Omaki15
O Ka Laa Ɔzhizɔsi Midu Iyi Opayileti
1Mu kwoto biri ebwoshi umbakɔ mbala enzu umbakɔ mbala wazɔ kiya ingyi ɛrama iyi Omosisi mbala enzu umbakɔ umba udaba lɛɛbi o kpala ɛlu. O ma Ɔzhizɔsi ma akwɛyi o towu o ka mbaa Opayileti.2Opayileti e yo wu te, <<Uŋɔ gba ŋɔ kwu ɔsu uwu Azhu lee?>> Akwɛyi Ɔzhizɔsi a gba wu opwu te, <<Ee, kyamate bɔkɔ ŋɔ so awu tegba i yi le.>>3Eboshi umbakɔ o mulo wu meka iyi apula ikikɔ ikikɔ.4Kwuwo kwɔlɛ Opayileti e yo wu kwuyo kpɔ te, <<Uŋɔ ŋɔ gba mi opwu mo re? Yese apula riba iyi bɔkɔ o mu o lo ŋɔ.>>5Ɔzhizɔsi ba a gba wu opwu mo, ɛlɛ i shi Opayileti kenzu iyama.6kwuyengwu odumudumu uwu ikalama, o koko o wa la onzu ukpɛnyi uwu bɔkɔ enzu o nda ma mu ugu ugyi.7Onzu uwufo o ya wu te Obarabasi e yi mu ugu ugyi mbala enzu umbafo umba bɔkɔ o ngbɛ onzu kwuyengwu ovyo e yi mo.8Riba ingyi enzu o bo mbaa Opayileti akwɛyi o za wu te le wo mbo kiya ingyi bɔkɔ e koko e wo mbo awu.9Opayileti e yo mbo te, <<Lu gyi te kaa la mi lafya la ɔsu uwu umba Azhu?>>10Moo e yitu te anya wu gba ebwoshi umbakɔ o wo le.11Eboshi umbakɔ o lo riba ingyi enzu mbamba mu ubu te lo so Opayileti te la lafya la Obarabasi.12Akwɛyi Opayileti e yo kwuyo te, <<Mi wo te fo mbala onzu ele uwu bɔkɔ lu ya wu te ɔsu uwu umba Azhu?>>13O wo ovyo o zɔ te, <<Lo kpa wu mu kuwɛyi!>>14Opayileti e yo mbo te, <<Kwuwo ungwu kwuwongumbe? Ingbomo iyina bɔkɔ e wo?>>Umba ba o wo ovyo mu opwu uwɔkwu te, <<Lo kpa wu mu kwuwɛyi!>>15Kwuwongwu bɔkɔ Opayileti a gyi te le wo iyi bɔkɔ i she la enzu awu, akwɛyi a wa la Obarabasi e shi mbo. A fya Ɔzhizɔsi izele akwɛyi e shi wu mbo kaa lo kpa wu mu kuwɛyi.
Asozha O Wo Ɔzhizɔsi Ɛnɛ
16Asozha o to Ɔzhizɔsi o ka wu mu kizɛ ingyi bɔkɔ o ya ngyi te Ɔpuratɛriyɔ akwɛyi o ya uzhi uwu asozha ma lɛɛbi.17O kpo Ɔzhizɔsi ɛkiri mɛnwu akwɛyi o ndo kese unga awula o bɔ wu mu reshi.18Akwɛyi o to wu ɛnyi o zɔ te, <<Baagayidu, Ɔsu uwu umba Azhu!>>19O fya wu kwonga mu reshi, o kpo wu ɔtɛ akwɛyi o bɔ epunu mɛzhi o lemo.20Akwɛyi kwuyengwu bɔkɔ o mbwa wu ɛnɛ iwomo, o lu wu ɛkiri awu ma mɛnwu akwɛyi o kpo wu ekpayi wu mɛnwu. Akwɛyi o to wu o ka te lo kpa wu mu kuwɛyi.O Bɔ Ɔzhizɔsi Iba
21Onzu uwufo a wɔ mu Osarini, o ya wu te Ɔsamɔ, ete uwu Alɛkizanda mbala Orufu, e yi mu ikakama e sheyi mu kwuse, akwɛyi o wo wu mɛga kaa le shi kuwɛyi ungwu lukwu.22O bo la Ɔzhizɔsi mu Ɔgɔlugɔta (iluma yi i yi te, Kizɛ ingyi akɔgɔ iyi reshi).23Akwɛyi o shi wu embyi umba iwuma umba bɔkɔ o yoro mbo mo mbala omari, uwu ba e towu iwomo.24Akwɛyi o kpa wu mu kwuwɛyi ungwu lukwu. Akwɛyi o ka ɛriga wu ma, akwɛyi o nyɛpwu kaa lo ma kiya ingyi uwewe a fya.25Akwu mu ɔnɔnda gba o kpa wu mu kuwɛyi le.26Akwɛyi o ka ɛzu o kpa mu kadu unga kwuwɛyi kwɔngu te: ƆSU UWU UMBA AZHU.27O