อ่านหนังสือ Lum 10

Lum10

¹Bwa bə nih bəŋ, gia yə mih nəŋki bəh shɔm yiŋ yichi, bəh ntsa wuŋ i Nyɔ, kɔ a bəni mbəŋ bə Islae bələ bi kwati mbɔiŋ.²Gia yə mih kiəki, a num yə mih kɔ i dzaka kɔ a, bɔ kaŋaki lə kiŋkɔŋ na bəh ŋga i Nyɔ. Ayakalə, bɔ kiəki kə dzəh yi chəŋ yə bɔ kɔ i biəliki wi yɛiŋ.³Si bɔ kiəki kə dzəh yə Nyɔ dzɔki a mi si num chəŋ i wi nshiŋ yɛiŋ, bɔ kabə nəŋ lɔ i jiə num dzəh yibɔ, ayaka na chu nya gwu yibɔ i biəliki dzəh yə Nyɔ dzɔki a mi kɔ chəŋ yɛiŋ i wi nshiŋ.⁴Si Klistus nì dzə, dzəh yi bənchi yə bəni nì biəliki i numki chəŋ i Nyɔ nshiŋ ka kaa, ka i numki chəŋ i Nyɔ nshiŋ i liə ni numki i jîə shɔm i Klistus wə.

Mbɔiŋ dzə lɔ i mi wichi

⁵Muses nì nyaka kɔm dzəh i numki chəŋ i Nyɔ nshiŋ yə yi biəliki num bənchi a, “Mi wə wi fəki si bənchi dzakaki ni nɔki lə kɔm wi jiəki bənchi bəwɔ bəchi.”⁶Ayakalə, kɔm dzəh yə yi kɔ a mi kɔ chəŋ i Nyɔ nshiŋ biəliki num shɔm yə wi jiə i wi wə, yi num bə nyaka a,“Kiə wɔ ma bikəki i shɔm ya wə a, ‘A ni yaka ndə i bɛiŋ na?’”(Yi num a, a ni yaka ndə i tsə dzəh bəh Klistus a).⁷Nabə a, “A ni shi ndə i kii a?”(Yi num a, i tsə dzasi Klistus i kpi wə).

⁸Ayakalə, yi dzakaki a nə? Yi dzakaki a,“Gia yi Nyɔ kɔ kɔmsi i wɔ wə.Yi kɔ i dzaka ka wə, bəh i shɔm ya wə.”Ayaka a num yi, buku fukuki kɔm njiə wi shɔm i Jisɔs wə.⁹Wɔ ka dzaka bəh dzaka ka a Jisɔs kɔ Bah, ayaka, ka bum i shɔm ya wə a Nyɔ nì dzasi wi i kpi wə, ma wɔ bi bɔiŋ.¹⁰Yi kɔ a, mi bumki num bəh shɔm yi na ka Nyɔ dzɔ wi a wi kaŋaki kə kiŋgbɔ kidɔkɔ. Ayaka mi dzâkaki bəh dzaka ki ka bi bɔiŋ.¹¹Kiŋwakti ki Nyɔ dzakaki a,“Mi wə wi kɔ wi bum i wi bi num kə i kiŋgəmni wə.”

¹²Mbɛiŋ kiəki a chi chi kɔkə i kintəəŋ ki mi wi Ju bəh mi wə wi kɔkə mi wi Ju. Bah wə wi kɔ Bah wi mi wichi akɔ a wimu. Ayaka wi si shi wɛli kaŋ yi nya mbum i mi wichi wə wi dəki i wi.¹³Yi kɔ num bə nyaka i Kiŋwakti ki Nyɔ wə a,“Mi wichi wə wi bi bɔɔŋki yɛli wi Bah,wi bi bɔiŋki lə.”

¹⁴Ayakalə, bəni kɔ i nyani dəiŋ na ka bɔ dəki bɔɔŋ wi maka bɔ jiə shɔ́m i wi a? Ayaka bɔ kɔ nyani dəiŋ i jiə shɔm i wi maka bɔ num wɔkɔ kɔm wi a? Bɔ kɔ nyani na dəiŋ i wɔkɔ maka mi num fuku kɔm wi i bɔ a.¹⁵Ayaka bəni kɔ i nyani dəiŋ i tsə fukuki maka bə faaŋ bɔ a? Yi kɔ num bə nì nyaka a,“Gvú yi bəni bə̀ bɔ si dzə bəh ntum wi ndzɔŋni,si ndzɔŋ nalə.”

¹⁶Ayakalə, bəni bə Islae bəchi kɛiŋki maka bɔ bum ntum wi ndzɔŋni wələ. Yi kɔ a liŋ asi kiŋwakti ki mi wi ntum wi Nyɔ wə Isaya dzakaki a,“Bah, a bum ndə gia yə buku fukuki a?”

¹⁷Yi bə́ num a, njiə wi shɔm i Klistus dzəki num i gia yə mi wɔkɔ. Ayaka gia yə mi wɔkɔ dzəki num i mfuku wə kɔm Klistus.¹⁸Mih ka bikə a, yaka bɔ nì ka wɔkɔ a? Ŋkɔŋ bɔ nì wɔkɔ. Kiŋwakti ki Nyɔ dzakaki a,“Já yibɔ tsə i nshwaiŋ yichi,ayaka ndzaka wibɔ tsə i biŋgɔksi bi mbi wə bichi.”

¹⁹Mih chu bikəki a, yaka kɔ a jɔbi wə bəni bə Islae nì wɔkɔ, na wɔkɔ ndzɔŋ a? Muses nì kɔ wi yisi dzaka a Nyɔ dzakaki a,“Mih ni fə̂ lə kindɔŋ chiniki mbɛiŋ bəh kitumiki bəni bə kilɔlɔ,fə shɔ́m bɔkɔki mbɛiŋ bəh kitumi kə bɔ kɔ bəni bə kiyuŋ.”

²⁰Isaya chu dzaka lwa kə a Nyɔ dzakaki a,“Bəni bə̀ bɔ nì nəŋki kə mih kɔ bə̀ bɔ yɛiŋ mih.Ayaka mih chusi gwu yiŋ i bəni bə̀ bɔ ni bikəki kə mih.”

²¹Ayakalə, yə kɔm bəni bə Islae Nyɔ nì dzaka a,“I kaŋ yichi wə kɔ mih jiə kaŋ yiŋ wɔkɔli a bəni dzə mih dzɔ̂ bɔ,ayaka bɔ ləkə tsə a bəh kifwu i ninshiŋ, tsə i yibɔ dzə́h wə.”