Wahebulania3
1Hinu walongo wa nenga mwenga mhaghulwa na Sapanga na kuwela wandu ghaki handa twenga, mumuwachilili nesu hayu Yesu, mndumindumi na Mtambika Mkulu wa ukwinila hau tunguutangasa.2Mweni awelili mchakaka kwa yula mweni kumhaghula, handa vila Musa awelili mchakaka kukuwatumikila wandu wa lighuta lyogha lya Izilaili.3Yesu anguwoneka yiwa ingumpala apeghwi utundamilu mkulu kupiti Musa, handa vila mchenga lighuta kawela na utundamilu mkulu kupiti lighuta lyeni.4Kwaikiva kila lighuta linguchengwa na mundu tenu, ila Sapanga ni mchenga wa kila kindu.5Musa awelili mtumikila mchakaka kumighalu hyogha kwa wandu paghati gha Waizilaili wogha, na alongile yala hyogha yavile Sapanga ateyalonga haku kuulongolo.6Ila Kilisito ni mwana mchakaka wa mighalu hyogha avile angulongosa wandu wa lighuta lya Sapanga. Na twenga ndiwa wandu hau, ikiva weka tuteyendelela mbaka mwihu kuwela tugangamala na kuhighala kulitumaini lila tungulikwinila.7Hinu hinaa, handa ailongile Mpumulo wa Sapanga, “Handa pamtehyoghanila lilowi lya Sapanga lelo,8mkotoho kuwela watatala, handa wagogolo wa mwenga vila waigholile pawamhyuka Sapanga, na lichuwa wambuyi wa mwenga wamyesili Sapanga kuluvagha.9Haku ndiwa wambuyi wa mwenga waniyesili na kunilolesa, pamonga na yiwa walola hyogha niyagholili lipindi lya machuva ialobaini.10Kwaikiva gha nagha wakanighola nihyomi, na nikalonga, ‘Wandu hagha wangubyodoka machuwa hyogha kwa kuleka kukovekela njila zyangu.'11Hinu nikahyoma na kalapa, nikalonga, 'Wateyingila ng'ogha kumlima pavile nitewapegha wapumulile’”.12Hinu walongo wa nenga, mlolesi paghati mwa mwenga, akotoho kuwela mundu mweni kuwela na moyu wa kukotoho kukwinila hata kujivika kutali na Sapanga avile mkomu.13Ila mgangamalisani mwenga kwa mwenga kila lelo, ili kukotoho kuwela na hata mmonga wa mwenga kugholwa aweli mtatala kwa kungongwa na sambi.14Kwaikiva twenga wogha tungughola pamonga na Kilisito paikawela tuteghola pamonga kwa uchakaka lila litumaini tuwelili nalu haku mtumbulo.15Handa Mayandiko yangulonga nagha, “Handa lelo mteliyoghanila lilowi lyaki, mkotoho kuwela watatala handa lipindi lila pawanihyukile”.16Ghuli ni akina ghani wahyoghanilili na kumuhyomelesa Sapanga? Ni wala wogha walongosilwi na Musa kuhuma Misili.17Hila hila ni akina ghani wamgholile Sapanga aweli na lilaka kwa machuva ialobaini? Awahyomelesili wala waigholile sambi, mindumbi ghao ikalandala kula mlivagha.18Sapanga paapalile wakolwi na mahakata, “Wateyingila ng'ogha mahala pa nenga pakumumulilila,” awelili akiwalongela akina ghani? Awelili akiwalongela wala wamuhyukile.19Hinu tungulola yiwa wawesili ng'ogha kuyingila kula mahala kwa kupumulilila kwaikiva gha kukotoho kukwinila kwa weni.
The Word for the World International