Matiyu7
Owada tu n azaje tukwo
1“Fye to da aza owa m, ntolonu m əfyehni ce, a ɓa da fye owa.2Ntuge shi fya da aza owa n wú, a ɓə da əfyehni nlonu, jesnu nyamwinya n fya zhni apma ncei, əkwo nu n a ɓə mwu ga fye ncei.3“Knyiyi nu zhni hoi gye shnuwna pisəloi n kwo dna ń əhozado əwye ama to hoi zewye ń shnuwna kwnunù n kwo dna ń əhohni əwye ma a?4Ho ɓa gna əhozado n wunanu, ‘Fa mi ma gbmi ho pisəloi ya n əho əwye,’ honyi n shnuwna kwnunùi ɓwadna lo n əhohni əwye a?5Əho kwocednayi, kpmisnuyi la shnuwna kwnunù gbmiya n əhohni əwye kpa, nlonu n ho ɓa gyewyeba dəidəi ha gbmi pisəloi ya n əhozado əwye.6“To ga amwi ənya gyigyiyi m; to she əho anya amanai ya zhi abwulutu m. Ń ha zhni lonu, ɓa ɓá dna ɓa ya n apitai, jesnu ɓa pmyi ɓa sa ho ya wyiwowyiwo.Nyaɓo, Znashni, Jeaba
7“Fye nyaɓo, a ɓa ga fye; fye znashni, fye ɓa ɓwa; fye jeaba, jesnu a ɓa gwu kpakwo ya ga fye.8Ntuge zahozahoyi ń wo nyaɓo, wo gwo; əza ń wo znashni, wo ɓwa; jesnu əza ń wo jeaba, a ɓa gwu aba ya ga wo.9“Nyika nu lo n fye, n əwo nugwnu ɓa nya wo biledi ɓo, wa ga wo kwuta a?10Kwo n wa nya wo əbmya ɓo, n wo ɓa ga wo owa a?11Nlonu, ngye əfye, kwo shikwonyi, fye zhni aɓənukwoizhniyi nu, fye kpəlo shi fye ɓa ga əfye aɓyi anya amanai, fye kwu gna kpekpe nge, əfye Dada n wo dna n əshemi nyi, wo ɓa gna aza yi anya amanai gaga nu n ɓa nya wo əɓo nyi!”12Ntulonu dna ń ɓəhoɓəhoi, zhni ga aza, aɓo n ho ye ɓa zhni ga ho, ntuge əkwo nu zhni ɓəwu vnyanya owa nya n sheaɓəgwognayi aɓədai.Abwokwnumi wogyeí n palalayii.
13“Fye lofyi ń aduba pmapmai. Ntuge aduba patai, n zokwo palalayii ɓa lo aɓwi aba nu; jesnu aza bəgyé lofyi n əkwo nu.14Ama abwokwnumi nawyii n zokwo wogyeí əɓa nu lo wyewyeyi, jesnu aza fyewyi nu ɓwasnu n ɓa ɓwa əkwo.Sheaɓəgwognayi hnihnii n akatayii
15“Fye zhni pəceye ń sheaɓəgwognayi katái nyai. Ɓa ɓe da fye ǹ aknyi ajei nu kpe, ama fyi ń əɓa mi ɓa zhni acamcam anapyei nu.16Fye ɓa kpe ɓa aye n əɓa gyigyiga nu. Aza zhni ɓa ka anam gyigyi n knawui shnuwna kwo əgbà n lagbaii?17N ɓwasnu lonu, shnuwna manai dəhodəhoi ga gyigyi manai, ama shnuwna nukwoi ga gyigyi nukwoi.18Shnuwna manai taa ga gyigyi nukwoi m, jesnu shnuwna nukwoi taa ga gyigyi manai m.19Shnuwna dəhodəhoi n kwo to ga gyigyi manai m, a znu kwo yashi jesnu aa kwo sheya dna n əná.20Ntuge, fye ɓa kpe ɓa aye n əɓa gyigyiga nu.Amwutuyi hnihnii n akatayii
21“Əzahozahoyi nu to n wo yi mi, ‘Dagayi, Dagayi,’ n wo ɓə lodna n əshebemi m, ama əza nu ɓwasnu n wo zhni əmi Dada ɓəye n wo dna n əshemi nyi.22Bəgyé ɓə gna mi n əwyi yi, ‘Dagayi, Dagayi, yi to ɓə kwu sheɓəgwognada dna n əho əye jesnu dna n əho əye ya kwnu ase nukwoi ya, dna n əho əye ya zhni aɓəwowoi n bəgyei m?’23Nlonu nu ń mi ɓə gna ɓa pəipəi, ‘Mi ta kpe fye əye lo m, kpeekpe. Fye la kwu mi kala, əfye aɓənukwoizhniyi!’Anyakwnu miyi aceceyi n amamai
24“Ntucenu zahozahoyi ń wo wo əmi aɓədagbma ye jesnu waa zhni apma n ɓai, wo wu ngye əza ceceyi nu n wo mi əwo nyakwnu tu n apmá.25Əgbma kwa zhi, adna ɓa kwnu-akpma, jesnu ase ɓa ci kpe n nyakwnu yi; dudulonu to kwa myiya m, ntuge əkwo shnipa ɓə shi tu ń apmá nu.26Ama zahozahoyi n wo wo əmi aɓədagbma ye, to woi shi ɓa ɓwa m, wo wu lo ngye mama nu n wo ɓə mi əwo nyakwnu tu n amwi.27Əgbma kwa zhi, adna ɓa kwnu-akpma, jesnu ase ɓa ci, ɓai ci kpe n nyakwnu yi, kwaa vyiya vnyanya.”28She Yeisu ɓəə la pwo aɓəda ye da ɓo, ca wo deeji ntu n əwo nyawu ɓo,29ntuge wo ɓə wunya ngye əza nu n wo ɓə n ikwoi toge ngye əɓa owa anyawuyi m.Biblica, Inc.