प्रेशित19
1जेहेलाम अपुल्लोस करिन्थमेहें ओतू, ताहां पौलुस उसर्याआ आखा मुलखोम रोत इफिसोमेहें आयू. तिहीं थोड़ाक सेलाहा पालित कोइत2तियांहां कोयो, “केहें तुमुहूं विश्वास कोइलाअ वेले पवित्र आत्मा जोड़्यू?” तियें तियाहा कोयो, “आमू ते पवित्र आत्माआं बाप्तिमेहें गोठ बी नाहां उनाअया.”3तिये तियांहां कोयो, “ताहां तुमू कोडाअ बाप्तिस्मा लेदो?” तियें कोयो, “योहानोअ बाप्तिस्मा.”4पौलुसे कोयो, “जो माआं फासाड़ी आवनारु होय, तियाआ पोअ मोन्ज्ये ईसु पोअ विश्वास कोअजा, एहें कोत योहाने मोन फिरावीलाअ बाप्तिस्मा आप्यो.”5ओं होंबलीत कोइत तियां प्रभु ईसुउ नावोमेहें बाप्तिस्मा लेदो.6जेहेलाम पौलुसे तियांपोअ आथ मिक्यू, तेहेलाम तियांपोअ पवित्र आत्मा उतर्यू, आन तें जुदी-जुदी बाशा गोगे वोल्ये आन भविश्यवाणी कोए वोल्ये.7ते लगबग बारा माटी ओता.8तो यहुदी आराधनालयोमेहें जात कोइत तीन मोयना जाआं हिम्मते वाअहीं गोगतू रोयू, आन देवोअ राजोअ बाप्तिमेहें गोठी कोअतू आन समजाड़तू रोयू.9पोन जेहेलाम थोड़ेक माअहें कुंगे ओत कोइत तियाआ ने मान्ये पोन माअहुंउं आगाड़ी या मार्गाहा खाराब कोने वोल्ये, ताहां पौलुसे तियांहां सोड़ी देदेन सेलहांहां आलाग कोइत लेदा, आन दाडीइज तुरन्नुसोअ शाड़ामेहें गोठी कोताप्या कोअतुतो.10बेन वोरह्ये जाआं एहेंज कोइत सालतो रोयो, तेतोज नाहां पोन आसियामेहें रोनारा, यहुदी आन युनानी यां आखाज प्रभुउ वसन उनाइत लेदो.11देव पौलुसोअ आथोवाअहीं ओकल ने पुरे एहेलेहे कामे देखाड़तुतो.12तेतोज नाहां पोन रुमाल नेत आंगड़े तियाअरी हारीत कोइत मांदवाड़्यां पोअ टाकतेते, आन तियांआं बिमारी जाती रोतीते; आन पुते तियांमेहें रोत निहीत जाया कोअतेते.13पोन थोड़ेक यहुदी जें मोतीरते फिरतेते, एहेलोह कोए वोल्ये के जियामेहें पुते ओय तियापोअ प्रभु ईसुउ नाव एहें कोत कोइत फुकीइलो, “पौलुस जिया ईसुउ परसार कोअहे, तियाआज आंय तुमुहूं शप्पत आपोहो.”14आन स्केवा नावोअ एका यहुदी मुख्य पुंजाराआ हांत पोर्या ओता, जे एहेंज कोअताते.15पोन पुते तियांहां उत्तर आप्यो, “ईसुहू आंय ओलखोहो, आन पौलुसोहो बी ओलखोहो, पोन तुमू कोडा होय?”16आन तिये माहें जियामेहें पुत ओतू तियांअहें गुगदीइतोज आयोन तियांहां ताबम कोइत, तियांहां एहेलुहू तारास कोआड्यू के ते दुखाअया आन नागराज तिया कोअमेहें रोत निहीत गुगद्या.17ए गोठ इफिसोम रोनारा आखा यहुदी आन युनानीही बी मुंदू गोयू, आन तियां आखाहा बित लागी; आन प्रभु ईसुउ नावोअ वोडाय ओवी.18जियां विश्वास कोअयुतो, तियांमेहें रोत वार जोओं आवित कोइत जिवज्योअ कामोहों मानित लेदे आन कबुल कोअये.19जादू कोअनारामेहें रोत वार विश्वासी माअहें जिवज्योअ पुस्तके टोलू वालित कोइत आखाआ सामने पेटाड़ी देदे, आन तियांआं किंमत काड्यी ताहां, तें पोन्नास हाजार सांदीइ रुप्या एतीही निहींयी.20एहें कोइत प्रभुउ वसन सेक्ती वाअहीं पसरीइतो आन एकदम जबरदस्त वादतो गोयो.21जेहेलामेहें ए गोठी ओत सुकी ताहां पौलुसे आत्मामेहें ठरवीत लेदो के मकिदुनिया आन अखायामेहें रोत ओवतुज येरुसालेमोमेहें जांव, आन कोयो, “तिहीं जाअलोअ फासाड़ी माहूं रोम होयरोहो बी पालाअहूं जोवे.”22तियाहा कोत तिये आरी मदत कोअनारामेहें