อ่านหนังสือ Luqqaasixxaa Wengeele 3

Luqqaasixxaa Wengeele3

Xammaqallo Yohaanisika Lallaba

¹Xibariyoosi Qeesaar moyeexxe tommenna ondixxe wogga'n Phanxiyoosi Philaaxoosi Yihudaa galchamma wodda, Heeroodisi Geliilaxxe sholgaxxe kutake galchallomman, iittanni dayyi isik Filiphphoosi Ixuriyaasikenna Xirakondoosixxe sholgaxxe kutake galchallo, Lisaaniyoosinna Abileenixxe sholgaxxe kutake galchallo kade'emma wodda,²Haannanna Qeyyaafa umo qeese kandeexxi he'nee'naa Mageniink hiyyichchi qiilla gammoojje giddo Zakkaariyaasika belto Yohaannisi'n dage.³Yohaanisinna ke'eexxi Yordanoosike qarqarike boguwwi duuchchibaa mara'n, cubbotixxe gattowwaali'a aadde aagatixxa xamaqa lallabe.⁴Tinninna wabeeki Issaayaasi ifike Maxaafa'n hiyya'n borreeseema qici«Kunse qiilla gamoojje giddo raaraamake manjichchik hafuur;‹Goottakee ora qixxeesse!ookkonee hodhdhichchanna isi'a toggi asse.⁵Dhooqa duuchchinna wo'mitowwaal;Koobatinna tullichchi duuchchinna dirree kadowwaal.Midaamiddichchi oruwwi toggi hiyyowwaal;bobboqichchi hodhdhichchuwwinna ca'a hiyyowwaal.⁶Manjiinxi sanne duuchchinnaanjira Mageniinxa uuddaan.› »

⁷Yohaannisinna xammaqemo'a isibaa dagaammakaara, «Ha'no dhudhdhuufiinxi oose, dagga'neexxe mufenaa'n baajjino'a ayyete ha'noo xexxe'achchiise?⁸Yoona, aadde aggaa leellishshaaxxa huje hujje malee ha'noo ifi'a ‹Abirihaami anna no'oka anfeennen› hiyyate'n kexxinoqqe'e, tennee kinonaa'n Magen Abirihaami'a oose ke'issa dande'aaxxa ha'no'n kulaannen.⁹Ta'a qoce haqichchuwwii hunda hexxeen; eloxxa gumma gummisabaak haqichchi duuchchinna woxemeexxi giirate'n hunemaan.»

¹⁰Ardikinna «No'ota maachcho assinanno?» hiyye isoo qore.¹¹Isinna insa'ne'n, «Lame seemma afeek, afebaakee qoodowwaal; itaachcho afeekinna afebaake iittanni assowwaal» hiyye hiisse haaso'e.

¹²Qaraxa bukkassammakiirinna xammaqemo'a isibaa dageexxi, «Barachchiisallo no'ota maachcho assinanno?» hiyye isoo qore.

¹³Isinna insa'ne'n, «Ajajendineemma qicinaa'n lebbine qaraxxinoqqe'e» hiyye.¹⁴Loliink manninna, «No'ota maachcho assinanno? Hiyyeexxi isoo qore. Isinna ayyika maallaqanna hunnat adhdhitinoqqe'e; dharikinna manjo ku'ltinoqe'e; ha'noonge rundinninni hedhdhe.»

¹⁵Ardi duuchchi halchati heqqedha'n, «Kunni dedha Kiristoosite kaduu?» hiyya'n Yohaannisixxee qalbe giddo heda'emman.¹⁶Yohaannisinna hiisseexxi insa'ne'n hiyye haaso'ee qici, «Ani ha'noo woddi'ik xammaqaanen; yaane kinni anenaa'n sa'aak dagaak isi ani isixxe kopheka usurra midde tikatee geyabe'noken. Isi ha'noo Woyyichchi Hafuurinninna giirat xammaqaan.¹⁷Isi ifixxe aldumme'n midha huurakenaa'n qulleesso'a ifika qulleessatika mi'a anga afe'een; huura kinni xoxxabaaxxe giira'n gubaan.»

