อ่านหนังสือ JO ROMA 1

JO ROMA1

¹Waraga man oa ki bot Paulo ma en latic pa Yecu Kricito, ma Lubanga olwongo me bedo lakwena, ka dong kimiye tic me tito lok me Kwena Maber ma oa ki bot Lubanga.²Lok me Kwena Maber onongo yam Lubanga ociko pire con ilok ma lunebi yam gutito, dok bene onongo kicoyo woko i ginacoya maleng.³Lok me Kwena Maber man kicoyo okemo Wode. Ikit me kom, Wode man yam kinywale ikin likwayo pa Daudi,⁴ento pi Cwiny Maleng, Lubanga onyutu en obedo Wode pi tek ma ocere kwede ki ikin jo ma oto, en aye Yecu Kricito Rwotwa.⁵Pire omiyo wan walimo kica pa Lubanga, ki tic me bedo lukwena wek wamii dano ma i rok ducu gubed luwiny pi niyegi inyinge;⁶ma wun bene wutye ikin gi, wun dano madong kilwongowu me bedo jo pa Yecu Kricito.

⁷Bot wun jo ducu ma wutye i Roma ma Lubanga marowu, dok olwongowu me bedo jone maleng ma en aye oyero.
Lubanga Wonwa ki Rwotwa Yecu Kricito omiwu kica ki kuc.

Lega me miyo pwoc

⁸Mukwongo apwoyo Lubangana i Yecu Kricito pi wun ducu, pien niyewu dong kitucu pire oromo wi lobo woko ducu.⁹Lubanga ma aworo ki icwinya kun bene atito lok me Kwena Maber ikom Wode, en aye cadena ma ngeyo ni atucu nyingwu ilegana ikare ducu ma pe akeng.¹⁰Alego ni ka twere, ka Lubanga oye, olo myero anong yo me bino botwu ikare ni.¹¹Atye kaparo me nenowu mada, wek apok botwu mot mogo me cwiny me jingowu wek wubed matek.¹²Gin ma aloko en aye ni wun kacel ki an wabikonye lawangacel; en aye ni niyena bikonyowu, ki niyewu bene bikonya.

¹³Gin ma amito wunge, utmegina, en aye ni onongo abedo kamito tyen mapol ni myero abin botwu, (kadi wa onyo bene gin mo pud tye ma kagenga bino woko), wek alok jo mogo ikinwu me ye Yecu kit ma atimo ikin Lurok mukene ducu.¹⁴Atye ki banya bot Lugrik ki bot Lurok ma gin kwiya piny, bot luryeko ki bot luming.¹⁵Man aye gin ma omiyo atye ki miti me tito lok me Kwena Maber botwu bene wun jo ma wubedo i Roma.

Teko matye i Kwena Maber

¹⁶Lewic pe maka pi lok me Kwena Maber, ma en aye teko pa Lubanga ma laro jo matye ki niye, mukwongo Lujudaya, ka dong Lugrik bene.¹⁷Pien lok me Kwena Maber nyutu kit ma Lubanga kwano ni dano bedo ma kite atir, ma man time pi niye keken, cake ki i acakine nio kwede wa i agikine. Kit macalo kicoyo ni, “Dano ma kite atir pi niye bibedo kwo.”

Bal pa dano

¹⁸Pien dong akemo pa Lubanga onyute woko ki ipolo kun bino ikom jo ma lutim maracu ducu ma pe gin woro Lubanga, ma gin tye kagengo lok ada ni pe otii tic, pi timgi maracuni.¹⁹Pien gin ma dano twero ngeyone ikom Lubanga dong onen woko kamaleng botgi, Lubanga kikome aye onyutu botgi.²⁰Nicake ikare ma kicweyo lobo, kit pa Lubanga ma onongo pe nen, ma en aye tekone ma pe gik, ki dit ma en Lubanga tye kwede dong onen woko, kun kingeye nia ki i jami ducu ma en otiyo. Ma omiyo dano dong pe gitye ki lok mo ma myero gin opid pi gengo ngegi.²¹Pien kadi bed onongo yam gin ngeyo Lubanga, ento pe guwore macalo Lubanga, pe bene gupwoye, ento tamgi odwokogi igin ma pe konyo, ki tam ma i cwinygi me mingomingo bene dong ocido woko odoko col.²²Gin lwonge ken gi ni gin luryeko, ento gin guloke gudoko luming.²³Ci gin guloko deyo pa Lubanga ma pe to woko, kun giporo ki cal pa dano ma to, nyo ki cal pa winyo, nyo pa lee, nyo pa twol gu. Dano giworo cal

²⁴En ma omiyo Lubanga otenyogi woko liyak imiti me caro matye i cwinygi, wek gin gubal kwede deyo me komgi keken gi.²⁵Gin guloko ada mamako kom Lubanga woko ki goba, kun guworo dok gutiyo bot ginacweya, ma ka woro ki tic bot Lacwec, ma pwoc myero kimii bote nakanaka! Amen.

²⁶Pi tyen lok man omiyo Lubanga otenyogi itamgi ma ogom ma gin tamo makelo lewic. Kadi wa mon gi bene guweko bedo ki co ikit ma kinywalogi ni gin gubed kwedeni, ento dok gucako butu ki mon wadigi.²⁷Ki co bene kitmeno guweko bedo ki mon woko ikit ma kinywalogi ni myero gubed kwedeni, ento cwinygi puke ikom co wadigi, ma gimito ni gibut ki co wadgi, ma meno tim me lewic mada, pimeno gin gilimo can malit ikomgi ken gi pi kit balgi meno.

²⁸Dong kit macalo gin pe guneno gin mo ma konyogi ingeyo Lubangani, Lubanga bene otenyogi woko itamgi ma konye pekeni, wek dong gutim gin ma pe myero.²⁹Gin onongo yam gupong ki kwayi bal mapol, tim maracu, woro me lim, ki rac cwiny. Gupong bene ki cwiny me nyeko, nek, daa, goba, ki kwarcwiny, dok gin bene lukwot dano,³⁰luyet dano, dok jo ma dag Lubanga. Gubedo lungala, jo ma lyere, jo ma wake, lurot kit me timo tim maracu, jo ma pe winyo lunyodogi.³¹Gin jo ma gikwiya piny, jo ma pe gene, pe gitye ki mar i cwinygi, kica bene pe makogi ikom dano.³²Kadi bed gin ngeyo cik pa Lubanga ni jo ma timo gin macalo meno myero kinekgi woko, ento gin pe gitimo jami macalo meno atima keken, kono gin gipwoyo apwoya bene jo matye katimone.

Bible Society of Uganda

https://app.library.bible/content/1618808970a5a3ca