योहान6
1यीं गोठीइ फासाड़ी ईसु गालील दोर्याअ मोन्ज्ये तिबिरियास दोर्याआ तिवोग गोयू.2आन एक वोडी गर्दी तियाआ फासाड़ी जानी वोल्यी, काहाके तियां मांदवाड़्ये हुदरीइलाअ तिये कोअल्या समत्कार देख्याते.3ताहरुउ ईसु डोगो पोअ सोढीत कोइत तियाआ सेलांअरी बोहीत गोयू.4यहुद्याआं वल्हांडणोअ तिवार आहने ओतू.5जाहां ईसु तियाआ सोमकीर नजर फेरवीत वोडी गर्दीही तियाअहें आवत्लाहा देख्यी, तेहेलाम फिलीप्पोहो कोयो, “आपू यां माअहोंअ काजे ताराइत खाय एतुहू रोटू का रोत वेसातू लेतावहूं?”6तिये ए गोठ फिलीप्पोहो फारकीइलाअ काजे कोयी, काहाके तो सोताहा जांअतुतो के तो कि कोअनारु होये.7फिलीप्पे तियाहा उत्तर आप्यो, “बेन होव सांदीइ रुप्याआ रोटा वेसाता लेय आन हारेक जोओंहों थोड़ थोड़ा बी आपे, तेबी पुगी ने आवे.”8तियाआ सेलामेर्युउ शिमोन पेत्राआ पाही आंद्रिये तियाहा कोयो,9“इंहीं एक पोर्यू होये जिया पोअ जवोअ पास रोटा आन बेन मासा होये; पोन एता माअहोंअ काजे ते काहा पुरेमे?”10ईसु कोयो, “माअहोंहों बोहाड़ी द्या.” तियी जागेहे जाअखीलोह खोड़ ओतो: ताहां आखे माअहें बोहीत गोये; जियांमेहें एका आंदासोवाअहीं माट्योंअ गणती पास हाजार ओती.11ताहरुउ ईसु आथोमेहें रोटू लेदू, आन देवोहो धन्यवाद आपीत कोइत तिहीं बोहनारा माअहोंहों वाटी देदू; आन तेहेंज कोइत मासे बी वाटी देदे, आन तियांहां जेते जोवे तेतेहे जोड़्ये.12जेहेलाम ते खात कोइत ताराइत गोये, ताहां तिये तियाआ सेलाहां कोयो, “उगरीइल्या कुटका हाटवीत ल्या के किज वाया ने जाअहूं जोवे.”13ताहराअ तियां हाटव्या, आन पास जवोअ रोटाअ कुटका वाअहीं जे खानारापोअ रोत उगर्याते, बारा टोपले पोआये.14ताहां जो समत्कार ईसु तियांहां कोइत देखाड़्यू, तियाहा काजे तें माअहें कोने वोल्ये, “जो भविश्यवक्तू दुन्यामेहें आवनारु ओतू तो हादामक्यु ओज होये.”15ईसु ओं ओलखीत कोइत के तें तियाहा जबरजस्तीज राजा बोणावीइलाअ काजे तोअनारे होये, ताहां तो डोगो पोअ एखलुज जातु रोयू.16जेहेलाम हांजेए वेल आयी, ताहां ईसुउ सेला दोर्याअहें गोया,17आन एका नावड़ामेहें बोहीत दोर्याअ एकी मेरे कफर्णहुमोमेहें जाना वोल्या. तेहेलामेहें वारुज आंदारो ओत गोयोतो, तेबी ईसु ओमे जाआं तियांआं जागे ने आयुतो.18वोडू वादुउ सालू वोल्यू तिहीं वाअहीं दोर्यामेहें सेलकाआ उसला वोल्या.19जेहेलाम ते पास सोव किलो मिटर जाता रोया, ताहां तियां ईसुहू दोर्याआ पाअयों पोअ सालित कोइत नावड़ाअहें आवत्लू देख्यू, आन ते बित गोया.20ईसु तियांहां कोयो, “आंय होंव, मा बिहा.”21ताहराअ ते तियाहा नावड़ामेहें बोहाड़ीलोअ काजे तियार ओवा, आन ताबुड़ तों नावड़ो तियी मेरे जात पोत्यो जिहीं तियांआं जाअलो ओत्लो.22बिहीरे दिही तियी गर्दीइ माअहें, जे दोर्याअ तियी मेरे गोयेते, तियां ओं देख्यो के इंहीं एका नावड़ाअ सिवाय बिहीरो कोड्लो नावड़ो कायने ओतो; आन ईसु तियाआ सेलांअरी तिया नावड़ामेहें ने बोठू, ओं तियांहां मुंदू पोड़ीत गोयू, पोन निस्ता तियाआ सेला एताज गोयाते.23ताहां बिहीरे नावडे तिबिरियास रोत तिया जागाआ आहने आवये, जिहीं तियां प्रभुउ आभार मानित रोटू खादूतो.24तियाहा काजे गर्दीइ माअहूं देख्यो के इंहीं नाहां ईसु आन नाहां तियाआ सेला, ते बी नावड़ामेहें बोहीत कोइत ईसुहू होदते होदते कफर्णहुमोअहें जाने वोल्ये.25जाहां माअहें ईसुहू दोर्याआ एकी मेरे मिल्ये ताहां कोयो, “गुरु, तू इंहीं केती वेले आयू?”26ईसु तियांहां उत्तर आप्यो, “आंय तुमुहूं खोरीज कोहो, तुमू माहूं याअकाजे नाहां होदते के तुमू समत्कार देख्या, पोन याअ काजे के तुमू रोटू खात कोइत ताराअये.27आरवाअनारा ओनोअ काजे मेहेंनत मा कोअहा, पोन तिया ओनोअ काजे मेहेंनत कोआ जों हादाजलम जिवनोम टिकीत रोहे, जियाहा माहुंउं बेटुह्हू तुमुहूं आपे; काहाके आब्हे मोन्ज्ये देवे तियाज पोअ सिक्कु लागाड़्युहू.”28तियां तियाहा कोयो, “देवोअ काम कोइलाआ कोअते आमू कि कोओ?”29ईसु तियांहां उत्तर आप्यो, “देवोअ काम ओं होय के तुमू तिया पोअ, जियाहा तिये मोकल्युहू, विश्वास कोआ.”30ताहां तियां तियाहा उत्तर आप्यो, “ताहरुउ तू कोड्लू समत्कार देखाड़ेहे के आमू देखीत कोइत तापोअ विश्वास कोअ? तू की कोअही?31आमाआं वेगाअ डायहां जंगलोमेहें मान्ना खादो; जेहलोहो लेख्योहो, ‘तिये तियांहां खाअहूं काजे होरगाम रोत रोटू आप्यू.’”32ईसु तियांहां कोयो, “आंय तुमुहूं खोरीज कोहो के मोशे तुमुहूं तो रोटू होरगाम रोत नाहां आप्यू, पोन माआं आब्हू होय जो तुमुहूं होरगाम रोत खोरु रोटू आपेहे.33काहाके तो रोटू जियाहा देव आपेहे तो होरगाम रोत उतर्युहू आन दुन्याहा जिवन आपेहे.”34ताहां तियाहा तियां कोयो, “प्रभु, ओ रोटू आमुहूं सादाज आप्या कोअजी.”35ईसु तियांहां कोयो, “जिवनोअ रोटू आंय होय: जो माआं जागे आवे तो केदिहीं फुकल्यो ने रोये, आन जो मापोअ विश्वास कोअहे, तो केदिहीं तिहील्यो ने रोय.36पोन आंय तुमुहूं कोयोतो के तुमू माहूं देखीत लेदूहू, तेबी विश्वास नाहां कोअते.37हारेक जोओं जियाहा आब्हू माहूं आपेहे, तो माआं जागे आवे, आन जो माआं जागे आवेहे तियाहा केदिहीं वोलीत जाअहूं ने देंव.38काहाके आंय माआं इश्शा नाहां, पोन माहूं मोकलीइनाराआ इश्शा पुरी कोइलाआ काजे होरगाम रोत उतर्युहू;39आन माहूं मोकलीइनाराअ इश्शा ए होय के जो किबी तिये माहूं आप्योहो, तियामेर्योअ आंय किज ने टाकाअहूं देंव, पोन आखरीइ दिही तियां आखाहा जिवाड़ी देहीं.40काहाके माआं आब्हाअ इश्शा ए होय के जो कोडो बेटाह्हाहा देखे आन तियापोअ विश्वास कोए, तो हादाजल्म्योंअ जिवन मेलवे; आन फाशुउ आंय तियांहां आखरीइ दिहोमेहें जिवते कोअहीं.”41तियाहा काजे यहुदी तिया पोअ टुटणे वोल्ये, काहाके तिये कोयोतो, “जो रोटू होरगाम रोत उतर्यू, तो आंय होय.”42आन तियां कोयो, “केहें ओ योसेफोअ बेटुह्हू ईसु नाहां? ताहां तो कि कोइत कोत सेकेहे के आंय होरगाम रोत उतर्युहू?”43ईसु तियांहां उत्तर आप्यो, “तुमा तुमाआंज टुटण्या मा कोअहा.44कोडोज माआं जागे नाहां आवित सेकतो जाअहूं जाआं आब्हू तियाहा ने हादे, आन आंय तियाहा आखरीइ दिही फाशुउ जिवाड़ीहीं.45भविश्यवक्ताआ लेख्याम ओं लेख्योहो: ‘तें आखे देवोअहें रोत सिकाअले रोनारे.’ जो कोडो आब्हाप रोत उनाअयो आन सिकाअयोहो, तो माआं जागे आवेहे.46याआ ओं अर्थ कायनाहां के एखे आब्हाहा देख्युहू; पोन जो देवोअहीं रोत होये, निस्तू तियेज आब्हाहा देख्युहू.47आंय तुमुहूं खोरीज कोहो के जो कोडो विश्वास कोअहे, हादाजल्म्योंअ जिवन तियाआज होय.48जिवनोअ रोटू आंय होये.49तुमाआं वेगाअ डायहां मेहें मान्ना खादो आन तेबी ते मोइत गोया.50ओ तो रोटू होय, जो होरगाम रोत उतर्युहू, जों होरगाम रोत आवल्या या रोटाहा खाये तो ने मोए.51जिवनोअ रोटू जो होरगाम रोत उतर्यू, तो आंय होय. जर एखू या रोटामेहें रोत खाय, ताहां हादाजल्म्योंअ जिवतो रोये; आन जो रोटू आंय दुन्याअ जिवनोअ काजे आपीहीं, तो माआं डिल होये, याज वाअहीं दुन्या जिवती रोये.”52यी गोठीपोअ यहुद्याहां खोत लागी तियां तियांआंज सोबासोबी ओत गोये, “ओं माहुंउं याअ डिल आपुहूं खायतेहें केहें कोइत आपीत सेकेहे?”53ईसु तियांहां कोयो, “आंय तुमुहूं खोरीज कोहो के जाअहूं जाआं तुमू माहुंउं बेटाह्हाअ डिल ने खाहा, आन तियाआ रक्त ने पीहा, ताअहूं जाआं तुमामेहें जिवन नाहां रोनारो.54जो माआं माहां खाहे आन माआं रक्त पीहे, हादाजल्म्योंअ जिवन तियाआज होय; आन आंय तियाहा आखरीइ दिही फाशुउ जिवाड़ीहीं.55काहाके माआं डिल हादामक्योज खाअलाअ रोटू होय, आन माआं रक्त हादामक्योज पीइलाअ वस्तू होय.56जो माआं डिल खाहे आन माआं रक्त पीहे तों मामेहें जिवतो रोहे, आन आंय तियामेहें जिवतु रोहो.57जेहें कोइत जिवते आब्हे माहूं मोकल्यू, आन आंय आब्हा वाअहीं जिवतु होय, तेहेंज कोइत जों माआं डिल खाये तों माआं वाअहीं जिवतो रोय.58जो रोटू होरगाम रोत उतर्युहू तो ओज होय, जो वेगाअ डायहां खादू आन फासाड़ी ते मोइत गोया; पोन जो या रोटाहा खाये, तो सादा जिवतो रोये.”59ए गोठी तिये कफर्णहुमोमेहें एका यहुदी आराधनालयोमेहें सिकाड़त्लू तेहेलाम कोयी.60ईसुउ वारुज सेला ए गोठ उनाइत कोइत कोयो, “ए हिकवोण खुब कठीण होये; यीही कोडो उनाइत सेकेहे?”61ईसु तियाआ मोनोम ओं जांइत कोइत के माआं सेला तियां तियांआंज यी गोठी वाअहीं टुटणीइताहा, तियांहां फुशो, “केहें यी हिकवोणो वाअहीं तुमू टुटणीइताहा के?62जर तुमू माहुंउं बेटाह्हाहा जिहीं तो पेल ओतू, तिहीं उसे जात्लाहा देखहा, ताहां कि ओवे?63जो जिवन आपेहे तो आत्मा होये, डिलो वाअहीं किज फायदू कायनाहां; जे गोठी आंय तुमुहूं कोयीही ते आत्मा आन जिवन होये.64पोन तुमामेहें थोड़ाक एहेलाहा होये, जे विश्वास नाहां कोअता,” काहाके ईसुहू पेलुज मुंदू ओतू के कोडू विश्वास नाहां कोअतू आन कोडू तियाहा तोइत आपनारु होये.65आन ईसु आगाड़ी कोयो, “तियाहा काजे आंय तुमुहूं कोयोतो के माआं फासाड़ी ताअहूं जाआं कोडोज नाहां आवित सेकतो, जाअहूं जाआं माआं आब्हू तियाहा माआं जागे आविइलाअ परवानगी ने आपे.”66यी गोठीपोअ तियाआ सेलामेर्याआ वारुज जोंअ फासाड़ी फिरीत वोल्या आन फाश्याआ केदिहींज तियाआ फासाड़ी ने गोया.67ताहरुउ ईसु तियाआ बारु सेलाहां कोयो, “केहें तुमू बी सोड़ीत कोइत जाअहूं होदताहा?”68शिमोन पेत्रे तियाहा उत्तर आप्यो, “प्रभु, आमू कोडाअ जागे जांव? हादाजल्म्याआं जिवनोअ गोठी तोम ताआज जागे होय;69आन आमू विश्वास कोअयुहू आन मुंदू ओत गोयुहू के देवोअ पवित्र माहुंउं तो तुज होय.”70ईसु तियांहां उत्तर आप्यो, “केहें आंय तुमू बारा जोअहों नाहां निवड़्या? तेबी तुमामेर्युउ एक जोउं सैतान होये.”71ओं तिये शिमोन इस्कार्योतोअ बेटाह्हा यहुदाअ बाप्तिमेहें कोयोतो, काहाके तोज जो बारा जोंअं मेर्युउ एक ओतू, जो तियाहा तोइत आपनारु ओतू.
The Word for the World International