HEB - BUU10
1Doka nji Yahuda he alama ri kyawa wa ndindi riwa wa ye kusi a ran wawa nye wa he kyawa-a kpunji ran. A he bibi Ti Baan nye wa si sro wa se ri se. Ari he ri se ko Doka ri wa hu ri Ti Baan ri no wa nji wawa wa ye ri Izhi no wa son tsra?2I wa tsri wa hu Izhi ri meme ti mba, wa ran he ri meme ti ngaran, nga wa ran ran Ti Baan ngaran.3Bibi riwa a he, isro riwa wa sro se ri se a he ritu no he taka ti nji ritu meme ti mba.4Ritu iyii buu lando nga wa yawo ran ri ban meme ti zho ran.5Ritu rimba, riwa Kristo a ran wa ran ye rimi mgbumgblume, a la Izhi ri: <<Wu ran ri wa Ti Baan imba de ran, ama wu milan kpa ti dzi ri mo.6ITi Baan ri gon wa nɨma ri tenti ritu ka meme ti rega ran ri sii-u sron ran.7Ngha me tre ri, <Ingye ame-e, Izhi, me ye me ri ti kya riwa wu wa, bibi riwa a he rimi ngan ritu won rimi Doka.>>>8Ri mimilan a tre ri, <<Wa Ti Baan nga wa de nga Ti Baan riwa wa vanghon ri tu tenti nga wa Ti Baan riwa ari ban meme ti rega a ran ri si-u sron ran.>> A tre nganyi ritu ko ri riwa wa Ti Baan wanyi wa sro wa bibi riwa Doka Musa a tre nye.9Imba ka tre ri,<< Izhi ingye ngaa ame-e, me ye riwa me ti kya riwa wu wa.>>Imba Izhi ka ban Ti Baan ri kimo zho ran ka Ti Baan riwa Kristo ri bubu riwa wa he.10Ritu Yeso Kristo a ti kya riwa Izhi a wa no ti, wa tsrii ta ri wawu ri rimi meme ti ri ide riwa a de kpa ngawan kyuwan ri nkpu riri meron.11Ko nji ri Ti Baan wa nji Yahuda ritan a ti bibi ndu nyi bla vi nga ran sro wa bibi yii yii-a ri kpu kigbu; ama isro nyi ran ri to ban meme ti rega ran.12Ama Kristo a Ti Baan riri gyen kakre riwa a ran kre ran ritu meme ti, nga ran son kuwo ri riwa Izhi.13Ri bubu wan nye ka gben ara Izhi a ka wa kpan fu wan ki ri ndodza.14Ri Ti Baan riri-a, a no wawa wa tsri wa-a no wa sonson riwa a tsra riwa a ran yitu ran.15Ngha Iyu Tsitsri ngawen a tre ritu mbu. Ri mimilan a tre ri:16<< Bachi a tre ri , rinyi nye he katredzi riwa me ti ri wa ri vi riwa ari ye: me ka doka won dzi ri sron mba nga me ri ngan ri rimɨren mba.>>17Ngha ka tre ri, <<Me ran taka meme ti mba ngaran.>>18Ka wa ka wanyi chuwo, ide riwa ari ban meme ti rega ran ri he ngaran.19Imiri vayi won, nkon he huri ri ta riwa ki gra ri Bubu riwa a he Tsitsri Han ritu kuu Yeso.20A bu nkon ri sa ri ta, nkon ri vri, hu ri tsro ri ka nkon, ari miyen ikpa wan kyuwan.21Ki he ri nji ri Ti Baan riwa iko Izhi he ri wo wan nye.22No ta ki ye hɨreri Izhi ri sron kinklan nga yosron ri kpunji, ri sron riwa wa tsri-u rimi sisiri nga kpa riwa wa ngla-u ri ima riwa a kpan.23No ta ki kri mgbemgben rimi yosron riwa ki la, ritu wawu Izhi riwa a katredzi ran ri sran sron ran.24No ta ki ran ya ngambu, ki ran dzon ngambu kiri nyɨme ngambu kiri ran ti ndindi ti.25Ki ran ka kabrutu ri ngambu chuwo bibi riwa wari wa ti ran. Tsede ki sondu ran nghɨron ngambu, riwa bi to ri ikre vi Bachi ri ye hure.26ITi Baan ri riwa ari ban meme ti rega ran he ngaran i ki sondu ri ti meme ti kugon riwa wa la ta kpunji.27Riwa ki gben rimi sisiri ibla tre riwa ari ye nga chon wulu riwa ari huu wawa wa kamba ri Izhi!28Inji riwa a kpa Doka Musa time wa ran losron riwu ran wa wuu-u, ka wa fe shada nji hari ko no wa han ritu wan.29Ko wawa wa kamba tsri Vren Nji fa? wawa wa ban Iyii katredzi riwa Izhi riwa a tsri wa rimi meme ti? wawa wa kra Yuu ri losron tu? Ya bibi meme yaa bibi tan nye riwa wa no wa!30Ritu ki to nji riwa a tre ri, <<Me ti zhula, me bru han>> nga riwa a bru tre ngawen ri, <<Bachi ri bla tre ri wa nji wan.>>31A he kya ri sisiri no nji no ku ri wo Izhi riwa ari vri!32Taka bibi riwa a he ri yi ri sen. Ri vi wa mba, kugon riwa ikpan wulu Izhi a tsro yi, bi vu sron ri yaa riwa bi so, ama iso yaa-a ka ran han gbengbren mbi ran.33Ri vi wari wa ran kra yi tu ri rira, wari ran no yi yaa ri kusi wa nji, nga ri vi wari yo sron riwa bi kabrutu ri wawa wa no wa bibi ya nyi.34Bi so yaa ri wawa wa tren wa ri tra tren nji, nga riwa wa vu yi wa kpi mbi raa, bi vu sron ri ngiri, ritu bi to ri bi he ri kya riwa a han, riwa a ran ri kre ran.35Ran ka vu sron mbi chuwo ran, ritu ari ye ri nchon lada.36A he riwa bi vu sron, ritu bi ri ti kya riwa Izhi rim wa nga bi ri kpa kya riwa a kadzi ri wawu ri no yi.37Ritu, bibi riwa imbe Izhi tre ri:<<Aran ban vi bran ran, nga wawu riwa ari ye a ran wuu vi ran.38Wa nji won wa ndindi ti, wa kpanyɨme wari son; ama ka injo rimi mba kɨma gon, a ran si wen sron ri wu ran.>>39Ki ran he wa nji wawa wa kɨma gon nga wari kado ran. kita de ki he ri yosron nga ki fe kpachuwo.
The Word for the World International