Citește APOCALIPSIS 1

APOCALIPSIS1

¹Re' Dios xuk'uhtaaj reh i Jesucristo chib'ih taqe jariik i k'isiin ma' nk'ularik, reh chi xuk'uhtaaj keh i raj kamanoom. Eh re' i Jesucristo xutaq'aaj chaloq i ruánjel chi ch'ob'ariik rub'ehel taqe re' reh i Juan i raj kamanoom.²Re' Juan xuq'or i korik chi riij taqe xrilow. Eh xuq'or wo' korik chi re' re' i ruk'uhb'aal i Dios re' xuch'ob' rub'ehel i Jesucristo.³Atoob' reh inilwik wach i wilik chupaam i huuj wili. Eh atoob' keh i ki-ib'irinik reh i k'uhb'aal wili eh inkinimaj chib'ih ruq'or i tz'ihb'amaj chupaam i huuj wili, ruum ilook' inooj eloq wach chib'ih i ruq'or. Re' Juan xutaq'aaj rusuqkiil kik'ux i wuquub' ch'uq chi aj nimaneel

⁴Re' hin i Juan, inutz'ihb'aaj reje ahuuj taq i hat i wuquub' ch'uq chi aj nimaneel wilkaat taq paruyuq'ul i Asia. Chak'ul taq i rotob'il, i suq kiil k'uxliis inchalik ruuk' i Dios, wilik cho najtir q'iij, wilik yu'naak, naa ruwihiik chi juneliik. Re' i ruyeew i wuquub' chi uxlab'al wilik chuwach i Dios paruloq'laj ye'aab'.⁵Eh chak'ul wo' taq i otob'il, suq kiil k'uxliis i ruyeew Jesucristo, re' i q'orol reh i korik re' i peet xwuktik chaloq chi k'achlik wach, re' wilik runimaal rajaawriik chikinaah i wilkeeb' chi reyil ayu' wach ak'al. Re' reh q'e' qohruk'ax, ruuk' i rukik'eel xutz'aj chu'nchel i qamahk.⁶Eh xuyeew qajaawriik chi hoj haa' pa runimaal rajaawriik, eh chi hoj k'amal b'eeh aj tiij parukamaj i Dios, re' raJaaw i Jesucristo. Re' ta wo' naq i reh ye'aroq ruloq'il, ye'aroq rajaawriik chi juneliik. Je' ta wo' naq re'.⁷Re' Jesucristo nah suutz' wilik na' chaloq ruka'peech. Chu'nchel i tinamit naa kilwiik wach. Naa wo' kilom wach i xib'anik ti' k'axik reh. Eh chu'nchel i tinamit wach ak'al naa rutib'iik kik'ux, naa koq'iim noq naakilom wach. Korik, je' ta wo' naq re'.

⁸Re' hin i peet, re' hin i rukuxiik wach, je' rukab' noq wilik i peet letra A i tz'apaab' wach letra Z, inki QaJaaw Dios nim rajaawriik, re' i wilik cho najtir, wilik yu'naak, naa ruwihiik chi juneliik. Jinaj ilooj xb'aan chi riij i Jesucristo

⁹Re' hin i Juan, qahermano qiib' taq awuuk' hoj junehtriik i runimaal rajaawriik i Dios. Eh hin haa' chi k'ulariik i ti' k'axik k'ahchi' taq ak'ulum i hat. Eh pan jinaj ye'aab' sutim ha' riij, Patmos rub'ihnaal, xinkiyeew cho pantz'ilom ruum i ruq'orariik i ruk'uhb'aal i Dios, ruum i ruq'orariik rib'iral i Jesucristo.¹⁰Je' wili xnuk'ul ar paruq'ijil i rulooq'jiik i QaJaaw. Noq wilkiin chi ri'sil rajaawriik i Santolaj Uxlab'al. Jinaj i kowlaj q'orik xb'aan cho chi wiij, xa je' chik inq'ajb'anik tuun,¹¹je' wili xuq'or cho weh: Re' hin i peet, re' hin i rukuxiik wach, re' taqe k'ahchi' awilom, cha tz'ihb'aaj pan jino'q huuj. Eh neenataq'aaj reje keh i wuquub' ch'uq chi aj nimaneel wilkeeb' paruyuq'ul i Asia, ar Éfeso, Esmirna, Pérgamo, Tiatira, Sardis, Filadelfia, Laodicea, inki.

¹²Re' hin xnusutej b'ila' wiib' chi rilariik awach inq'orinik cho weh. Inwilow pe', xawuquub' wo' chi ye'aab' kantela re' ruuk' i oro wilkeeb' ar.¹³Eh jinaj i je' ruwii' winaq wilik chi kixilak i wuquub' chi ye'aab' kantela re' re', koju' rooq poninaq i ruso'. Eh re' rusincho b'ak'lik chi' ruk'ux re' ruuk' i oro.¹⁴Re' rismaal naah xasaq chik je' rukab' i saq laj lana oon je' rukab' i saq suutz'. Eh re' taqe naq'wach xa kirob' rotik chik je' rukab' i xaq q'aaq'.¹⁵Re' taqe rooq xan reprotik chik je' rukab' i q'an ch'ihch' ch'ub'ik wach, korb'isamaj cho pan q'aaq'. Eh re' kowlaj q'orik xub'an chaloq xa je' chik inq'orik ruk'ihaal nim ha' xampojik chik.¹⁶Parusak'aaj q'ab' wilkeeb' i wuquub' chi ch'umiil. Eh jinaj ch'ihch' q'as ju' k'ul wilik ruq'asiil xelik cho panchii'. Re' rusaqumaal chii' wach xa je' chik rukab' i rusaqumaal i q'iij noq wilik paransil i rutz'a'iil.

¹⁷Noq xwilow wach, xa je' chik hin kamnaq ruum nuyo'jiik noq xinq'ehb'ik i koq ri'si rooq. Chalik i reh, xuyeew i rusak'aaj q'ab' chi nunaah je' wili xuq'or weh: Matyo'jik wuum, re' hin i peet, re' hin i rukuxiik wach.¹⁸Re' hin, hin naq kansamaj, eh xink'aach wo' chik chaloq. Eh yu'naak, ma' naa ta chik nukimiik chi jumpech. Re' hin wilik wajaawriik chinaah i kimik, eh wilik wajaawriik chinaah i kiye'aab' kamnaq.¹⁹Chatz'ihb'aaj re' aha' wilik taqe i xawilow, chib'ih jariik i k'ahchi' ruk'ulariik yu'naak, ruch'ihil i naa ruk'ulariik na' chub'an.²⁰Re' wili iraaj ruq'orom i ma' eht'alimaj taj chi riij i wuquub' chi ch'umiil xawilow wach parusak'aaj nuq'ab', re' taqe i re' kijalwaach i ju'jun chi k'amal b'eeh wilik chi kixilak i ju'jun ch'uq chi aj nimaneel. Eh re' wuquub' chi ye'aab' kantela re' ruuk' i oro kijalwaach i wuquub' ch'uq chi aj nimaneel, inki weh. Re' k'uhb'aal xtaq'ab'jik reje Éfeso

¹Chatz'ihb'aaj reje ruhuuj i k'amal kib'eeh i junch'uq chi aj nimaneel wilik Éfeso,
je' wili cha q'or reje reh re' i wilik i wuquub' chi ch'umiil parusak'aaj q'ab', re' b'ehik i rub'an chi kixilak i wuquub' chi ye'aab' kantela re' ruuk' i oro. Je' wili i ruq'or aweh:

²Re' hin weht'al taqe i k'ahchi' kaat, weht'al i kowlaj kamanik k'achi' kaat, ruch'ihil i kuyuuj k'ahchi' kaat. Eh chi ma' nakuy ta chik pan kiq'ab' i yeb'ee wach kina'ojb'al. Eh chi xawilow chik inki a'n taqe inkikoj tii chik kiib' chi raj tahqaneel i Jesucristo, eh ma' re' ta wo' taqe, xareq chik chi riij chi xa chukul q'orik taqe.³Eh re' hat, q'e' hat kuyuul. Xakuy i ti' k'axik, xiik' naah i kamanik xa a'n panub'ihnaal. Eh ma' xq'uhtik ta ak'ux chub'aan.⁴Xa re' la' jinaj i ma' imponik ta chi nuwach i na a'n: Re' chi xakanaa' nuk'axariik je' naq rukab' i na a'n cho pampeet.⁵Ruum aj re', k'oloq panak'ux chib'ih jariik xatq'ehb'ik wii'. Chayot' ak'ux chi riij aamahk, chureq wo' chik chi je' rukab' i nuk'axariik i na a'n cho pampeet. Ruum wi ma' xajal wach aana'ojb'al, naa wojiik k'oloq cha naah chi jumehq'iil chuq'uchariik aweh i ye'aab' kantela.⁶Jinaj la' tii i ma' xta reet i na a'n: Re' chi ma' imponik ta chawach i yiib' wach na'ojb'al inki a'n taqe aj Nicoláita je' wo' hin ma' imponik ta wo' chi nuwach inki a'n⁷Awach iraaj rib'iram, chunimaj i ruq'or i Santolaj Uxlab'al keh i ju'jun ch'uq chi aj nimaneel. Awach i naakeliik korik, naa nuye'em keh chi k'uxarik i wach chee' inye'wik k'acharik, i wilik panyejaal i ruye'aab' i Dios, inki. Re' k'uhb'aal i xtaq'ab'jik reje keh i aj Esmirna

⁸Chatz'ihb'aaj reje ruhuuj i k'amal kib'eeh i junch'uq chi aj nimaneel wilkeeb' Esmirna,
je' wili i cha q'or reje reh re' i xa wilik wo' cho pampeet i xanaa wo' ruwihiik pan kuxesb'al wach, re' i kansamaj, eh xk'aach wo' chik. Je' wili i ruq'or aweh:

⁹Weht'al chib'ih taqe i na a'n, je' wo' i neb'a'il k'ahchi' awik'iik wii'. Xa re' la' hat wo' b'ehoom ruuk' i rotob'il i Dios. Weht'al wo' chi nkitz'aq wach i q'orik chawiij taqe inkikoj kiib chi aj Judío, eh ma' re' ta wo' taqe xa junch'uq chi raj kamaj i aj Yahm taqe.¹⁰Re' hat maayohb'isaj awiib' ruuk' i ti' k'axik naa ak'ulum, ruum wilik taqe akomoon naakikojariik pantz'ilom ruum i aj Yahm, xa pajb'al taq aweh. Eh naa taq ak'ulum jarub'-oq q'iij i ti' k'axik re' re'. Xa re' la' korik-oq wach ak'ux korehtaal akimiik re' hin naa nuye'em aweh aakorona reh i juneliik k'acharik.¹¹Awach iraaj rib'iram, chunimaj i ruq'or i Santolaj Uxlab'al keh i ju'jun ch'uq chi aj nimaneel. Eh awach taqe i naakeliik korik, ma' xta naa kuuchjiik ruum i ruka'peech kimik, inki. Re' k'uhb'aal i xtaq'ab'jik reje keh i aj Pérgamo

¹²Chatz'ihb'aaj reje ruhuuj i k'amal kib'eeh i junch'uq chi aj nimaneel wilkeeb' Pérgamo,
je' wili cha q'or reje reh re' i wilik ruch'ihch' q'as ju', k'ul wilik ruq'asiil. Je' wili i ruq'or aweh:

¹³Re' hin weht'al chib'ih jariik i na a'n, eh chi ar hat patim i wilik wii' chi taaq'anik i aj Yahm ni xata ruum i re' inyoj ak'ux. Re' hat xama' akanaam ta wo' nunimjiik, ni xata re' noq xkanteesjik i Antipas xyoj ak'ux, re' ixq'orik cho wib'iral. Re' reh ar xkanteesjik chupaam i nimlaj tinamit re' re', i wilik wii' chi taaq'anik i aj Yahm.¹⁴Xa re' la', ko wilik i ma' imponik ta chi nuwach i na a'n: Re' chi kokiib' ixib' chik i wilkeeb' awuuk' ar ma' inkikanaa' ta runimjiik i ruk'uhb'aal i Balaam. Re' xtaqchi'inik cho reh i Balac, chi xkiq'eb' kiib' pamahk taqe aj Israel, noq xiye'arik chuk'uxariik i xa chib'ih jariik mayijimaj chikiwach i tiyoox, eh xuyeew wo' q'ab' keh chi xi k'acharik pan k'oyomal.¹⁵Eh wilkeeb' wo' ju'jun awuuk' ar i ma' kikanaa' taj i yiib' wach na'ojb'al inkik'uhtaaj taqe aj Nicoláita, re' i ma' imponik ta chi nuwach i hin.¹⁶Ruum aj re', re' hat chayot' ak'ux chi riij amahk. Wila' ma' chi, naa wojiik k'oloq cha naah chi jumehq'iil. Eh junb'aan taq aweh naa nub'anam kuuk' i keh ruuk' i ch'ihch' i nelik cho panuchii'.¹⁷Awach iraaj rib'iram, chunimaj i ruq'or i Santolaj Uxlab'al keh i ju'jun ch'uq chi aj nimaneel Awach i naa reliik korik, naa nuye'em reh chi k'uxarik i maná, ma' nilarik ta wach. Eh naa nuye'em reh Jinaj i k'isa saq laj ab'aj re' tz'ihb'amaj wii' jinaj i ak' b'ihnaal ma' awach ta neht'alinik reh. Xa re' wo' neht'alinik awach ink'ulwik reh, inki. Re' k'uhb'aal i xtaq'ab'jik reje keh i aj Tiatira

