Soma Warumi 10

Warumi10

¹Ndugu zangu, shauku ya moyo wangu na maombi yangu kwa Mungu ni kwa ajili ya Waisraeli, kwamba waokolewe.²Kwa maana ninaweza nikashuhudia wazi kwamba wao wana juhudi kubwa kwa ajili ya Mungu, lakini juhudi yao haina maarifa.³Kwa kuwa hawakuijua haki ya Mungu, wakatafuta kuweka haki yao wenyewe, hawakujitia chini ya haki ya Mungu.⁴Kwa maana Al-Masihi ni ukomo wa sheria ili kila mtu aaminiye ahesabiwe haki.

Wokovu kwa watu wote

⁵Musa anaandika kuhusu haki ile itokanayo na sheria, kwamba, “Mtu atendaye matendo hayo ataishi kwa hayo.”⁶Lakini ile haki itokanayo na imani husema hivi: “Usiseme moyoni mwako, ‘Ni nani atakayepanda mbinguni?’ ” (yaani ili kumleta Al-Masihi chini)⁷“au ‘Ni nani atashuka kwenda Kuzimu ?’ ” (yaani ili kumleta Al-Masihi kutoka kwa wafu).⁸Lakini andiko lasemaje? “Lile neno liko karibu nawe, liko kinywani mwako na moyoni mwako,” yaani lile neno la imani tunalolihubiri.⁹Kwa sababu, ukikiri kwa kinywa chako kwamba “Isa ni Bwana,” na kuamini moyoni mwako kwamba Mungu alimfufua kutoka kwa wafu, utaokoka.¹⁰Kwa maana kwa moyo mtu huamini na hivyo kuhesabiwa haki, tena kwa kinywa mtu hukiri na hivyo kupata wokovu.¹¹Kama Maandiko yanavyosema, “Yeyote amwaminiye hataaibika kamwe.”¹²Kwa maana hakuna tofauti kati ya Myahudi na mtu wa Mataifa, yeye ni Bwana wa wote, mwenye utajiri kwa wote wamwitao.¹³Kwa maana, “Kila mtu atakayeliitia Jina la Mwenyezi Mungu, ataokolewa.”

¹⁴Lakini watamwitaje yeye ambaye hawajamwamini? Nao watawezaje kumwamini yeye ambaye hawajamsikia? Tena watamsikiaje bila mtu kuwahubiria?¹⁵Nao watahubirije wasipopelekwa? Kama ilivyoandikwa, “Tazama jinsi ilivyo mizuri miguu yao wale wanaohubiri Habari Njema!”

¹⁶Lakini si wote waliotii Injili. Kwa maana Isaya asema, “Mwenyezi Mungu, ni nani aliyeamini ujumbe wetu?”¹⁷Basi, imani chanzo chake ni kusikia, na kusikia huja kwa neno la Al-Masihi.¹⁸Lakini nauliza: Je, wao hawakusikia? Naam, wamesikia, kwa maana:“Sauti yao imeenea duniani pote,nayo maneno yao yameeneahadi miisho ya ulimwengu.”

¹⁹Nami nauliza tena: Je, Waisraeli hawakuelewa? Kwanza, Musa asema,“Nitawafanya mwe na wivukwa watu wale ambao si taifa.Nitawakasirisha kwa taifalile lisilo na ufahamu.”

²⁰Naye Isaya kwa ujasiri mwingi anasema,“Nimeonekana na watu wale ambao hawakunitafuta.Nilijifunua kwa watuwale ambao hawakunitafuta.”

²¹Lakini kuhusu Israeli anasema,“Mchana kutwa nimewanyoosheawatu wakaidi na wasiotii mikono yangu.”