गलाती6
1माआं पाव्हीइला, जर एखो माहुंउं गुनाम तोआयो, ताहां तुमू जें आत्मिक होये, नम्रता वाईं एहेला माहुंहूं सांबाला, आन तुमू सोताहा बी गुनाम ने पोड़ुहूं जोवे कोत जाबालीत रोवा.2तुमू एकान एकाआ वोजू उसला, मोन्ज्ये एहें कोइत तुमू ख्रिस्ताआ नियम पुरु कोअहा.3काहाके जर एखु किज कायनाहां तेबी सोताहा आंय बी की तेबी होंव कोत सोमजेहे, ताहां तो सोताहा दोका खाहे.4तिहीं वाईं हारेक जोओं जिवज्योअ काम फारकीत लेअहूं जोवे, आन ताहांज बिहीराआ नाहां, पोन सोताआ बाप्तिमेहें तियाहा वोडाय कोइलोअ सान्सो जोड़े.5काहाके हारेक जोओंहों सोताआ वोजू आखलुहूं पोड़े.6जियाहा वसनोअ शिक्शण जोड़ेहे, तों तियाआ आखी हाजी वस्तुमेहें वसन सिकाड़नाराहा बी सामिल कोअहूं जोवे.7दोकू मा खाहा; देवोहो कोडोज फोगू नाहां बोणावीत सेकतो. काहाके, माहुंउं जों किबी ओएहे तोंज वाडेहे.8जों सोताआ शरीरोअ काजे ओएहे, तों तियाआ शरीरो वाईं मोतोअ फल वाडीत टोलू कोए; आन जों आत्माआं काजे ओएहे, तों आत्मा वाईं हादाफल्याआ जिवनोअ फल वाडीत टोलू कोए.9आपू हाजे कामे कोइलाम उजगाय ने कोअहूं जोवे, काहाके जर आपू याम ढिल्ले ने पोड़ो ताहां बोराबर वेलेपोअ फल वाडीत टोलू कोअहूं.10तियाहा काजे जेतो ओत सेके तेतो आपू आखाअरी हाजोज कोअहूं जोवे, खास कोइत विश्वासी पाव्हीइलांअरी.11आंय सोताआ आथोवाईं केहेलाहा वोडा वोडा आक्शरोमेहें तुमुहूं लेख्योहो तों पाला!12जे माअहें उपरसोल्यू देखावू कोअहूं होदतेहें, तेंज तुमू खतना कोअहूं जोवे कोत दाबाव टाकतेहे, तेंबी काहा काजे के, ख्रिस्ताआ क्रुसखांबोअ वाखरी तियांहां सतावणी ने ओवुहूं जोवे कोत.13आन खतना कोअनारे सोताहा ते कायदाआ पालन नाहां कोअते, पोन तुमाआं उपरसोल्या देखावाआ वोडाय कोइलोअ काजे तें तुमाआं खतना कोआड़ुहूं होदतेहे.14आपाआ प्रभु ईसु ख्रिस्ताआ क्रुस खांबोअ वोडायीइ सिवाय आंय किहाआज वोडाय ने कोओ; तियाआ क्रुस खांबोअ वाखरी दुन्या माआं नजरेम मोयीही आन आंय दुन्याअ नजरेम मोयुहू.15एखाआ खतना ओवोय नेत ने बी ओवोय तियाआ कीज महत्व नाहां, पोन नोवो बोणुहूं जोवे ओंज महत्वाआ होय.16आन जेते जोएं या कायदापोअ सालतेय तियांपोअ आन देवोअ इस्राएलो पोअ शांती आन दया ओवती रोअहूं जोवे!17आगाड़ी रोत कोडोज माहूं दुख मा देहा, काहाके आंय ईसुउ निशाणी माआं डिलोपोअ लेत फिरोहो.18माआं पाव्हीइला, आपाआ प्रभु ईसु ख्रिस्ताआ मेरवानी तुमाअरी रोअहूं जोवे. आमेन!
The Word for the World International