Roma3
Yuda no peemi he se nami
1Ke kikɛ ɔ ji Mawu blɔ nya tomi ɔ, lɛɛ mɛni ji Yuda no se nami mɔ? Anɛ Mawu to se nami titli ko ha mɛ lo? Anɛ nyumu mi womi ngɛ Yuda bi a kusumi nya a he ngɛ se nami ko lo?2Ee, Yuda no he ngɛ se nami babauu. Kekle se nami ji, Mawu to e mlaa amɛ kɛ wo Yuda bi ɔmɛ a dɛ konɛ a le lɛ nɛ a pee e suɔmi nya ni.3E ji anɔkuale kaa a ti ni komɛ he we lɛ yi, se anɛ enɛ ɔ tsɔɔ kaa Mawu be e si womi ɔmɛ a nɔ yee, akɛnɛ mɛ hu a yi a si womi ɔmɛ a nɔ kɛ ha we lɛ ɔ lo?4Dabi! E be mi bae ja. Ejakaa adesa fɛɛ adesa ngɛ je ɔ mi ɔ, lakpatsɛ i, se Mawu lɛɛ anɔkualetsɛ ji lɛ, kaa bɔ nɛ a ngma ngɛ David La a mi ke, Mawu Munyu ɔ maa pee anɔkuale daa, nɛ nɔ fɛɛ nɔ nɛ ma hla a, e maa na ja.5Se ni komɛ de ke, “E hi kaa wa gbo Mawu tue, ejakaa wa yayami peemi ɔ hu he ngɛ se nami, ejakaa e ma ha nɛ nihi maa na bɔ nɛ Mawu hi ha, ke a na bɔ nɛ wa puɛ ha a. Anɛ e sa kaa e gblaa wa tue lo, ke wa he yayami ɔmɛ yeɔ kɛ buaa lɛ ɔ?” Kikɛ ɔ nɛ ni komɛ tuɔ munyu.6E be mi bae ja gblee! Nɛ mɛni Mawu ji lɛ ke e ma nga hɛ ngmɛ kɛ fɔ yayami nɔ? Nɛ kɛ e ma plɛ kɛ bu nɔ ko fɔ kɛɛ?7Ejakaa ke ye lakpa yemi ɔ woɔ anunyami kɛ baa haa lɛ, nɛ tsɔɔ kaa lɛɛ anɔkualetsɛ ji lɛ ɔ, kɛ e maa pee kɛɛ nɛ e maa kojo nɛ e maa bu mi fɔ kaa yayami peelɔ?8Ke nyɛ nyɛɛ munyu nɛ ɔ se ɔ, nɔ nɛ nyɛ ma susu ji, ke wa puɛ wawɛɛ kɛ yayami ɔ, ja a ji bɔ nɛ Mawu suɔ. Se nihi nɛ ngɛ kikɛmɛ a juɛmi nɛ ɔ, a fɔ bumi kle. Se kɛ ɔ, ni komɛ deɔ ke ja a ji bɔ nɛ ye fiɛmi ɔ tsɔɔ.9Ke ja a, anɛ wɔ Yuda bi ɔmɛ pɛ wa hi pe ni kpa amɛ lo? Dabi, wa hí pi nɔ ko kulaa, ejakaa wa ye he odase momo kaa yayami peelɔ ji nɔ fɛɛ nɔ, Yuda no jio, ma je no jio,10kaa bɔ nɛ Ngmami Klɔuklɔu ɔ de ɔ, “Dalɔ ko be, nɔ kake po be je ɔ mi nɛ e yeɔ bemi.”11Nɔ ko be nɛ nyɛɛ Mawu se bɔ nɛ sa, nɛ nɔ ko hu be nɛ ngɛ hlae kaa e maa nyɛɛ e se anɔkuale mi.12Nɔ tsuaa nɔ gba ngɛ e blɔ ɔ nɔ, nɛ nɔ fɛɛ nɔ pee yayami, nɛ nɔ ko kulaa be he ko nɛ e ngɛ kpakpa pee kɛ sa; nɔ ko be.13A kuɛ si bli voo kaa nɔ gbogboe muɔ mi, nɛ a yeɔ lakpa, nɛ a nya mi munyuhi ngɛ kaa sinɔ duɔ.14Nɛ a nya mi munyu duɔ ngmangmaangma kɛ gbiɛmi.15A he sɔɔ kɛ muɔ si puemi, nɛ a nyɛɛ nihi nɛ kɛ mɛ kpa we gbi ɔ.16Hɛ mi kpatami kɛ aywilɛho nihi nɛ a peeɔ ngɛ he fɛɛ he nɛ a maa gu;17nɛ a li nɔ́ nɛ ji yi baami blɔ loo Mawu gbaami.18A yi Mawu gbeye