Лекм10
1Господь Моисейлан каласен: «Фараон деке кае. Ӧрыктарыше пале-влакем фараон ден тарзыж-влак ончылно ончыкташ манын, Мый нунын шӱмыштым вустыкым ыштенам.2Тыге те Мыйын Египетым орландарымем, тушто ончыктымо палдарыше пале-влакем нерген шке эргыч ден уныкада-влаклан каласкален кертыда. Тек палаш тӱҥалыда: Мый Господь улам!»3Моисей ден Аарон фараон деке каеныт да каласеныт: «Господь, еврей-влакын Юмышт, тыге ойла: ”Мыйын ончылнем эше кужун торешланаш тӱҥалат мо? Мыйын калыкем Мыланем кумалаш колто.4Калыкем от колто гын, эрла [тиде жапыштак] тыйын [уло] кундемышкет шурнышырчык-влакым колтем.5Шурнышырчык-влак мландым тыге леведыт, эсогыл мланде кояш ок тӱҥал. Шолем деч вара тыйын [мландыштет] мо кодшыжымат нуно чыла кочкыт, пасуштет кушшо чыла пушеҥгымат нултен пытарат.6Шурнышырчык-влак тыйын пӧртет-влакым, тарзет-шамычын пӧртыштым да чыла египет калыкын пӧртыштым темат. Тыйын ача-кочатат, нунын ачаштат мландымбалне мыняр иленыт – кызыт мартеат тыгайым ужын огытыл”». Вара [Моисей] савырнен да фараон деч лектын каен.7Тунам фараонын тарзыже-влак озаштлан каласеныт: «Кужун мо тудо мемнам орландараш тӱҥалеш? Колто нине еҥ-влакым, тек нуно Господьлан, шке Юмыштлан, кумалыт. Тый эшеат от уж мо: Египет пыта».8Моисей ден Аароным фараон деке пӧртылтеныт, да фараон нунылан каласен: «Кайыза, Господьлан, шкендан Юмыланда, кумалза. Кумалашыже кӧмыт каят?»9Моисей каласен: «Ме йоча ден шоҥгыеҥна, эрге-ӱдырна, шорык да ушкална дене пырля каена, вет Господь [Юмыланна] ме пайремым ыштена».10Фараон нунылан игылт вашештен: «Тек тыге лиеш, Господь тендан дене пырляк лийже ыле! Мый тендам колтем лийже, но йоча ден ӱдырамаш-влакланже молан кайыман? Тендан шонымашда уда.11Уке, те пӧръеҥ-влак гына кайыза да йодмыда семынак Господьланда кумалза». Да нуным фараон деч поктен луктыныт.12Господь тунам Моисейлан каласен: «Кидетым Египет мланде ӱмбаке шуялте: Египет мландышке тек шурнышырчык толын темеш да мландымбалысе чыла кушкылым, [пушеҥге саскам] – шолем деч вара мо кодын – чыла кочкын пытара».13Моисей Египет мланде ӱмбаке пондыжым шуялтен, да Господь тиде мландышке эрвел мардежым колтен. Тудо кечыгут, йӱдвошт пуэн да эр лишан шурнышырчыкым конден.14Шурнышырчык уло Египет мландым темен, пӱтынь Египет мланде мучко тудо моткоч шуко лийын. Тынар шурнышырчык тымарте лийынат огыл, тиддеч варат тынар огеш лий.15Шурнышырчык пӱтынь мландым койдымын леведын. Шолем деч кодшо чыла кушкылым, пушеҥге саскам кочкын пытарен. Египет мланде мучко пушеҥгыштат, нурысо шудыштат нимогай ужарге кодын огыл.16Фараон Моисей ден Аароным вашкен ӱжыктен да каласен: «Тендан Господь Юмыда ончылно да тендан ончылно мый сулыкыш пуренам.17Эше ик гана мыйын сулыкем кудалтыза да, мыйым тыгай колымаш деч утарыже манын, шке Господь Юмыланда кумалза».18Моисей фараон деч лектын да Господьлан кумалын.19Господь вес вел гыч пеш кугу касвел мардежым колтен, тудыжо шурнышырчыкым Йошкар теҥызышке наҥгаен да вӱдыш кудалтен. Египет мланде мучко ик шурнышырчыкат кодын огыл.20Но Господь фараонын шӱм-чонжым ӱскыртымак коден, да тудо Израиль эрге-влакым колтен огыл.21Господь Моисейлан каласен: «Кидетым кава дек шуялте – Египет мландыште кидшӱм дене шижаш лийме тӱп пычкемыш лиеш».22Моисей кидшым кава дек шуялтен, да пӱтынь Египет мландым кум кечылан тӱп пычкемыш авалтен.23Кум кече нуно икте-весыштым ужын огытыл, пӧртышт гыч лектын коштын огытыл. А Израиль эрге-влакын чыла илемыштышт волгыдо лийын.24Фараон Моисей [ден Аароным] ӱжыктен да каласен: «Кайыза да шке Господь [Юмыланда] кумалза. Тек тыште лач тыгыде да шолдыра вольыкда кодеш, а йоча ден ӱдырамаш-влак тендан дене пырля каят».25Но Моисей каласен: «[Уке,] мемнан Господь Юмыланна йӱлалтен пуымо да моло вес надырым кондаш манын, мыланна вольыкнамат наҥгаяш эрыкым пу.26Тек мемнан дене пырля кӱтӱ-влакнат каят, иктат ынже код. Вет тушечын ме Господь Юмыланна кондышаш надырым налына. А тушко миен шуде, Господь [Юмыланна] могай надырым кондышаш улына – ме огына пале».27Но Господь фараонын шӱм-чонжым ӱскыртымак коден: тудо Израиль калыкым колташ келшен огыл.28Моисейлан фараон каласен: «Кай тышечын да тетла мый декем ит тол. Мылам эше ик гана тыйым ужаш логалеш гын, тудо кечынак колет».29Моисей каласен: «Тый кузе каласенат, тугак лиеш. Тетла мый тый декет ом тол».
Institute for Bible Translation, Finland