ያግዶሶና።4ሙሰይ ሄሳ ስእዳ ዎደ ጎዳ ስንን ጉፋንስ።5ቆረኮነ እያ ጩጋኮ፥ “ጎዳይ ዎንቶ ዎንታ ኦን እያ ባገኮነ ኦን ጌሸኮ በሳና፤ ሄ እ ዶርዳ ኡራ ባኮ ሺሻና፤ ሄ ኡራይ እያኮ ሺቃና።6ዎንቶ ዎንታ ኔራነ ነ አሳራ ሀይሳ ኦተ፤ እፃነ ጩይስያ ሚሸ ኤክድ፥7ቦንቆ ታማ እያን ዎድ፥ ጎዳ ስንን እፃነ ጩይስተ። ጎዳይ ዶርያ ኡራይ እ ጌሽ ግዳና። ህንተ፥ ሌወት ዛዋፐ አደታ።”8ቃስካ ሙሰይ ቆረኮ፥ “ህንተ ሌወት ስእተ።9እስራኤለ ፆሳይ ህንተና ባ ማባራ ግዶፈ ዱማይድ፥ ጌሻ ዱንካንያን ኦና መላነ ባ አሳ ስንን ኤቅድ ሀጋዛና መላ ባኮ ሺሽዳይስ ህንተዉ ጉፅዴ?10እ ህንተናነ ህንተ እሻታ ሌወታ ኡባ ባኮ ሺሽስ፤ ሽን ሀእ ህንተ ካህነታ በሳ ኮዬታ።11ኔንነ ነ ጩጋ ኡባይ ጎዳ ቦላ ማካልድ ደንድደታ፤ ህንተ እያ ቦላ ዙዙማናዉ እ አሮን ኦኔ?” ያግስ።12“ያትድ፥ ሙሰይ፥ ኤልኣባ ናይታ፥ ዳታነነ አቤሮ ፄግስስ፤ ሽን ኤንቲ፥ ‘ኑኒ ቦኮ’ ያግዶሶና።13ኔኒ መላ ቢታን ኑና ዎናዉ ማነ ኤስ ጎግያ ቢታፈ ኑና ከስዳይስ ጉፅስ ጋዳ ሀእ ኑ ቦላ ሀላቃ ግዳናዉ ኮያይ?14ኔኒ ኑና ማነ ኤስ ጎግያ ቢታ ገልሳባካ፤ ዎይኮ ኔኒ ኑስ ላታ ኦዳ ጎሻ ጋደነ ዎይነ ጋደ እማባካ፤ ኔኒ ኑና ጭማሳ፤ ኑኒ ቦኮ” ያግዶሶና።15ያትን፥ ሙሰይ ዳሮ ሀንቀትድ፥ ጎዳኮ፥ “ኔኒ ኤንታ ያርሹዋ ኤኮፋ፤ ታ ኤንታፈ እሱዋካ ቆሀብከ፤ ቃስ ሀር አቶሽን እስ ሀረካ ኤንታፈ ኤካብከ” ያግስ።16ቃስ ሙሰይ ቆረኮ፥ “ዎንቶ ኔራነ ነ አሳራ ሄሳዳ አሮንካ ጎዳ ስን ሺቅተ።17እስ እስ አስ ባ እፃነ ጩይስያ ሚሽያ ኤኮ፤ እፃነካ እያን ዎ፤ ኡባይ እስፈ ናምኡ ፄታነ እሻታሙ እፃነ ጩይስያ ሚሸ ግዴስ፤ እፃነ እያን ዎድ ጎዳ ስን ሺሾ። ኔኒነ አሮን ህንተ እፃንያ ሄሳዳ ሺሽተ” ያግስ።18ያትን፥ እስ እስ አስ ባ ሚሸን እፃነነ ታማ ቦንቆ ዎድ ጌሻ ዱንካንያ ፐንገን ሙሰራነ አሮናራ እስፈ ኤቅዶሶና።