อ่านหนังสือ يُوحَنَّا 21

يُوحَنَّا21

يَسُوعْ يُظْهُرْ لْسَبْعَة مِنْ تْلَامِذْتُو

¹وزَادْ يَسُوعْ ظْهُرْ مَرَّة أُخْرَى لِتْلَامِذْتُو عْلَى شَطْ بُحَيْرَةْ طَبَرِيَّة. وهَاوْ كِيفَاشْ ظْهُرِّلْهُمْ.²كَانْ سِمْعَانْ بُطْرُسْ، وتُومَا الِّي يْعَيْطُولُو التُّومِي، ونَثَنَائِيلْ الِّي مِنْ مَنْطَقْةْ قَانَا الجَلِيلْ، ووْلَادْ زَبَدِي، وزُوزْ تْلَامْذَة أُخْرِينْ مِنْ تْلَامِذْةْ يَسُوعْ مَلْمُومِينْ.³قَالِلْهُمْ سِمْعَانْ بُطْرُسْ: «آنَا مَاشِي نِصْطَادْ». قَالُولُو: «أَحْنَا زَادَا نِمْشِيوْ مْعَاكْ». خَرْجُوا وطَلْعُوا فِي الفْلُوكَة، آمَا اللِّيلَة هَاذِيكَا مَا صْطَادُوا شَيْ.

⁴وَقْتِلِّي طْلَعْ النْهَارْ كَانْ يَسُوعْ وَاقِفْ عَالشَّطْ، آمَا التْلَامْذَة مَا عَرْفُوهِشْ.⁵يَاخِي قَالِلْهُمْ: «يَا شَبَابْ، مَا صْطَدْتُوا شَيْ؟» جَاوْبُوهْ: «لَا».⁶قَالِلْهُمْ: «إِرْمِيوْ الشَّبْكَة عْلَى يْمِينْ الفْلُوكَة وتَوَّا تَلْقَاوْ الحُوتْ». رْمَاوْ الشَّبْكَة ومِنْ كُثْرِةْ مَا كَانِتْ مْعِبْيَة بِالحُوتْ، مَا نَجْمُوشْ يْخَرْجُوهَا.⁷قَالْ التِّلْمِيذْ الِّي يْحِبُّو يَسُوعْ لْبُطْرُسْ: «رَاهُو الرَّبْ يَسُوعْ!». كِي سْمَعْ سِمْعَانْ بُطْرُسْ كِلْمِةْ: «رَاهُو الرَّبْ يَسُوعْ»، لْبِسْ بَرْنُوسُو عْلَى خَاطْرُو كَانْ مْنَحِّيهْ، وتِرْمَى فِي المَاء.⁸والتْلَامْذَة الأُخْرِينْ وُصْلُوا لِلشَّطْ بِالفْلُوكَة، وهِيَّ تْكَرْكِرْ فِي الشَّبْكَة المْعِبْيَة بِالحُوتْ، عْلَى خَاطِرْهُمْ كَانُوا بْعَادْ عَالشَّطْ قْرَابِةْ المْيَاةْ مِيتْرُو أَكَهَوْ.⁹ووَقْتِلِّي خَرْجُوا لِلشَّطْ، شَافُوا حُوتْ يْطِيبْ عَالجْمَرْ، وخُبْزْ.¹⁰قَالِلْهُمْ يَسُوعْ: «جِيبُوا مِالحُوتْ الِّي شَدِّيتُوهْ تَوَّا».¹¹طْلَعْ سِمْعَانْ بُطْرُسْ فِي الفْلُوكَة، وكَرْكِرْ الشَّبْكَة المِلْيَانَة لِلشَّطْ. وكَانِتْ فِيهَا 153 حُوتَة كْبِيرَة. ورَغْمِلِّي كَانِتْ مْعِبْيَة، مَا تْقَطْعِتْشْ.¹²قَالِلْهُمْ يَسُوعْ: «إِيجَاوْ كُولُوا!» وحَتَّى وَاحِدْ مِالتْلَامْذَة مَا تْجَرَّأْ يِسْأْلُو «إِنْتِ شْكُونْ؟»، عْلَى خَاطِرْ عَرْفُوا الِّي هُوَّ الرَّبْ يَسُوعْ.¹³يَاخِي قْرُبِّلْهُمْ يَسُوعْ، وعْطَاهُمْ الخُبْزْ، وزَادْ مَدِّلْهُمْ الحُوتْ.¹⁴هَاذِي كَانِتْ المَرَّة الثَّالْثَة الِّي ظْهُرْ فِيهَا يَسُوعْ لِتْلَامِذْتُو بَعْدْمَا قَامْ مِالمُوتْ.

