लुक8
1ओना तायोमते जिसु दो आतो आतो आर नागराहा नागराहा दाँड़ाँ दाँड़ाँतेये पोरचाराकोकान आर इसोराक् राज रेयाक् भागे सोमबाते जा़हिराकोकान ताहेंकाना आर गेलबारको दो उनि साँवतेको ताहेंकाना;2आर तिना़क् गान चोङ मायजिउको, ओने ओनको बा़ड़िच् जिउ आर रोगबिघिन खोनको बोगे ओचोवाकान ताहेंकान, मागदालिनिको मेताय मा़रिया़म, ओने उनि खोन एयाय भुतको ओडोकलेन,3आर हेरोदरेन देवान खुसा़ रिनिच् जोआन्ना आर सुसान्ना आर ढेर एटाक् मायजिउको, ओने ओनको ताहेंकानताकोवाक् धोनते जिसु आर उनिरेन चेलाकोको साप्सोराकोकान ताहेंकाना।4आदो आ़डि गादेल होड़को हेच् जारवाक्कान आर नागराहा नागराहारेन जिसु ठेनको हेच् ठा़उरा़क्कान ताहेंकानरे मित्टेच् फेनतेये गालमारावात्कोवा,5“एरोक्इच् दो इता़ एरोक् ला़गित्ए ओडोक चालावेना; आर एरोक् जोखेच् आदोम दो होर आड़ेरे ञुरेना, आर लेबेत् गासमाँडावेना आर चोटरेन चेंड़ें ओनाको हालाङ जोमकेदा।6आदोम दो चा़टा़इनि ओतरे ञुरेना, ओमोनकाते हाल बाङते रोहोड़ का़रचुप् एना।7आदोमाक् दो जा़नुमको तालारे ञुरेना आर ओना साँवते जा़नुमको हारायेनते ओनाय झुरकेदा।”8“आर आदोमाक् दो भागे ओतरे ञुरेना आर ओमोनकाते गेले बेलेयेना, मित्साय दोबोड़,” नोवाको काथा जिसुइ रोड़केत् खान होहोवातेये मेनकेदा, “आँजोम ला़गित् लुतुर मेनाक्तायिच् दोए आँजोममा।”9आदो जिसुरेन चेला ओना फेन दो चेत्काना मेनतेको कुलि केदेया।10आदोए मेनकेदा, “आपे इसोराक् राज रेयाक् ओकोवाक्को बाक्डाय एम आकावात्पेया, मेनखान आरको दो फेनतेगे, जेमोन ञेञेल तुलुच् आलोको ञेल आर आँजोम तुलुच् आलोको बुजहा़उ।”11फेनतेत् दो नोक्ओंय, इता़ दो इसोराक् काथा काना।12होर आड़ेरे ञुर आकान इता़ दो ओनको कानाको, ओकोयको आँजोम मेनखान आलोको पा़तिया़उक् आर आलोको बाञचावक् मेनते सायतान हेच्काते ओनकोवाक् मोन खोन काथाय हालाङ इदिया।13आर चा़टा़इनि ओतरेन दो नोको कानाको, ओने ओनको आँजोमलेरे रा़सका़ते काथाको आताङेत् मेनखान ओनको दो रेहेत् बा़नुक्ताकोवा; थोड़ा दिन ला़गित्को पा़तिया़उक्आ आर बिडा़उ जोखेच् दोको पा़चा़क्आ।14आर जा़नुमको तालारे ञुरेनाक् दो, ओनको कानाको, ओकोय दो नोवा पुरिरे जियोन रेयाक् दाँद आर धोन आर हा़ँस लाताररे चालाक् चालाक्तेको झुरोक् काना आर बाङको गेले बेले सा़बितोक् काना।15आर भागे ओत रेयाक् दो नोको कानाको, ओने ओनको काथा आँजोमकाते जुत आर भागे मोनरे ओनाको साप् दोहोय आर सोमभोरिकातेको गेले बेलेक् कान।16ओकोय हों दिउहे जेरेत्काते भाजानते बाको हा़रुप् एसेदा, से पारकोम लाताररे दो बाको दोहोया; बिचकोम दिया़ड़ा चेतानरेको दोहोया जेमोन बोलोक्को मारसालको ञेल।17एनते ओकोवाक् दो चेत् हों बा़नुक्आनेच् ओकाटाक् दो ओकोआकान ओना दो सोदोररे आ़गुक्आ आर ओकाको पोटोम आकान ओना दो ञामकाते मारसालरे आ़गुक्आ।18“ओनाते मोनेयाक्पे चेत् लेकापे आँजोमेदा; एनते मेनाक्ताय होड़ दोए एम ओचोक्आ आर बा़नुक्ताय होड़ दो ओकाटाक् मेनाक्ताये बुजहा़वेत्कान, ओना होंए रेच् ओचोक्आ।”19आदो जिसुरेन एङगात आर बोयहाको उनि ठेनको हेच्एना, मेनखान गादेल होड़ इया़ते उनि तुलुच् बाको ञापाम दाड़ेयादा।