¹⁸Chatz'ihb'aaj reje ruhuuj i k'amal kib'eeh i junch'uq chi aj nimaneel wilkeeb' Tiatira,
je' wili i cha q'or reje reh:
Re' i Rak'uun i Dios, i xa je' chik xaq q'aaq' inaq'wach, eh re' rooq je' rukab' i q'an ch'ihch' xan reprotik chik. Je' wili i ruq'or aweh:

¹⁹Re' hin weht'al taqe chib'ih i na a'n, eh chi wilik i k'axooj awuuk', weht'al i nimanik i na a'n, ruch'ihil i rukamaj i Dios k'ahchi' kaat. Eh weht'al wo' chi k'ahchi' ruk'utiniik wach chi korik i na a'n yu'naak chuwach i na a'n chaloq pampeet.²⁰Xa re' la' jinaj i ma' toob' taj i na a'n re' chi ma' naq'il taj ixoq, Jezabel i b'ih, i rukoj riib' chi q'orol ruk'uhb'aal i Dios. Eh i ruk'uhtaaj i yiib' wach na'ojb'al i keh i numoso, rumin taqe pan k'oyomal, i rumin taqe chuk'uxariik i xa chib'ih tib'kaal mayijimaj chikiwach i tiyoox.²¹Re' hin najt xwuy-eej reh chi neeruyot' i ruk'ux ixoq re' re'. Xanaah re', ma' raaj ta rub'anam, ma' rukanaa' taj i k'oyomal.²²Ruum aj re', naa nuqasam wach yokaab' chi yab'ilaal. Je' wo' taqe awach uuk' i rub'an i k'oyomal, naa taqe nuye'em panti' k'axik wila' ma' xkikanaa' rub'aan taqe i yiib' wach na'ojb'al i rub'an ixoq re' re'.²³Eh re' taqe rak'uun rixq'uun, ti' laj kimik i naakik'ulum. Chi je' re', neenkikoj rehtaal i aj nimaneel chi re' hin weht'al chib'ih jariik inkapeb'jik, eh chib'ih jariik i wilik cho pan ánima. Re' hin naa nuye'em rujilob'aal taq aweh cha ju'junaal re' q'oreel chib'ih taq i xa a'n.²⁴Eh re' taq i hat, i junch'uq chi aj nimaneel i wilkaat taq Tiatira, i ma' k'ahchi' ta taq animam i ruk'uhb'aal i Jezabel, eh ma' k'ahchi' ta wo' taq awaajwaam reht'aljiik inkiq'or chi riij i ruk'ayeew wach na'ojb'al i aj Yahm, i nuq'or taq aweh chi ma' xta chik jino'q ihq neenuyeew taq cha naah.²⁵Xa re' la', maakanaa' taq chik i nimanik k'ahchi' taq kaat korehtaal i nuk'uliik iloq i hin ruka'peech.²⁶Awach taqe i naakeliik korik, eh ma' nee ta inkikanaa' rub'aan nukamaj, naa nuye'em kajaawriik chikinaah i nimaq taq tinamit,²⁷je' wo' rukab' noq xuyeew wajaawriik i waJaaw i hin. Re' keh je' naa b'axtoon ch'ihch' i naa ruwihiik pan kiq'ab' na' kian i taaq'anik chikinaah i nimaq taq tinamit, eh je' kipaaxjik ak'al xun nakianam.²⁸Eh naa wo' nuye'em keh i je' ch'umiil ihqen q'iij.²⁹Awach iraaj rib'iram, chunimaj i ruq'or i Santolaj Uxlab'al keh i ju'jun ch'uq chi aj nimaneel inki. Re' k'uhb'aal i xtaq'ab'jik reje keh i aj Sardis

¹Chatz'ihb'aaj reje ruhuuj i k'amal kib'eeh i junch'uq chi aj nimaneel wilkeeb' Sardis,
je' wili cha q'or reje reh:
Re' i wilik i wuquub' chi Ruxlab'al i Dios ruuk', eh wilik ruuk' i wuquub' chi ch'umiil je' wili i ruq'or aweh:
Re' hin weht'al chib'ih i na a'n, weht'al chi je' hat kamnaq, atoob' ta wilik wo' naq awib'iral chi hat k'achalkaat.²Chawik'raaj awiib' i hat, chayeew rukowiil kik'ux i xa chib'ih jariik ach k'isiin k'achalkeeb', ruum re' hin i nukoj rehtaal taqe i na a'n ma' imponik ta chuwach i nuDios.³K'oloq panak'ux re' i k'uhb'aal xat-tiijik cho wii'. Maacanaa' chik runimjiik, eh chayot' ak'ux chi riij aamahk. Wila' ma' chih naa wojiik k'oloq cha naah chi ma' aweht'al, je' rukab' noq inooj k'oloq i ajileq' chi ma' eht'alimaj.⁴Atoob' naak ko wilik kiib' ixib' taqe i wilkeeb' awuuk' ar Sardis i ma' kich'uwa'risam ta wach i kiso'. Re' keh naa kiwihiik wuuk' chi saqpotz'ik i kiso', ruum je' re' i ruk'ul chi keh.⁵Awach taqe naakeliik korik saqpotz'ik i kiso' naa rukojariik. Eh ma' naa ta nujuxum i kib'ihnaal chupaam i ruhujil i juneliik k'acharik. Naa la' nuq'orom i koq ree waJaaw je' wo' keh ruánjel chi re' keh wak'uun wixq'uun taqe.⁶Awach iraaj rib'iram, chunimaj i ruq'or i Santolaj Uxlab'al keh i ju'jun ch'uq chi aj nimaneel inki. Re' k'uhb'aal xtaq'ab'jik reje keh i aj Filadelfia

⁷Chatz'ihb'aaj reje ruhuuj i k'amal kib'eeh i junch'uq chi aj nimaneel wilkeeb' Filadelfia,
je' wili i cha q'or reje reh:
Re' i wilik ruSantohiil, i re' i xti korik, re' wilik ruuk' i ruláweh i reey David, noq i ruteh i ookb'al, ma' awach ta chik neentz'apwik reh, noq i rutz'ap, ma' awach chik neentehwik reh. Je' wili ruq'or aweh:

⁸Re' hin weht'al taqe chib'ih i na a'n, eh jinaj i ookb'al tehlik i nuyeew aweh ma' awach ta neentz'apwik reh chawach. Ma' re' ta nkiwii' chi ma' q'e' ta k'ih i ye'el rukowiil ak'ux, xanimaj la' i nuk'uhb'aal ma' xapoy taj i nub'ihnaal.⁹Re' hin naa taqe nutaq'aam reje awuuk' i junch'uq chi raj kamaj i aj Yahm, re' i xa chukul q'orik taqe, ruum inkikoj kiib' chi aj judío, eh ma' re' ta wo' taqe. Re' taqe re' korehtaal taqe nuxuk'aa' chawach, reh chi neenkinab'eej chi hat nuk'axam.¹⁰Ruum chi xanimaj i nuk'uhb'aal ruuk' kuyuuj, re' hin naa kaat nuko'leem chuwach i ti' k'axik na' chaloq i pajarik chikinaah chu'nchel i tinamit wach ak'al chi nik'inb'al keh¹¹Re' hin k'ulik iloq weh chi jumehq'iil. Looq'-oq aweh animaniik, reh chi ma' jino'q neenq'uchwik aweh aakorona naa ak'ulum.¹²Awach i naa reliik korik, re' hin naa nukojom chi je' jilow pilalix chupaam i rupaat i nuDios ma' jaruuj chik naa reliik cho ar. Naa nutz'ihb'aam yejal wach i rub'ihnaal i nuDios, je' wo' i rub'ihnaal i rutinamiit i nuDios, re' i ak' Jerusaleem naa ruchaliik pan taxaaj ruuk' i nuDios. Eh naa wo' nutz'ihb'aam yejal wach i nu ak' b'ihnaal.¹³Awach iraaj rib'iram, chunimaj i ruq'or i Santolaj Uxlab'al keh i ju'jun ch'uq chi aj nimaneel inki. Re' k'uhb'aal xtaq'ab'jik reje keh i aj Laodicea

¹⁴Chatz'ihb'aaj reje ruhuuj i k'amal kib'eeh i junch'uq chi aj nimaneel wilik Laodicea,
je' wili cha q'or reje reh re' i korik wach ruk'ux, i ma' xta chukuj q'orik ruuk',
i raa' ri'sil chu'nchel i rutz'uhkrisam chaloq i Dios, je' wili i ruq'or aweh:

¹⁵Re' hin weht'al taqe chib'ih i na a'n. Weht'al wo' hoq chi ma' hat ta jot'ik, ni xata hat tz'a', ma' xta naq reet hat ta jot'ik oon hat ta tz'a'¹⁶Raaj i wili, xa hat wo' q'ixin ma' hat ta jot'ik ni xata hat tz'a'. Ruum aj re', naa kaat nuxab'em reje wulu'.¹⁷Re' hat je' wili inaq'or: Hin chik b'ehoom. Chu'nchel i nelik korik chi nuwach. Wilik chik chib'ih weh, tiki. Xanaah re', ma' nakoj ta rehtaal chi ma' xta wilik aweh. Hat pixp. Hat neb'aa'. Hat moywach. Hat t'usulkaat.¹⁸Ruum aj re', i nukoj ana'ojb'al chi chaloq' aweh wuuk' i oro, korb'isamaj pan q'aaq'. Chi je' re', netib'ehoomrik chi manlik. Eh chaloq' asaq' so' wuuk', reh chi nee nakoj chawiij b'urb'al wach ak'ixb'ilaal, ruum t'usulkaat. Chaloq aawiq'oom wuuk' tz'ajb'al paam i naq'awach, reh chi nee chik ti'ilwik.¹⁹Re' hin kow taqe nuq'il, i nukoj kina'ojb'al awach taqe nuk'ax. Je' re' noq re' hat, maakanaa' awiib'. Chachop la' ak'ux chi nimanik, eh cha sik' wo' chik i Dios ruka'peech.²⁰Re' hin pa'alkiin i koq wach puerta chi yuq'inik, awach i rib'iraj i nuq'oral neeruteh weh i rupuerta, neekinokik ruuk'. Neenub'an nuwa' ruuk', je' wo' reh nee wo' rub'an ruwa' wuuk'.²¹Awach naa reliik korik naa nuye'em rutzunaab' wuuk' chupaam i nuloq'laj ye'aab', je' rukab' i hin xinelik korik, eh xuyeew nutzunaab' ruuk' i waJaaw paruloq'laj ye'aab'.²²Awach iraaj rib'iram, chunimaj i ruq'or i Santolaj Uxlab'al keh i ju'jun ch'uq chi aj nimaneel inki i je' ruwii' winaq. Re' rulooq'jiik i Dios pan taxaaj

¹Chi riij i wili, xintz'ehtanik johtoq pan taxaaj, eh inwilow jinaj i puerta tehlik cho ar noq xwilow. Eh re' paam i ralaq i xq'o'rinik cho weh pampeet, i je' nq'ajb'anik tuun i ruq'oral, je' wili i xuq'or: Johteen chaa yu' neenuk'uhtaaj aweh chib'ih jariik taqe i naa ruk'ulariik na' chub'an, inki.

²Chupaam i jumehq' re' re', xa re' chik i wánjel nut'iosil wilik noq xwik'raaj. Eh jinaj chik i loq'laj ye'aab' xwilow wach pan taxaaj, eh jinaj i tzunlik cho ar.³Re' tzunlik cho chupaam i loq'laj ye'aab' xa ntziqtzotik chik i ruwii' je' rukab' i jaspe ab'aj, eh je' rukab' i ab'aj, kornalina. Eh re' loq'laj ye'aab' kotimaj riij chi rax kojl i ruyeew chaloq i ruch'aab' je' rukab' i rub'an ab'aj, esmeralda, xan reprotik chik.⁴Chi junsuut i loq'laj ye'aab' re' re' xwil wo' kiwach i kijib' ru ka'winaq chi tzunaab'. Eh ar tzunulkeeb' i kijib' ru ka'winaq chi nimaq kiwach winaq. Re' keh saq saq i kiso', eh wilik kikoróna wach kinaah re' ruuk' i oro.⁵Ar chupaam i loq'laj ye'aab' kielik chaloq i ruch'aab' kahoq. Eh noq kipoq', xa nteleninik, xa nq'ajb'anik chik inche noq xb'iraj. Eh chuwach i loq'laj ye'aab' qopolkeeb' i wuquub' chi q'aaq' saqumb'al, rujalwaach i wuquub' chi Ruxlab'al i Dios.

⁶Eh chuwach i loq'laj ye'aab' re' re' jinaj i xan saqumanik chik paam wilik ar, xa je' chik palaw xa je' chik lemow noq xwil. Panyejaal, eh chi junsuut i loq'laj ye'aab' wilkeeb' i kijib' chi k'achaach ma' k'isiin inaq'kiwach wilik, je' chikiwach, je' chikiij.⁷Re' peet keh k'achaach re' re' je' ruwii' kaq b'ahlam. Re' rukab', je' ruwii' imas wakax. Re' roox, je' nka'yik winaq. Eh re' rukaaj, je' ruwii' xihk ruhe'em paam i ruxiik' chi rupinik.⁸Re' kijib' chi k'achaach re' re' waqtaq i kixiik' chi kiju'junaal. Eh ma' k'isiin inaq'kiwach wilik, je' chupaam, je' chi riij i kixiik'. Eh ma' nkikanaa' ta rutz'uuyjiik wach i Dios chi q'iij chi aq'ab' je' wili inkiq'or:
Santo, Santo, Santo i QaJaaw Dios nim rajaawriik, re' i xa wilik wo' cho najtir q'iij, je' yu'naak, je' chi juneliik, inki taqe.