kpa awɛlɔ wepo mbala wu tete, ukpɛnyi e yi mu kuwo ungwungyi wu, uwufo ba e yi mu kuwo ungwu ɔzu wu.28O kpa wu mu kwuwɛyi mbala awɛlɔ wepo, uwufo e yi mu kwuwo ungwungyi wu akwɛyi uwufo ba e yi mu kwuwo ungwɔzu.29Enzu umba bɔkɔ o yi mu ikakama o kpa wu ari, o mi reshi, o zɔ te, <<Uŋɔ uwu bɔkɔ ŋɔ shiri ɔtɛpu ma akwɛyi ŋɔ gba wa la imbomo ɔnu uwu kwɔfyi ungwola le,30kalama mu kuwɛyi kwɔlɛ kaa sa ɛŋɔ ŋɔ ma ŋa nɛ!>>31Tatayi gba ebwoshi umbakɔ mbala enzu umbakɔ o wo Ɔzhizɔsi ɛnɛ le tete. O zɔ te, <<A sa enzu umbafo ma ba e do ɛnwu wu isama mo!32Okrasi ele, Ɔsu uwu Izirɛ ele, la kalama mu kuwɛyi ungwu lukwu kwɔlɛ ka la ki ma, akwɛyi ki fulo idu ma wu.>> Enzu umba bɔkɔ o kpa mba mu kuwɛyi mbala wu awu, o kpa wu ari tete.Lukwu Undu Ɔzhizɔsi
33Kwuye ungwu ɔnɔnda ipu i kpo mɛzhi munamuna nzhii so mu kwuyengwu ekerepe ela.34Akwɛyi kwuye ugu ekerepe ela Ɔzhizɔsi e lo oga mu opwu uwɔkuu te, <<Ɛlɔyi, Ɛlɔyi, lama sabatani?>> iyi bɔkɔ o lu yi te, <<Ukpo mi, Ukpo mi, I wo te ŋɔ lu mi afyima te?>>35Kuye ungwu bɔkɔ enzu umba bɔkɔ o ri kɛlɛ mɔmɔ awu o pwa ɛlɛ, o zɔ te, <<La lu yese e yi mu Elazha iyama.>>36Onzu ɛnyi meka mba a renya a ka e ke to amegbere, a nyɔlɔ ngwu ma mbala embyi umba bɔkɔ o wuma, a bɔ ngwu mu kuwɛyi akwɛyi e shi Ɔzhizɔsi kaa le wo. Enzu o za wu te <<Shiwobi, la ki mate Elazha a nyɔ a ba sa wu ma.>>37Ɔzhizɔsi a ta oga kpaa, akwɛyi e fu ɛnyɔ imbwambwaa.38Akwɛyi okpayi uwu kenzugu unga ɔtɛpu a tara ma yaa i wɔ moshi nzhii ba e bo mɛzhi.39Kuye ungwu u to keyi uwu asozha uwu bɔkɔ e ri midu iyi Ɔzhizɔsi awu, a pwa oga mbala ewo iyi bɔkɔ e kpomo awu, a zɔ te, <<Onzu ele e ku Umɛ uwu Ukpo kego!>>40Ekokpayi umbafo o yi mu iyesemo sharu. Eko mbamba aku, Omeri Omagadali, Omeri anyi uwu Ozhemisi uwɛri mbala Ozhosesi, mbala Osalomi.41Eko mbɔlɛ o mbwalu wu mu Ogalili akwɛyi o sa Ɔzhizɔsi igɔ ma. Eko gyɔɔ umba bɔkɔ o mbwalu wu o ka mu Ɔzhɛrusalɛ le o yɔmɔ tete.Ipwumo Iyi Ɔzhizɔsi
42Mu onoyo kwuyengwu bɔkɔ o yi mu ɛnwuyimo iyi kwɔfyi ungwu ɛnwu igbomo,43Ɔzhɔsɛfu uwu Arimatiya, onzu ukpɛnyi meka iyi wa to keyi, uwu bɔkɔ e rigbo la irɛsu iyoshi a ka mbaa Opayileti, a ka nda ukpɛzhi uwu Ɔzhizɔsi.44Ɛlɛ i shi Opayileti kenzu iyama ta bɔkɔ a pwa te e kpomo-o le. A lɔ la U to keyi uwu asozha kaa le bo akwɛyi e yo kwuyo te, Ɔzhizɔsi e kpomo-o.45Kuye ungwu bɔkɔ Opayileti a pwa mɔgɔ uwu u to keyi uwu asozha awu te e kpomo-o, akwɛyi e shi Ɔzhɔsɛfu ukpɛzhi uwu Ɔzhizɔsi.46Akwɛyi Ɔzhɔsɛfu e bo la okpayi uwu ɔlinɛ, e to ukpɛzhi uwu Ɔzhizɔsi ma, akwɛyi a ta ukpɛzhi awu mu ogariwu uwu o vu mu kwokyi. Akwɛyi e mbiri kwokyi e fulo mu kenzu unga ogariwu awu.47Omeri Omagadali mbala Omeri anyi wu Ozhosesi o ma mɔgɔ uwu bɔkɔ o ta wu.The Word for the World International