Soma Filemoni 1

Filemoni1

Salamu

¹Paulo, mfungwa wa Al-Masihi Isa, pamoja na Timotheo ndugu yetu.
Kwa Filemoni rafiki yetu mpendwa na mtendakazi mwenzetu,²kwa dada yetu mpendwa Afia, kwa Arkipo askari mwenzetu na kwa kundi la waumini wanaokutana nyumbani mwako.

³Neema na amani zitokazo kwa Mungu, Baba yetu, na kwa Bwana wetu Isa Al-Masihi ziwe nanyi.

Shukrani na maombi

⁴Siku zote ninamshukuru Mungu wangu ninapokukumbuka katika maombi yangu,⁵kwa sababu ninasikia kuhusu imani yako katika Bwana Isa na upendo wako kwa watakatifu wote.⁶Naomba utiwe nguvu katika kushiriki imani yako na wengine, ili upate kuwa na ufahamu mkamilifu wa kila kitu chema tunachoshiriki kwa ajili ya Al-Masihi.⁷Upendo wako umenifurahisha mno na kunitia moyo, kwa sababu wewe ndugu, umeiburudisha mioyo ya watakatifu.

Paulo anamtetea Onesimo

⁸Hata hivyo, ingawa katika Al-Masihi ningekuwa na ujasiri wa kukuagiza yale yakupasayo kutenda,⁹lakini ninakuomba kwa upendo. Mimi Paulo, mzee na pia sasa nikiwa mfungwa wa Al-Masihi Isa,¹⁰nakuomba kwa ajili ya mwanangu Onesimo , aliyefanyika mwanangu nilipokuwa kwenye minyororo.¹¹Mwanzoni alikuwa hakufai, lakini sasa anakufaa sana wewe na mimi pia.

¹²Namtuma kwako, yeye aliye moyo wangu hasa.¹³Ningependa nikae naye ili ashike nafasi yako ya kunisaidia wakati huu nikiwa kifungoni kwa ajili ya Injili.¹⁴Lakini sikutaka kufanya lolote bila idhini yako, ili wema wowote uufanyao usiwe wa lazima, bali wa hiari.¹⁵Huenda sababu ya Onesimo kutengwa nawe kwa muda ni ili uwe naye daima,¹⁶si kama mtumwa sasa, bali bora kuliko mtumwa, kama ndugu mpendwa. Yeye ni mpendwa sana kwangu na hata kwako zaidi, yeye kama mwanadamu na kama ndugu katika Bwana Isa.

¹⁷Hivyo kama unanihesabu mimi kuwa mshirika nawe, mkaribishe kama vile ungenikaribisha mimi mwenyewe.¹⁸Kama amekukosea lolote au kama unamdai chochote, nidai mimi.¹⁹Ni mimi Paulo, ninayeandika waraka huu kwa mkono wangu mwenyewe. Nitakulipa hilo deni. Kumbuka kwamba nakudai hata nafsi yako.²⁰Ndugu yangu, natamani nipate faida kwako katika Bwana Isa, yaani uniburudishe moyo wangu katika Al-Masihi.²¹Huku nikiwa na hakika ya kutii kwako, nakuandikia nikijua kwamba utafanya hata zaidi ya yale ninayokuomba.

²²Jambo moja zaidi: Niandalie chumba cha wageni, kwa kuwa nataraji kurudishwa kwenu kama jibu la maombi yenu.

Salamu za mwisho

²³Epafra, aliye mfungwa mwenzangu katika Al-Masihi Isa, anakusalimu.

²⁴Vivyo hivyo Marko, Aristarko, Dema na Luka, watendakazi wenzangu wanakusalimu.

²⁵Neema ya Bwana Isa Al-Masihi iwe pamoja na roho zenu. Amen.