19ቆረይ ባ አሳራ ጌሻ ዱንካንያ ፐንገን ሙሰ ስንንነ አሮና ስንን ኤቅዶሶና። ሄ ዎደ ጎዳ ቦንቾይ ኩመ ማባራስ ቆንጭስ።20ጎዳይ ሙሰኮነ አሮናኮ፥21“ታኒ እስ ቶሆ ሀ አሳ ይሳና ግሾ፥ ኤንታፈ ሻከትተ” ያግስ።22ሽን ሙሰይነ አሮን ሳአን ጉፋንድ፥ “አቤት ፆሳዉ፥ አሳ ሸምፖ ኡባ መዳ ፆሳዉ፥ እስ አስ ናጋራ ኦኮ፥ ኔኒ ኩመ ማባራ ሀንቀታዬ?” ያግዶሶና።23ያትን፥ ጎዳይ ሙሰኮ፥24“አሳስ ‘ቆረ፥ ዳታነነ አቤሮ ዱንካንያ ማታፐ ክችተ’ ጋዳ ኦዳ” ያግስ።25ሙሰይ ደንድድ፥ ዳታነኮነ አቤሮኮ ብን፥ እስራኤለ ጭማት እያ ካልዶሶና።26እ ማባራኮ፥ “ሀ ኢታ አሳ ዱንካንያ ማታፐ ክችተ፤ ኤንታባ አይብባካ ቦቾፍተ። አካይ፥ ጊኮ፥ ኤንታ ናጋራ ጋሶን ህንተካ ፕተትድ ያና” ያግድ ምንድ ኦድስ።27ያትን አሳይ ቆረ፥ ዳታነነ አቤሮ ዱንካንያ ማታፐ ክችዶሶና። ዳታነይነ አቤሮይ ካረ ከይድ፥ ባንታ ማቸታራነ ባንታ ናይታራ ባንታ ዱንካነታ ፐንገን ኤቅዶሶና።28ሙሰይ አሳኮ፥ “ታኒ ሀ ኦሶ ኡባ ኦና መላ፥ ጎዳይ ታና ኪትዳይሳነ ታኒ ታ ሸነን ኦናይሳ ህንተ ኤራናይ ሀይሳና።29ሀ አሳት አስ ሀይቀይሳዳ ሀይቅኮ ዎይኮ አሳ ቦላ ጋክያባ ፃላል ኤንታ ቦላ ጋክኮ ጎዳይ ታና ኪትቤና።30ሽን፥ ጎዳይ ኦራባ ኦድ፥ ቢታይ ዶየትድ ኤንታነ ኤንታዉ ደእያባ ኡባ ምትኮነ ኤንቲ ፓፃ ደእሸ ዱፎ ገልኮ ሄ ዎደ ሀ አሳት ጎዳ ካዳይሳ ህንተ ኤራና” ያግስ።31እ ያግድ ኦንግዳ ዎደ ኤንቲ ኤቅዳ ቢታይ ዶየትድ፥32ኤንታነ ኤንታ ሶ አሳ፥ ቆረ ጩጋ ኡባነ ኤንታዉ ደእያባ ኡባ ምትስ።33ያትን ኤንቲ ባንታዉ ደእያባ ኡባራ ፓፃ ደእሸ፥ ዱፎ ገልዶሶና። ቢታይ ኤንታ ቦላ ጎርደትስ፤ ኤንቲ ማባራ ግዶፈ ይዶሶና።34ኤንታ ዋሱዋ ጋሶን ኤንታ ማታን ደእያ እስራኤለ አሳ ኡባይ፥ “ቢታይ ኑናካ ምታና ሀኔስ” ያግድ ባቃትዶሶና።35ቃስ ታም ጎዳ ማታፐ ይድ እፃነ ጩይስያ ናምኡ ፄታነ እሻታሙ አሳ ምስ።36ሄሳፈ ጉየ ጎዳይ ሙሰኮ፥37“ካህነይ፥ አሮና ናኣ አላዛር ናሰ ብራታፐ ኦሰትዳ እፃነ ጩይስያ ሚሸታ ፁገትዳ አሳፐ ኤክድ፥ ሄ ሚሸት ጌሽ ግድያ ግሾ፥ ቦንቆ ታማ ሀራ ሶ ኤፍድ ላላና መላ ኦዳ።38ሄ ሚሸት ባንታ ደኡዋ ይሳናዉ ናጋራ ኦዳ አሳይ እፃነ ጩይስያ ሚሸ። ሄ ሚሸት ጎዳስ እመትዳ ግሾነ ጌሽ ግድያ ግሾ ሌእሳ ቆፃዳ ያርሾ በሳ ላንፃ። ሄስ እስራኤለ አሳስ ናግሶ ማላ ግዶ” ያግስ።39ያትን ካህነይ አላዛር እፃነ ጩይስያ ሚሸታ ኤክድ ያርሾ በሳ ላንፃናዉ ሌእስድ ቆፅስ።40ጎዳይ ሙሰ ባጋራ ኪትዳይሳዳ፥ አሮና ኮቸ ግዶና ኦንካ ጎዳ ስንን እፃነ ጩይሳናዉ ሺቆና መላ፥ እፃስ ጊኮ፥ ቆረ ቦላነ እያ ካለይሳታ ቦላ ጋክዳይስ እያ ጋኮና መላ እስራኤለ አሳ አኬክሳናዉ ሀይሳታ ኦስ።41ዎንተ ጋላስ እስራኤለ ማባራ ኡባይ፥ “ጎዳ አሳ ህንተ ዎደታ” ያግድ ሙሰ ቦላነ አሮና ቦላ ዙዙምዶሶና።42ኤንቲ ሙሰነ አሮና ቦላ ደንዳናዉ ሺቅድ፥ ኤንቲ ጌሻ ዱንካንያ ፄልያ ዎደ ሻራይ ጌሻ ዱንካንያ ካምን፥ ጎዳ ቦንቾይ ቆንጭስ።43ሄሳፈ ጉየ፥ ሙሰይነ አሮን ጌሻ ዱንካንያ ስን ይድ ኤቅዶሶና።44ያትን ጎዳይ ሙሰኮ፥45“ሀ አሳ ግዶፈ ክችተ፤ ታ ኤንታ እስ ቶሆን ይሳና” ያግስ። ሙሰይነ አሮን ሳአን ጉፋንዶሶና።46ሙሰይ አሮናኮ፥ “እፃነ ጩይስያ ነ ሚሽያ ኤካዳ ያርሾ በሳፈ ቦንቆ ታማ ኤካዳ እያን ዎ፤ እያ ቦላ እፃነ ጉጃዳ እስራኤለ ማባራኮ ኤፋ። ጎዳ ሀንቆይ እያ ማታፐ ከይ ክችስ፤ ቦሻይካ ዶምስ” ያግስ።47ያትን አሮን፥ ሙሰይ ኪትዳይሳዳ ባ እፃነ ጩይስያ ሚሽያ ኤክድ ማባራ ግዶ ዎፅድ ገልስ። ቦሻይ አሳ ዎ ኦይክስ ሽን፥ አሮን እፃነ ጩይስድ አሳስ አቶተ ኤህስ።48ያትድ፥ እ ሀይቅዳይሳታነ ፓፃታ ግዶን ኤቅን፥ ቦሻይ አግስ።49ቆረ ጋሶን ሀይቅዳ አሳይ አትሽን፥ ሄ ቦሻን ሀይቅዳ አሳ ታይቦይ 14,700.50ቦሻይ ኤቅዳፐ ጉየ፥ አሮን ጌሻ ዱንካንያ ፐንገን ደእያ ሙሰኮ ስምስ።