20खानगे जिसुको ला़इयादेया, एङगाम आर बोयहामको बाहरेरेको तेङगोवाकाना आम तुलुच् ञेपेलको ञामकाना।21जिसु दोए रोड़ रुवा़ड़ात्कोवा, “इसोराक् काथा आँजोमको आर सेनोवाक्कोगे एङगा़ञ आर बोयहाञ दो।”22आर ओना जोखेच् मित् दिन जिसु दो मित्टेच् ला़उका़रेये देच्एना आर उनिरेन चेलाको हों; आरे मेतात्कोवा, “देलाबोन दोरयाँव ओन पारोमतेबोन चालाक्आ।” आदो ला़उका़को लाड़ावकेदा।23आर ला़उका़तेको चालाक्कान ताहेंकानरे जिसु दोए जा़पित्केदा। खानगे दोरयाँवरे बिरबाँव हेच्एना आर ला़उका़ दो दाक्ते पेरेजोक्कान ताहेंकानते मुहिनरेको पाड़ावेना।24आदो जिसु ठेन सेनकाते बेरेत्केदेतेको मेतादेया, “ए गुरु, ए गुरु, जोसावेनाबोन।” जिसु दो बेरेत्एनते होय आर हाबाक डाबाकोक् कान दाक्ए धोमकावकेदा; खानगे थिरेनते डेलडेल निझुमेना।25आदोए मेतात्कोवा, “ओकोरतापे बिसवा़स दो?” आर बोतोर आर हाहाड़ातेको मेपेनेना, “ओकोय एनडेखान उनि दो, होय हों होय आर दाक् हों दाक्ए हुकुमाक्काना आर बानारकिन बातावेत्ताय दो?”26जिसु आर आच्रेन चेलाको गा़लिल ओन पारोम गेरासेनेसरेनकोवाक् टोठातेको सेटेरेना।27आर ढिपरेये फेडेन खान, भुतको चापाड़ आकावादे ताहेंकान ओना नागराहारेन मित् होड़े दाराम केदेया; उनि दो आ़डि दिन खोन किचरिच् बाय ओयो डेङगानकान ताहेंकाना आर ओड़ाक्रे दो बाय ताहेनकान ताहेंकाना, बिचकोम कोबोरकोरेगे।28आदो जिसु ञेलकेदेते किकिया़उआते उनि सामाङरेये ताबेरेना आर होहोवातेये मेनकेदा, “इञ तुलुच् आमाक् दो चेत्? ए जिसु चोट उता़रिच् इसोररेन होपोन, नेहोंराम का़ना़ञ, आलोम सासेतिञा।”29एनते उनि दो बा़ड़िच् जिउ उनि होड़ खोन ओडोक चालाक्ए हुकुमादे ताहेंकाना। एनते बेसाफा जिउ दो उनि आ़डि धावे तावाक् आकादे ताहेंकाना आर सिकड़ि आर बिड़िकोतेये तोल ओचोक् आरे होरहो ओचोक्कान ताहेंकाना आर तोनोलको तोपाक् काटरा कुटरा़काते उनि भुत होतेते हाहाङकारकोरेये हेलाव ओचोक्कान ताहेंकाना।30जिसु दो उनिये कुलि केदेया, “चेलेयामा ञुतुम दो?” उनिये मेनकेदा, “फा़दआञा।” एनते आयमा भुतगे उनिरेको बोलो आकान ताहेंकाना।31आदो भुतको जिसुको नेहोंरादेया जेमोन आथान कुँडते चालाक् आलोय हुकुमाको।32ओंडे दो बुरुरे आ़डि साङगे खा़ड़ सुकरिको आ़तिञकान ताहेंकाना; आदो जिसुको नेहोंरादेया जेमोन ओनकोरे बोलोक् ला़गित्ए आड़ाक्आको; आदोए आड़ाक्आत्कोवा।33खानगे ओनको भुत दो उनि होड़ खोन ओडोक सेनकाते सुकरिकोरेको बोलोयेना; आर खा़ड़ सुकरि दो दाड़ाङ दाड़ाङते दोरयाँवरेको गादगादाव फेडेना आरको उनुम गोच्एना।34आर गुक्पिको दो होयेनाक् ञेलकातेको दा़ड़केदा आर आतोते आर आतो बाहरे सेनाक् बा़इहा़ड़ रेयाक् आतोकोरे सेनकातेको ला़इ पासनावकेदा।35खानगे ओना होय आकानाक् ञेल ला़गित्को ओडोक चालावेना आर जिसु ठेनको सेटेरेन खान, उनि होड़, ओने उनि खोन भुतको ओडोक चालावेन ओयो डेङगा आकान आर बुदआकान जिसुवाक् जाङगा ठेन दुड़ुप् आकानको ञाम केदेया, आरको बोतोरेना।36आर ओनाको ञेललेत् होड़ दोको ला़इयात्कोवा भुत चापाड़लेदेयिच् चेत्लेकातेये बोगेयेना मेनते।37आर गेरासेनेस बेड़हायतेयाक् टोठारेन जोतो गादेल होड़ जिसु ठेनको नेहोंरेना आको ठेन खोने चालाक्आ मेनते, एनते आ़डि आँट बोतोरगे पाड़ाव आकावात्को ताहेंकाना। आर जिसु दो ला़उका़रे देच्कातेये रुवा़ड़ चालावेना।