⁹Eh re' kijib' chi k'achaach re' re' jarpech inki a'n kitz'uuy, inkiyeew runimaal wach, inkit'iosej i koq reh i rotob'il i tzunlik cho paruloq'laj ye'aab', re' i k'achlik chi juneliik.¹⁰Re' kijib' ru ka'winaq chi nimaq kiwach winaq inkixuk'aa' i koq kiib' chulooq'jiik i k'achlik chi juneliik. Eh inkitak'aa' i koq i kikoróna chuwach i loq'laj ye'aab', je' wili inkiq'or:

¹¹Jaaw, hat qaDios xti ruk'ul chi nqayeew aloq'il, ruum i runimaal awach, je' wo' awajaawriik, ruum re' hat xatyej-anik reh chu'nchel chib'ih jariik i wilik. Eh xitz'uhkrik, xwihik kik'achariik, ruum je' re' xchalik panak'ux, inki taqe reh. Re' junb'oht chi huuj re' i je' Rak'uun Tentzun inokik chi mayiij

¹Re' tzunlik cho paruloq'laj ye'aab', junb'oht i huuj wilik parusak'aaj q'ab' noq xwil. Re' huuj re' re' k'ul tar tz'ihb'amaj wach, lutz'uuj chi korik ruuk' i wuquub' chi rehtalil kojooj.²Eh jinaj i ánjel xwilow wach xiik' naah i rajaawriik xuk'er cho chii', je' wili xuq'or: ¿Awach i ruk'ul chi neeruteh wach i huuj b'otlik wach, eh neeruweq taqe rehtalil lutz'uuj wii'? inki.³Ma' awach ta jino'q i xub'an rutehariik rilariik wach i junb'oht chi huuj, ni xata pan taxaaj, ni xata wach ak'al, ni xata ri'si ak'al wilkeeb' i xkian rub'aan.⁴Re' hin, ma' k'isiin ta chik inche noq xchalik woq'iim noq xwil chi ma' awach ta jino'q ixreqarik chi ruk'ul ta chi reh chi xub'an rutehariik rilariik wach i huuj re' re'.⁵Eh re' jinaj keh i nimaq kiwach winaq je' wili xuq'or weh: Matoq'ik chik. Ruum re' nimlaj kaq b'ahlam re' ruuk' i aj Judá, riih rumaam i reey David, xa re' wo' reh xelik korik chi neerub'an rutehariik i junb'oht chi huuj, eh nee wo' rub'an ruweqariik i wuquub' chi rehtalil, inki.

⁶Eh panyejaal i loq'laj ye'aab', chi kixilak i kijib' chi k'achaach, pankiyejaal i nimaq kiwach winaq, xwilow chi pa'lik ar i je' Rak'uun Tentzun, ink'utinik wach ruti'jolal chi b'anooj ti' k'axik reh noq xuyeew riib' chi mayiij. Re' reh wuquub' i ruk'aa', wuquub' naq'wach wilik. Eh re' taqe naq'wach rujalwaach i wuquub' chi Ruxlab'al i Dios, xutaq'aaj sut i wach ak'al.⁷Re' i je' Rak'uun Tentzun re' re' xponik ruk'ul i junb'oht chi huuj parusak'aaj q'ab' i tzunlik cho paruloq'laj ye'aab'.⁸Eh noq ruk'ulum chik i junb'oht chi huuj, re' kijib' chi k'achaach, i kijib' ru ka'winaq chi nimaq kiwach winaq xkixuk'aa' kiib' chuwach i je' Rak'uun Tentzun. Eh chi kunchelaal wilik ju'jun kiarpa, ju'jun kikulk re' ruuk' i oro, nujinaq chi insensia, rujalwaach i kitiij i santo laj aj nimaneel.⁹Re' taqe re' je' wili inkiq'or pankitz'uuy:
I ruk'ul chi re' hat xatk'ulwik ree huuj, je' wo' ruweqariik taqe rehtalil lutz'b'al reh, ruum re' hat b'anooj chik ti' k'axik aweh. Eh ruuk' akik'eel xaloq', xakoj taqe chi rak'uun rixq'uun i Dios, taqe i aj panimaq tinamit, i aj pankok' tinamit, xa reh reh wach kiq'orik wii'.¹⁰Re' hat xapab'aa' taqe chi reey, chi k'amal b'eeh aj tiij chuwach i qaDios, re' i naa aye'em kajaawriik chi taaq'anik chinaah i tinamit wach ak'al, inki taqe.

¹¹Jinaj wo' chik ilooj xnub'an, xb'iraj i kiq'oral i ruk'ihaal chi ánjel, kisutem i koq riij i loq'laj ye'aab', re' wilkeeb' wii' k'achaach kuch'ihil i nimaq kiwach winaq. Eh re' taqe ma' xata ajlamaj chi ánjel,¹²xakow chik inkiq'or chi je' wili:
Re' i je' Rak'uun Tentzun, i xuyeew riib' chi mayiij, xti ruk'ul chi naa rehchaam i rajaawriik, i rub'ehomal, i runa'ojb'al, ransil, runimaal wach, i rutz'uuyjiik wach inki taqe.

¹³Eh chu'nchel i rutz'uhkrisam i Dios, i wilkeeb' pan taxaaj, i wilkeeb' wach ak'al, i wilkeeb' ri'si ak'al, i wilkeeb' pan palaw, je' wili i xkiq'or: Re' ta naq i Dios, i ch'iklik chaloq paruloq'laj ye'aab', je' wo' i je' Rak'uun Tentzun, neentz'uyjik kiwach, neenye'arik runimaal kiwach, i kiloq'il, nee ta naq inye'arik i kajawriik chi juneliik inki taqe.

¹⁴Re' kijib' chi k'achaach je' wili i chaq'wik inki a'n: Je' ta wo' naq re' inki taqe. Eh re' taqe kijib' ru ka'winaq chi nimaq kiwach winaq xkixuk'aa' kiib' chulooq'jiik i wilik ruk'achariik chi juneliik. Re' wuquub' chi rehtalil i lutz'b'al reh i kojooj i jumb'oht chi huuj

¹Eh re' i je' Rak'uun Tentzun, xwilow chik noq xuweq iloq jinaj i rehtalil lutz'b'al reh i junb'oht chi huuj. Xb'iraj i xuq'or chi je' wili i jinaj keh i kijib' chi k'achaach: Kim ayu' inki weh, eh re' ruq'oral xa je' chik inq'ajb'anik kahoq.

²Eh noq xintz'ehtanik, jinaj i saq riij kawáyu xwilow wach, re' iqlik chi riij jinaj i ru flecha i kanteesb'al wilik pan q'ab'. Jinaj wo' rukoróna xkojarik wach naah, eh ma' xta x-uuchjik ruum i ti' k'axik.

³Eh noq xuweq iloq i rukab' rehtalil lutz'b'al ree huuj i je' Rak'uun Tentzun, xb'iraj i xuq'or chi je' wili i rukab' keh k'achaach: Kim ayu' inki weh.

⁴Eh noq xintz'ehtanik, jinaj chik i kawáyu xelik chaloq, kaq riij, re' iqlik chi riij xye'arik jinaj ruch'ihch' k'ul q'as. Xye'arik rajaawriik chi rehtesjiik i rusuqkiil kik'ux i tinamit wach ak'al, reh chi k'ul naa kikansam kiib' chikiwach.

⁵Noq xuweq iloq i roox rehtalil i lutz'b'al ree huuj i je' Rak'uun Tentzun, xb'iraj i xuq'or chi je' wili i roox keh k'achaach: Kim ayu' inki weh.
Eh noq xintz'ehtanik, jinaj wo' chik i kawáyu xwilow wach q'eq riij, re' iqlik chi riij rut'uhyeem rupexu.⁶Eh xb'iraj i q'orik xb'aan cho pan kixilak i kijib' chi k'achaach, je' wili i xuq'or: Xa ki'ib' libra chi trigo i naa ruye'ariik chi riij i jinaj q'iij chi kamanik. Eh waqiib' libra chi sebada i naa ruye'ariik chi riij i jinaj q'iij chi kamanik. Xa re' la', maasach wach i aséite, i vino, inki.

⁷Noq xuweq iloq i rukaaj rehtalil lutz'b'al ree huuj i je' Rak'uun Tentzun, xb'iraj i xuq'or chi je' wili i rukaaj keh taqe k'achaach: Kim ayu' inki weh.

⁸Eh noq xintz'ehtanik, jinaj chik i kawáyu xwilow wach, q'ank'isik i riij, re' iqlik chi riij, Camnaq i rub'ihnaal. Xam chi riij i kiYe'aab' Camnaq. Re' i ki'ib' re' re', xye'arik rajaawriik chinaah i rukaaj q'at paam i tinamit wach ak'al, reh chi naa kikansam ruuk' q'aq'inik, ruuk' wi'jaleel, ruuk' yab'ilaal, eh ruuk' taqe josq'laj chikop wilkeeb' wach ak'al.

⁹Noq xuweq iloq i roo' rehtalil lutz'b'al ree huuj i je' Rak'uun Tentzun, xwil wach ri'si artaal i kánjel kit'iosil i xikanteesjik ruum i ruq'orariik i ruk'uhb'aal i Dios.¹⁰Re' taqe re' kow xkiq'or chi je' wili: Hat QaJaaw, wilik awajaawriik wilik asantohiil, korik wach ak'ux, Jaaw, ¿jaruuj aj wo' naq'at i q'orik chikinaah i tinamit wach ak'al chi q'ajb'al wach i qakanteesjiik xkian chaloq? inki taqe.¹¹Eh re' keh xye'arik kisaq so' chi kiju'junaal. Eh xq'orarik keh chi kuy-eej pee chik jarub'-oq q'iij manlojoq pee wach kik'ihaal taq awuch hermano parukamaj i Jesucristo ko kik'ul peet i ti'laj kimik i keh je' rukab' i xak'ul taq chee hat, ko ra'j naa nuq'ajam wach re', ki uchjik.

¹²Noq xuweq iloq i ruwaaq rehtalil lutz'b'al ree huuj i je' Rak'uun Tentzun, jinaj chik kowlaj yihk xub'an noq xwil. Re' q'iij xq'equmrik wach, xa je' chik q'eqjutik laj itz'ihy. Re' poh xsutinik chi xa kaq chik, xa je' chik kik' xkahnik.¹³Eh re' taqe ch'umiil pan taxaaj xitilojik cho wach ak'al, xa je' chik kitilojik chaloq i wach i higo noq ink'uyu'teesjik ruum i kowlaj teew.¹⁴Re' taxaaj xsahchik wach, xa je' chik imb'otarik wach huuj xb'aan. Eh chu'nchel nimaq taq yuuq', je' wo' taqe mohloom yuuq' sutim ha' riij, xi ehteesjik reje pan kiye'aab'.¹⁵Eh re' taqe reey wach ak'al, taqe i nimaq wach kikamaj, taqe i kajaaw soldado, taqe i wilik kajaawriik, taqe i b'ehomaq, taqe i minooj pankowlaj kamanik, taqe i ma' awach ta intaaq'anik keh, xooj kikeb'aa' kiib' pantaq saqrehp, pantaq paat ab'aj, wataq yuuq'¹⁶Re' keh je' wili i xkiq'or reh taqe yuuq', nimaq taq saqrehp: Tiq'ehb'oq taq cho chi qanaah Qoh akeb'aa' taq chuwach i tzunlik cho paruloq'laj ye'aab' Qoh akeb'aa' taq chuwach i rujosq'iil i je' Rak'uun Tentzun,¹⁷ruum xponik chik i nimlaj q'iij chi naa ruye'em chaloq chi qanaah i ti' k'axik chi tojb'al qamahk. Ma' awach ta jino'q neenkuywik ransil i rujosq'iil, inki taqe. Re' taqe i jinaj siento miil ruuk' kijib' roxk'ahl miil xkojarik kehtalil

¹Chi riij taqe re', xwilow chik inche kiwach kijib' chi ánjel, ju'jun i pa'alkeeb' pantaq rutz'u'kaal i wach ak'al. Eh re' keh xkiq'il peet i kijib' chi teew, reh chi ma' xihupinik ta chinaah i wach ak'al, ni xata nah palaw, ni xata chikinaah taqe chee' k'ahaam.²Jinaj wo' chik i ánjel xwilow wach, xchalik parelb'aal q'iij wilik ruuk' i rukoj wii' ehtalil i k'achlik Dios. Re' ánjel re' re' kow xuk'er cho chii' chi kiq'orob'jiik i kijib' chi ánjel, re' kik'ulum kajaawriik chub'anariik ti' k'axik reh i wach ak'al ruch'ihil i palaw. Je' wili i xuq'or:³Ma' chih pee taq awuchej i wach ak'al, i palaw, je' wo' taqe i chee', ko qakoj peet i kehtalil yejal kiwach taqe rukamanoom i qaDios, inki.

