Ezekiyeli13
Imburi ku bavugishwa b’ibinyoma
1Ijambo ry’Uhoraho ryongera kumbwira riti:2“Mwana w’umuntu, vugishwa ubwire abavugishwa b’ibinyoma ba Isirayeli bariko baravugishwa muri iki gihe. Bwira abo bariko baravugishwa ivyo biyumviriye uti: ‘Nimwumve ijambo ry’Uhoraho!3Uku ni ko Uhoraho Nyeninganji avuze: Baragowe abavugishwa b’ibipfu, bakurikiza ivyo biyumviriye, ata co beretswe!4Ewe Isirayeli, abavugishwa bawe bameze nk’imfyisi ziyerera mu bihomoka vy’amazu.5Ntibigeze baduga ngo baje kuzibira ibihengeri vy’uruzitiro, ngo barusanure kubw’Abisirayeli kugira ngo ruze rube ruhagaze neza ku musi w’urugamba w’Uhoraho.6Ivyo berekwa si ivy’ukuri kandi n’ivyo babaragurira ni ibinyoma. Mbere n’aho Uhoraho atigeze abatuma, bavuga ngo: “Uhoraho aravuze,” kandi bakitega ko ashitsa ivyo bavuze.7Mbega inzozi mwarose si ibinyoma kandi indagu zanyu muvuga si ububeshi, igihe muvuga muti: “Uhoraho aravuze,” kandi ata na kimwe navuze?8None rero uku ni ko Uhoraho Nyeninganji avuze: Kubera amajambo yanyu y’ububeshi n’inzozi z’ibinyoma, nzobagwanya, ni ko jewe Uhoraho Nyeninganji mvuze.9Ukuboko kwanje kuzogwanya abavugishwa berekwa ibitari vyo, bakaragura ibinyoma. Ntibazoba mw’ikoraniro ry’ubwoko bwanje, ntibazoharurwa mu bana ba Isirayeli, canke ngo binjire mu gihugu ca Isirayeli. Ni ho muzomenya ko ndi Uhoraho Nyeninganji.10Ko bazimiza abantu banje, bakavuga ngo: “Ni amahoro” kandi ata yariho, ni nk’aho abantu boba bubatse uruhome rudakomeye, maze abo bavugishwa bakarusiga ishwagara.11Nuko rero, bwira abo basiga uruhome ko rugiye guhenuka. Hazogwa imvura y’isegenya, kandi nzorungika n’urubura ruhunguruke, hamwe n’umuyaga w’igihuhusi birusenyure.12None uruhome nirwasenyuka, mbega abantu ntibazobabaza bati: Ya shwagara mwarusigako iri he?’13None rero uku ni ko Uhoraho Nyeninganji avuze ati: ‘Mu burake bwanje, nzosuka umuyaga w’igihuhusi, ishavu ryanje rirungike urubura n’isegenya, bigwe bifise umukuba wo gusambura.14Nzosenyagura uruhome mwasize irangi ryera, ndaruryamike hasi, umushinge warwo usigare hejuru. Nirwahenuka, muzorutikiriramwo; kandi muzomenya ko ndi Uhoraho.15Nuko nzoba nimariye ishavu kuri urwo ruzitiro no ku barusize iryo rangi. Nzobabwira nti: Uruzitiro ruragiye, kandi n’abarusize ishwagara bajanye na rwo,16ni bo bavugishwa b’ibinyoma ba Isirayeli bavugishwa ibinyoma i Yerusalemu, bakerekwa ivy’amahoro kuri ho kandi ata yariho, ni ko jewe Uhoraho Nyeninganji mvuze.’17Ubu na ho, mwana w’umuntu, burira abakobwa b’ubwoko bwanyu bavugishwa ivyo biyumviriye. Vugishwa ubaburire18ubabwire uti: ‘Uku ni ko Uhoraho Nyeninganji avuze: Haragowe abagore bajishira udukomo tw’ubukonikoni ku maboko yabo, bakibaririra imyitwikiro y’uburebure butandukanye ku mitwe yabo kugira ngo bikwegereko abantu. Mbega mwibaza ko muzokwikwegerako ubuzima bw’abantu banje mutikwegeye ukuranduka kwanyu?19Mwarangayishije mu bantu banje kubera urushi rw’ingano n’akamanyu k’umutsima. Mwahenze abantu banje bumvirije ibinyoma vyanyu, mwica abatopfuye, mukingira abari bakwiye gupfa.20None rero uku ni ko Uhoraho Nyeninganji avuze: Nzogwanya ubukomo bw’ubukonikoni bwanyu mufatisha abantu banje nk’inyoni, ndabucagagurire ku maboko yanyu; nzobohora abantu mwateze nk’inyoni.21Nzotabagura imyitwikiro iri ku mitwe yanyu, nkize abantu banje mu maboko yanyu, kandi ntibazosubira kugwa musi y’ububasha bwanyu. Ni ho muzomenya ko ndi Uhoraho.22Kubera mwaciye intege imitima y’abagororotsi n’ibinyoma vyanyu, igihe jewe ubwanje ntari nabateye imibabaro, kandi kubera mutera intege abanyakibi ngo ntibave mu nzira zabo mbi ngo bakize ubuzima bwabo,23ntimuzosubira kugira izo nzozi z’ibinyoma, canke ngo musubire kuragura. Nzokiza abantu banje ndabakure mu maboko yanyu. Ni ho namwe muzomenya ko jewe ndi Uhoraho.’ ”Biblica, Inc.