Лев15
1Господь Моисей ден Ааронлан каласен:2«Израиль калыклан ойлыза: иктаж пӧръеҥ тарманже гыч йоген лекмаш дене черланен гын, тиде йоген лекмаш ару огыл.3Теве йоген лекмашлан кӧра пӧръеҥын ару огыл улмыж шотышто [закон]: кеч-могай йоген лекмаш – чарныде йогышо але жапын-жапын йогышо – пӧръеҥым ару огылым ышта.4Кеч-могай вакшыш, кушко тыгай йогымашан еҥ возеш – ару огыл; кеч-могай арвер, кудын ӱмбаке [йогымашан еҥ] шинчеш – тыгак ару огыл.5Кӧ тудын вакшышыж дек тӱкна, вургемжым мушшаш да шкежат вӱд дене мушкылтшаш. Кас марте тудо ару огыл лиеш.6Кӧ йогымашан еҥын шинчыме иктаж-могай арвер ӱмбаке шинчеш – тудат вургемжым мушшаш да вӱд дене мушкылтшаш. Тыгай еҥ кас марте ару огыл лиеш.7Кӧ йогымашан еҥ деке тӱкна, тудо вургемжым мушшаш да вӱд дене мушкылтшаш. Тыгай еҥ кас марте ару огыл лиеш.8Йогымашан еҥ ару еҥ ӱмбаке шӱвалеш гын, тудыжо шке вургемжым мушшаш да вӱд дене мушкылтшаш – кас марте тудо ару огыл лиеш.9Йогымашан еҥын шинчын кайыме кеч-могай ӧртньӧрат [кас марте] ару огыл лиеш.10Кӧ йогымашан еҥын йымалныже мо лийме дек тӱкна – тудат кас марте ару огыл лиеш. Кӧ тиде арверым нумал кая, тудо шке вургемжым мушшаш да вӱд дене мушкылтшаш. Ты еҥ кас марте ару огыл лиеш.11Йогымашан еҥ, кидшым мушде, кӧ деке тӱкна – тудо еҥ шке вургемжым мушшаш да вӱд дене мушкылтшаш. Кас марте тудо ару огыл лиеш.12Йогымашан еҥ шун ате деке тӱкна гын, тиде атым шалатыман, а пу ате деке тӱкна гын, тудым вӱд дене мушман, [да тудо ару лиеш].13А кунам йоген лекмаш дене орланыше еҥ йогымашыж деч паремеш, тунам тудо эше шым кечым вучышаш. Тидын деч вара тудо вургемжым мушшаш да йогын вӱд дене мушкылтшаш. Тыге тудо ару лиеш.14А кандашымше кечын тек кок кедым але кок самырык кӧгӧрченым налеш да, Господь ончыко Юмо дене вашлийме омаш деке толын, нуным иерейлан пуа.15Тек иерей нине кайык гыч иктыжым сулык верч надырлан, а весыжым йӱлалтен пуымо надырлан конда. Тыге иерей Господь ончылно тудым йоген лекмашыж деч эрныкта.16Иктаж пӧръеҥын нӧшмыжӧ йоген лектеш гын, тудо уло капшым вӱд дене мушшаш. Кас марте тудо ару огыл лиеш.17Нӧшмӧ логалме кеч-могай вургемым, коваште гыч ыштыме арверым вӱд дене мушман. Кас марте нуно ару огыл лийыт.18Пӧръеҥ ӱдырамаш дене возеш да тудын нӧшмыжӧ йоген лектеш гын, нуно коктынат вӱд дене мушкылтшаш улыт. Кас марте нуно ару огыл лийыт.19Кунам ӱдырамашын тылзашыже годым вӱр йога, тудо шым кече ару огыл лиеш. Кӧ тудын деке тӱкна – кас марте ару огыл лиеш.20Ӱдырамашын тылзашыже кайыме жапыште чылажат, кушко тудо возеш але шинчеш, ару огыл лиеш.21Кӧ тудын вакшышыж деке тӱкна – шке вургемжым мушшаш да вӱд дене мушкылтшаш. Кас марте тудо ару огыл лиеш.22Кӧ ӱдырамашын шинчыме иктаж арверже дек тӱкна, тудо шке вургемжым мушшаш да вӱд дене мушкылтшаш. Кас марте тудо ару огыл лиеш.23Иктаж-кӧ тудын вакшыштыже але шинчыме верыштыже улшо иктаж-мо деке тӱкна гын, тиде еҥ кас марте ару огыл лиеш.24Тыгай ӱдырамаш дене пӧръеҥ мала гын, ӱдырамашын ару огыл улмыжо тудын ӱмбалнат лиеш. Тудо шым кече ару огыл лиеш, тудын вочмо кеч-могай вакшышат ару огыл лиеш.25Ӱдырамашын тылзашыже огыл годым шуко кече вӱр йога але тылзашыже годым йогымо деч шукырак кече шуйна гын, ты жапыште тудо, шке тылзашыже годсо семынак, ару огыл лиеш.26Кеч-могай вакшыш, кушко ӱдырамаш вӱржӧ йогымо годым возеш, тылзашыже годсо семынак, ару огыл лиеш. Кеч-могай арвер, кудын ӱмбаке тудо шинчеш, тылзашыже годсо семынак, ару огыл лиеш.27Тыгай вакшыш але арвер деке тӱкнышӧ еҥ ару огыл лиеш – тудо вургемжым мушшаш, шкежат вӱд дене мушкылтшаш. Кас марте ты еҥ ару огыл лиеш.28Ӱдырамашын вӱржӧ йогымым чарнымеке, тудо шым кечым вучышаш. Вара тудо ару лиеш.29Тек кандашымше кечын тудо кок кедым але кок самырык кӧгӧрченым налеш да Юмо дене вашлийме омашыш пурымо верыш иерей деке конда.30Тек иерей ик кайыкым сулык верч надырлан, весыжым йӱлалтен пуымо надырлан конда. Тыге иерей тиде ӱдырамашым йоген лекмашыжлан кӧра ару огыл лиймыж деч Господь ончылно эрныкта.31Израиль калыкым ару огыллык деч арален шогыза. Вет нунын коклаште улшо святой верем шке ару огыл улмышт дене амыртат гын, нуно колат».32Йоген лекмаш дене черланыше але нӧшмӧ йогымо дене ару огыл лийше пӧръеҥ, тыгак тылзашыже кайыме жапыште ӱдырамаш – чыла пӧръеҥ ден ӱдырамаш, кудыштын йоген лекмаш лийын, тыгак ару огыл ӱдырамаш дене малыше пӧръеҥ шотышто закон тыгай.
Institute for Bible Translation, Finland