อ่านหนังสือ 1 Whakapapa 16

1 Whakapapa16

¹Heoi, kawea ana e rātou te āka a te Atua, whakatūria ana ki waenganui o te tēneti i whakaarahia e Rāwiri mōna; ā, tāpaea ana e rātou he tahunga tinana, he whakahere mō te pai ki te aroaro o te Atua.²Ā, ka mutu tā Rāwiri whakaeke i ngā tahunga tinana, i ngā whakahere mō te pai, ka manaakitia e ia te iwi i runga i te ingoa o Ihowā.³I tuwhaina anō e ia mā ngā tāngata katoa o Īharaira, mā te tāne, mā te wahine, kotahi rohi taro mā tēnei, mā tēnei, tētahi wāhi kikokiko, me tētahi keke karepe whakamaroke.

⁴I whakaritea anō e ia ētahi o ngā Rīwaiti hei minita ki mua i te āka a Ihowā, hei whakamahara, hei whakawhetai, hei whakamoemiti ki a Ihowā, ki te Atua o Īharaira.⁵Ko Āhapa hei tuatahi; i muri i a ia ko Hakaraia, ko Teiere, ko Hemirāmoto, ko Tehiere, ko Matitia, ko Eriapa, ko Penaia, ko Opere-Eroma, ko Teiere hoki ki ngā hātere, ki ngā hāpa, ko Āhapa hei whakatangi i ngā himipora;⁶ko Penaia hoki rāua ko Tahatiere, ko ngā tohunga, kia tūturu tonu tā rāua mau tētere ki mua i te āka o te kawenata a te Atua.

Te Waiata Whakamoemiti a Rāwiri

⁷I reira anō i taua rā ka whakaritea tuatahitia e Rāwiri he whakamoemiti mō Ihowā, nā te ringa o Āhapa rātou ko ōna tēina.

⁸Whakawhetai atu ki a Ihowā, karanga ki tōna ingoa;whakapuakina āna mahi ki waenganui o ngā iwi.⁹Waiata ki a ia, hīmene ki a ia,kōrerotia āna mahi whakamīharo katoa.¹⁰Kia whakamanamana koutou ki tōna ingoa tapu;kia hari ngā ngākau o te hunga e rapu ana i a Ihowā.¹¹Rapua a Ihowā, me tōna kaha,rapua tonutia tōna mata.¹²Maharatia āna mahi whakamīharo i mahi ai ia;āna merekara, me ngā whakaritenga a tōna māngai;¹³e ngā uri o Īharaira, o tāna pononga,e ngā tama a Hākopa, e āna i whiriwhiri ai.

¹⁴Ko Ihowā ia, ko tō tātou Atua;kei te whenua katoa āna whakaritenga.¹⁵Maharatia tonutia tāna kawenata,te kupu i kīia iho e ia ki te mano o ngā whakatupuranga;¹⁶te kawenata i whakarite ai ia ki a Āperahama,tāna oati hoki ki a Īhaka;¹⁷ā, whakapūmautia iho hei tikanga ki a Hākopa,hei kawenata mau tonu ki a Īharaira,¹⁸i a ia i mea rā, “Ka hoatu e ahau ki a koe te whenua o Kanaanahei wāhi pūmau mō koutou.”

¹⁹I te mea e torutoru ana anō koutou;āe, e tokoiti rawa ana, he manene hoki ki reira;²⁰i a rātou e hāereere ana i tēnei iwi ki tērā atu iwi,i tētahi rangatiratanga ki tētahi iwi kē.²¹Kīhai rātou i tukua e ia kia tūkinotia e te tangata;āe rā, i rīria e ia ngā kīngi, he whakaaro ki a rātou.²²I mea ia, “Kei pā ki āku i whakawahi ai,kei kino hoki ki āku poropiti.”

