MATAYO22
Indjɛ la tɛkɛ ɛ moki
1Yesu abala na emumu koko na mandjɛ. Abala na bu boo:2«Okumu ba diko bokoani na: kumu omɔti ona ɔbɔngɛdja tɛkɛ ɛ moki tina ɛ mwana ɔ nde moomi.3Aloma basali ba nde abea bato ibabeama ta tɛkɛ boo badoe, endolo balona odoa.4Aloma koko basali bakina ko abala na bu boo: “Kɛɛ atɔndɔeni babeami boo nabɔngɛdjai mia ma tɛkɛ, naowoi ngɔmbɛ ba mbai baami na tito ba mbai ba miita, midjɔ misusu miboanedjami. Badoe ta tɛkɛ ɛ moki!”5Endolo babeami ba tɛkɛ baikɛsɛlɛ na mbea ko bakɛɛ ta midjɔ ma bobo: omɔti ta gue ɛ nde, okina ta mombongu ma nde;6bakina bapea basali, babanyɔkɔla ko babaowa.7Kumu alemoa: aloma basoda ba nde baowoe baoowoli bia ko batumbe ibonga la bobo.8Bea abala na basali ba nde boo: “mia ma tɛkɛ mabɔngɛdjami, endolo babeami baboaniti na yu.9Kɛɛni ta maatano ma ndjia ko beani bato basusu ibatanealea no ena bɛngɛ boo badoe ta tɛkɛ ɛ moki ɛ mwana ɔ mbai.”10Basali bakɛɛ ta ndjia ko babea bato basusu ibatanea bo oho, bato babe na bato bapele; na bea, ekenge ndako ɛ tɛkɛ ɛluma na bato.11Kumu aingea bɛngɛ ahokee babeami ba tɛkɛ ko aenɛ moto omɔti ɔdaka pɛpɛ olwa esendja ɛ tɛkɛ.12Amohɔdja boo: “Mopalani ɔ mbai, moda moingei na wɛ haa pɛpɛ olwa esendja ɛ tɛkɛ nda?” Endolo moto ona ataka ebaeli ɛ osɔmbɛdja.13Bea kumu abala na basali ba nde boo: “Monangani mbɔti ta mabɔ na mako ko modumbani o sokolu, ta modidi. Oho ayealea ko akpɛkɛnɛlea mino.”14Tina ɛ boo, babeami badii bike endolo bahɔmi badii bakɛkɛ.»Puti tina ɛ Kaisala
15Bea bafalusai bakɛɛ aputoana bɛngɛ babɔngɛdjae ndjia ɛ otɛdja Yesu ta nduka na mibalo ma nde mɛɛnɛ.16Baloma ekenge ɛ batingami ba bobo engbanga na bato ba Elode abala na Yesu boo: «Molehi, ladjebaka opele boo odii moto ɔ sooti: okalehe sooti ndjia ɛ Ndjambe; tokɛsɛlɛ na moto tina ɛ boo tohokee mbanda dja bato.17Lotɔndɔɔ malɛi ma wɛ tina ɛ modjɔ muu: mobeko ma booso mapaka enɔli ɛ oputa puti ɛ kumu Kaisala kaoko pɛpɛ?»18Endolo Yesu adjeba owɛi ba bobo bobe; abala na bu boo: «Bato ba owɛi bobe, tina ɛ mekakani na nu nda?19Inedjanini falanga ikapute na nu puti.» Bamoinedja falanga emɔti ɛ ebende,20ko Yesu abahɔdja boo: «Epoya na kombe ekomi bo haa la nda?» -21Bamosɔmbɛdja boo: «La Kaisala», bea Yesu abala na bu boo: «Pani Kaisala ilodii la Kaisala, ko Ndjambe ilodii la Ndjambe.»22Ehole ɛoka bo esɔmbɛdjɛli ɛ Yesu, bakamoa. Bamokina ko bakɛɛ.Ihɔdja diko la opusoa
