Luka9
1Ligbi ko ɔ, Yesu tsɛ e kaseli nyɔngma kɛ enyɔ ɔmɛ nɛ e ha mɛ he wami ngɛ mumi yayamihi a nɔ, nɛ a hia mɛ ngɛ nihi a mi, nɛ a tsa hiɔ fɛɛ hiɔ.2Nɛ e tsɔ mɛ nɛ a ya fiɛ Mawu Matsɛyemi ɔ bami ɔ ha nɔ tsuaa nɔ; nɛ a tsa hiɔtsɛmɛ.3E de mɛ ke, “Nɛ nyɛ yaa nɛ ɔ, nyɛ ko de ke nyɛ maa hɛɛ kotoku loo dema tso loo niye ni loo sika loo tade kɛ piɛ nɔ́ nɛ nyɛ wo ɔmɛ a he.4Ke nyɛ ya a, nyɛ ya to he kake pɛ.5Ke nyɛ ya ma ko mi nɛ nimli ɔmɛ ha we nyɛ hɛ mi ɔ, nyɛɛ kpale; nɛ ke nyɛ maa je ma a mi ɔ, nyɛ blɛ ma a mi zu nɛ du nyɛ nane si ɔ ngɔ pue si ha mɛ kɛ pee odase loko nyɛɛ je.”6Enɛ ɔ se ɔ, kaseli ɔmɛ hia blɔ nɛ a fiɛ Manye Munyu ɔ ngɛ ma amɛ a mi nɛ a tsa hiɔtsɛmɛ.
Herode kɛ ni ɔmɛ a nya kpɛ a he
7Benɛ Herode nɛ ji amlaalo ɔ nu nyakpɛ ni slɔɔtohi nɛ Yesu ngɛ tsue ɔ he ɔ, e tsui po. Ejakaa nihi ngɛ dee ke, “Yohane Baptisilɔ ɔ nɛ e te si kɛ je gbeje.”8Nɛ ni komɛ hu de ke, “Elia loo blema gbali ɔmɛ a ti nɔ ko nɛ te si ekohu.” Ja a sɔuu nɛ a ngɛ dee ngɛ zugba a mi kulaa kɛ ngɛ si bɔlee.9Herode de e he ke, “I ha nɛ a po Yohane yi; nɛ mɛnɔ hu pa ji Nɔmlɔ nɛ ngɛ nyakpɛ ni nɛ ɔmɛ tsue nɛ ɔ mɔ?” Nɛ ja a he je ɔ e hla kaa e maa na lɛ.10Benɛ kaseli ɔmɛ je a sikpa a kɛ ba nɛ a ba bɔ Yesu a nyɛɛmi mi amaniɛ ɔ, e kɛ mɛ je kɛ ho he ko banee ya ngɛ Betsaida.11Se nihi nɛ ngɛ lɛ hlae ɔ na le he nɛ ya nɛ e ho nɛ a bu e nɔ. Benɛ a ya na lɛ ɔ, e fie we mɛ; e he mɛ atuu nɛ e fiɛ Mawu Matsɛyemi ɔ he sane ɔ kɛ tsɔɔ mɛ nɛ e tsa ni nɛmɛ nɛ be he wami ɔmɛ.12Kɛ yaa gbɔkuɛ nya si mi ɔ, e kaseli nyɔngma kɛ enyɔ ɔmɛ tsuo ba e ngɔ nɛ a ba de lɛ ke, “Mo ha nɛ ni ɔmɛ nɛ a ho ma a mi ya nɛ a ya hla niye ni kɛ hwɔ he, ejakaa niye ni ko be nga a nɔ hiɛ ɔ.”13Se Yesu de mɛ ke, “Nyɛ nitsɛmɛ nyɛ ha mɛ ni.” Kaseli ɔmɛ ha lɛ heto nɛ a de ke, “Abolo enyɔ kɛ lo enyɔ pɛ ji niye ni nɛ wɔ nitsɛmɛ wa hɛɛ nɛ wa maa ye. Aloo o ngɛ hlae nɛ wa ya he niye ni nɛ maa su ma mluku nɛ pueɔ si nɛ ɔ tsuo lo?”14Ejakaa nihi nɛ ba pue si ɔ, a hiɛmi maa su akpe enuɔ. Yesu ha mɛ heto ke, “Nyɛɛ lɛɛ nyɛ ha nɛ a bua kɛ hi si nyingmi