⁴Eh xb'iraj wo' rib'iral nik' kik'ihaal i xkojarik kehtalil chupaam i tinamit Israel. Je' wili kik'ihaal: Jinajsiento miil ruuk' kijib' roxk'ahl miil chi kiib':⁵Kab'laj miil i xokik kehtalil chupaam i rutinamitaal i Judá. Kab'laj miil chupaam i rutinamitaal i Rubén. Kab'laj miil chupaam i rutinamitaal i Gad.⁶Kab'laj miil chupaam i rutinamitaal i Aser. Kab'laj miil chupaam i rutinamitaal i Neftalí. Kab'laj miil chupaam i rutinamitaal i Manasés.⁷Kab'laj miil chupaam i rutinamitaal i Simeón. Kab'laj miil chupaam i rutinamitaal i Leví. Kab'laj miil chupaam i rutinamitaal i Isacar.⁸Kab'laj miil chupaam i rutinamitaal i Zabulón. Kab'laj miil chupaam i rutinamitaal i José. Eh kab'laj miil chupaam i rutinamitaal i Benjamín. Re' i ruk'ihaal tinamit saq saq i kiso'

⁹Chi riij taqe re', xwilow kiwach ma' k'isa tinamit ma' awach ta nkuywik kajaljiik. Xa aha' kichalik panimaq taq tinamit, pantaq kok' tinamit, xa reh reh wach kiq'orik wii', saq saq i kiso'. Kiyohq'eem kixaq ipak'. Pa'alkeeb' i koq chuwach i loq'laj ye'aab', eh chuwach i je' Rak'uun Tentzun.¹⁰Chu'nchel i re' kow xkiq'or chi je' wili:
Re' i xelik korik re' i qaDios, i tzunlik cho paruloq'laj ye'aab', je' wo' hoq i je' Rak'uun Tentzun inki taqe.

¹¹Eh re' ruk'ihaal ánjel pa'alkeeb' i koq chi junsuut i loq'laj ye'aab', chi kijunsuut i nimaq kiwach winaq, re' wilkeeb' wii' i kijib' chi k'achaach. Chi kunchelaal ánjel re' re' xkipachaa' qohoq kiib' wach ak'al chulooq'jiik i Dios tzunlik cho paruloq'laj ye'aab'.¹²Je' wili xkiq'or:
Je' ta wo' naq re'. Neeta naq intz'uuyjik wach, inye'arik ruloq'il, inkojarik chi ehchan na'ojb'al, int'ioosjik reh i rotob'il, inye'arik runimaal wach, inye'arik rajaawriik, re' inye'wik chee kowiil i qaDios wilik chi juneliik. Je' ta wo' naq re', inki taqe.

¹³Eh chi riij re', jinaj keh i nimaq kiwach winaq xpech'inik cho weh chi je' wili: Raaj taqe saq kiso' wili, ¿awach taqe, eh aha' xi chalik? inki weh.¹⁴Jaaw, xa re' wo' hat ti eht'alinik reh awach taqe, kinki reh. Eh re' reh je' wili i xuq'or weh: Re' taqe wili ik'inaq taqe cho chupaam i ti' k'axik. Yu'naak kitz'ajam chik i kiso', eh xa saqpotz'ik chik xkahnik ruum i rukik'eel i je' Rak'uun Tentzun.¹⁵Ruum aj re', wilkeeb' i koq chuwach i ruloq'laj ye'aab' i Dios.
Eh chi q'iij chi aq'ab' k'ahchi' keeb' chub'anariik i rukamaj i Dios chupaam i rupaat wilik pan taxaaj. Re' wo' Dios, i tzunlik cho paruloq'laj ye'aab', naa ruwihiik kuuk' reh i kicha'jaljiik.

¹⁶Eh ma' naa ta chik kilom wach i kuyuj wi'k ha', ma' naa ta chik kik'atariik ruum i rutz'a'iil i q'iij, ma' xta wo' chik jino'q tz'a' naa rujot'wiik keh ar,¹⁷ruum re' chik i je' Rak'uun Tentzun, i wilik cho panyejaal i loq'laj ye'aab' naa rucha'jiniik keh. Naa ruk'amam taqe reje paraasb'al ha' inye'wik k'acharik. Eh re' Dios naa rujuxwiik reh chu'nchel i riis naq' kiwach, inki weh. Re' ruwuuq rehtalil lutz'b'al reh i jumb'oht chi huuj

¹Noq xuweq iloq i ruwuuq rehtalil lutz'b'al ree jumb'oht chi huuj i je' Rak'uun Tentzun, je' naa yejaal i jinajora xtz'irlojik i q'orik pan taxaaj noq xb'iraj.

²Ko pa'alkeeb' chik i wuquub' chi ánjel chuwach i Dios noq xwil, eh ju'jun i kituun xye'arik.³Chi riij i re', jinaj wo' chik i ánjel xk'ulik iloq, rut'uhyeem rusansario re' ruuk' i oro, xupab'aa' i koq riib' wach artaal. Eh k'ih i ru insensia xye'arik, reh chi junq'ahteesjiik ruuk' i kitiij i santo laj aj nimaneel naa rub'anam chinaah i artaal oro wilik i koq chuwach i loq'laj ye'aab'.⁴Eh noq xk'ahtik i insensia chupaam i sansario rut'uhyeem i ánjel, xjohtik i rusib'eel chuwach i Dios junjohtiik ruuk' i kitiij taqe i santo laj aj nimaneel.⁵Eh re' ánjel re' re' xuchop i sansario, xuham i nah wach q'aaq' chupaam, re' i wilik chinaah i artaal, eh xujalk'iij cho chinaah i wach ak'al. Eh xub'an i ma' k'isa kahoq, xan reprotik chik i ruch'aab', xa nteleninik chik, eh xub'an jinaj kowlaj yihk noq xwil. Re' taqe tuun

⁶Chi riij i re', re' taqe wuquub' chi ánjel i wilik ju'jun kituun xkiyejaa' kiib' chi xuuljik.

⁷Eh noq xuxulej chee rutuun i peet ángel. Ma' k'isa saqb'och ruch'ihil q'aaq' xilakim kik' xqajik chinaah i wach ak'al. Eh ruum i re', je' naa k'isiin ma' yejaal i wach ak'al ruch'ihil taqe chee' k'ahaam, eh chu'nchel kok' rax ch'ahn xichaajrik.

⁸Eh noq xuxulej chee rutuun i rukab' ángel. Jinaj i je' mama' yuuq' inchaqchotik ruq'aq'al xkutarik cho nah palaw. Ruum i re', je' naa k'isiin ma' yejaal i palaw xsutinik chi kik'.⁹Eh re' taqe chikop wilkeeb' pan palaw je' naa k'isiin ma' yejaal i xikimik. Je' wo' re' kik'ihaal i nimaq taq barco wilkeeb' nah palaw xsahchik kiwach.

¹⁰Eh noq xuxulej chee rutuun i roox ánjel. Jinaj i mama' ch'umiil qoplik ruq'aq'al xq'ehb'ik cho pan taxaaj, je' jinaj saqumb'al. Re' ch'umiil re' re' xq'ehb'ik cho chikinaah i je' naa k'isiin ma' yejaal kik'ihaal taqe nim ha' taqe i raasb'al ha' wilkeeb' wach ak'al.¹¹Re' ch'umiil re' re', k'aah i rub'ihnaal. Je' naa k'isiin ma' yejaal kik'ihaal taqe nim ha' wilkeeb' wach ak'al xuk'aahb'isaj. Eh ruum i ruk'ahiil taqe ha', ma' k'isiin chik taqe tinamit xikimik noq xkuk'ej.

¹²Eh noq xuxulej chee rutuun i rukaaj ánjel. Je' naa k'isiin ma' junch'uy i q'iij, i poh xpohyik kiwach. Eh je' naa k'isiin ma' yejaal i kik'ihaal ch'umiil xpohyik kiwach, eh je' naa k'isiin ma' juntoq q'iij, k'isiin ma' juntoq aq'ab' xq'equmrik kiwach, eh ma' xisihq'inik ta chik noq xwil.

¹³Eh chi riij i re', jinaj chik i ánjel inrupik koyejal taxaaj noq xwil. Eh xakow chik xuq'or cho chi je' wili: Xti q'e' wo' chik ti', xti q'e' wo' chik ti', xti q'e' wo' chik ti' i naakik'ulum i tinamit wach ak'al na' kixulej chee kituun ixib' chi ánjel, re' i komajaa' inkixulej chee kituun inki.

¹Eh noq xuxulej chee rutuun i roo' ángel. Jinaj ch'umiil xq'ehb'ik cho pan taxaaj xk'ulik qohoq wach ak'al noq xwil. Xye'arik reh i laweh tehb'al chii' i julkahq.²Noq xuteh chii' i julkahq, xa nb'olik chik i sib' xelik cho chupaam, je' rukab' noq i nelik chee sib' chupaam i nimlaj horna. Eh re' sib' xunujisaj paam i taxaaj xuq'equmrisaj wach i q'iij, eh xtz'irlojik teew ruum.³Chupaam i sib' re' re' xi elik chaloq i je' nimaq taq chili'l, xkipuhkaaj kiib' sut i wach ak'al. Eh xye'arik kajawriik chub'anariik i ti' k'axik je' ti'kiil i rub'an i rukiih i tzina'j inki a'n⁴Eh xq'orarik keh chi ma' naa ta kisacham wach i chee' k'ahaam, taqe tik mu'uun. Xq'orarik keh chi xa re' taqe tinamit i ma' xta kehtalil yejal kiwach chi rak'uun rixq'uun i Dios taqe naa kianam ti' k'axik reh.⁵Eh re' taqe je' nimaq chili'l, ma' xye'arik ta q'ab' keh chi naa kikansam tinamit re' re', xanaa la' kik'sam pa runimaal ti' chuwach i hoob' poh. Eh re' taqe ti' nakianam ree tinamit je' ti'kiil i rub'an i rukiih sina'j.⁶Chupaam i q'iij re' re', xanaa naq chik kaajwaam kimik i tinamit xama' naa ta wo' kikimiik. Xa naa naq chik kisik'im kikimiik eh xama' naa ta wo' kireqem kikimiik.

⁷Re' taqe je' nimaq taq chili'l re' re', je' kiwii' kawáyu re' ruuk' i xa uy-inik chik inki a'n ree ojik panq'aq'inik. Re' wilik wach kinaah je' cho corona re' ruuk' i oro. Eh re' kiwach je' wach winaq.⁸Eh re' rismaal kinaah je' chamiil rooq i rismaal naah ixoq. Re' keh je' reeh nimlaj kaq b'ahlam.⁹Je' cho ch'ihch' i kikojom chi kiso'. Re' kixiik' xa pok'oj chik riib' noq kirupinik xa je' chik rukab' i polok'inik inki a'n i ruk'ihaal kareta noq qeremaj kuum i kawáyu ree ojik panq'aq'inik.¹⁰Re' kijeeh je' rujeeh tzina'j wilik ruxuul. Eh ruuk' i rukiih i ruxuul i kijeeh wilik kajawriik chub'aan ti' k'axik ree tinamit chuwach i hoob' poh.¹¹Re' k'amal kib'eeh taqe je' nimaq chili'l re' i ánjel inchopinik naah i julkahq, Abadón rub'ihnaal pan kiq'oral i aj hebreo. Eh pan kiq'oral i aj griego, Apolión rub'ihnaal.

¹²Re' peet ti' k'axik xk'ularik, xik'ik chik. Xa re' la', ko ka'pech chik i naa ruk'ulariik chi riij i re'.

¹³Eh noq xuxulej chee rutuun i ruwaaq ángel. Xb'iraj i q'orik xb'aan cho chi kixilak i kijib' chi ruk'aa' i artaal oro re' i wilik i koq chuwach i Dios.¹⁴Eh je' wili xuq'or cho reh i ruwaaq ánjel i wilik rutuun: Chachej taqe i kijib' chi ánjel b'ak'alkeeb' chi chii' i nim ha', Éufrates, inki.¹⁵Xichejarik aj re' i kijib' chi ánjel. Re' keh paab'amaj taqe chaloq chi chupaam i ora, chupaam i q'iij, chupaam i poh, chupaam i haab' re' re' chi naa kikansam i je' naa k'isiin ma' yejaal i tinamit wach ak'al.¹⁶Re' taqe ki soldado iqilkeeb' chikiij taqe kawáyu ki'ib' siento miyón kik'ihaal noq xb'iraj kib'iral.¹⁷Eh je' wili kiwii' xk'uhtjik weh taqe iqilkeeb' chikiij i kawáyu wilik ch'ihch' chi' kik'ux ko'lemb'al ree kiti'jolal, kaq je' nah wach q'aaq' rax je' jasinto, q'an inka'yik je' asufre. Re' taqe kawáyu je' naah kaq b'ahlam i kinaah. Eh pan kichii' i nelik chaloq q'aaq', sib', eh asufre.¹⁸Eh re' q'aaq', re' sib', re' asufre i xelik cho pan kichii', ox b'uhr wach chi ti' k'axik i xuk'am chaloq. Re' taqe re' xkansanik keh i je' naa k'isiin ma' yejaal i tinamit wach ak'al,¹⁹ruum taqe kawáyu re' re', pan kichii' eh ju' taq kijeeh i nelik chaloq i kajaawriik. Re' kijeeh je' ruwii' aaq', wilik naah, eh ruuk' i re' inki a'n i ti' k'axik.