38आदो उनि होड़ ओने उनि खोन भुतको ओडोक आकान ताहेंकान, जिसुइ नेहोंरादेया उनि तुलुच् ताहेन ला़गित्; मेनखान जिसु दो बिदा़केदेतेये मेतादेया,39“आमाक् ओड़ाक्ते दु रुवा़ड़ चालाक्मे आर ला़इ सोदोरमे तिन माराङाक्को इसोरे चेकाआकावात्मेया।” आदोए रुवा़ड़ चालावेना आर गोटा नागराहारेये पोरचार इदिकेदा तिन माराङाक्को जिसुइ चेकाआकावादे ताहेंकान।40आदो जिसुइ रुवा़ड़ चालावेन खान गादेल होड़को आताङ दाराम केदेया, सानाम होड़गे एनतेको ञेलहोरेकान ताहेंकाना।41आर ञेलपे, जायरोस ञुतुमाय मित् होड़े हेच्एना; उनि दो सुना़गोगरेन मित्टेन मुखिया़इ ताहेंकाना। आर जिसुवाक् ति जाङगारे गिडियेनतेये नेहोंरादेया आयाक् ओड़ाक्ते सेनोक् ला़गित्।42एनते गेलबार सेरमा गानरेन मित्टेन साधेर होपोनेराय ताहेंकानताया आर उनि दो गुजुक् दा़खिले ताहेंकाना। आदो जिसु ओंडेये चालाक्कान ताहेंकानरे ओनको गादेल होड़ दोको रिडा़त् चिरित्एदे कान ताहेंकाना।43आर गेलबार बोछोर खोन पोरधोल रोगान मित्टेन मायजिवे ताहेंकाना आर आयाक् सारा जिबोन आ़सुलोक्आक् रारानकोरे खोरोच गिडिकाते ओकोय हों बाको बोगे दाड़ेयादेया।44उनि दो तायोम सेच् खोन हेच् सोरकाते जिसुवाक् किचरिच् रेयाक् आञचारे जोटेत्केत्ताया आर इना़ घा़ड़िच्तेगे उनियाक् माँयाँम ओडोकोक् दो टामभाव गोत्एना।45आदो जिसुइ मेनकेदा, “ओकोये जोटेत्केदिञा?” आर सानामकोगेको बाङकेत् खान, पातरासे मेनकेदा, “हेंदा गुरू, गादेल होड़ चोङ कुचित आरको रिडा़त्एत्मे कान।”46मेनखान जिसुइ मेनकेदा, “जाहाँय बाङ जाहाँये जोटेत्केदिञगेया, एनतेञ बाडायकेदा इञ खोन दाड़े ओडोक सेन आकाना।”47आदो उनि मायजिउ बाय ओको ताहेंदाड़ेयाक्आ मेनतेये बाडायकेत् खान थारथारावाते हेच्एना आर जिसु सामाङरे ओमबाक्एनते सानाम होड़को सामाङरेये ला़इ सोदोरकेदा चेत् मेनतेये जोटेत्लेदे आर चेत्लेका इना़ घा़ड़िच्तेये बोगेयेन।48जिसु दोए मेतादेया, “ए मा़इ, आमाक् बिसवा़सगेये बाञचाव आकात्मेया; निरा़इते सेनजोङमे।”49जिसुइ रोरोड़कान ताहेंकानरेगे सुना़गोगरेन मुखिया़वाक् ओड़ाक् खोन मित् होड़ हेच्कातेये मेनकेदा, “होपोनेराम दोए बेनडावेना, गुरु दो आर आलोम हारोनेया।”50जिसु दो ओना आँजोमकातेये रोड़ रुवा़ड़केदा, “आलोम बोतोरोक्आ, एकेन पा़तिया़उक्मे, खाने बाञचावक्आ।”51आदो ओड़ाक्ए सेटेरेन खान आच् साँवते ओकोय हों बाय बोलो ओचोवात्कोवा, पातरास आर जोहान आर जाकोब आर उनि कुड़िरेन एङगात आपात छाडा दो।52आर सानाम होड़ उनि इया़तेको राराक्कान आर कोड़ामको चेटागोक्कान ताहेंकाना। मेनखान जिसुये मेनकेदा, “आलोपे रागा; बाङचोय गोच् आकान एकेने जा़पित् आकादा।”53आदोको लानदा धुत्आदेया, उनिये गोच् आकान बाडायकाते।54आर जिसु दो उनियाक् ति साप्कातेये होहोवादेया, “ए मा़इ मा बेरेत्मे।”55खानगे उनियाक् जिवि रुवा़ड़ेनताया आरे बेरेत् गोत्एना आर जोम ला़गित् एमाये हुकुमकेदा।56आर उनिरेन एङगात आपात दोकिन ठाक एना, मेनखान जिसु दोए का़जियाँउकात्किना ओना होयेनाक् रेयाङ दो ओकोय हों आलोकिन ला़इयाकोवा मेनते।
The Word for the World International