enuɔɔnuɔ.”15Nɛ kaseli ɔmɛ ha nɛ a hi si ja.16Kɛkɛ nɛ Yesu wo abolo enuɔ ɔ kɛ lo enyɔ ɔ nɛ e hyɛ hiɔwe nɛ e na si nɛ e poo abolo ɔ ngɔ ha e kaseli ɔmɛ konɛ a kɛ ha ni ɔmɛ.17Nɛ niye ni ɔ su nɔ tsuaa nɔ nɛ a ye nɛ a tɔ nɛ bibliwi nɛ pue si nɛ a kukuɔ ɔ, e hyi kusii nyɔngma kɛ enyɔ.18Ligbi ko ɔ, lɛ nɔ kake e hii si ngɛ sɔlee benɛ e kaseli ɔmɛ hii si ngɛ se; nɛ benɛ e sɔle ta a, e ba a ngɔ ba bi mɛ ke, “Kɛ ni ɔmɛ deɔ ngɛ ye he kɛɛ? Mɛnɔ nɛ a ke i ji?”19A de lɛ ke, “Nihi ngɛ dee ke Yohane Baptisilɔ ɔ ji mo; nɛ nihi hu ngɛ dee ke o maa pee Elia loo blema gbali ɔmɛ eko nɛ te si kɛ je gbeje.”20Jehanɛ ɔ e bi mɛ ke, “Mɛnɔ nɛ nyɛɛ lɛɛ nyɛ susu kaa i ji?” Petro ha lɛ heto nɛ e de ke, “Mo ji Mesia a, Mawu e Kristo ɔ nɛ.”21E bɔ mɛ kɔkɔ ke a ko de nɛ nɔ ko nɛ e nu. Nɛ e ya nɔ nɛ e de mɛ ke,22“Nɔmlɔ Bi ɔ maa na nisɛ ni a ni; nɛ Yuda bi ɔmɛ a nikɔtɔma amɛ kɛ osɔfo nikɔtɔma amɛ kɛ mlaa tsɔɔli ɔmɛ ma kua lɛ, nɛ a maa gbe lɛ. Se ligbi etɛ se ɔ, e maa te si ekohu.”23Nɛ e pa de mɛ ke, “Mo nɔ nɛ o suɔ nɛ o nyɛɛ ye se ɔ, o ngmɛɛ o akɔnɔ nihi a he nɛ o wo o sɛumi tso ɔ nɛ o nyɛɛ ye se.24Nɔ tsuaa nɔ nɛ ma hla kaa e baa e he lo yi ɔ, e maa laa e klaa. Se nɔ tsuaa nɔ nɛ e hɛ mi ma kpata ngɛ ye he ɔ, e yi ma na wami.25Nɛ mɛni se nɛ nɔ ko ma na ke ji kaa e nine maa su je nɛ ɔ tsuo nɔ se e maa laa lɛ nitsɛ e klaa?26Ke ye tsɔɔmi ɔ kɛ ami nitsɛ ye he peeɔ nɔ ko zo ɔ, benɛ Nɔmlɔ Bi ɔ maa ba ngɛ e kɛ Tsɛ ɔ kɛ bɔfo ɔmɛ a anunyami ɔ mi ɔ, jamɛ a nɔ ɔ hu e he maa pee Nɔmlɔ Bi ɔ zo.27Se e ji anɔkuale kaa nyɛ nihi nɛ daa si ngɛ hiɛmɛ nɛ ɔ amlɔ nɛ ɔ, nyɛ ti nihi maa na Mawu Matsɛyemi ɔ loko ji a ma si je mi.”Yesu nɔmlɔ tso su tsakemi
28E tu munyu nɛ ɔmɛ se ligbi kpaanyɔ nɛ e tsɛ Petro kɛ Yakobo kɛ Yohane ngɔ piɛ e he nɛ a ho yoku ko nɔ ya nɛ e ya sɔle.29Nɛ benɛ e ngɛ sɔlee ɔ, e hɛ mi bɔni tsakemi, nɛ tade nɛ e wo ɔ bɔni peemi futaa hluu kɛ ya si e bɔni la pomi.30Kɛkɛ benɛ a maa hyɛ ɔ, a na nihi enyɔ, Mose kɛ Elia ba je kpo nɛ a kɛ lɛ ngɛ munyu tue.31Mɛ hu a he pee fɛu saminya, nɛ a ji anunyami nimli; nɛ a