YESƆ JASHONƐ I Vishonɛ3
Bituru Gati Shɔ Vigakinɛ Dɔgbutu
1Si lewɔɔ Bituru a Yɔhanani i yɛ wɛrɛ Ɗa gakinɛ si gɨnɗadɔɔ ntatɛ taati a niti, a ɗagbete shɔ gaki Ɗa yɛ.2A nyebawɛrɛ Ɗa gbete si shɔ ɓaanɛ nyabawɛrɛ Kɔrinɛ Yiriri, jawɔɔ siɗɔn sãnɛ au ɗaa yeenɛ siu dɔgbutu. Ko-pi leepiya shɔ tuliurɛ shɔ pɔ̃u a nyebawɛrɛ Ɗa nɛu gaki saa a shɔ gbete i to wɛrɛ Ɗau i naa.3Naa jaau zɛ Bituru tɛ a Yɔhanani i ɗɔ tonɛ, a gaki rɛ nɛi ãng viwɔɔ.4I tanɔɔ au bi, a Bituru shanɛ, <<Zɛu pɛ!>>5Kɛɗɔn a kɨnnɔɔ rɛ ai bi, pɔ̃ sisɨn nɛmɛnɛn kpaa viwɔɔ ai naani.6Ama Bituru geliu nɛ,<<N saa ɓɛɛ ɓa a naani ɓa, ama n yɛn ã ɓɛɛjo vigbete n a wuniyɛ: a Yesɔ Kirisi shɔ Nazara nii n gelaatɛ yulapanɛ a rarɛ!>>7Kɛɗɔn Bituru sãu a nakɨn a yusiu laparɛ. Tɛ̃ɛ̃ti jaau dɔɔ a nɔdɔni lakirɛ;8jau kɔbilapa nɛ̃ɛ̃ti a shi a dɔɔ, a gaa rakinɛrɛ ɗɔuni. Kɛɗɔn a to wɛrɛ Ɗa a yini, u ɗɔranɛ a bikɔlinɛ lapa-lapa a Ɗa bɛlinɛni.9Shɔ gbeteyi si ɗɔuni i zɛurɛ a ɗɔranɛ a Ɗa bɛlinɛni,10naa i kpaa sisɨntɛ nɛ shɔmpɛ shɔvi gakinɛ gbete si ɔ̃li a nyeba wɛrɛ Ɗa yiririukɔ, i kpai bizaatɔ ayuu vigbete pɛli jaauyɛni.Bituru Nyanwanɛ a Wɛrɛ Ɗa
11Aɗagbete jaau sã Bituru naa a Yɔhanani a Solomoni jaanyabawɛrɛ, ji nɔgbete shɔ ɓaayɛ, shɔwi bizaatɔ i yurɛ i yɛyi ɗɔbiirɛ.12Naa Bituru zɛ shɔwitɛ, a geliyi nɛ,<<N shɔbii Israilayi, bizaawɔɔ piruvi a yuu vinniviya? aru ivi ɔ ɗɔ gbete ɔ kɨnnɔɔ au bi viya? Ɔ tɔnɛ mɛnɛ u pɛli vim au kaka ya ko tɔnɛ mɛnɛ au sisɨn pɔ̃nɛ atette Ɗa gɨnnɛ ukɔ pɔ̃rɛ jaam rakɨnya?13Ibirayi Ɗalapa, Ishayaku Ɗalapa, a Yakub Ɗalapa, u ɓeuruyi Ɗalapa, Ɗalapa ukɔ ã Yesɔ u jawɛrɛ basinɛrɛ. Ama ɔ tuurɛ ɔ ãu Yupɛ̃ni Yahudawayi a naa nɛi nyoutɔ, ɔ bɛ̃unɔni a Bilatu ɗekɨn, piti nɔgbete Bilatu kasinɛn yaau naa wese nɛu yɛrɛni.14U si wɔsɔ-wɔsɔ wɔsɔ̃n tɔ̃vɨn, ama ɔ bɛ̃unɔni, awɔ gaki Bilatu nɛu yasɔɔ shɔyuvɔnyɔnɛ naa.15Ɔ nyo shɔ gbete n ti surutɛ, ama Ɗalapa yusiutɛ a suruni, ukɔu ɔ̃rɛ shɔshinɛ knti a vimni.16Ji sisɨn-ãnɛ gbete shɛ a Yesɔ niikɔ ukɔ ã shɔ dɔgbutum kakarɛ. Vigbete ɔ zɛyɛ dɔdɔrim pɛlivishonɛ ji a sisɨn ãnɛ au niikɔ; ji sisɨn-ãnɛ gbete shɛ Yesɔ niikɔ, ukɔ pɔ̃ jaamrɛ gatirɛ, nɔ gbete ɔ kpai ɔ zɛɓang kɔ.17<<N shɔbiiyi dɔdɔrim, n zɛ tɛttɔ vigbete ɔ pɛliyɛ awɔ yupɛ̃niyi ni a Yesɔ yuu ɓa ɔ zɛnɛni ɓa.18Ɗalapa shavim tɛttɔ kpai tɛ̃ɛ̃tɛ̃ɛ au janyagadiyi nya nɛ Shɔshɔranɛ yɛ ɓoraatɔ; a pɛlirɛ nɛu ɔ̃ a nyabankɔ nizɛ.19Ɔ kɔsi sisɨn ɔ yaa ruvini pɛlinɛtɔ, ɔ rinɔɔ a Ɗalapa ɗɔbii, nɔgbete yɛ yasɔɔ ruuvini kɨn. Ɔkɛ pɛlinɛyɛ,20yɛ dɔ̃sɔɔ Yesɔ sɔ̃ntɔ ukɔ ɔ̃rɛ Shɔshɔranɛ shɔ gbete lɔrɔɔ tɛttɔ tɛ̃ɛtɛ̃ɛ.21Ɔ̃tɛ kaka jazɨng akɔrɔ Yesɔ yɛ ɔ̃ a kolapa anɛ ɗagbete shɔ sɔɔri vitɛ sɔɔ kpai, nagbete Ɗalapa sha au janyagadiyi wɔsɔ-wɔsɔ nya tɛ̃ɛtɛ̃ɛ.22Musa shanɛ, Uɓeyelapa ɔ Ɗalapa yɛ shoshɔɔ janyagaditɔ, yɛ lɔjo awɔ tetekɔ, ji nagbete shɔmɓakɔ. Ɔ gɨn vigbete yɛ gelɔɔtɔ kpai.23Shɔ gbeteu ji gɨn janyagadi wa vigbete shayɛ ɓa, shɔyɛ shɛshutɔ atette Ɗa jaayini shɔu lɛsiurɛ.24A janyagadiyi kpai gbeteyi sha Ɗa nyaruubiiyɛ yunɛ Samayila bi a shɔ gbeteyi au kɨntiyɛni, ikɔma i sha ji vigbete a ɗɔyɛnɛ leezɨnkɔ.25Ruu gbete Ɗalapa ma au janyagadiyi nya pɛ ɔ ɓɛɛkɔ, ɔkɔɔ yɛ shaa naa vigbete Ɗalapa ma a mɛuruyini jo. Nɔgbete geli Ibirayi nɛ, Ji aa ladurukɔ n yɛn tasi shɔ kootipiyi vɔɔ susãri a bi kpai.26Aɗagbete Ɗalapa lɔu jawɛrɛ Yesɔ yɛ, a shoupɛ ji awɔ ɗɔbii ɗekɨn, aru u tasɔɔ vɔɔ susãri a bi kpai u pɔ̃ kopiya u yaa vikɔ̃linɛ pɛlinɛtɔ.>>The Word for the World International