يَسُوعْ وبُطْرُسْ

¹⁵وبَعْدْمَا كْلَاوْ، قَالْ يَسُوعْ لْسِمْعَانْ بُطْرُسْ: «يَا سِمْعَانْ وِلْدْ يُونَا، يَاخِي تْحِبْنِي أَكْثِرْ مِلِّي يْحِبُّونِي هَاذُومَا الكُلْ؟». جَاوْبُو: «إِيْ نْعَمْ، يَا رَبْ. إِنْتِ تَعْرِفْ الِّي آنَا نْحِبِّكْ». قَالُّو: «أَرْعَى الغْنَمْ مْتَاعِي».¹⁶وقَالُّو يَسُوعْ مَرَّة أُخْرَى: «يَا سِمْعَانْ وِلْدْ يُونَا، يَاخِي تْحِبْنِي؟». جَاوْبُو: «إِيْ نْعَمْ، يَا رَبْ، إِنْتِ تَعْرِفْ الِّي آنَا نْحِبِّكْ». قَالُّو: «تِلْهَا بِالغْنَمْ مْتَاعِي».¹⁷وسِأْلُو مَرَّة ثَالْثَة: «يَا سِمْعَانْ يَا وِلْدْ يُونَا، يَاخِي تْحِبْنِي؟». حْزِنْ بُطْرُسْ عْلَى خَاطِرْ يَسُوعْ سِأْلُو مَرَّة ثَالْثَة: «يَاخِي تْحِبْنِي؟». قَالُّو: «يَا رَبْ، إِنْتِ تَعْرِفْ كُلْ شَيْ، وتَعْرِفْ الِّي آنَا نْحِبِّكْ». قَالُّو يَسُوعْ: «أَرْعَى الغْنَمْ مْتَاعِي.¹⁸الحَقْ الحَقْ نْقُلِّكْ: وَقْتِلِّي كُنْتْ صْغِيرْ، كُنْتْ تِلْبِسْ حْوَايْجِكْ وَحْدِكْ وتِمْشِي وِينْ تْحِبْ. آمَا وَقْتِلِّي تْوَلِّي شَايِبْ، تْمِدْ يْدِيكْ ووَاحِدْ آخَرْ يْلَبْسِكْ ويْهِزِّكْ وِينْ مَا تْحِبِّشْ تِمْشِي».¹⁹لَمَّحْ يَسُوعْ بِالكْلَامْ هَاذَا لِلطَّرِيقَة الِّي بِشْ يْمُوتْ بِيهَا بُطْرُسْ ولِّي بِشْ يِتْمَجِّدْ بِيهَا اللَّهْ. ومِنْ بَعْدْهَا قَالُّو: «تَبَّعْنِي!».

²⁰تْلَفِّتْ بُطْرُسْ، وشَافْ التِّلْمِيذْ الِّي يْحِبُّو يَسُوعْ يْتَبَّعْ فِيهُمْ، وهُوَّ الِّي إِتَّكَّى عْلَى صْدِرْ يَسُوعْ وَقْتْ العْشَاء وقَالُّو: «يَا سِيدِي، شْكُونُو الِّي بَاشْ يْخُونِكْ؟».²¹وَقْتِلِّي شَافُو بُطْرُسْ قَالْ لْيَسُوعْ: «وهَاذَا يَا رَبْ، آشْ بَاشْ يْصِيرْلُو؟».²²قَالُّو يَسُوعْ: «إِذَا كَانْ نْحِبُّو يُقْعُدْ حَيْ حَتَّى لِينْ نِرْجَعْ، هَاذَا مَا يْخُصِّكْشْ. إِنْتِ، تَبَّعْنِي!».²³يَاخِي طَلْعِتْ إِشَاعَة بِينْ المُؤْمْنِينْ الِّي التِّلْمِيذْ هَاذَاكَا مُشْ بِشْ يْمُوتْ. آمَا يَسُوعْ مَا قَالِشْ لْبُطْرُسْ الِّي هُوَّ مُشْ بِشْ يْمُوتْ. قَالُّو: «إِذَا كَانْ نْحِبُّو يُقْعُدْ حَيْ حَتَّى لِينْ نِرْجَعْ، هَاذَا مَا يْخُصِّكْشْ».²⁴والتِّلْمِيذْ هَاذَا هُوَّ الِّي يِشْهِدْ بِالأُمُورْ هَاذِي، وهُوَّ الِّي كْتِبْهَا. وأَحْنَا نَعْرْفُوا الِّي شْهَادْتُو صْحِيحَة.

²⁵وفَمَّة بَرْشَة حَاجَاتْ أُخْرِينْ عْمَلْهُمْ يَسُوعْ. كَانْ تِتْكْتِبْ بِالوَحْدَة بِالوَحْدَة، مَا نْظُنِّشْ الِّي العَالِمْ كَامِلْ بِشْ يَرْفَعْ الكْتُبْ الِّي بِشْ تِتْكْتِبْ عْلِيهَا.