Läs Mak 16

Mak16

Sisas kil wrekg

¹Wang wail a mentepm rpma eng yapm pa kai plalng pa, okg or kong, wang a itna ep a wang wampwomis wampwompwekg. Salome, Maria a Maktala, a Maria, man a Semis, tunteng armpen kweikwei yaprekget la ik inel palk a Sisas.²Atom am tunteng aye ak kong miningket ai kai kirkap ike.³Tu akor la tatu ya pa kai la, “Wes pa wail paipm ai. Mla mpa ntiwo eng tulpul wes pa tukulelkg mlamin ok pa?”⁴Tunteng ikg kai ari, wes pa am wet melnum ur talpul takwlelkg mlamin ok pa ike.⁵Atom tunteng kai kawor kirk wunen a tu u mlaminel ai ari melnum ur a nowe apm tangkoren pupup watinet ur pa rpma wam wi pa, atom tunteng tutusraing.

⁶Atom melnum pa lanaken la, “Ampur kipm ngkark. Kupm ariwe kipm la ikor Sisas kai Nasaret, melnum a pekg tu karkurngkel rka yo okgmangki. Ake kil rmpa ti, kil am wrekg ike. Ti kipm ri wrik kalpmilel a pekg tu elngkel rmpa ti.⁷Ti kipm kai niki tu watnom alkilen a kil aroaro wonel pa nimpikgen Pita pa yat la, kil am ep kaino anong kanokg a Kalili ike. Ti kipm kai o, mpa kipm riwel kaino anong kanokg pake, kol pekg kil lanakepm ep pa.”

⁸Tunteng atning yangkipm a kil la pa plalng, tunteng atnurng kirk pa kul or en am ngkark kai ike. Tunteng ngkark warwar paipm wrisen, kolpa ti akentiwe mpa tunteng laniki melnum ur.

Maria a anong Maktala kil ari Sisas

⁹Mining angket wang wail a tu Suta rpma eng yapm pa kai plalng pa, or kong miningket ti pa, Sisas kil wrekg a kirk a tu u mlamin pa or. Kil palng atom Maria a anong Maktala pa ariwel ep; kin pa pekg maur paipm wampwomis wampwompwekg pa arpmewel, atom pekg Sisas ungkwan takwlelkgtel.¹⁰Tu melnum alkilen a pekg antiwel atn pa tu nikgwalpm kaikuten akg rka. Atom Maria aye yangkipm pa kai naken, la kolpa,¹¹“Kupm ari Sisas am wrekg ike.” Tu atning yangkipm a kil la pa, ari ake tu ukipma.

Melnum wekg ari Sisas angko ya

¹²Melnum wekg wet atning yangkipm a Maria lanaken pa, tuwekg atnurng anong wail pa kinar angko ya, atom Sisas palng tuwekg ariwel ari palng manet.¹³Tuwekg aye yangkipm pa yaper no naki tu melnum a pekg anti Sisas atn pa ari ake tu atning yangkipm a tuwekg la pa.

Sisas kil ukwa tu watnom alkil la kai ikwap

¹⁴Katnukg pa Sisas wa palng ari tu watnom wampwam yikak wris alkilen a kil aroaro wonel a al okipma rka pa. Atom kil aklewen la, “Ake kipm ukipma. Ipma akipmen ti kakiren paipm ai, ti ake kipm atning yangkipm a tu pekg ariwopm la kupm am wrekg ike.”¹⁵Atom wa kil wa la, “Kipm kai ngkli yangkipm wor a Maur Wailen ti niki tu wrong kin kipman yela kanokg pa!¹⁶Kol melnum ur kil ukipma atom kipm kulukel pa, mpa Maur Wailen kil ikuwiyel pa. Kol melnum ur ake ukipma pa, kil angkom or ya a kai anong paipm kolpa kai.¹⁷Melnum a ukipma pa, mpa Maur Wailen lkel kla alkil pa eng kil ik ntokg kweikwei ik plan titnongket a Maur Wailen pa. Ikga kil lken kla kolkil: ikga tu naren kupm ti atom ik ungkwan maur paipm, wa tu ikga oklala ik ok manet manet a tu ake awi ariwe pa a palng la wli ok a tu ti.¹⁸Kol tu rkul ul paipm aki tu il kweikwei paipm paipm a alm melnum amo pa, akentiwe mpa tu imo, kalpis. Kol tu elng wam ele tu melnum a numpet pa, ikga tu palng wor.”

Maur Wailen kil awi Sisas aye kaino kitnong

¹⁹Wailen Sisas kil la yangkipm pa naki tu watnom alkilen a kil aroaro wonel pa plalng atom Maur Wailen kil awiyel aye kaino kitnong. Atom tuwekg rpma ikgalen kweikwei wrongkwail pa.²⁰Tu watnom alkil a kil aroaro wonel pa tu kai angkli yangkipm yela tatu palpa. Wailen kil ak kwap nampokgenten, elng kla a ak plan titnongket a Maur Wailen pa eng ak titnongketel yangkipm a tu angkli pa.