kɛ lɛ ngɛ gbenɔ nɛ e ma ya gbo ngɛ Yerusalem, ngɛ Mawu yi mi tomi ɔ nya a, he munyu tue.32Jamɛ a be ɔ mi ɔ, mahe gbe Petro kɛ ni enyɔ ɔmɛ nɛ piɛ e he ɔ, nɛ a hwɔ mahe pɔpɔɔpɔ. Se a he tsiɛ nɛ a na bɔ nɛ Yesu ngɛ kpɛe kɛ anunyami, kɛ ni enyɔ ɔmɛ nɛ a kɛ lɛ daa si ɔ.33Benɛ Mose kɛ Elia maa ho Yesu ngɔ jemi ya a, Petro hia ngmlaa nɛ e de ke, “Tsɔɔlɔ, nɔ́ nɛ ɔ ngɛ nyakpɛ. Mo ha nɛ waa ma tsuhi etɛ ngɛ hiɛmɛ nɛ ɔ ha nyɛ, o nɔ kake, Mose nɔ kake kɛ Elia hu nɔ kake.”34Se Petro nya nɔɛ si nɛ bɔ kuu ko ba ha mɛ tsuo a nɔ, nɛ gbeye nu mɛ.35Kɛkɛ nɛ gbi ko pɛ kɛ je bɔ kuu ɔ mi ke, “Ye Binyumu, Nɔ Nɛ i hla a ji nɛ ɔ nɛ, nyɛɛ bu lɛ tue.”36Benɛ gbi ɔ pɛ se ɔ, Yesu kɛ e kaseli ɔmɛ pɛ nɛ piɛ ngɛ lejɛ ɔ; nɛ a ti nɔ ko wui munyu nɛ ɔ nɔ ta kɛ de we nɔ ko ngɛ jamɛ a be ɔ mi.Yesu tsa jokuɛ ɔ nɛ mumi yayami ngɛ e mi ɔ
37E nɔ jena benɛ a kple si kɛ je yoku ɔ nɔ kɛ ma a, nihi fuu kɛ lɛ ba kpe.38Kɛkɛ nɛ nɔ ko hia ngmlaa ngɛ ni ɔmɛ a kpɛti kɛ tsɛ lɛ ke, “Tsɔɔlɔ, ye binyumuyo kake too ji nɛ ɔ nɛ.39Se mumi yayami ngɛ lɛ haoe. E nuu lɛ nɛ e haa nɛ e kpaa ngmlaa nɛ e woɔ e he kɛ hii si fiae kaa kɔkɔtsɛ; kɛkɛ ɔ, e nya mi fiaa hwɔli; e pɔɔ lɛ numi nɛ e ha we nɛ e na he jɔmi ko kulaa.40I kpa o kaseli ɔmɛ pɛɛ nɛ a hia mumi yayami ɔ ngɛ e mi nɛ e na he jɔmi se a nyɛ we.”41Kɛkɛ nɛ Yesu de ke, “Mɛni nimli ji nɛ ɔ nɛ a tue mi ti, nɛ a be hemi kɛ yemi kikɛ ɔ? Mɛni be i kɛ nyɛ maa hi si kɛ ya si? Mo wo lɛ ke ba hiɛmɛ nɛ ɔ.”42Benɛ bi ɔ nyɛɛ ke ma Yesu ngɔ ɔ, kɛkɛ nɛ mumi yayami ɔ pa po lɛ kɛ fɔ si. Se Yesu nga mumi yayami ɔ yi nɛ e de lɛ ke e je e mi; kɛkɛ nɛ jokuɛ ɔ na he wami, nɛ e wo lɛ kɛ ha e tsɛ ɔ.43Nihi nɛ na Mawu he wami ni tsumi nɛ ɔ ye gbeye saminya, nɛ benɛ a ngɛ nyakpɛ ni kpahi nɛ Yesu ngɛ tsue ɔ he munyu tue ɔ, e de e kaseli ɔmɛ ke,44“Nyɛɛ bu mi tue saminya nɛ nyɛ kai nɔ́ nɛ i ngɛ dee ɔ. A maa tsɔɔ Nɔmlɔ Bi ɔ se blɔ.”45Se kaseli ɔmɛ nui munyu ɔ nɛ e tu ɔ sisi, ejakaa a ngɔ laa mɛ, nɛ a ngɛ gbeye yee hulɔ kaa a ma bi lɛ munyu ɔ he nɔ́ ko.46Nya sami mohu nɛ ba te si ngɛ a kpɛti kaa a ti mɛnɔ nɛ maa pee nguaa pe kulaa ngɛ Matsɛyemi nɛ ma a mi lo.47Se Yesu le nɔ nɛ a ngɛ susue ɔ, nɛ lɔ ɔ he je ɔ e tsɛ jokuɛ ko kɛ ba da si ngɛ e kasa nya.48Nɛ e de mɛ ke, “Nɔ tsuaa nɔ nɛ maa baa jokuɛ kaa nɔ nɛ ɔ yi saminya a, ami nɛ e pee kɛ ha; nɛ nɔ tsuaa nɔ nɛ maa hyɛ ye nɔ ɔ, Tsaatsɛ nɛ tsɔ mi ɔ nɛ e pee kɛ ha. Ejakaa bɔ nɛ nyɛ maa ba nyɛ he si kɛ ha ni kpahi ha a, lɔ ɔ nɛ maa pee nyɛ nimli nguahi.”49Nɛ e kaselɔ Yohane ba ba de lɛ ke, “Tsɔɔlɔ, wa na nɔ ko nɛ e wo o biɛ kɛ ngɛ mumi yayamihi hiae ngɛ nihi a mi nɛ wa tsi e nya nɛ wa de lɛ ke e be he blɔ nɛ e peeɔ ja, ejakaa e be wa kpɛti.”50Yesu de lɛ ke, “E sɛ nɛ o tsiɔ e nya, ejakaa nɔ nɛ ti si kɛ wui mo ɔ, lɛɛ e kɛ mo i.”51Nɛ akɛnɛ e be nɛ e ma kɛ kpale kɛ ho hiɔwe ya a ngɛ sue he je ɔ, e wo e hɛ mi ngɔ pi Yerusalem blɔ.52Ligbi ko, e tsɔ nihi kɛ sɛ hlami nɛ a ya bi nɛ a si tsu ha mɛ ngɛ Samaria kɔpe ko mi.53Se ma a mi tsɛ ɔmɛ fie tsɔli ɔmɛ, ejakaa a na kaa Yerusalem ji he nɛ a yaa.54Benɛ munyu nɛ ɔ ba su Yesu kɛ e kaseli ɔmɛ ɔ, Yakobo kɛ Yohane de Yesu ke, “Tsɔɔlɔ, wa tsɛ la kɛ je hiɔwe nɛ e ba sa nimli nɛ ɔmɛ lo?”55Se Yesu ka a hɛ mi ngɛ a susumi nɛ ɔ he.56Nɛ a ho ya to kɔpe kpa mi.57Benɛ a yaa ngɛ blɔ ɔ nɔ ɔ, nɔ ko de Yesu ke, “He tsuaa he nɛ o maa ya a, i ma nyɛɛ o se daa.”58Se Yesu ha lɛ heto nɛ e de ke, “Mo kai kaa i be he nɛ i woɔ ye yi kɛ fɔɔ. Kɔkɔbohi ngɛ a muɔhi nɛ a hwɔɔ mi, nɛ lohwe pɛlitsɛhi hu ngɛ a tsuhi, se Nɔmlɔ Bi ɔ be we ngɛ zugba nɛ ɔ nɔ.”59Be kpa ko lɛɛ lɛ nitsɛ e tsɛ nɔ ko ke e ba nyɛɛ e se. Nɔ ɔ kplɛɛ, se e de lɛ ke e mlɛ ha lɛ kɛ ya si be nɛ e maa pu e tsɛ konɛ e ba nyɛɛ e se.60Yesu ha lɛ heto nɛ e de ke, “Mo ha nɛ nihi nɛ be nyagbe yi wami hemi ɔ nae ɔ, a tsu jamɛ a ni ɔmɛ. Se moo lɛɛ o blɔ nya ni tsumi ji kaa o ba fiɛ Mawu Matsɛyemi ɔ bami ɔ ngɔ tsɔɔ je ɔ tsuo.”61Nɔ kpa hu de lɛ ke, “Nutsɔ, i ma ba, se mo ha mi blɔ nɛ ma ya sɛ ye we mi bi ɔmɛ lolo.”62Se Yesu de lɛ ke, “Nɔ tsuaa nɔ nɛ haa nɛ nɔ́ kpahi jeɔ e juɛmi kɛ jee ni tsumi nɛ i to kɛ ha lɛ ɔ he ɔ, e sɛ Mawu Matsɛyemi ɔ.”Biblica, Inc.