रोत तिमथ्या आन इरास्तुसोहो बी मकिदुनिया मोकलीत कोइत सोताहा तिहीं आसियामेहें थोड़ाक दिही रोत गोयू.23तियी वेले या प्रभुउ मार्गाअ वाखरी इफिस होयरोम वोडू दोंगू ओवू.24काहाके देमेत्रियुस नावोअ एक हुनार अरतिमिसोअ सांदीइ मंदिर बोणावाडीत कारागिरोहों खुब काम आप्या कोअतुतो.25तिये तियांहां आन एहेलीज वस्तुउ कारागिरोहों टोलू वालीत कोइत कोयो, “माट्यों, तुमुहूं मुंदू होय के, या कामों वाअहीं आपुहूं केताहा पोशा जोड़ताहा.26तुमू उनाअताहा के निस्त इफिसोमेहें एतोज नाहां, पोन पुरा आसियामेहें ओं कोय कोय ये पौलुसे डाहटा माअहुंहूं समजाड़्ये आन भटकाड़्येहे बी, के जें आथोअ कलाकारी होय, तें देव कायनाहां.27यावाअहीं ओमे निस्ती यी गोठी एतीज बिक कायनाहां के आपाअ या धंदाआ इज्जत जाती रोनारी, पोन महान देवी अरतिमिसोअ मंदिर बी एठो समजाये, आन जियीही आखो आसिया आन दुन्या पुंजेहे तियीइ किंमत बी जाती रोनारी.”28ते ओं उनाइत कोइत खोते वाअहीं खिजवात उठ्ये आन आअड़ी-आअड़ीइ कोने वोल्ये, “इफिसोवालाआं अरतिमिस, महान होय!”29आन पुरा होयरोमेहें पुरी गड़बड़ ओत गोयी, आन माअहें मकिदुनियावाला रेवासी गयुस आन अरिस्तर्खुसोहो जे पौलुसोअ आरी हेंगाती ओता, तियांहां तोइत लेदा, आन एकवार्येज नाटकशाड़ामेहें गुगदीत गोये.30जाहां पौलुसे माअहुंउं जागे मायते जाअलाआ कोअयो ताहां सेलां तियाहा जाअहूंन्ने देदू.31आसियावाला आधिकार्यों मेर्याआ पौलुसोअ थोड़ाक दोस्ती ओता तियां तियाआ जागे कोत मोकल्यो आन विनंती कोअयी के नाटकशाड़ामेहें जात कोइत दुख मा वेठीही.32तिहीं एखु कीज आअड़ीइतोतो आन एखु कीज कोअतोतो, काहाके पोन्सामेहें वोडी गड़बड़ी ओवतीते, आन वारुज माहुंहूं ते ओंज मुंदूज ने ओतू के आपू किहाअ काजे टोलू वोल्येहे.33ताहां तियां अलेक्झान्डरोहो, जियाहा यहुद्यांज उबू कोअयुतो, गर्दीम रोत आगाड़ी कोअयू. अलेक्झान्डरे आथोवाअहीं इशारु कोइत माअहोंअ सामने उत्तर आपीइलाअ कोशित कोअयीते.34पोन जाहां तियां जांइत लेदो के तो यहुदी होय, ताहां आखे एका आवाजोम पुरा बेन तास जाआं आअड़ीइतेज रोये, “इफिसोवालाआं अरतिमिस, महान होय!”35ताहरुउ होयरोअ मंत्री माअहोंहों शांत कोइत कोयो, “ए इफिसोवालां, कोडाहा ने मुंदू के इफिस होयरोअ महान देवी अरतिमिसोअ मंदिर, आन ज्यूसोअहें रोत पोड़ल्या सोका डोणोअ मुर्तीइ साकरीवालो इफिस होय.36तियाहा काजे यी गोठीइ नाकारनारो कोडोज नाहां ताहां तुमू ठावके रोवा, आन विण सोशे-समज्येज किज मा कोअहा.37काहाके तुमू यां माट्योहों लेतायाहा जे नाहां मंदिरोहो लुटनारा के नाहां आपाअ देवीइ निंदा कोअनारा होय.38जर देमेत्रियुस आन तियाआ जोड़ीदार कारागिरोओं एखाअरी भान्गड़ ओय ताहां कोर्ठ खुल्लो होय आन आधिकारी बी ताम होय; ताहां एकान एकापोअ आरोप लागाड़ीत सेकताहा.39पोन जर तुमू एखी बिहीरी गोठीइ बाप्तिम फुसीइलाअ कोअता ओय, ताहां ठरिवल्या पोन्सामेहें फैसलू लेवाय.40काहाके आज्याआ दोंगाअ किज कारण कायनाहां, ताहां आपुहूं यी गर्दी टोलू वोलीइलाअ किज उत्तर ने आपीत सेकाय, तिहीं वाअहीं आपापोअ दोश लागीत सेके एहेलिही बिक होय.”41एहें कोत कोइत तिये पोन्साहा वेरायतेहें कोयो.
The Word for the World International