Ibru3

1Mani oni, ayene hin ipu ko Okristi ni Owuso ki yala ogwu ni! Ala rela ko Oyesu, anu ni Owuso toleho wo Osapa Nyakwu kotuse ni aha ba tono ni.2Ogbo kwokwoshi do Owuso ni sho ko yoko mani, byoni Omusa gbo kwokwoshi ipu koko nu ole ko Owuso ni.3Ase ni mole ni ya pyabo okpa sho ole abiyinu. Mamani Oyesu pya abokpa sho Omusa.4Ole kpiri asuse pini ma la, kweyi Owuso ke yo ojoji kpiri.5Omusa wase neshi kpo oko nu ko oyole ole ko Owuso, kweyi oyo okela ikweyi koza ni aba ka ohobu ni.6Okristi ke gbo okwokwoshi ikweyi koni anu wo Oyi ni woteyi ipu kole ko Owuso ni. Kweyi aha wole nu, owoni aha hagye loshu kweyi yi iyitagye ikweyi koza ni ayo otuso ni.
7Byoni Omaku ko Owuso ka mo,<<Ikyeni, owoni ala pwela ko Owuso,8ala ka zakpaha byoni awokyikyi kala ya ishini ataso Owuso eyibyoni awe eno oni na moma ipu ko ododa ni.9Owuso kamo, awosoku kala munma ebe ni ko moza ni nyya ya ni,koni amoza ni nyya kishayi awene ni.10Oza ni ya ni nkyanya kpase koyi oni, kweyi nkamo,<Ishi kpiri aba geyagye lokweyi atela ko kono hin.>11Ebeni nkyanya kweyi shokoyi mo:<Aba gipu ko ominyo hin lo!>>>
12Ayene hin, ala gbera, ashishe ipu kala naka gbotu bibi ni tela ko kyogwu ni ko yo na pyitikpi to Owuso ni yiyi ni lo.13Ala ke tiyikala otugbagba kurutu, shini ozalabi kpo ozakpaha naka gya ashishe kala egya lo, byoni <<Ikyeni>> ipu ko okpa ko Owuso ya ka kpaha ni.14Aha wawoya koko ko Okristi owoni aha yabo byo otuse ka loshu gokweyi byoni abyi bwikyikyo ni.15Ozani okpa ko Owuso ka ni yoma:<<Owoni ala pwoko ko Owuso ikyeni,ala ka zakpaha byoni awokyikyi kala ya ni loishini ataso Owuso eyi ni.>>
16Awanoho pwoko ko Owuso, kweyi taseyi? Awase ni Omusa ngmawa sho okpagye ki Ijip ni la.17Awanoho ni Owuso kyanya kpawa ki ishayi awene? Awase ni yo ozalabi ni lalo? Agbo gekwu ipu ko ododa.18Ishini Owuso shokoyi mo, aba gipu ko ominyo nu lo. Awanoho ni oya kela kpawa? Awase ni taseyi ni lalo?19Aha ma, agege ko gipu ko okpagye ni lo, ikweyi koni atela ko kyogwu ni.

The Word for the World International

https://app.library.bible/content/5762b83c586abca6