Hiburuyi2
Naraanɛ Pɛ̃nɛba
1Aru nankɔ ɔ̃tɛ kaka jazɨng akɔrɔ u ãsisɨntɔ fɛ̃ɛm a vigbete shɔ matiu a Ɗa jaa yuuni, nɔgbete u yɛ vɔsi ɓa a nyabanni ɓa.2Ruu gbete Ɗajashonɛlapa ãu ɓɛuruyi yɛ tasi tɛttɔ nɛ pɛ tɔ̃vɨn, shɔgbeteyi ji wesho ɓa ɗɔnɓayɛ ko i gɨnrɛni ɓa, i yɛ kpaa raaɓoonɛ gbete shɔ pɔ̃siyɛtɔ.3U yɛ kpaa naraanɛ kɛpikovi naa u ji wesho ɓa a ruu raanɛ pɛ̃nɛbamni ɓa viya? Uɓeyelapa au yuu ukɔ gaa shɔ ruu raanɛm gelinɛrɛ, shɔgbeteyi nta ruum au nya i tasiu tɛttɔ nɛ pɛ ruu tɔ̃vɨn.4Ɗalapa pɔ̃siu shɔshinɛkɨnti sɔ̃njo ai yuu ɓɛɛni, a nyaba vibiizaanɛ gbete pɛliyɛ tottot a vinɔlusinɛni, a sẽrẽ Suru wɔsɔ-wɔsɔ gbete au vɔsi shɔ nagbete kasiyɛ.Shɔ Gbete Tɛɛsiu Ɗekɨn Yɛnɛ Naraanɛ
5Koo jakɨnti sɔɔ gbete kaanɛm au nwanya au yuunim, Ɗalapa ji pɔ̃ Ɗajashonɛlapayi ɓa nɛ ikɔyi roo kpatirɛ aɗɔn ɓa.6Anɔgbete si pɛli nam, ji nagbete shɔ bee a laabeenɛ Ɗalapa nɛ:<<Gbee Ɗalapa, shɔzɛ ɔ̃kɛ iviya gbete a lɛri au yuuni viya;ji shɔzɛ gbãgbã weze, a koyuu ai bi ya?7A pɔ̃yitɛ sekaa i kpaa bassinɛ gbete ji yɛ Ɗajashonɛlapayi ɓɛɛ ɓa;A basiyitɛ kiriri,8a pɔ̃i kpatitɛ a yuu vi piti kpai.>>labeenɛm shanɛ Ɗalapa pɔ̃tɛ nɛi ɔ̃ kpati a yuu vi piti kpai;>> Vim tasitɛ wasa-wasa nɛu ɔ̃ kpati ayuu ko-iviya. U ji zɛ shɔwɔ dɔdɔrim tɔkɨn au roo kpati ayuu vi piti kpaini ɓa.9Ama vigbete u zɛyɛ ukɔ ɔ̃rɛ Yesɔ Ɗalapa pɔ̃rɛ sekaa u ɔ̃ fɛ̃ɛ̃ a Ɗajashonɛlapa ɗekɨn, nɔgbete a nyaba Ɗa tɔ̃vɨn shonɛ u vɔ a kopiya yuu. Dɔdɔrim u zɛutɛ shɔ ãu basinɛtɛ kiriri aru raaɓoonɛ gbete ɓoo au vɔnɛyɛ.10Si pɛ vitɔ̃vɨng aruviya Ɗalapa au shɛshi vi piti kpaiyɛ a pɔ̃rɛ vi piti kpai ɔ̃yɛ, a lɔrɛ u n ti jaayi i kpau basinɛtɔ. Aruviya Yesɔ kɔ ɔ̃rɛ shɔgbete teesiyi ɗekɨn yɛnɛ raanɛ.11Yesɔ sɔki shɔzɛ i ruuvinitɔ, ukɔ a shɔgbete sɔkiyi ruuvinini i Ɓeye gbete. Aruukɔ Yesɔ ji nta yusẽ ɓa u ɓainɛn jaayini ɓa.12A geli Ɗalapa nɛ,<< N yɛn geli n shɔbiiyi vigbete a pɛliyɛtɔ;N yɛn bɛlaatɔ ai ɗɔ ɔ̃nɛni13Yesɔ sha sɔ̃nnɛ,<<N yɛn ã sisɨn a Ɗalapa ɗɔbii.>>A sha wɔsɔn nɛ, <<Nkɔng yɛm a jaayini gbete Ɗalapa angyi-yɛni.>>14Aru nankɔ aru jaamiyi i pɛ shɔzɛ ai yɔpɔ a kpaa aɗɔn, Yesɔ tɛ shɔzɛ bi tɛjo nɔgbete i tɛyɛni. Pɛli vim nɔgbete au nyaba vɔnɛ yɛ lɛsi japɛ̃pɛ̃ɛ̃yɛ, shɔgbeteu kaka aɗɔn vɔrɔ yuuni,15a nyabankɔ fooyi gbete seti vɔnɛ sãyitɔ kalinaatɛ piti kpai.16Pɛ wasa-wasa Yesɔ ji pɔ̃si ɓa Ɗajashonɛlapayi naa ɓa. Ama pɔ̃sinaa pɛ Ibirayi laduru.17Shɔmkɔ tasitɛ u ɔ̃ naa ɓɛɛ shɔzɛyi kopinyaba shɔpiya, nɔgbete u ɔ̃riyi shɔ sisɨn ãnɛ a shɔra ntanɛ shɔlansi pẽnɛba au vishonɛ Ɗalapa, nɔgbete shɔ yɛ yaasi shɔ ruuviniyɛ.18Dɔdɔrim yɛ pɔ̃si shɔgbete shɔ ntai sisɨnyɛ naatɔ, aruviya u au yuu shɔ ntau sisɨntɔ, ɓooraa sɔntɔ.The Word for the World International