1 Bitrus5
1Ani uknaayu han suurkinaabu, tukaniisaati suurkina ibtikeekna eefeen waliikani. Ani Umasiihiit tilhanayti badehiiwwa, aree gayii lawiiniib umatuuniib han adhidh abariinaayt waliikani:2Ukwaasanaay ooreew ibitkeekna eefeen shaakwna, igwꞌaadiigaayeet shagaamaana, ibakii tidꞌaneena kitti, laakiin baraakna beet toonaati dꞌuuy tehariwnayt, Ukwaasana hookna yharriiweet toonaatiit dꞌiina. Mhallagaayi jillaay baahaamaana, laakiin tikhidmaati harawaay jillaay tidꞌaneet toonaati.3Ukwaasana bareekna ammaniyaneeb oodehayi kehii baahadꞌaamaana. Laakiin bareeyooh misaal akeena.4Malya Umasiih Ushakwa Uuwin lawiiniyihoob, umatuuni taaj door han oogbil baanaaw imaar tiyadna.5Baraakna yꞌarareewa, oontꞌaaneet isuurkinaayeekna tisnaakiirneet toonaati. Kassaakna, igarooyeekna taktakee dehaay baatatageegsaana, Uuktaab indi,“Ukwaasana oodehay ookibir ibariin imooriiblaakiin tatageegtiib baabariin nꞌimaat iniiw.” indi.6Ukwaasana wꞌalyaanaay akriri suurii igarooyeekna dhoomsaana, aflaay uudoor yꞌiiniyihoob, baruuh asti tageegsi hookna indi.7Ukwaasana imshabiib hookna akay, aflaay tehasikneena kastooh bariiyooh dehaay ishna.8Digwagwna, daayiib gwꞌadna! Uubliis wꞌashooyuukna whadha wꞌaadhana tꞌiiteebu, baruuh kwantꞌeet shooki harriiw.9Wꞌankwanaay yꞌaamanana kastooh tuduniyaatiib eefeen teen tilhanay teekna lhami iyadneet toona tikteennayt, wꞌiimaaniyookna akirnaat barooh amꞌakaarna.10Aree shalikt midda lhamteeni harꞌii, kasteeh tinꞌimaati Ukwaasana, bareekna Umasiihiib umatuun udaayim beeti waliikiyaab, baruuh uukna timmiisi hookna indi aree isꞌikir hookna indi, atamwa akraabwa iikwasi hookna indi.11Yꞌakrir diimaab bariiyeeh baꞌiiktiin! Aamiin.12Siilaas oon ujawaab unakashnaay kituubiib ishamheeb, ani aree barooh sidki Wꞌankwanaay aamananaayt ashanbiib. Ani bareekna haay asꞌakiiri jillaay dehookna akantiib aree taan bataah Ukwaasanaayt tinꞌima tisidkiit ikatiineet toona badehiib akati. Teen tinꞌimaateeb akirnaa gadna.13Wꞌankwanaay yꞌaamanana Baabilyooneeb eefeen, bareeyookna geeb waasamaab, tishboonay salaameen hookna, aree Maarkoos wꞌooru han salaamiini hookna.14Taktak daayiit salaam salaamaana. Kasseekna Umasiihiib eefeen umꞌasig baꞌiyaaw hookna.
The Seed Company