Ilawsiti15

1Malya tibreeteeb weet wint ajjabsitiit alaama rhan. Asarama malak asaramaat nasiibeeti geeb iifiina, taan bataah wꞌagiyaayt ikatiin. Taan bataah Ukwaasanaay igadabi timmiimti sooyeent alaamaata.2Naat gaat karooraati bhar nꞌeetiib ameeshwiyaab tꞌiiteena rhan. Baliin tudhhaniiwwa utimsaaliyooh kehiiwwa ansiramiyaan, batiiyooh oosmi ragimi kehii ansiramiyaan baliin, bareeh oobhari dar gadee rhan. Ukwaasana bareeh baasankwoob yhii,3aree baraah Ukwaasanaay ukishiya Muusaayt kaf kafiyaana, aree whooyt kaft kafiyaan:“Tiwaraataak wawinta aree ajaayibta,yaa Wꞌankwana Ukwaasana Wꞌalya.Isalalaayaak adilwa sidikwa ikatiin,yaa Whadꞌa kasseeh idamaneeb!4Yaa Wꞌankwana, aaw barook iraakw kiidi?Oosmook dehaay matuun iyaaw baadiib aabu?Baruuk oodꞌook mugaddaswa.Tushbooti shagaayuuk lawiyani sabbii,kassaah idehaya yꞌeetiitsuurook yꞌibid iyadna.” idiin.
5Oonaay harꞌii ashibibihoob, tibreeteeb eefeeb udiini gaw, tukheema tumugaddas hooy haayee, nigalee rhan.6Udiini gawii imalak yꞌasarama tinasiibi tꞌasaramaati geeb ifirꞌana. Baraah nhas halaka akwaya, buubi tootriin akwaya, dimꞌaraay shash iginheeyoohna kehii daasaaba.7Malya tidhhaniya tifadhigtee gaat, imalak yꞌasarama asarama dimꞌaraay kas Ukwaasanaay gadab atab tehii, aan igadab diimaabwa kassoohoobwa iikti iyadna.8Aree udiini gaw Ukwaasanaay matuuniiwwa yꞌakrireesoohwa kwaraar ataabi. Aree tinasiibi tꞌasarama imalak yꞌasaramaayeet faayamiyaaneeb ookiik, gaal han udiini gawi ishuumti adgiraab kiiki.

The Seed Company

https://app.library.bible/content/752fe0f7dfba7b5f