Hebrews10
1Wâyc gâyf njanh — six cungb ayx cayx taih wax đomc gongx nyăngz bah cloiz cuungv, max zâyf wax đomc senz nyăngz hanyh jangx — stiz muif nyăngv nzâyz wax đomc stanyb lanyh ninyh congx yâuc max hayh ayx phunz ninyh yămz stătx Zâu Tênb-Huungh wax đomc munh tuz clăkx clunh.2Năngđ coong tuz têx, six wax đomc canyx bongc nyăngz munh tuz stav đăngb ah hâyđ six caux nzuf, stiz max numđ năngx naih stoif nzof, ha nâyx max zâyf max zâuđ năngx zuc stungx stanyb lanyh nzof haz?3Six, wax đomc stanyb lanyh, yâuc cungb ayx phunz stiz săngx tauv muif nyăngv nyăngz stoif.4Wâyc ngoongh wăngh câu cloon yuungh congz nyăngz samđ six max hayh stav tuz stoif đangđ.5Wâyc nây, Zâu Jix-Tuz nzac bamh canz taih wax zanyf, Nănh songđ coong:“Zâu max oixstanyb lanyh cloon jax dlaih,six Mâyh bênc săngh ah nomz stinb a phunz Yaz;6Mâyh yâuc max oix wax đomcpu congx nyăngz tax huungđ cloon stav stoif nyăngz tax huungđ.7Yaz songđ coong: ‘Zâu Tênb-Huungh lex, mangc Yaz taih —âyz năngđ tuz ja coong tauv yaz yămz wax đomc stâub nyăngz wac —nongc ayx âyz Mâyh nyăngz zux ix.’”8Năngđ Nănh coong yămz wa cah zâyc nâyx coong: “Zâu Max oix wax đomc stanyb lanyh cloon jax dlaih, cloon wax đomc pu congx nyăngz tax huungđ, cloon stav stoif nyăngz tax huungđ. Nănh yâuc max oix wax đomc tax huungđ” (wâyc stiz cungb âyz gâyf njanh stungx),9Nănh zef coong: “Phanv mangc, Yaz taih nongc ayx âyz Mâyh nyăngz zux ix.” Nănh sâub nzuf lôx nyăngz wax đomc tauv laiv, nongc njăpc săngb nyăngz taih.10Păngc yămz wax cuyb zux ix, pănh bix tuz stav đăngb, wâyc Zâu Yê-su Jix-Tuz stungx Nănh nyăngz stinb nongc ayx stanyb lanyh ah hâyđ đokc bix caux nzuf.11Muif tauh stayb munh six muif noib stâuđ wa ayx stayb munh nyăngz cumh pâuz, yâuc njinh leox stungx stanyb lanyh max setc tiny, six wax đomc stanyb lanyh yâuc max naih laiv zanyf hayh stav tuz stoif đangđ.12Six Nănh wâyc stoif bix stungx stanyb lanyh ah hâyđ đokc yâuc tuz tauv stâyv quâyx, songđ tuz stâyv yămz Zâu Tênb-Huungh nyăngz byaoh phanx,13zu ayx tuz tauv laiv zanyf Nănh wax đomc yônz zaz zuc tăpx ănz Nănh nyăngz staux đi.14Wâyc păngc ah cuyb stanyb lanyh, Nănh bix ayx phunz wax đomc tuz stav đăngb nyăngz munh tuz clăkx clunh tauv stâyv quâyx.15Nzof Zâu Singx-Lingh lauf ayx zanyx manyf phunz pănh, yâuc coong:16“Nây six Yaz cloon stiz njăpc nyăngz nhlengc wacblătc wax đomc noib, Zâu coong,Yaz six zoz Yaz nyăngz gâyf ănz stiz nyăngz stimz nyâuđ cah njaf,Yaz yâuc ja ănz stiz nyăngz pyây lâyđ.”17Zef coong:“Yaz six max săngx tauv stiz ayx nyăngz stoifcloon stiz ayx huđ wax đomc.”18Wâyc zuc yămz laiv tix tuz quanyf wax đomc ayx longđ nyăngz stoif, yămz wa six max zâuđ năngx zuc stungx stanyb lanyh nongc stav stoif.19Wâyc nây, yâuf pez lex, păngc Zâu Yê-su nyăngz samđ pănh bix hayh tuz pungx stimz nzac wax đomc đăngb zeengh nyăngz tinc,20Nănh coib phunz pănh ah stinz săngh nyăngz săngb jau clăngv quaix wax tungđ buyx ninyh, nây six cănh Nănh nyăngz stinb,21yâuc ayx ah tauh