2 KOLINTO6
1Ni hahoho, bu tuna sala kintwadi na Nzambi, tuna lusyamisa mu lembolo nyafuna mulemvo wu lutambula ku Nzambi ko.2Mu dyambu ti Nzambi wuta ebu:«Mu ntangu yifwanakani, meno nakuyuwila,mpe kilumbu ki mpulusu, meno nakusadisa.» Kadi bwabu yiyiyi nkatika ni ntangu yifwanakani. Kikiki ni kilumbu ki mpulusu!
Bisadi bi Nzambi
3Yeto tukwe tesisanga muntu sakuba ko, mwanki balembolo vweza kisalu kyeto.4Kansi, mu misamu mimvimba, tuna sosa mu nzila zimvimba mu kilonka bonso bisadi bi Nzambi: tukwe tatamananga mu vibidila mpasi, mu mulembolo ba na kima na mu nkwamusu.5Batuzuba bikoti na batutuula mu boloko, mukangu wutunangumukina, tusala bisalu bingolo, tumina nsoki na tubwa tolo ko.6Tuna kilonka bisadi bi Nzambi mu mvedosolo, mu nzayilu yi Nzambi, mu mvibudulu, mu bumbote, mu Mpeve Yilongo na mu luzolo lukedika,7mu Mambu ma kikedika, mu lulendo lu Nzambi, mu binwanunu byeto bye nwanina na bye kikakidila ni mu sa lunungu ha ntadisi yi Nzambi,8ni kuba mu kati di nkembo hoti mu mvwezolo, mu mwangusunu yi nsangu zimbi hoti zimbote. Bana tubongila bonso bantu baluvunu, mpeleko tuna ta makedika,9bonso bantu balembolo zabakana, mpeleko batoma zabakana tudi, bonso bantu bafwa, mpeleko nkatika bamoyo tudi. Bana tuyenina bonso bantu ba bana semba, mpeleko bana tuhonda ko,10bana tuyenina bonso bantu baa mu kyadi, mpeleko ntangu zimvimba tudi bakiyangidika, bonso bantu bamputu, mpeleko babingi tuna vwamisa, bonso bantu balembolo ba na kima, mpeleko bimvimba bii neeto.11Yeno bisi-Kolinto, tuluzonzidi wulembolo sweka musamu, mpe tutomini luzibudila mitima myeto.12Yeto tulukangidi mitima ko, kansi yeno lutukangidi mitima.13Bwabu nina luzonzila bonso baala bani: yeno mpe, tomeeno tuzibudila mitima myeno!14Lubandi kintwadi na bantu bakwe lembolo kwikilanga mu Nzambi ko. Mu dyambu ti, nkye nyuwasani yidi ha kati di lunungu na mambi e? Hoti nkye kintwadi kidi ha kati di kya na kitombe e?15Nganunu Klisto lendi yuwasana na Satana e? Nkye kintwadi kilendi ba ha kati di munkwikidi na muntu wukwe lembolo kwikilanga mu Nzambi e?16Nkye nyuwasani yilendi ba ha kati di nzo-Nzambi na nsambudulu yi biteki e? Mu dyambu ti, yeto tudi nzo yi Nzambi yimoyo, bonso Yandi bende Nzambi bu kata ti:«Naazinga ha kati dyawu, mpe naadyata nawu,naaba Nzambi awu na yawu baaba mukangu ani.»17Ni hahoho,«duukeeno ha kati dyawu, mpe batatukileeno, Mfumu teedi bobo.Lusimbandi kima kilembolo ba kivedila ko,mpe meno naalutambula.18Naaba Tata ku yenona yeno lwaaba baala babakento na babakala ku meno,Mfumu yilulendo lumvimba teedi bobo.»Wycliffe Bible Translators, Inc.