23Oko ta iswi dia, ekenge ɛ Basadukai ibakabale boo opusoa boditi, badoa odii Yesu ko bamohɔdja boo:24«Molehi, Mose abala boo: “Nga moomi akagwa pɛpɛ okina mwana, mwanango aboani oosɔ mwali ona okini mowei bɛngɛ amobotedjae baana ibatitanalea mowei.”25Ta ndanda ɛ booso ladaka na bami saambo ba ngwabu omɔti sangwabu omɔti. Mwana moomi ɔboso aosɔ mwali ko agwa, endolo aibota na nde; bea akina mwali ɔ nde ta mabɔ ma mwanango.26Ekɔɔmɔ moda momɔti na ɔ babae, na ɔ basato mbunoko mwana ɔ saambo.27Ngɔngɔ dja ibo basusu, mwali agwa koko.28Ta iswi ilipusoabi bato ta ndanda ɛ bago, mwali ona adabi mwali ɔ nda ta tei ɛ bami bia saambo? Tina ɛ boo ibo basusu bamoosɔ!»29Yesu abasɔmbɛdja boo: «Odini ta ibunga, tina ɛ boo todjebeni na Makomi, na ngulu ɛ Ndjambe.30Tina ɛ boo ehole epusomabi bago, bali na bami baosɔnetebi, endolo badabi elengɛɛ babwɛndi ta busa.31Ta modjɔ moeni opusoama ba bago, opakitalangani moda mabala Ndjambe na nu? Abala boo:32“Nadii Ndjambe ɔ Abalayama, Ndjambe ɔ Isaka na Ndjambe ɔ Yakobo.” Yesu abakea boo, Ndjambe adii Ndjambe ɔ bato bamohelo, endolo titi ɔ bago.»33Bato ibamooka bakamoa obuke na bileho ba nde.Mobeko imonɔi na tina
34Ehole ɛoka Bafalusai boo Yesu asukedjai Basadukai, bea baputuana.35Ko omɔti ta ndanda ɛ bobo, moto ɔ edjebeli ɛ mobeko, ahɔdja Yesu ihɔdja dii bɛngɛ amomeke:36«Molehi, mobeko monɔi na tina ta mibeko misusu nda?»37Yesu amosɔmbɛdja boo: « “Oboani opala Kumu Ndjambe ɔ wɛ na molema ma wɛ mosusu, na dongi la wɛ isusu ko na malɛi ma wɛ masusu.”38Ena edii mobeko ma tina ko monɔi na onɛnɛ.39Ko hokea mobeko ma babae mokoani na mua: “Oboani opala mopalani ɔ wɛ moda mokasapale wɛ mɛɛnɛ.”40Mobeko mosusu na bileho ba batɛli bitingi ta mibeko mia mibae.»Masia na Davidi
41Ena ɔputoana bafalusai esika emɔti, Yesu abahɔdja boo:42«Ekalɛdjaeno tina ɛ Masia yee? Adii mwana ɔ nda?» Bamosɔmbɛdja boo: «Adii mwana ɔ Davidi.»43Ko Yesu abala na bu boo: «bea moda ndani Davidi, na ilɔndi la Mwembo Mosɛnɔke, amobea “Kumu”? Tina ɛ Davidi abala boo:44“Kumu Ndjambe abala na Kumu ɔ mbai boo:Doa adae ta ebɔ ɛ mbai ɛ bami,mbunoko naise baloni ba wɛ nase dja bigbota ba wɛ.”»45«Bea nga Davidi akamobea “Kumu”, moda ndani ahɔni koko oda mwana ɔ nde?»46Pɛpɛ noko moto omɔti ɔhɔnɔ omosɔmbedja ebaeli, ko donga iswi dia, pɛpɛ moto ɔsoboa koko boo amohɔdjae mahɔdja.The Seed Company