²⁰Eh re' ruqox i tinamit i ma' xikimik ta ruum taqe ti' k'axik re' re', xama' xkikanaa' ta wo' rub'aan iraaj ma' raaj b'anarik. Eh xama' xkikanaa' ta wo' kilooq'jiik i ma' tob'laj uxlab'al, je' wo' kilooq'jiik i tiyoox oro, plata, q'an ch'ihch', ab'aj, chee' kiyej-aal, re' i ma' ki ilwik, ma' ki-ib'irinik taj, ni xata kib'ehik.²¹Re' tinamit re' re' xama' xkikanaa' ta wo' rukanteesjiik i kas kichaaq'. Ni xata re' warinik, i k'oyomal, i leq' xkimay rub'aan. Re' ánjel ruyohq'eem jinaj k'isa huuj

¹Jinaj i ánjel kow riib', xqajik cho pan taxaaj noq xwil, b'otlik pan suutz', jinaj rax kojl kotlik wach naah. Eh xan saqumanik chik chii' wach je' rukab' i rusaqumaal i q'iij. Re' wach'ehk xa je' chik rukab' noq i rub'olaa' riib' i xaq q'aaq'.²Re' ángel re' re' jinaj i k'isa huuj he'lik wach ruyohq'eem, xuyeew i rusak'aaj rooq nah palaw, eh re' rutz'eet rooq xuyeew chi chiq yuuq'.³Eh xuk'er cho chii' chi kow je' rukab' noq i ruk'er chii' i kaq b'ahlam. Eh xiq'orik chaloq i wuquub' chi kahoq xa nteleninik chik i xkian.⁴Kikohlaam-oq chik i q'orik i wuquub' chi kahoq, re' hin i Juan ach naq naa nutz'ihb'aam i xkiq'or. Xa re' la', jinaj wo' chik i q'orik xb'aan cho pan taxaaj, je' wili xuq'or cho weh: Maatz'ihb'aaj peet i q'orik xkian chaloq i wuquub' chi kahoq xa chayee pee panak'ux, inki.

⁵Chalik i ánjel i pa'lik nah palaw i rooq juntar eh re' rooq juntar pa'lik chi chiq yuuq', xujosaj johtoq i rusak'aaj q'ab' pan taxaaj.⁶Re' reh xuq'or i korik parub'ihnaal i wilik ruk'achariik chi juneliik, re' i xyej-anik cho reh i taxaaj, ruch'ihil i wach ak'al, je' wo' palaw, je' wo' hoq i xa chib'ih jariik i wilkeeb' chupaam. Je' wili xuq'or: Ach k'isiin ma' imponik i ruq'ijil.⁷Na' ponoq i ruq'ijil chi naa ruxulem chee rutuun i ruwuuq ánjel, re' re' i rehtalil chi xooj eloq wach i ma' eht'alimaj ta naq i ruyejaam cho wach i Dios, re' i ruq'orom cho rib'iral keh i jalal ruq'oral, re' taqe raj kamanoom, inki.

⁸Re' q'orik b'iram chaloq i xb'aan cho pan taxaaj, xiruq'o'reej wo' chik cho ruka'peech xuq'or weh chi je' wili: Hiy chak'ul i k'isa huuj he'lik wach, i ruyohq'eem i ánjel wulu', re' i ruye'em i rooq jinaj chinaah i palaw, eh jinaj i ruye'em chi chiq yuuq', inki chik weh.

⁹Xinooj ruuk' i ánjel, chayeew weh i k'isa junb'oht chi huuj, kinki chik reh ma' xta reet, hu', chak'ux i koq. Je' ki'iil riiskaab' noq nenik'ik panachii' xa re' la' noq nenooj k'oloq chapaam, neenk'aahb'ik ar, inki weh.¹⁰Re' k'isa junb'oht chi huuj xnuk'ul reh i ánjel. Xnuk'ux i koq xa je' chik ki'iil riiskaab' noq xwik'raaj panuchii'. Eh junk'aam-oq chik nuk'uxum, xwik'raaj i ruk'ahiil chi nupaam.¹¹Eh je' wili i xuq'or cho weh: Ajwaal wach chi naa aq'orom ruka'peech i ruq'orom chee Dios chikiij i aj pankok' tinamit, chikiij i aj pan nimaq tinamit, chikiij xa reh reh wach kiq'orik wii', eh chikiij taqe reey, inki. Re' taqe ki'ib' chi q'orol ree korik

¹Chi riij i re', xye'arik chik weh jinaj i chee' reh pajb'al je' ruwii' kaxlan aaj. Eh xq'orarik cho weh chi je' wili: Hiy, chapaj i rupaat i Dios ruch'ihil i artaal. Eh chawajlaaj taqe jarub' chi kiib' i kiloq'inik ar.²Xa re' la', maapaj reje haa' i rujunsuut riij i paat, ruum q'asamaj chik keh i ma' re' ta taqe aj judío, re' i nakianam i re' ma' re' chuwach i ki'ib' roxk'ahl poh chupaam i Santolaj Tinamit.³Eh re' hin naa nutaq'aam reje i ki'ib' chi q'orol reh i nuq'oral. Re' keh, q'eq i kiso' naa kikojom, na' kiq'or i korik panub'ihnaal chuwach i kab'laj siento q'iij ruuk' oxk'ahl q'iij, inki noq xb'iraj.

⁴Re' taqe ki'ib' chi q'orol ree nuk'uhb'aal wili, re' i ki'ib' chi ruche'el i olivo, eh re' wo' ki'ib' chi ye'aab' kantela wilkeeb' chuwach i QaJaaw ehchan ree wach ak'al.⁵Re' ki'ib' re' re' naa reliik chee xaq q'aaq' pan kichii' k'atb'al keh chi jumpech awach naq i na kaajwaam rub'anariik ti' k'axik keh. Je' re' i kimik naakik'ulum awach i naa rujot'wiik keh.⁶Re' i ki'ib' re' re', ye'ooj kajaawriik chupa'ab'jiik i jab' pan taxaaj, nik' pa' najtiil naa kiq'orom i k'uhb'aal. Eh ye'ooj kajaawriik chi neenkisutej chi kik' taqe ha', eh chuye'ariik xa jar b'uhr wach chi ti' k'axik chinaah i wach ak'al xa jarpech pa' inkaaj i keh pankik'ux.⁷Kikohlaam-oq chik ruq'orariik i ruk'uhb'aal i Dios, jinaj i josq'laj chikop naa reliik cho pan julkahq, naa rutoq'aam peleto kuuk'. Eh ma' naa ta kikuyum ransil, naa kikanteesjiik ruum.⁸Eh re' kiti'jolal naa rukahniik tuuch' pamb'eeh chupaam i nimlaj tinamit, re' ye'ooj cho wii' wach kuruus i kaJaaw, re' i ehchan keh. Re' tinamit re' re' xa xjalwaachjik ruuk' i tinamit Sodoma, ruuk' i tinamit Egipto.⁹Re' taqe re' chi je' panimaq tinamit, chi je' pankok' tinamit, chi je' xa reh reh wach kiq'orik wii', naa kilwiik reh chuwach i ixib' q'iij ruuk' juntoq q'iij chi tuch'ulkeeb' ar i ki'ib' chi q'orol ree k'uhb'aal. Eh ma' naa ta kaajwaam chi naa rumuhqiik i kiti'jolal.¹⁰Re' tinamit naa kianam kininq'iij, xa chib'ih jariik i naakisihim chikiwach ruum i rusuqkiil kik'ux chi riij i kikimiik. Ruum ma' suq ta k'isinoq xb'aan keh noq xkiq'or chee k'uhb'aal i ki'ib' chi jalal ruq'oral i Dios.¹¹Ixib'-oq chik q'iij ruuk' juntoq q'iij kikimiik, xye'arik wo' chik kik'achariik ruum i Dios noq xwil. Eh noq xi wuktik wo' chik johtoq chi k'achlik kiwach, ma' k'isiin ta noqxiyo'jik chu'nchel i xi ilwik reh.¹²Eh jinaj i kowlaj q'orik xb'aan cho pan taxaaj yuq'umb'al keh i ki'ib' chi q'orol ree k'uhb'aal. Je' wili xq'orarik cho keh: Johteen taq chaayu' ki uchjik. Xijohtik johtoq pan taxaaj pan jinaj suutz'. Eh re' taqe i nixowanik kiwach xkilow noq xijohtik.

¹³Chupaam i jumehq' re' re', jinaj i kowlaj yihk xub'an. Eh je' naa ru lajeeb' q'at paam i nimlaj tinamit xb'oq qohoq aak'al chi ki'sil. Eh wuquub' miil chi tinamit i xikimik ruum i kowlaj yihk. Eh nik' nimaal i ma' xikimik taj, ma' k'isiin ta noqxiyo'jik, xkiloq'ej Dios wilik cho pan taxaaj.

¹⁴Re' rukab' ti' k'axik xk'ularik, xik'ik chik. Xa re' la', re' roox ti' k'axik k'isiin wo' chik ma' nk'ularik. Re' i ruwuuq tuun

¹⁵Noq xuxulej chee rutuun i ruwuuq ánjel, ma' k'isiin i kowlaj q'orik xb'aan cho pan taxaaj, Je' wili i xkiq'or:
Yu'naak re' chik i QaJaaw Dios wilik rajaawriik chi taaq'anik chinaah i tinamit wach ak'al, je' wo' hoq i rupab'aam chaloq, re' i Cristo. Eh re' reh naa rukahniik chi taaq'anik chi juneliik, inki taqe.

¹⁶Eh re' kijib' ru ka'winaq nimaq kiwach winaq tzunulkeeb' pan kiloq' laj ye'aab' chuwach i Dios, xkipachaa' qohoq kiib' wach ak'al, eh xkiyeew ruloq'il i Dios.¹⁷K'ahchi' kiq'orom chi je' wili:
Inqat'iosej aweh, hat QaJaaw Dios, i wilik awajaawriik. Re' hat xa wilkaat wo' cho najtir q'iij je' wo' yu'naak, eh je' chi juneliik, ruum xak'ul chik i awajaawriik chi taaq'anik.¹⁸Re' nimaq taq tinamit yohb'aal wach kijosq'iil. Eh re' hat xayeew wo' aajosq'iil chikinaah, eh chi naa aq'atam q'orik chikinaah kamnaq. Eh chi naa aye'em jilow keh aakamaj xkian i kijalwik aq'oral, je' wo' taqe santo laj aj nimaneel, eh je' wo' taqe kiye'wik aloq'il, chi nimaq chi kok' taq. Eh chi naa taqe aye'em panti' k'axik i xib'anik cho ti' k'axik keh i wilkeeb' wach ak'al, inki taqe.

¹⁹Eh xteh i chi' i ruPaat i Dios wilik pan taxaaj ar ink'utinik i koq i kaxa, ye'aab' reh i tz'ihb'amaj wii' i ruyejaam cho wach i Dios. Eh xipoq' chaloq i kahoq, xa nq'ajb'anik chik i xkian. Eh xub'an jinaj i kowlaj yihk, xub'an i ma' k'isa saqb'och noq xwil. Re' ixoq eh re' i mama' kaq riij aaq'

¹Eh jinaj i runimaal sahchb'al k'uxliis xuk'uhtaaj cho riib' weh pan taxaaj: Jinaj chik ixoq b'otooj chupaam rusaqumaal i q'iij. Eh wilik i poh ri'si rooq. Wilik rukoróna wach naah, kab'laj i ruch'uminal.²Re' ixoq re' re' wach k'acharik wilik, eh k'erik chii' ruum i ruti'kiil, ruum ach k'isiin ma' nk'ulik ruk'ux.³Jumehq'iil wo' chik xuk'uhtaaj cho riib' weh pan taxaaj jinaj sahchb'al k'uxliis: Jinaj i mama' kaq riij aaq', wuquub' i naah, lajeeb' i ruk'aa'. Eh re' wuquub' chi nahis re' re' wilik ju'jun kikoróna.⁴Eh ruuk' i rujeeh, xuhilej cho chinaah i wach ak'al i je' naa k'isiin ma' yejaal kik'ihaal i ch'umiil wilkeeb' pan taxaaj. Re' mama' aaq' xuq'eb'aa' riib' chuwach ixoq, re' i k'isiin ma' nk'ulik ruk'ux, re' naq xraaj i reh chi tiklik rub'iq'im i koq i k'isa rak'uun ixoq noq naa raasjiik.⁵Eh noq x-aasjik i k'isa rak'uun ixoq, re' i naa rub'aniik i taaq'anik chikinaah chu'nchel i tinamit wach ak'al ruuk' i je' b'axtoon ch'ihch'. Eh re' rak'uun xk'amarik johtoq ruuk' i Dios, re' wilik cho wii' paruloq'laj ye'aab'.⁶Re' ixoq xooj pan jinaj ye'aab' chiq yuuq', re' yej-amaj chi ruye'aab' ruum i Dios. Eh kab'laj siento q'iij ruuk' oxk'ahl q'iij naa ruk'uxuljiik ar.