nɛ a li kaa e susuu a he.19Lɔ ɔ he je ɔ, Mawu maa kojo Yuda bi ɔmɛ kulaa nɛ e be a ti nɔ kake po he ngmɛɛe, ejakaa a yi e mlaa amɛ a nɔ, nɛ yayami mohu nɛ a peeɔ. Anɔkuale ji kaa je ɔ tsuo maa ye fɔ ngɛ Mawu Ope ɔ hɛ mi.20Nyɛ na amlɔ nɛ ɔ kaa kɛ gu mlaa amɛ a nɔ ɔ, a be nɔ ko bemi bue ngɛ Mawu hɛ mi. Ejakaa ke wa le mlaa amɛ ɔ, e tsɔɔ wɔ kaa wa yi a nɔ, nɛ yayami peeli ji wɔ.21Se amlɔ nɛ ɔ, a si mlaa amɛ a se, nɛ a je Mawu dami ɔ kpo, nɛ lɔ ɔ nɔ a maa da kɛ he wa yi wami, nɛ lɔ ɔ he odase nɛ mlaa a kɛ gbali ɔmɛ yeɔ.22Nihi tsuo nɛ heɔ Yesu Kristo nɔ yeɔ ɔ, a nine suu Mawu dami nɛ ɔ nɔ.23E ji anɔkuale kaa wa ti nɔ tsuaa nɔ pee yayami nɛ Mawu anunyami ɔ bɔ wɔ.24Se amlɔ nɛ ɔ, Mawu na wɔ mɔbɔ nɛ e kɛ wa tɔmi ɔmɛ ke wɔ kɛ gu e Bi Yesu Kristo nɛ kpɔ wɔ kɛ je wa yayami ɔmɛ a mi ɔ nɔ.25Ejakaa Mawu tsɔ Yesu Kristo kɛ ba nɛ e kɛ e muɔ ɔ ba he wa yayami ɔmɛ a he tue gblami ɔ, nɛ e kɛ po Mawu mi mi fumi nɛ e na wɔ ɔ se. Nɛ kɛ gu e muɔ ɔ kɛ wa hemi kɛ yemi ngɛ e mi nɔ ɔ, wa ma na yi wami hemi. Be ko nɛ be ɔ, Mawu na wa he tsui nɛ e pui wa nya mi, ejakaa e ngɛ Kristo blɔ hyɛe nɛ e ba kpɔ wɔ kɛ je wa he yayami ɔmɛ a mi.26Mwɔnɛmwɔnɛ ɔ hu Mawu kɛ nihi a he yayamihi ngɛ mɛ kee ja a nɔuu, ejakaa Yesu je a he yayami ɔmɛ kɛ ho. Se anɛ e sa kaa Mawu nɛ ngmɛɛ yayami peeli a he nɛ a ye a he, nɛ e de ke a yi fɔ lo? Dabi! Se e ngmɛɛ a he, ejakaa a he Yesu nɛ je a he yayami ɔmɛ kɛ ho ɔ nɔ ye.27Lɛɛ mɛni ni tsumi nɔ nɛ wa maa fia kɛ fɔ kaa lɔ ɔ nɔ wa maa gu kɛ na wa yi wami hemi ɔ? Wa be fiami ko kulaa nɛ wa maa fia, ejakaa tsa pi ni tsumi kpakpa ko nɛ wa tsu ɔ he nɛ a bu wɔ bemi ngɛ, se mohu a he wa yi wami kɛ gu nɔ́ nɛ Kristo pee ha wɔ ɔ, kɛ hemi kɛ yemi nɛ wa ngɛ ngɛ e mi ɔ nɔ.28Lɔ ɔ he ɔ, a bu wɔ bemi ngɛ wa hemi kɛ yemi nɛ wa ngɛ ngɛ Kristo mi ɔ he je, se tsa pi ngɛ ni tsumi kpakpa ko nɛ wa tsu ɔ he.29Anɛ Yuda bi ɔmɛ pɛ a yi wami nɛ Mawu heɔ kikɛ ɔ lo? Dabida! Ma je li ɔmɛ hu ma nyɛ ba Mawu ngɔ nɛ e ma he a yi wami ja a nɔuu.30Mawu hlɛ adesahi a mi, nɛ lɔ ɔ he je ɔ, e buu Yuda no kɛ ma je no nɛ ngɛ hemi kɛ yemi ɔ kulaa bemi kake.31Jehanɛ ɔ nɛɛ, ke ji hemi kɛ yemi nɔ nɛ a guɔ kɛ heɔ wa yi wami ɔ, lɛɛ e sɛ kaa wa yeɔ Mawu mlaa amɛ a nɔ lo? Tsa pi ja a kulaa i. Niinɛ, ja waa kɛ wa hɛ fɔ Yesu nɔ loko ji wa ma nyɛ ma he e nɔ maa ye tutuutu.Biblica, Inc.