Yoonaasikaa Raaga4

Yoonaasixxa Hifonna Mageniixa Mararte

1Tenne yaane'ni Yoonaasi yo'oshsha gammada gophemmaxxee'e hifate.2Yoonaasinna Duuchchi Woddike Goottibaa hiyye soodatee qici «Ee, Duuchchi Woddike Goottaa boga aninge'ni hedhenna wodda iitta assitatton hiyyeennan; tennexxeetemmani aninna ati edii'ni Terseesi'a baqateennaki; ati arjakenna gattowaalitike, ossameessanna marartetike, muddabaaxxe jaalalanni wo'miteetteke, elobaaxxa iyyedaggotaa hite hilde waldatoke Mageno kaddeettexxa ege'neennan.3Ta'anna anke Duuchchi Woddike Gootta! Tenne hedho mannii'ni ani'a reyo woyyan; maganneten anee shiyi» hiyye soodate.
4Yaane kinni Duuchchi Woddik Gootti Yoonaasii'i «Hittan seeri belo mufattato?» hiyye.
5Yoonaasinna qachchi giddi'ni fuleexxi qachchinbaa'ni boroti ga'ma'ni fooqa fooqilseexxi fooqiinke gaaddisi hunda ofo'le; Nenewweke qachcha'ni geltaaxxa yaane uudo'a ookko hedhe heqqaamman.6Duuchchi Woddik Gootti Mageni Yoonaasi arishshotika holata qiidiffato'a buqqe latise; iseenna nosse Yoonaasii gaaddisaashsha asse; Yoonaasinna buqqe gaaddiseexxe yo'oshsha gammade.7Yaane kinni Mageni langa baro gorsa corroqa qixxeesse; isenna eettene buqqe itte; buqqetinna bagge.8Mageni arishsho fulde wodda gubbaaxxa boroti darree'ni diidallo erge; arishshotiki holati yo'oshsha gubemmaxxee'e Yoonaasi shaqqe gaggabe; tennexxee reyo halcheexxi «Tenne hedho mannii'ni reyo woyyan» hiyye.
9Mageni Yoonaasii «Hitta seeri belo tenne buqqexxe yaane'a mufattato?» hiyye, Yoonaasinna «Mayee mufata gophanno; mufe giddii'ninna lubbo fuldaa qico'n mufatannoni!» hiyye.
10Yaane kinn Duuchchi Woddik Gootti Yoonnasi'i hiyyee qic, «Ati mittechchonna elootte nossitebexxoxxeenna mitte barra'n latte mittte barra'n baggeexxe buqqe'a yaaddeteni!11Ani kinni dhibbanna diddama kumii iimi darre hedheeke middanna bita'a ege'nebaake Neneweke qachchi giddike ardi'anna heddo hori'a hitta yaada gophphano?» hiyye.

The Word for the World International

https://app.library.bible/content/2b894378475c6aea