Yeremia23
Osuku Onyu Nkpe Kuɔta Dii Kaamaa
1SAATE nwu niebuɛ alɛ, “Yɔɔsa bɔɔta bafoso bakpatɛ ba nikɔwɔɔsa, mansamiisa ni bafoso di sɛfa kaweekɔ nii!”.2Nkpo oso nnya ɔlaa wɔ di SAATE Israel Yaa nwu kobuɛ antɔkɔ ni bafoso bakpatɛ ba nikonyu ni batii nii alɛ: “Ta bitɔɔsamiisa ni babɔkɛɛ nii, bietososa ma biesifiko, minanyu ma ni kafɔɔ oso yi, kamayɔ lɛkanko n-wako ye di suoto ta lɛsaa kpile le biɛbla ni oso,” SAATE nwu niebuɛ.3“Ami omu nii kamasiisa bafoso nii ba niebu ni ndiki di nsɔ be mmuu di nfũ latososa ma lakpee nii, ninkplesa ma kafɔɔ n-wako sɛfa lɛma kaweekɔ, nfũ babalofo, mankpɛ mankyakaa ni di lɛpɔ kamɛ.4Kamayɔ bafoso bakpatɛ n-se ma kaanya. Mma nimakpa ma, di mmle mɔnɔmasinyɛkɛ ee difu dipɛ ma, ee kuonwii ayu nii,” SAATE nwu niebuɛ.5SAATE nwu niebuɛ alɛ,“Obe kɔwa, kamatakatɛ Owosola tinini katoo nta ni Dawid.Ɔka wɔ nimale ni sɛka di ninumbe kanya,ambla ni lɛsaa le niesiɛko ni ku nle ninlɛ ni di kasɔ nwu suoto.6Di obe nɔɔ kamɛ yi, Yuda kamawɛ didiki,Israel kafɔɔ kamasiɛ di atoko ɔkyɛ ole kamɛ.Nnya leyooto le babalɛɛ nwɔ ni alɛ:SAATE Ɔsaabla Tinini Loo.7SAATE nwu niebuɛ alɛ, “Nioso, obe kɔwa di batii dilɔbasimbuɛ ni alɛ, ‘Nwaako di SAATE nwu lɛnya akpe ni nkpa, nnwɔ niakpaa Israel batii adieko ni di Egipte,’8kafɔɔ bababuɛ alɛ, ‘Nwaako di SAATE nwu lɛnya akpe ni nkpa, nnwɔ niakpaa Israel batii aadieko ni di katookasɔ ku nsɔ be mmuu, di nfũ aatososa ma aakpee nii.’ Ni babasiɛ di mma bamu kasɔ suoto.”Yeremia Kanya Ɔlaa Kuɔta Ni Ɔlaababuɛtɛtɛ
9Ɔlaa di ɔlaababuɛtɛtɛ suoto:Otu nii ntoobiɛ kaamɛ nii;akufi nii amuu kotũtũkũ.Nte fɛle tasiɛntɛ,fɛle otii wɔ di nta ntoolenkee ni okle,ta SAATE nwuku sɛlaa nɔɔ klekle oso.10Kasɔ nwu leyii ku basɔnɔkpeetɛ;ta lɛkpaani nwu oso yi, kasɔ ntooklee keekoso,sɛfa nweekɔ nwu kafɔɔ di ɔfaafuu kamɛ ntookpi.Ɔlaababuɛtɛtɛ ntikanko osuku kpile nwumambla ko ni osie lɛma ɔkpɛ di onukwale ɔtanle kamɛ.11“Ɔlaabuɛtɛtɛ ku oletatɛ akyuu nwu anyɔ nnaa dibu bɛɛta Yaa;bia n-nya asiensiesaa lɛma nwu di olekatakɔ nii kamɛ,”SAATE nwu niebuɛ.12“Nkpo oso osuku lɛma kamabla kplɔkplɔ;babatososa ma makpee di ditunu kamɛ,nfa kafɔɔ babanɔɔ nɛ.Kamayɔ ɔlaa kpile n-wako ma di suotodi lɛlɛɛ le babananfi ma ni kootoko,”SAATE nwu niebuɛ.13“Di Samaria ɔlaababuɛtɛtɛ kamɛ yi,lanya lɛsaa lalaale le mmle:Baabuɛ sɛlaa baatɛ di Baal leyooto kamɛni baaleko batii nii Israel katũ baayu osuku nɛ.14Di Yerusalem ɔlaababuɛtɛtɛ kamɛ kafɔɔ yi,ntɔɔnya lɛsaa yɛkɛle ninwii:Baakpee asɔnɔ, ni baalaa sɛlaa ku afunu nɛ.Baakpee bakpileblatɛ nnɛɛ osie,di mmle di kuonwii dilaakyi ni di asiensiesaa nɔɔ suoto.Bamuu lɛma bate fɛle Sodom bɛɛtɛɛ;Yerusalem batii nte fɛle Gomora.”15Nkpo oso nnya ɔlaa wɔ di SAATE wɔ Ninlenke ni kobuɛ ni di ɔlaababuɛtɛtɛ nwu suoto alɛ:“Kamata ma manle alesaa ya ninkpe ni olomannyi kafɔɔ kɔfa kpile ntu,ta ɔlaababuɛtɛtɛ ba niekye ni Yerusalem oso yi,Yaa ɔtambu ntoobiɛ diebuo di kasɔ nwu kamuu suoto.”16Nnya ɔlaa wɔ di SAATE wɔ Ninleke ni kobuɛ ni alɛ:“Bitankyɔɔ ɔlaa wɔ di ɔlaababuɛtɛtɛ nwu kobuɛ mantɛ manta ye nii atoko;boobuɛ man-yiisa ye atoko ku kakyɔnkyɔ sisuku onyu.Mambuɛ asaaɔnya sɛlaa mankyeko mma bamu asibu kamɛ,sinankye ni SAATE nwu kanya kamɛ.17Mantoobuɛ mantɔtɔkɔ mba ninnyu mi ni nyakatãa alɛ,‘SAATE nwu kobuɛ alɛ: Bibawɛ atoko ɔkyɛ ole.’Mba bamuu kafɔɔ nintikanko ni situ lɛma atokopĩsaa nwu,mambuɛ alɛ, ‘Okpile kuonwii dilɔbawa ye di suoto.’18Kafɔɔ owe lɛma nitodiyila di SAATE nwu bawokalɛɛkɔalɛ ɔɔnya ee oonu ɔlaa nɔɔ?19Binyu lo, SAATE nwu afɛɛfɔkamakpɛ di ɔblɔ yakayaka kamɛ,kakitikɔ kamakpɛ kansoodi basiensietɛ nwu asi suoto.20SAATE nwu ɔblɔ dilɔbapɛkukple kusifi sɛmaadilaase di obe wɔ eeloo niotu nɔɔ disitikasaa nimuu ɔbla.Bibanu ni kasɔ klekledi ayi ya nikɔwa ni kamɛ.21Ntakpee ɔlaababuɛtɛtɛ ba mmle,kafɔɔ batookusako ɔlaa lɛma;ntakakatɛ lata ma,kafɔɔ baabuɛ sɛlaa baatɛ.22Kafɔɔ nse manyila di bawo kalɛɛkɔ nii yi,n-se batabayie sɛlaa nii lɛkya manta batii nii,mamunkĩisa ma kafɔɔ di sisuku kpile lɛma nwuku akpilesaa sɛsaabla lɛma nwu suoto.23“Lete nii ninle Yaa wɔ niɛtɛɛtɛɛ ni lete,ni diele Yaa wɔ ninkpe ni kaakyonkɔ nle?”SAATE nwu niebuɛ.24Otii owo kamafuo owofa di n-wofakɔalɛ namafuo nwɔ ɔnya?”SAATE nwu niebuɛ alɛ,“Diele ami nieyii osi ku kasɔ?”SAATE nwu niebuɛ.25“Ntoonu ɔlaababuɛtɛtɛ ba nimbuɛ kakyɔnkyɔ sɛlaa ku ofunu sɛlaa mantɛ ni di leyooto nii kamɛ. Mambuɛ alɛ, ‘Lasɛ kɔlaafɔ! Lasɛ kɔlaafɔ!’26Ɔmɛmbe di nle mmle kamadiɛ sĩtũ ɔkyɛ di balaatɛ ɔlaababuɛtɛtɛ ba mmle situ kamɛ, mba nimbuɛ ni mma bamu asibu kamɛ sɛlaa mantɛ ni?27Beenyu alɛ alaafɔ ya manka ni bawo kamata batii nii n-yee leyooto nii, fɛ mmle okle di bate lɛma layee ni leyooto nii diafe ni di Baal osumu kamɛ.28Bita ɔlaabuɛtɛtɛ wɔ ninsɛ ni kɔlaafɔ aka kɔlaafɔ nɔɔ, kafɔɔ bita nnwɔ ninkle ni ɔlaa nii abuɛ nwu di onukwale ole kamɛ. Diekye obe di sɛmɔɔbuu nkpe ɔbla ku kamɔɔ?” SAATE nwu niebuɛ.29SAATE nwu niebuɛ alɛ, “Diele ote di ɔlaa nii nte fɛle ɔtɔ, kute ni kafɔɔ fɛle ɔmankyĩ wɔ nimbibiɛ ni afuɔnkpaa wɛkyɛwɛkyɛ?30SAATE nwu niebuɛ alɛ, “Nkpo oso lɛtaka n-yɛ di ɔlaababuɛtɛtɛ ba nin-yu sɛlaa mankyeko ni bawo sɛkyɛ, mambuɛ alɛ ɔkyɛ nii siekye nii.31Nyu lo,” SAATE nwu niebuɛ alɛ, “Lɛtaka n-yɛ di ɔlaababuɛtɛtɛ ba nin-yɔ mma bamu sɛkplalomii mambuɛ ni alɛ, ‘SAATE nwu niebuɛ ni suoto.’32Nwaako, lɛtaka n-yɛ di mba nimbuɛ sɛlaa ku afunu alaafɔ mantɛ ni suoto,” SAATE nwu niebuɛ. “Mantɔkɔ batii nii, manleko ma katũ man-yusa osuku ku lɛkanta fukuti lɛma sɛlaa ku afunu, kafɔɔ ninkpee ma ee ndiki ma. Batii ba mmle nin-wɛ lɛsalɛsaa di suoto lɛma di lɛsaa kuninwii kamɛ,” SAATE nwu niebuɛ.SAATE Nwu Ɔlaa
33Nse batii ba mmle, ee ɔlaabuɛtɛtɛ ee oletatɛ owo, lɛkaalɛ fɔ alɛ, ‘Obe lɛsaa ninle SAATE nwu ɔlaa?’ kaalɛ ma falɛ, ‘Ɔmɛnlaa? Kamasĩ fɔ, SAATE nwu niebuɛ.’34Nse ɔlaabuɛtɛtɛ ee oletatɛ ee otii owo lebuɛ alɛ, ‘Nnya SAATE nwu ɔlaa,’ Kamananfi otii nwu ku leyo nɔɔ kamɛ batii kootoko.35Nnya ɔlaa wɔ di obiala lee ntoobuɛ antɔɔtɔkɔ ni siɛwo ee ɔnantii nɔɔ alɛ: ‘Obe ninle SAATE nwu kanya didikibi?’ ee ‘Obe di SAATE nwu lebuɛ?’36Kafɔɔ diɛkaatɛ alɛ fɛɛlɛɛ ‘SAATE nwu ɔlaa’ diɛkyakaa nii, ta di otii biala ɔlaa omu ntookple nwɔ ni ɔlaa oso yi, beemunikĩisa Yaa wɔ ninkpe ni nkpa, SAATE Yaa loo wɔ Ninleke ni ɔlaa.37Nnya ɔlaa wɔ fantɔɔkaalɛ ni ɔlaabuɛtɛtɛ falɛ: ‘Obe ninle SAATE nwu kanya didiki le ɛɛta fɔ ni?’ ee ‘Obe di SAATE nwu lebuɛ?’38Kuntɛ mimbuɛ bilɛ, ‘Nnya SAATE nwu ɔlaa yi,’ nnya ɔlaa wɔ di SAATE nwu lebuɛ ni alɛ: Mimblako sɛlaa nwu ɔkpɛ bilɛ, ‘Nnya SAATE nwu ɔlaa,’ nu latɔkɔ ye nlɛ bitambuɛ bilɛ, ‘Nnya SAATE nwu ɔlaa.’39Nkpo oso, nwaako kamayee ye, nintososa ye kafɔɔ di anu nii diɛkyakaa ni di okpoo kplɛ wɔ lata ye ni ku bate lee.40Kamayɔ anunsɔsaa ya ninaa ni kaloo- sinunsɔ se ninaa ni kaloo, manabayee ni diidii n-wako di suoto lee.”The Seed Company