⁷Chi riij i re', je' wili i peleto xb'aan pan taxaaj noq xwil: Re' ánjel Miguel, ruch'ihil taqe ruánjel, xub'an i peleto ruuk' i mama' kaq riij aaq'. Eh re' mama' aaq' ruch'ihil wo' naq taqe ruánjel chi k'ulb'ilinik.⁸Xanaah re', ma' xi elik ta wo' korik ruuk' i peleto xkian, eh ma' xik'ularik ta cho pan taxaaj chi jumpech.⁹Eh xehteesjik cho pan taxaaj i mama' aaq', re' i xa wilik wo' cho najtir q'iij. Je' wili i rub'ihnaal: Ma' Tob'laj Winaq, aj Yahm, re' insub'wik keh chu'nchel i tinamit wach ak'al. Re' reh ruch'ihil taqe ruánjel noq xikutarik cho wach ak'al.¹⁰Eh jinaj i kowlaj q'orik xb'aan cho pan taxaaj noq xb'iraj. Je' wili i xuq'or: Yu'naak, xponik chik i ruq'ijil i ko'lemb'al iib' Xk'utinik chik chi re' qaDios wilik rajaawriik chi taaq'anik. Xuk'ul rajaawriik i ruCristo chi taaq'anik, ruum xkutarik cho wach ak'al i nixowanik kiwach i qahermano, re' inkojwik i koq kimahk chi q'iij chi aq'ab' chuwach i Dios.¹¹Re' taqe qahermano re' re' xkiq'at wach i kajawriik i aj Ixowaal parub'ihnaal i rukik'eel i je' Rak'uun Tentzun, eh ruum ruq'orariik i ruk'uhb'aal i Dios xkian. Ma' xkiketelaaj ta wach i kik'achariik, xkiyeew la' kiib' pankimik.¹²Re' taq i hat taxaaj, chasuuqb'isaj taq ak'ux, je' wo' taq i hat wilkaat taq chupaam Eh re' taq i hat i wilkaat taq wach ak'al, taq i hat i wilkaat taq pan palaw, q'e' wo' chik ti' i naa taq ak'ulum, ruum xqajik taq chik qohoq awuuk' i aj Yahm. Re' reh yohb'aal wach i rujosq'iil, ruum reht'al chi ach ma' najt naa ruwihiik, inki.

¹³Noq xukoj rehtaal chi xkutarik cho wach ak'al i mama' aaq', xchalik rujosq'iil xooj naq chub'anariik ti' k'axik ree ixoq, re' i aasjinaq cho ruk'isa k'uun.¹⁴Eh re' ixoq re' re' ma' xta x-uuchjik, ruum xkojarik runimaq taq xiik', je' ruxiik' mama' xihk. Ruuk' i re', rupinik reje chuwach i mama' aaq', reh chi xooj rukeb'aa' riib' panchiq yuuq', re' xk'uxuljik wii' chuwach ixib' haab' ruuk' waqiib' poh.¹⁵Xrilow chi je' re' mama' aaq', xuxab'ej reje ma' k'isa ha' eh xkorjik chi nim ha'. Ruuk' i re', xraaj naq ruqerem reje ixoq.¹⁶Re' ixoq xto'arik ruum aak'al noq xtar, ruum xutz'ub'ej qohoq i nim ha' xelik cho panchii' i mama' aaq'.¹⁷Ruuk' i re', xchalik rujosq'iil i mama' aaq' chinaah ixoq, xooj chi kipletohjiik taqe i re' ruuk' i rak'uun rixq'uun ixoq, re' i kinimanik reh i ruk'uhb'aal i Dios, eh kiye'em wo' kik'ux chub'anariik i korik ruq'orom cho rib'iral i Jesucristo. Re' taqe ki'ib' chi josq'laj chikop

¹Eh re' mama' kaq riij aaq' re' re' xuq'eb'aa' riib' chi uy-inik chii' palaw. Eh jinaj chik i mama' josq'laj chikop xelik cho pan palaw wuquub' i naah, lajeeb' i ruk'aa'. Re' ju'jun chi ruk'aa' wilik ju'jun kikoróna. Eh wach kinaah i wuquub' chi nahis tz'ihb'amaj i b'ihnaal b'ajb'al ree Dios.²Re' josq'laj chikop xwilow wach je' ruwii' rajaaw b'ahlam. Re' taqe rooq, je' rooq oso. Eh re' chii' je' chii' kaq b'ahlam, eh re' i mama' aaq' xuyeew i rutzunaab' reh i josq'laj chikop, xuyeew rajaawriik runimaal wach chi taaq'anik.³Jinaj chi kixilak taqe naah i josq'laj chikop je' cho yok'eel xakimik chik reh ruum, eh xk'achjik wo' chik. Noq xkilow chi je' re' i tinamit xsahchik kik'ux, eh xkinimaj i josq'laj chikop.⁴Eh xkiloq'ej i mama' kaq riij aaq', ruum xuyeew runimaal wach chi taaq'anik i josq'laj chikop. Xkiloq'ej i mama' josq'laj chikop re' re', je' wili i xkiq'or reh: Re' josq'laj chikop wili ma' ha' ta chi je', eh ma' awach ta neenkuywik i ransil, inki taqe.

⁵Eh re' josq'laj chikop xye'arik q'ab' reh chuq'orariik i xa chib'ih jariik chi b'ajb'al ree Dios. Xye'arik wo' q'ab' reh i josq'laj chikop chi xa ki'ib' roxk'ahl poh naa ruwihiik runimaal wach chi taaq'anik.⁶Eh je' wo' re' xub'an chupaam taqe poh re' re': Xub'aj i Dios, je' wo' hoq i loq'laj rub'ihnaal. Xub'aj wo' hoq i ruPaat i Dios wilik pan taxaaj. Eh xub'aj wo' taqe wilkeeb' pan taxaaj.⁷Xye'arik wo' q'ab' reh chi naa rub'anam i peleto kuuk' i santo laj aj nimaneel korehtaal i rub'an keh. Eh xye'arik wo' runimaal wach chi taaq'anik chikinaah i ju'jun ch'uq chi nimaq tinamit, ju'jun chi kok' tinamit, i xa reh reh wach kiq'orik wii'.⁸Chu'nchel i tinamit wach ak'al xiloq'inik ree josq'laj chikop re' re'. Re' taqe re' xa re' wo' rutz'uhkriik chee wach ak'al ma' kojooj tee kib'ihnaal paruhujil i juneliik k'acharik wilik ruuk' i je' Rak'uun Tentzun, re' i kansamaj chi jilow mayiij.⁹Awach iraaj rib'iram, chunimaj i wili:¹⁰Awach i ruk'ul chi naa ruye'ariik pantz'ilom, naa wo' ruye'ariik pantz'ilom. Eh awach i ruk'ul chi naa rukanteesjiik ruuk' q'aslaj ch'ihch', ruuk' wo' q'aslaj ch'ihch' naa rukanteesjiik.
Ruum re' taqe i santo laj aj nimaneel koruman chi naa kikuyum i ti' k'axik.

¹¹Chi riij i re', jinaj wo' chik i mama' josq'laj chikop xelik cho panak'al noq xwil. Ki'ib' i ruk'aa' je' ruk'aa' rak'uun tentzun, eh je' inq'orik mama' aaq'.¹²Re' reh wilik ruuk' i rajaawriik i peet josq'laj chikop. Eh re' rukab' chikop, re' wach ak'al, chu'nchel i tinamit xumin taqe chulooq'jiik i peet josq'laj chikop, re' i k'isiin naq ma' xkimik ruum i ruyok'eel eh xk'achjik wo' chik.¹³Re' rukab' chikop re' re' yohb'aal wach taqe i ma' ilooj taj xub'an, eh xa chib'ih chik jariik taqe xuk'uhtaaj, korehtaal xuqasaj chee q'aaq' pan taxaaj, xk'ulik qohoq wach ak'al chikiwach i tinamit.¹⁴Eh ruuk' taqe ma' ilooj taj xuk'uhtaaj, re' i ye'ooj q'ab' ree rub'anariik chuwach i peet josq'laj chikop, xujot'ib'eej tinamit wach ak'al. Eh xumin taqe chupaam i tinamit chi kitz'aq jino'q i rujalwaach i peet josq'laj chikop, re' i ma' xkimik ta ruum i ruyok'om i q'aslaj ch'ihch'.¹⁵Re' rukab' josq'laj chikop xye'arik rajaawriik chuye'ariik ruxlab'al i rujalwaach i peet josq'laj chikop, reh chi xq'orik i jalwaach re' re', reh chi xukansaj taqe i ma' xiloq'inik ta reh.¹⁶Re' i rukab' josq'laj chikop xuq'or chi kojaroq kehtalil parusak'aaj kiq'ab' oon yejal kiwach i tinamit, chi nimaq chi kok' taq, chi b'ehoom chi neb'aa', chi ma' awach ta intaaq'anik keh chi je' minooj taqe pankowlaj kamanik.¹⁷Eh ma' awach ta chik i neerub'an i loq', neerub'an i k'aay wila' ma' kojooj reh i rehtalil oon re' i rub'ihnaal i josq'laj chikop oon re' k'ihaal i rajlaamb'al i rub'ihnaal.

¹⁸Re' wili na'ojb'al iraaj. Awach i rureq chi riij, chukapaaj riij nik' k'ihaal nee nelik chuwach i ajlaamb'al reh i josq'laj chikop. Re' ruk'ihaal i ajlaamb'al re' re', chi riij i rub'ihnaal jino'q winaq inq'orik, waqiib' siento ruuk' waqiib' rukajwinaq inooj eloq. Re' kitz'uuy i jinajsiento miil ruuk' kijib' roxk'ahl miil

¹Eh jinaj wo' chik ilooj xnub'an: Pa'lik chik chaloq i je' Rak'uun Tentzun chinaah i yuuq' Sión. Eh jinajsiento miil ruuk' kijib' roxk'ahl miil chi tinamit i wilkeeb' i koq ruuk', re' taqe i tz'ihb'amaj yejal kiwach i rub'ihnaal i je' Rak'uun Tentzun, i rub'ihnaal i raJaaw.²Eh jinaj i q'orik xb'aan cho pan taxaaj noq xb'iraj. Xa je' chik rukab' noq inqajik chaloq nim ha' wataq ab'aj xampojik chik. Xa je' chik rukab' i xeleqinik i rub'an i kahoq. Eh xa je' chik inq'orik ruk'ihaal arpa noq inq'oojiik.³Jinaj i ak' tz'uuy xkitz'uyej i koq chuwach i loq'laj ye'aab', chikiwach i kijib' chi k'achaach, chikiwach i nimaq kiwach winaq. Eh re' ak' tz'uuy re' re', ma' jino'q xichol rutz'uuyjiik xa re' wo' taqe jinajsiento miil ruuk' kijib' roxk'ahl miil xichol rutz'uuyjiik, re' taqe xiko'ljik chaloq chi kixilak i tinamit wach ak'al.⁴Re' taqe re' saq wach i kánima, ruum ma' xkian ta keh i k'oyomal. Eh xkinimaj chi korik i je' Rak'uun Tentzun. Eh aha' inooj i reh kiooj chi riij. Re' taqe re' xiko'ljik cho chi kixilak i tinamit wach ak'al chi je' taqe rupeet mayiij i Dios, je' wo' chi reh i je' Rak'uun Tentzun.⁵Re' keh ma' jino'q chukuj q'orik xelik cho pan kichii'. Eh ma' xta wo' k'isinoq kimahk. Re' k'uhb'aal xkiq'or ixib' chi ánjel

⁶Eh jinaj wo' chik i ánjel inrupik koyejal taxaaj noq xwil. Eh xchalik ruq'or rib'iral jinaj i ak' k'uhb'aal i wilik chi juneliik keh chu'nchel i tinamit wach ak'al, chi nimaq taq tinamit, chi kok' tinamit, chi je' xa reh reh wach kiq'orik wii'.⁷Re' ánjel re' re' kow xuq'or cho chi je' wili: Chayohleej taq wach i Dios, chayeew taq ruloq'il, ruum xponik chik i ruq'ijil chi naa rub'anam i q'ataj q'orik. Chaloq'ej taq i Dios, re' xyej-anik reh i taxaaj, i wach ak'al, i palaw, taqe raasb'al ha' inki.

⁸Eh tiklik wo' chik cho chi riij i rukab' ánjel, je' wili xuq'or: Xuq'eb' chik riib' xuq'eb' chik riib' panti' k'axik i nimlaj tinamit Babilonia, ruum xuyoj i kina'ojb'al i nimaq taq tinamit ruuk' i k'oyomal xutijej taqe wii'. Ruum i xub'an re' re', je' naa xuxohk'risaj taqe ruuk' k'ahlaj ha', inki.

⁹Chi riij i rukab' ánjel tiklik wo' chik chaloq i roox ánjel, kow xuq'or chi je' wili: Awach inloq'inik reh i peet josq'laj chikop ruch'ihil i rujalwaach, eh awach i ruk'ul i rehtalil yejal wach oon parusak'aaj q'ab',¹⁰je' naa k'ah laj ha' ma' xilakimaj taj i naa ruye'ariik reh chi uuk'jik pan kulk. Re' na' ye'aroq pa runimaal tojb'al mahk ruum i rujosq'iil i Dios, ye'b'al reh pan q'aaq' qoplik ruuk' asufre chuwach i je' Rak'uun Tentzun, chikiwach taqe i santo laj ruánjel i Dios.¹¹Re' rusib'eel i q'aaq' i naa kiwihiik wii' pa runimaal ti' k'axik intzub'ik johtoq chi juneliik. Eh re' taqe kiloq'inik reh i peet josq'laj chikop ruch'ihil i rujalwaach oon xkiyeew q'ab' chi xkojarik keh i rehtalil, ma' naa ta kihi'liik chuk'ulariik i ti' k'axik chi q'iij chi aq'ab' naa kiwihiik ar, inki.