stayb munh năngx lub quaix cun yămz Zâu Tênb-Huungh nyăngz pyau,22wâyc nây pănh oix zuc neetb stimz zen năngx tingc, nongc samđ stav đăngb huđ nyăngz stimz nyâuđ, yâuc nongc womz đăngb đaox dlăngc nyăngz stinb a, bix ninyh yămz stătx Zâu Tênb-Huungh.23Pănh oix zuc nzauf năngx tăngđ pănh nhlimc nyăngz njih mungc năngx gâyf plungh plănb, wâyc nyunc wac wax Tauh six neetb stimz.24Pănh oix zuc lanh jămđ lanh phunz hayh naih nyâuđ lanh stăngz lanh yâuc ayx gongx nyăngz jau,25Năngx gâyf queengx pănh căpx dlonf nyăngz jau cayx năngđ naih ah phanx munh queengx quênx nâyx, plănc taih six oix zuc lanh oonz lanh nyăngz nyâuđ, nyâuh phătc zâu nyăngz noib taih tauv stătx ayx năngđ laix, yâuc oix zuc căpx dlonf năngx yongb năngđ wa nâyx.26Wâyc năngđ coong pănh tuz pâyz nzuf senz gâyf bix lauf năngx cah đanyc ninyh ayx longđ stoif, six max naih stanyb lanyh nongc stav tuz stoif nzof gôh,27Six cungb zuc zu tauv senz cumh nzav nzongf nyăngz zuc stămđ stoif, bix nongc hongđ nzongf nyăngz tâuf pu, six tuz bênc săngh nongc pu Zâu nyăngz yônz zaz wax đomc tâuf.28Tinyh phanv laiv lanh ayx longđ Mô-sê nyăngz gâyf njanh, bix naih iz pôz lanh munh ayx zanyx manyf, six tayc max tuz hâuđ lênh.29Nyâuh nyâyh mungv jađ, laiv lanh munh zaiđ Zâu Tênb-Huungh nyăngz Toonz, yâuc stunx njăpc nhlengc wac nyăngz samđ nongc ayx naih wâyx — six păngc wax cuyb samđ, nănh bix tuz stav đăngb — yâuc mangc stam Singx-Lingh nyăngz pôz, wax tauh munh six payh tuz zuc tingc stoif niđ ayx năngđ laix?30Wâyc pănh pâyz tuz coong nâyx đomc wac wax Tauh, coong: “Clao yônz six yămz Yaz; Yaz six senz clao.” Zef coong: “Zâu six stămđ Nănh nyăngz pec stingx.”31Năngđ nây, zuc tuih nzac stâyv quâyx săngh wax Tauh Zâu Tênb-Huungh nyăngz puf six senz cumh nzav nzongf!32Oix zuc săngx tauv cah đangc noib, six nyâuh ah yac tuz siux gwăngz wax đomc noib, nyâuh yâuc zuc tanyđ zâuđ lub nzongf, zuc pongh đuungx huungđ zâuđ nanc,33ah zanyf yâuc zuc tanyđ munh toongx songx pib mađ, yâuc zuc ayx huđ ănz, ah zanyf yâuc zuc cloon wax đomc pongh zuc ayx huđ năngđ nâyx nyăngz munh songc tanyđ zâuđ.34Nyâuh yâuc hâuđ lênh wax đomc yămz nzauh nyăngz munh, yâuc numđ nyađ tanyđ munh zab nyâuh nyăngz jax toongx, wâyc pâyz tuz coong nyâuh naih năngx gongx quaix nyăngz jax toongx yâuc stâyv quâyx yămz.35Wâyc nây nyâuh năngx gâyf quanyf nyâuh zen tingc nyăngz jau, nây six senz hayh tuz stipx lub nzongf nyăngz sâuđ nyâyc.36Nyâuh six oix zuc nongc nyâuđ tanyđ, phunz tauv ayx tuz âyz Zâu Tênb-Huungh nyăngz zux ix, nyâuh songđ hayh tuz stipx nyunc phunz nyăngz phănc.37“Wâyc max naih lauh,năngx taih wax Tauh six taih, Nănh yâuc max ngaih.38Yaz nyăngz peengh stimz munh six păngc zen stimz bix săngh;six năngđ coong laiv lanh winb đangz, Yaz nyăngz mengc hoonh six max numđ nyađ nănh.”39Nzof pănh six max zâyf winb đangz ninyh nongc zuc mêtc nyăngz munh, plănc taih pănh six oix zuc yămz zen stimz phunz mengc hoonh hayh tuz njâuv.
FAR EAST BROADCASTING COMPANY