1 Jon1
1Nage mey am̄ag den naqtēqtēg ne mayam en, wa nahap mey a kemem moyon̄teg, wa metgeh, tō met lōlhiy mi namtamem, wa matan̄qal mi namnemem en, kemem hole gatay tō agōh. Kē Nohohole Bēh.2Nēh nan maklō kē me hiy kemem, tō kemem metgeh kē, wa kemem mohohole gatay kē. Wa tō kemem vasemlō van hiy kimi nēh lap nan mey a motog tiwag mi Namam, wa Namam maklō kē me hiy kemem.3Nage mey a kemem mal et wa moyon̄teg vatag en, kemem vasemlō se van hiy kimi, tō so kimi qultiwag mi kemem, wa gēn qultiwag mi Namam, wa Ēntēn a Tigsas Kraēs.4Tō kemem yap van noyoy gōh hiy kimi, ak tō so namlaklak niōy lōlōwyeg kemem. 5Igōhkē nahal mey a kemem moyon̄teg den kē wa kemem vasemlō van hiy kimi en, so Ḡod, ikē namyeyen, wa tateh mēlēglēg hōnqal aē mi kē.6So gēn wo vap so gēn nuqultiwag galsi mi Ḡod, ba gēn wo vanvan lapgetō lemlēglēg en, tō gēn galgal ēwē, ba et damdam te nēhēyhēywē.7Ba gēn wo vanvan lemyeyen, qeleso Ḡod notog lemyeyen, tō gēn tuqultiwag galsi vēh, wa tō naday non Tigsas a Ēntēn Ḡod toh yak negengenyeg del nongēn.8Gēn wo vap so tateh bug mi gēn en, tō gēn galgal lok ēwē gēn, wa tō nēhēyhēywē tateh mi gēn.9Ba gēn wo mōl bug en, kē tēdēmveteg nimgungēn wa toh yak nubug del den gēn, veg kē netnenen wa kē taktig navatvat nonon so nidēm veteg nimgungēn del.10Gēn wo vap so gēn et gengenyeg te en, tō qeleso gēn vap so Ḡod en nagalgal, tō nohohole nonon tateh mi gēn.
The Seed Company