Uremu8
1Nátidügü hamuga buguya, le tátagüdün núguchu! Lun hamuga dan lan le nadunragun buma ǘmada, aba hamuga nachuurunibu úouga kaba lan adüga bula nau;2nanügüñadibu hamuga túbiñoun núguchu, aba hamuga nebelaagüdünibu, buguya hamugati arufudaha nun. Nátagüdüña hamuga tubuidun-agei diwéin bun luma tira tin ninadüri güranáda.3Rulei lubaünan lábugiñe nichügü, lóuburaname lau lóunwenren!4Füramase humá nun hiñaruñu Herusalénna, luagu madüraagun hubéi lan lidabagu númari. Ígira huméi lun larumugun darí lásaarun.5Katoun san to, to ñǘbuinboun lídangiñe fulasu mageirawati, balañu légewagu túmari? Ligía: Agagudaha numuti lábugiñe aban tídibu mansana: Le ñein lubéi tagaridabu búguchu; le ñein lubéi tágurahabu búguchu.6Barübana bürüñu tidan banigi, barübana bürüñu luagu barüna! Héreti ínsiñeni kei óunweni; dereti emeidini kei umúahaü. Ítara liña lisü ínsiñeni kei watu gemeti!7Ni lidunari sun barana, lásiñarubei ínsiñeni éñegucha; ni duna éibaaguati lásiñarubei giñe éñegucha. Anhein hamuga abusenra aban gürigia lasansiruni sun lirisin luagu ínsiñeni, adügǘwarügübei bula lau.8Madagagili taniguagu wamulelua, kaba san wadüga tau danme hayabin amuriahoun?9Lun hamuga aban lan baríeiru tuguya, wábunaguña hamuga aban wáyelesi lauti pülata tóugiñe; lun hamuga aban lan bena tuguya, wafuraruñoun hamuga lau fulansu le hibúari.10Ítara niña kei aban baríeiru, ítara liña nuri kei wáyelesi. Ligía darí naali lubéi ugundani ligibugiñe lagu.11Ñeinñein bugaha aban beibei-agei lani Salomón Baali-amón. Aba lígiruni lábugiñe haríaahan óunigirutiña, dan le lidaanihali alubahani ábaha lederegerun kada aban milu seinsu le pülata lun.12Mílugubei seinsu ligía, bani, Salomón, bián san houn óunigirutiña, nuguya óunigirubarun nubeibei-agei!13Ígiraba lun naganbuni bumalali lurúeite fuluri-agei! Agurabahatiña wamadagu haganbuni.14Éibaaguaba númari, éibaaguaba kei aban usari, kei usari niburengili ligibuagu wübü buin lau íhemeni!
Bible Society of Honduras