¹⁸Yohaannisinna wele heddo gorsiinke haaso'inni arda gorsa'n eloxxa odo insa'ne'n lallabe.

¹⁹Yaane kinni sholgaxxe kutak galchalli, Galiilak Heeroodisi ifike dayyixxa are, Heerodiyaadaxxeenna wele hujemmaxxe elobaaxxe hujexxee Yohaannisi isoo xixee wodda,²⁰Heroodis tennee wele duuchcha'n lebeexxi Yohaannisii'i usurriinke mine'n usursiise.

Yessuussixxxa Xammaqensha

²¹Ardi duuchchi xammaqemeechchi uduma Yessuusinna cuupheme. Soodata'nenge'n iima bannendee'naa:²²Woyyichchi Hafuuri guugenjotixxe fakkenni isi hana dirre; Iimi'ninna «Eeyyaanneki anki belt ateten; ate'n Ani gammadeenne» hiyaak hafuuri laqeme.

Yesuusixxe Ilenshaka Daalo

²³Yessuusi barsiisa safaa wodda isixxi wogga sase tommeba'atemma. Ardakee Yessuusi Yooseefike belto labe'emman.Yooseefinna Eelike²⁴Eeli Maatike, Maatii Leewwike, Leewwii Milkike, Milkii Yoonake, Yoonaa Yooseefike,²⁵Yooseefii Maataatiyuke, Maataatiyuu Amootsike, Amootsii Nahoomike, Nahoomii Esiliimike,Esiliimi Naaggeke,²⁶
Naaggee Ma'aatike,Ma'aatii Maataatiyuke, Maataatiyuu Semeyike,Semeyii Yooseefike, Yooseefii Yoodake,²⁷Yoodaa Yoonaanike, Yoonaanii ReesikeReesii Zerubaabeelike Zerbubaabeelii Selatiyaalike, Selatiyaalii Neerike,²⁸
Neerii Milkike, Milkii Haadike, Haadii Qoosaamike, Qoosaamii Elmodaamike, Elmodaamii Eerike²⁹Eerii Yoosee'ike, Yoosee'ii Eli'ezaarike, Eli'ezaarii Yoraamike, Yoraamii Maaxaatike, Maaxaatii Leewwike,³⁰Lewwi Simi'oonike, Simi'ooni Yihudake, Yihuda Yooseefike, Yooseefi Yonaanike, Yonaani Eliyaqeemike,³¹Elyaqeemi Meliyake, Meliyaa Mayinaanike, Mayinaanii Maxaatike, Maxaatii Naataanike,Naataanii Daawwitike,³²
Daawwitii Isseyike, Isseyii Iyyobeedike,Iyyobeedii Bo'eezike, Bo'eezii Selmoonike,Selmoonii Na'asoonike,³³Na'asoonii Aminadaabike,Aminadaabii Raamike,Raamii Aariinike,Aariinii Hetseroonike, Hetseroonii Faaresike,Faaresii Yihudake.³⁴Yihuda Ya'iqoobike Ya'iqoobi Yisaaqike,Yisaaqi Abirihaamike,Abirihaami Taarake,Taaraa Naakoorike,³⁵Naakoorii Seeruugike,Seeruugii Raagaawuke.Raagaawu Faaleeqike,Faaleeqii Ebeerike, Ebeerii Sheelaahike,³⁶Sheelaahii Qayinike Qayinii Arfakisiidike,Arfakisiidii Semike, Semii Nohike, Nohii Laamehike;³⁷Laameehii Matusaalake,Matusaalaa Henookike Henook Yareedike Yareedii Melali'eelike,Melali'eelii Qayinaanike,³⁸
Qayinaani Henoosike,Henoosii Seetike, Seetii Addaamike,Addaami Mageniinke.

The Word for the World International

https://app.library.bible/content/2b894378475c6aea