²³Waiata, e te whenua katoa ki a Ihowā;kauwhautia tāna mahi whakaora i tēnā rangi, i tēnā rangi.²⁴Whakapuakina tōna korōria i waenganui i ngā tauiwi,āna mahi whakamīharo i waenganui i ngā iwi katoa.²⁵He nui hoki a Ihowā, kia nui te whakamoemiti ki a ia;kia wehingia nuitia atu hoki ia i ngā atua katoa.²⁶He whakapakoko hoki ngā atua katoa o ngā iwi;nā Ihowā ia i hanga ngā rangi.²⁷He hōnore, he kīngitanga kei tōna aroaro;kei tōna wāhi te kaha me te koa.²⁸Tukua ki a Ihowā, e ngā hapū o ngā iwi,tukua ki a Ihowā te korōria me te kaha.²⁹Tukua atu ki a Ihowā te korōria e tika ana mō tōna ingoa;maua mai he whakahere, haere mai ki tōna aroaro.Koropiko ki a Ihowā i roto i te ātaahua o te tapu;³⁰kia wehi rā ki tōna aroaro, e te whenua katoa.E ū anō te ao, tē taea te whakanekeneke.³¹Kia hari ngā rangi, kia koa te whenua;kia mea rātou i roto i ngā iwi, “Ko Ihowā te kīngi!”³²Kia haruru te moana, me ngā mea hua ana i roto;kia koa te māra, me ngā mea katoa i runga!³³Ko reira ngā rākau o te ngahere waiata aii te hari i te aroaro o Ihowā,e haere mai ana hoki ia ki te whakarite i runga i te whenua.

³⁴Whakawhetai ki a Ihowā, he pai hoki ia,he pūmau tonu hoki tāna mahi tohu.³⁵Mea atu hoki: “Whakaorangia mātou, e te Atua o tō mātou whakaoranga,kohikohia mātou, whakaorangia mātou i ngā tauiwi,kia whakawhetai ai mātou ki tōu ingoa tapu,kia whakamanamana ai ki tōu whakamoemititanga.³⁶Kia whakapaingia a Ihowā, te Atua o Īharairaake nei, ā ake nei!”Nā, ka mea te iwi katoa, “Āmine!” ā, whakamoemiti ana rātou ki a Ihowā.

Te Koropiko kei Hiruhārama me Kipeono

³⁷Heoi, ka waiho e ia i reira, i mua i te āka o te kawenata a Ihowā, a Āhapa rātou ko ōna tēina, hei minita tonu ki mua i te āka, i ngā meatanga o tēnei rā, o tēnei rā,³⁸a Opere-Eroma me ō rātou tēina, e ono tekau mā waru; a Opere-Eroma hoki tama a Ierutunu, rāua ko Hōha hei kaitiaki tatau.

³⁹Ko Hāroko tohunga me ōna tēina, me ngā tohunga, ki mua o te tapenākara o Ihowā i te wāhi tiketike i Kipeono,⁴⁰hei whakaeke tonu i ngā tahunga tinana mā Ihowā ki runga ki te āta tahunga tinana i te ata, i te ahiahi, hei mea i ngā mea katoa i tuhituhia ki te Ture a Ihowā, i whakahaua e ia ki a Īharaira.⁴¹Ā, hei hoa mō rātou a Hēmana rāua ko Ierutunu, me ērā atu i whiriwhiria, i whakahuatia nei ngā ingoa, hei whakawhetai ki a Ihowā, nō te mea he pūmau tonu tāna mahi tohu.⁴²Hei hoa hoki mō rātou a Hēmana rāua ko Ierutunu me ngā tētere me ngā himipora mā ngā kaiwhakatangi kaha, me ngā whakatangi mō ngā waiata a te Atua. Ā, ko ngā tama a Ierutunu hei kaitiaki kūwaha.

⁴³Nā, haere ana te iwi katoa ki tōna whare, ki tōna whare, ā, hoki ana a Rāwiri ki te manaaki i tōna whare.