¹²Ruum i wili, re' taqe santo laj aj nimaneel, re' i kinimanik reh i ruk'uhb'aal i Dios, eh korik wo' wach kik'ux chunimjiik i Jesucristo, inchol kichopom kik'ux chukuyariik i ti' k'axik.

¹³Eh jinaj i q'orik xb'aan cho pan taxaaj noq xb'iraj. Je' wili i ruq'or: Chatz'ihb'aaj i wili: Yu'naak johtoq chi qawach atoob' keh i naa kikimiik chi k'ahchi' kinimam i QaJaaw inki cho weh.
Hoo' korik ruum naakihi'liik ruuk' i kikamaj, eh re' kikamaj naa ruk'amwiik reje keh chi hi'lik, inki Santolaj Uxlab'al.

¹⁴Chi riij i re', jinaj i saq suutz' xwilow reje wach. Eh chinaah i suutz' re' re' tzunlik chaloq jinaj i je' ruwii' winaq. Wilik ru corona wach naah re' ruuk' i oro. Ruyohq'eem jinaj ruq'aslaj ch'ihch' lok lok naah.¹⁵Eh pareh chik i ánjel xelik cho chupaam i rupaat i Dios wilik cho pan taxaaj noq xwil, kow xuq'or reje chi je' wili reh i wilik cho nah suutz': Xureq chik ruq'ijil rujachariik i tik wilik wach ak'al, ruum xq'aanb'ik chik, chayok' ruuk' aq'as laj ch'ihch', eh chamol i koq i wach, inki.¹⁶Eh re' i wilik cho nah suutz' xuyok' ruuk' i ruq'aslaj ch'ihch' i tik wilik wach ak'al. Eh re' wach i tik xureq wach ak'al xumol i koq.

¹⁷Jinaj wo' chik i ánjel xelik cho chupaam i rupaat i Dios wilik cho pan taxaaj. Re' ánjel re' re' ruyohq'eem wo' jinaj ruq'aslaj ch'ihch' lok lok naah.¹⁸Pareh chik i ánjel xelik cho wach artaal, re' i wilik rajaawriik chi rilariik i q'aaq' wilik ar. Kow xuk'er reje chii' chuq'orob'jiik i ánjel wilik ruq'aslaj ch'ihch', xuq'or reje reh chi je' wili: Re' uuva wilik wach ak'al xq'aanb'ik chik, chayok' ruuk' aq'as laj ch'ihch', eh chamol chi kuhtaal i wach, inki reh.¹⁹Chalik ánjel xrik'saj chinaah i wach ak'al i ruq'aslaj ch'ihch' lok lok naah, eh xuyok' i uuva. Xumol i wach, eh xuyeew pan jinaj yitz'b'al reh. Re' ye'aab' re' re' rehtalil i rujosq'iil i Dios naa ruye'em chaloq.²⁰Re' wach i uuva chii' tinamit xyitz'arik reje. Eh aha' xtuqlujik wii' i riis i uuva, kik' chik i xelik reje ar, je' naa chii' ju' kawáyu xponik ruchamiil paam. Je' wo' naa sut chi ixib' siento kilómetro xtuqlujik wii' i kik' re' re'. Re' taqe ánjel i xi k'amwik cho reh i wuquub' chi tz'apaab' wach ti' k'axik

¹Jinaj wo' chik i runimaal sahchb'al k'uxliis ma' ha' ta chi je' xuk'uhtaaj cho riib' pan taxaaj noq xwil: Wuquub' i ánjel xi k'amwik cho reh i wuquub' chi tz'apaab' wach ti' k'axik, re' i naa rik'sam wii' i rujosq'iil i Dios na' ohoq kuxoq.

²Xwilow wo' wach haa' jinaj i je' palaw xa je' chik lemow paam, eh xilakim q'aaq'. Re' taqe i ma' xta xi uchjik ruum i peet josq'laj chikop ruch'ihil i rujalwaach, eh ma' xkiyee ta q'ab' chi xkojarik keh i rajlaamb'al i rub'ihnaal, pa'alkeeb' i koq chi chii' i palaw re' re', ju'jun i kiarpa ye'ooj ruum i Dios.³Re' keh k'ahchi' kitz'uyem i rutz'uuy i Moisés, i raj kamanoom i Dios, je' wo' i rutz'uuy i je' Rak'uun Tentzun. Je' wili inkiq'or pankitz'uuy: QaJaaw Dios, q'e' nim awajaawriik, xiik' naah aaloq'il, eh ma' ha' ta chi je' taqe i xa a'n. Hat wo' Reey chikinaah i nimaq taq tinamit, korik wach ak'ux, rub'ehel chu'nchel i na a'n.⁴QaJaaw ¿Awach ma' neenyohlinik awach, awach ma' neen ye'wik aloq'il? ruum xa re' wo' hat wilik asantohiil. Eh chu'nchel i nimaq taq tinamit naa kichaliik chalooq'jiik, ruum xkikoj chik rehtaal chi rub'ehel i q'ataj q'orik i na a'n, inki.

⁵Chi riij i re', xwilow noq xteh i taxaaj re' wilik cho wii' i ye'aab' xiik' naah loq'il, je' wo' hoq i paat molb'al reh i k'uhb'aal, re' i ruyejaam cho wach i Dios chi naa rojiik eloq wach.⁶Chupaam i ye'aab' xiik' naah loq'il xi elik chaloq i wuquub' chi ánjel, re' i kik'amwik cho reh i wuquub' b'uhr wach chi ti' k'axik. Re' keh xa saqpotz'ik chik i kiso' kikojom re' ruuk' i lino xa nrob'rotik chik wach. Eh q'e'lik kisíncho chi' kik'ux re' ruuk' i oro.⁷Chalik i jinaj keh i kijib' chi k'achaach xuyeew ju'jun kikulk re' ruuk' i oro i wuquub' chi ánjel. Re' ju'jun chi kulk nujinaq chi rujosq'iil i Dios i k'achlik chi juneliik.⁸Eh re' ye'aab' xiik' naah loq'il xnujik chi sib' ruum i ruloq'il ruch'ihil i runimaal i rajaawriik i Dios. Eh ma' jino'q i xub'an i okik chupaam i ye'aab' xiik' naah loq'il, korehtaal xkikohlaaj cho rub'aan i wuquub' chi ti' k'axik i xkik'am chee wuquub' chi ánjel. Re' taqe kulk nujinaq taqe wii' i ti' k'axik

¹Eh jinaj chik i kowlaj q'orik xb'aan cho chupaam i ye'aab' xiik' naah loq'il noq xb'iraj. Je' wili i xuq'or keh i wuquub' chi ánjel: Hiy taq chachihkaaj chinaah i wach ak'al i wilkeeb' chupaam i wuquub' chi kulk re' i rujosq'iil i Dios xuyeew chaloq, inki.

²Xooj aj re' i peet ánjel, xuchihkaaj chaloq i wilik chupaam i rukulk chinaah i wach ak'al. Ruum i re', xpoq' chaloq jinaj yeb'ee wach ti'laj rax q'aah chikiij chu'nchel i tinamit i kojooj keh i rehtalil i peet josq'laj chikop, eh inkiloq'ej wo' hoq i rujalwaach.

³Eh re' rukab' ánjel xuchihkaaj chaloq i wilik chupaam i rukulk chinaah i palaw. Ruum i re', xsutinik chi kik' je' xuhkiil rukik'eel kamnaq xkahnik. Eh ruum i re' xikimik chu'nchel i k'achalkeeb' chupaam i palaw.

⁴Re' roox ánjel xuchihkaaj chaloq i wilik chupaam i rukulk chinaah taqe nim ha', je' wo' chinaah taqe raasb'al ha'. Eh ruum i re', xi sutinik chi kik'.⁵Eh xb'iraj i xuq'or chaloq chi je' wili i ánjel, inilwik reh taqe ha': Hat QaJaaw Dios, wilik asantohiil, xa wilkaat wo' cho najtir q'iij, je' wo' yu'naak. Eh rub'ehel cha weh chi je' re' i q'ataj q'orik xa a'n,⁶ruum chi re' keh xkikansaj taqe i santo laj aj nimaneel eh je' wo' re' xkian reh taqe i jalal aq'oral. Eh yu'naak i hat, xayeew keh chi uuk'jik i kik'. Xti ruk'ul chi keh inki ánjel.

⁷Eh jinaj wo' chik i q'orik xb'aan cho wach artaal noq xb'iraj: Hoo', QaJaaw Dios nim awajaawriik Xti korik chi parub'ehel xa a'n chee q'ataj q'orik inki.

⁸Re' rukaaj ánjel xuchihkaaj chaloq i wilik chupaam i rukulk chinaah i q'iij. Eh re' re' xye' wik ruman rutz'a'iil i q'iij, reh chi xuk'at taqe i tinamit ruuk' i rutz'a'iil.⁹Re' taqe re', xti q'e' ti' i k'ahtik xkik'ul ruum i rutz'a'iil i q'iij. Eh ni xata ruum i re' xkinimaj i Dios, eh ma' xkiyeew ta ruloq'il, rub'ajariik la' chik i Dios xkian, re' i wilik rajaawriik chuye'ariik taqe ti' k'axik re' re'.

¹⁰Re' roo' ánjel xuchihkaaj chaloq i wilik chupaam i rukulk chinaah i ruye'aab' i peet josq'laj chikop. Eh re' tinamit ruchopom naah xi kahnik panq'equm, eh xa nkitiiw chik i kaaq' ruum i ruti'kiil i xkik'ul.¹¹Eh xama' xkikanaa' ta wo' hoq i kiyeb'eew wach na'ojb'al. Rub'ajariik la' chik i Dios wilik cho pan taxaaj xkian, ruum i ti' xkik'ul, eh ruum i yeb'ee wach rax q'aah xpoq' cho chikiij.

¹²Re' ruwaaq ánjel xuchihkaaj chaloq i wilik chupaam i rukulk chinaah i nim ha', Éufrates. Eh ruum i re', xchiqik i nim ha', reh chi xteh i kib'eeh taqe reey chalik inki a'n parelb'aal q'iij.

¹³Eh chi riij i re', ixib' chi ma' tob'laj uxlab'al je' kiwii' tuhtz' xwil kiwach. Jinaj i xelik cho panchii' i mama' kaq riij aaq', jinaj xelik cho panchii' i peet josq'laj chikop. Jinaj i xelik cho panchii' i jalal ruq'oral i Dios i rub'an riib'.¹⁴Re' taqe re' i ruxlab'al i aj Yahm, eh xa chib'ih jariik i ma' ilooj taj inkik'uhtaaj chi sahchb'al k'uxliis. Eh xa aha' kiooj chumolariik kiwach taqe reey wilkeeb' sut i wach ak'al reh i pletohinik chupaam i ru nimlaj Q'iij i Dios xiik' naah nimaal rajaawriik.

¹⁵Re' hin xa je' kinooj k'oloq i ajileq' taq cha naah. Atoob' reh awach i na'lik reh eh ruk'axam-oq i ruso' rukojom chi riij. Chi je' re' ma' t'uslik taj, eh ma' nee ta ruk'uhtaaj ruk'ixb'ilaal chikiwach i tinamit, inki.

¹⁶Re' taqe ma' tob'laj uxlab'al re' re' xkimol wach chu'nchel reey ar chupaam i ye'aab' rub'ihnaal pan kiq'oral i aj hebreo.

¹⁷Re' ruwuuq ánjel xuchihkaaj chaloq i wilik chupaam i rukulk panteew noq xwil. Eh chupaam i Ye'aab' xiik' naah loq'il i wilik cho pan taxaaj, re' wilik cho wii' i Dios, jinaj i kowlaj q'orik xb'aan cho ar, je' wili i xuq'or: Xooj aj eloq wach re' inki.¹⁸Xub'an aj cho re' ruch'aab' kahoq xa repej chik riib'. Xa nq'ajb'anik chik i xub'an noq xpoq' i kahoq. Eh xub'an wo' jinaj i yihk xiik' naah kowiil. Ma' jino'q i yihk rub'anam chi je' re' i rutohq'iik chee k'acharik wach ak'al.¹⁹Re' nimlaj tinamit oxtariik xelik. Eh re' nimaq taq tinamit wilkeeb' sut i wach ak'al xich'a'lojik. Re' Dios, ruum i ruk'aah, xk'ulik cho paruk'ux chi xuyeew panti' k'axik i nimlaj tinamit Babilonia, je' naa k'ah laj ha' i xuyeew reh chi uuk'jik.²⁰Chu'nchel i ye'aab' sutimaj kiij chi ha', ruch'ihil taqe yuuq' k'ixkaab', xsahchik kiwach.²¹Eh xiq'ehb'ik chik inche cho pan taxaaj i nimaq taq saqb'och, xk'ulik qohoq chikinaah i tinamit wach ak'al. Re' ju'jun chi saqb'och je' naa ju'jun kintaal rahliil. Re' taqe tinamit ma' k'isiin ta noq xkib'aj i Dios chi riij i runimaal ti' xb'aan keh ruum i saqb'och. Re' tojb'al ru mahk iixoq xiik' naah k'oyomal

¹Chalik jinaj keh i wuquub' chi ánjel re' ruuk' taqe wilik ju'jun kikulk kuuk'. Xuq'or cho weh chi je' wili: Kim ayu'. Neenuk'uhtaaj aweh i tojb'al mahk naa ruk'ulum ixoq xiik' naah k'oyomal, re' i wilik chikinaah nimaq taq ha'.²Re' taqe reey wilkeeb' sut i wach ak'al xkian k'oyomal ruuk' ixoq re' re'. Eh re' tinamit wach ak'al xkian wo' i k'oyomal ruuk'. Ruum i re', je' naa xuxohk'risaj taqe ruuk' k'ahlaj ha', inki.

