Mateo14
Yohane gbenɔ
1Benɛ Matsɛ Herode nu Yesu he ɔ,2e de e sɔmɔli ɔmɛ ke, “Yohane Baptisilɔ ɔ ji lɔ ɔ nɛ, e te si kɛ je gbeje kɛ ba. Lɔ ɔ he je nɛ e nyɛ ngɛ nyakpɛ ni nɛ ɔmɛ tsue ngɛ ɔ nɛ.”3E ba mi kaa Herode nu Yohane nɛ e fi lɛ, nɛ e wo lɛ tsu mi ngɛ Herodia nɛ ji e nyɛmi Filipo yo nɛ e kɛ lɛ ba ngɛ ɔ he,4ejakaa Yohane de lɛ ke e sɛ kaa e ngɔ lɛ.5Herode ko gbe Yohane, se e ya ye asafo ɔ gbeye, ejakaa a buu Yohane gbalɔ.6Benɛ Herode ngɛ e fɔmi ligbi yee ɔ, Herodia biyo ɔ ya do ngɛ ni ɔmɛ a hɛ mi, nɛ e domi ɔ pee Herode fɛu saminya,7nɛ e ka kita kɛ wo yoyo ɔ si kaa e ma ha lɛ nɔ tsuaa nɔ nɛ e ma bi lɛ.8Kɛkɛ nɛ e nyɛ ɔ wo lɛ ga kaa e bi Herode ke e suɔ nɛ e ngɔ Yohane Baptisilɔ ɔ yi ngɔ fɔ suwe nɔ kɛ ha lɛ.9E he wa ha matsɛ ɔ, se akɛnɛ e ka kita ngɛ nihi nɛ ba ni yemi ɔ a hɛ mi nɛ e sɛ kaa e tɔ he je ɔ, e fa nɛ a tsu e kita a he ni.10Enɛ ɔ ha a ho ya po Yohane yi ngɛ tsu ɔ mi,11nɛ a ngɔ e yi ɔ ngɔ fɔ suwe nɔ kɛ ba ha yiheyo ɔ, nɛ e kɛ ya ha e nyɛ ɔ.12Nɛ Yohane kaseli ɔmɛ ba nɛ a ba wo e gbogboe ɔ nɛ a ya pu; nɛ lɔ ɔ se ɔ, a ho ya bɔ Yesu amaniɛ.13Benɛ Yesu nu Yohane gbenɔ ɔ he nɔuu ɔ, e je lejɛ ɔ zaa nɛ e ya sɛ lɛ mi kɛ ho nga nɔ he ko banee ya. Nɛ benɛ asafo ɔ nu ɔ, a je ma amɛ kɛ kɔpe ɔmɛ a mi nɛ a nyɛɛ nane kɛ bu e se.Yesu ha nimli akpe enuɔ niye ni
14Benɛ Yesu je kpo ngɛ lɛ ɔ mi nɛ e ba na asafo babauu ɔ, e mi mi sa lɛ ngɛ a he nɛ e tsa nihi nɛ be he wami ngɛ a kpɛti ɔmɛ.15Jamɛ a gbɔkuɛ ɔ, e kaseli ɔmɛ ba e ngɔ ba de lɛ ke, “Nga nɔ wa ngɛ ngɛ hiɛ ɔ, nɛ je ngɛ jɔe. Moo wo asafo ɔ blɔ nɛ a ya ma amɛ a mi nɛ a ya he niye ni.”16Se Yesu he nɔ nɛ e de mɛ ke, “E he hia we kaa a ya, nyɛ nitsɛmɛ nyɛ ha mɛ nɔ ko nɛ a ye!”17Nɛ a de lɛ ke, “Abolo nyafinyafi enuɔ kɛ lo enyɔ pɛ wa ngɛ ngɛ hiɛ ɔ!”18Nɛ e de mɛ ke, “Nyɛ wo kɛ ba hiɛ ɔ.”19Kɛkɛ nɛ e fa asafo ɔ ke a hi si ngɛ nga a nɔ; nɛ e muɔ abolo enuɔ kɛ lo enyɔ ɔ, nɛ e hyɛ hiɔwe, nɛ e gbaa nɔ. E ku a mi nɛ e ngɔ ha e kaseli ɔmɛ, nɛ kaseli ɔmɛ gba ngɔ ha asafo ɔ.20Nɛ mɛ tsuo a ye nɛ a tɔ, nɛ kaseli ɔmɛ kukuɔ bibliwi nɛ piɛ ɔ ngɔ wo kusii nyɔngma kɛ enyɔ mi nɛ a hyi tɔtɔɔtɔ.21Nyumuhi nɛ ye ni ɔ maa su akpe enuɔ, e slo yihi kɛ jokuɛwi.22Enɛ ɔ se ɔ, Yesu wo e kaseli ɔmɛ blɔ nɛ a wo lɛ kɛ sɛ e hlami kɛ ho wo ɔ se je ya, nɛ lɛɛ e mlɛ nɛ lɛ nitsɛ e wo ni ɔmɛ blɔ.Yesu nyɛɛ wo he mi
23Benɛ e wo asafo ɔ blɔ se ɔ, e pue nɔ kɛ ho yoku ɔ nɔ ya nɛ e ya sɔle. Se benɛ je jɔ,24nɛ e kaseli ɔmɛ ngɛ lɛ ɔ mi kɛ yaa a, lɛ ɔ ya bɔni kpami, ejakaa e ngɛ kɔɔhiɔ kpee.25Maa pee makɛ ngmlɛ eywiɛ mi ɔ, Yesu nyɛɛ wo ɔ hɛ mi kɛ ya na mɛ.26Se benɛ kaseli ɔmɛ na lɛ nɛ e ngɛ wo ɔ hɛ mi nyɛɛe kɛ ma a ngɔ ɔ, a tsui po nɛ a kpa ngmlaa, ejakaa a susu kaa kpade i.27Se amlɔ ɔ, Yesu kɛ mɛ tu munyu nɛ e de mɛ ke, “Nyɛ ko ye gbeye, ami i.”28Petro he nɔ nɛ e de lɛ ke, “Mawetsɛ, ke mo tutuutu i ɔ, lɛɛ mo ha nɛ ma nyɛɛ nyu ɔ hɛ mi kɛ ba o ngɔ.”29Yesu de lɛ ke, “Ba!” Kɛkɛ nɛ Petro je kpo ngɛ lɛ ɔ mi nɛ e bɔni nyu ɔ hɛ mi nyɛɛmi kɛ yaa Yesu ngɔ.30Se benɛ e na bɔ nɛ oslɔke ɔmɛ ngɛ kue ha a, e tsui po, nɛ nɔuu ɔ, e bɔni mumi. E kpa ngmlaa nɛ e de ke, “Nutsɔ, mo he mi!”31Amlɔ nɔuu ɔ, Yesu kpa e nine mi nɛ e nu lɛ; nɛ e de lɛ ke, “Mo nɛ o hemi kɛ yemi pi, mɛni he je nɛ o ngɛ nguane jee ɔ?”32Nɛ benɛ a sɛ lɛ ɔ mi ɔ, kɛkɛ nɛ kɔɔhiɔ ɔ nya ba si.33Nɛ ni nɛmɛ nɛ ngɛ lɛ ɔ mi ɔ a nya kpɛ a he nɛ a de ke, “Niinɛ, Mawu Bi ji mo!”Yesu tsa hiɔtsɛhi ngɛ Genesaret
34Nɛ a po wo ɔ kɛ ba Genesaret zugba a nɔ.35Nɛ benɛ Genesaret bi ɔmɛ na kaa Yesu i ɔ, a tsɔ kɛ ya lejɛ ɔ kɔpe ɔmɛ tsuo a mi nɛ a ya ngɔ hiɔtsɛhi kɛ ba e ngɔ nɛ e tsa mɛ.36Hiɔtsɛ ɔmɛ kpa lɛ pɛɛ kaa e ha nɛ a ta e tade ɔ nya he kɛkɛ, nɛ nihi abɔ nɛ ta he ɔ, mɛ tsuo a na he wami.Biblica, Inc.