³Re' i xuk'uhtaaj weh i Ruxlab'al i Dios, xiruk'am chik reje i ánjel pan jinaj ye'aab' chiq yuuq'. Ar xwilow wach jinaj ixoq ihqamaj ruum jinaj i josq'laj chikop kaq riij, wuquub' i naah, lajeeb' i ruk'aa', nujinaq chi b'ihnaal i riij b'ajb'al ree Dios.⁴Re' ixoq re' re' rax muqik ru kaqiil i ruso', ruxoyib'eem riib' ruuk' oro ruuk' i holohaq ab'aj, ruuk' uuh kirob' rotik. Eh ruchopom jinaj rukulk re' ruuk' i oro, re' nujinaq wii' chu'nchel i ruma'tob'laj na'ojb'al, re' ruch'uwa'iil wach i ruk'oyomal.⁵Eh re' ixoq re' re' tz'ihb'amaj jinaj b'ihnaal yejal wach, ma' inkan ta chi riij i ruq'or, je' wili i ruq'or: Re' i tinamit Babilonia, kituut noq wilik i kib'anik reh i k'oyomal, kituut wo' taqe i kib'anik reh i yiib' wach na'ojb'al, inki.

⁶Eh xnukoj rehtaal chi re' ixoq re' re' xohk'reel ruum i ruuk'jiik i kikik'eel i santo laj aj nimaneel, je' wo' ruum i kikik'eel i xikanteesjik chuq'orariik i korik chi riij i Jesucristo.
Eh re' hin, ma' k'isiin ta noq xsahchik nuk'ux.

⁷Eh re' ánjel xuq'or cho weh chi je' wili: ¿Chihreet noq xsahchik ak'ux ruum i re'? Re' hin neenuteh wach aweh chib'ih iraaj ruq'orom i ma' eht'alimaj taj chi riij ixoq, chi riij i josq'laj chikop kaq riij, wuquub' i naah, lajeeb' i ruk'aa'.⁸Re' josq'laj chikop xawil wach re' i wilik cho najtir, ma' nilarik ta chik wach, eh k'isiin wo' chik ma' nelik cho pan julkahq, naa rojiik chutojariik i ru mahk. Re' tinamit, i xa re' wo' rutz'uhkriik chee wach ak'al ma' tz'ihb'amaj tee kib'ihnaal paruhujil i juneliik k'acharik, naa rusahchiik kik'ux noq naakilom wach i josq'laj chikop, re' i wilik cho najtir, ma' nilarik ta chik wach, eh k'ulik wo' chik iloq reh.

⁹Re' wili na'ojb'al iraaj i rureqariik chi riij: Re' wuquub' chinaah i josq'laj chikop kijalwaach i wuquub' chi yuuq' i wilik cho wii' ixoq re' re'. Re' wuquub' chi nahis kijalwaach i wuquub' chi reey.¹⁰Eh re' ho'oob' keh i reey re' re' xq'ucharik chik i kajaawriik. Re' jinaj chi kixilak k'ahchi' chi taaq'anik yu'naak. Re' ruwuuq majaa' imponik ruq'ijil chi naa rokiik chi taaq'anik na' okoq chi taaq'anik, xama' najt ta naa rub'anam.¹¹Re' josq'laj chikop, i k'achlik naq chaloq ma' nilarik ta chik wach, i xokik chi ruwahxaaq reey, atoob' ta re' wo' naq taqe ruuk' i wuquub' chi reey. Chi riij i re', narojiik rutojom i ru mahk.¹²Eh re' lajeeb' chi uk'aa' xawil kiwach kijalwaach i lajeeb' chi reey i komajaa' kiokik chi taaq'anik na' kik'ul i kajaawriik chi reyil kuch'ihil i josq'laj chikop, xa je' jinajora nakianam.¹³Eh re' lajeeb' chi reey re' re' xkian jinaj wach kik'ux chi naakito'om i josq'laj chikop ruuk' i kikowiil ruuk' i kajaawriik.¹⁴Re' keh naa kipletoheem i je' Rak'uun Tentzun, eh re' i keh naa rub'aan keh, ruum re' reh i Ajaab'ees chikinaah ajaab'ees, eh Reey chikinaah reey. Eh re' wilkeeb' ruuk' i je' Rak'uun Tentzun re' i paab'amaj taqe, i sik'ooj kiwach, korik wach kik'ux ma' xta wo' naa kuuchjiik i keh, inki ánjel.

¹⁵Eh je' wo' chik wili i xuq'or weh: Re' taqe nimaq taq ha' xawil kiwach i wilik cho wii' i k'oyoom laj ixoq kijalwaach nimaq taq tinamit, i kok' tinamit, xa reh reh wach kiq'orik wii'.¹⁶Re' lajeeb' chi uk'aa' xawil kiwach chinaah i josq'laj chikop kaq riij naakixowaam wach i k'oyoom laj ixoq, nakit'usaam, eh naa kikanaam chi rutkeel. Naa kik'uxum i rutib'kaal, eh naakik'atam wach q'aaq'.¹⁷Re' Dios xq'orik pan kánima chi xkian iraaj i Dios chi naa kianam. Ruum i re', re' keh xkian jinaj wach kik'ux chuto'ariik i peet josq'laj chikop ruuk' i kajaawriik chi reyil, reh chi korehtaal inooj eloq wach i ruq'orom chee Dios.¹⁸Re' ixoq xawil wach rujalwaach i nimlaj tinamit inchopinik kinaah i reey wilkeeb' sut i wach ak'al, inki weh i ánjel. Re' ruq'ehb'iik panti' k'axik i Babilonia

¹Chi riij i re', jinaj wo' chik i ánjel qajik i rub'an cho pan taxaaj noq xwil nim rajaawriik, eh re' rusaqumaal chii' wach xan saqumanik chik i wach aak'al xub'an.²Re' ánjel re' re' kow xuq'or cho chi je' wili: xq'ehb'ik chik, xq'ehb'ik chik panti' k'axik i nimlaj tinamit Babilonia. Eh xsutinik chi kipaat i raj kamanoom i aj Yahm, je' wo' chi ke'emb'al kiib' i xa chib'ih chik jariik chi ma' tob'laj uxlab'al. Xsutinik chi ye'aab' kisuuq' xa chib'ih tz'inkaal ch'uwa' kiwach, eh xiik' naah yib'kiil kiwach.³Ruum re' i nimaq taq tinamit je' naa xuxohk'risaj taqe ruuk' i k'ah laj ha', ruuk' k'oyomal xutijej taqe wii'. Re' taqe reey wilkeeb' sut i wach ak'al xi wihik wo' pan k'oyomal ruuk' i tinamit re' re'. Eh re' taqe aj yakool wilkeeb' sut i wach ak'al xib'ehoomb'rik ruum i ruk'aayjiik i xama' xta rutiq, re' q'e' imponik chuwach i Babilonia, inki.⁴Eh jinaj wo' chik i q'orik xb'aan cho pan taxaaj je' wili xuq'or: Hat taq nutinamiit, eleen taq reje chupaam i tinamit re' re', reh chi ma' nee ta taq ti ehtrik haa' taqe ru mahk, taqe i ti' k'axik naa ruchaliik chinaah,⁵ruum re' taqe ru mahk xtahmik wach, je' naa kopan taxaaj xponik. Ruum i re', xk'ulik cho paruk'ux i Dios i ruyeb'ee wach na'ojb'al i tinamit re' re'.⁶Chaq'aj taq wach reh i ti' xub'an keh i tokoom. Xti ti' chik i tojb'al ru mahk taq chayeew ruum i yiib' wach xub'an. Re' k'ahlaj ha' xuyeew chi uuk'jik keh i tokoom, chaxilakeej taq i k'ahlaj ha' xiik' chik naah k'ahiil i chayeew taq ree reh.⁷Chayeew taq pa runimaal ti' k'axik, chatib'isaj taq ruk'ux je' rukab' noq xunimb'isaj riib' i reh ruuk' i rub'ehomal. Re' reh je' wili ruq'or: Re' hin ayu' wilkiin pan nuye'aab' chi taaq'anik. Ma' hin ta kahnel ixoq, ma' xta ti' naawilom wach, inki.⁸Ruum i re', naa ruchaliik taqe ti' k'axik chinaah chi jumehq'iil: Naa rutiib'iik ruk'ux wi'jaleel, rax kimik naa rub'aniik reh, eh naa ruk'atariik wach q'aaq', ruum re' QaJaaw Dios nim rajaawriik chuye'ariik pantojb'al mahk, inki.

⁹Re' taqe reey wilkeeb' sut i wach ak'al, i je' pan k'oyomal xi wihik ruuk' i Babilonia, eh xkich'ikaa' kik'ux ruuk' i rub'ehomal, ma' k'isiin ta naa rutib'iik kik'ux naakoq'em wach na' kilow i rusib'eel noq naa ruk'ahtiik.¹⁰Eh ruum kiyo'jiik xa chi najt naakilom reje i ti' k'axik naa ruk'ulum, je' wili i naa kiq'orom reh:
Q'e' wo' chik ti', q'e' wo' chik ti' i xak'ul, xti hat wo' naq nimlaj tinamit Babilonia, Q'e' wo' naq kow awiib', xa chi jumehq'iil xatye'arik pantojb'al mahk, inko'q taqe.

¹¹Re' taqe aj yakool wilkeeb' sut i wach ak'al naa wo' koq'iim i keh ruum i ruti'kiil kik'ux chi riij i nimlaj tinamit re' re', ruum ma' awach ta chik naa ruloq'wiik reh i k'ik'aay inkik'am chaloq.¹²Re' inkik'ayej re' taqe wili: oro, plata, holohaq ab'aj, karena, holohaq itz'ihy lino, xéla itz'ihy, eh itz'ihy rax muqik ru kaqiil, k'ih b'uhr wach chi chee' re' ruuk' i kik'ohnik, taqe xa chib'ih jariik holohaq b'aaq kiyej-aal, k'ih taq tz'aaq chee' kiyej-aal, taqe holohaq ab'aj marmol, q'an ch'ihch', til ch'ihch' taqe,¹³canela, xa chib'ih jariik i q'omal insensia, mirra, ink'ohnik laj iq'oom, vino, aséite, arina re' ruuk' i k'ih tz'aaq, trigo chikop aj ihqoom, rak'uun tentzun, kawáyu, kareta, eh moso re' ruuk' kiye'ariik pankowlaj kamanik.¹⁴Je' wili naa ruq'orariik reje reh i nimlaj tinamit: Yu'naak aj re' xsahchik wach awuuk' taqe wach i chee' xiik' naah suq kiil, re' i q'e' naq imponik chawach ruk'uxariik. Eh xsahchik wo' wach chu'nchel ab'ehomal, je' wo' runimaal awach, inko'q taqe.

¹⁵Re' taqe xiyakwik reh i xa chib'ih jariik re' re', i xib'ehoomb'rik ruum i k'aay kian naq chupaam i nimlaj tinamit, xa chi najt chik naakilom reje ruum i kiyo'jiik na' chaloq i runimaal ti' k'axik chinaah re' keh naa koq'iim,¹⁶je' wili naa kiq'orom: Q'e' wo' chik ti', Q'e' wo' chik ti' i xuk'ul i nimlaj tinamit. Re' reh je' naq rukab' ixoq i rutiq'aa' riib' ruuk' holohaq itz'ihy lino, rax muqik ru kaqiil, i ruxoyej naq riib' ruuk' oro, ruuk' holohaq ab'aj, ruuk' karena.¹⁷Eh xa chi jumehq'iil xsahchik wach i rub'ehomal inko'q taqe.
Chu'nchel i k'amal kib'eeh i b'esan barco, je' wo' taqe ki b'iyajohinik chupaam i tz'a'laj yuuq', taqe i kib'esanik ree barco, taqe kikamanik nah palaw, xa chi najt chik xkilow reje i xuk'ul i tinamit re' re'.¹⁸Noq xkilow reje rusib'eel i ruk'ahtiik i nimlaj tinamit, xkik'er kichii' chuq'orariik chi je' wili: Xti ma' jino'q chik i tinamit chi je' rukab' i nimlaj tinamit re' re', inki taqe¹⁹Eh ruum i ruti'kiil kik'ux, xa nkipukej chik i pooq wach kinaah.
Xa suq chik kioq'ik, eh xkik'er reje kichii' chuq'orariik chi je' wili: Q'e' wo' chik ti', Q'e' wo' chik ti' i xuk'ul i tinamit re' re'. Ruuk' chu'nchel chib'ih naq i wilik reh, xib'ehoomb'rik taqe wilik ki barco nah palaw. Eh xa chi jumehq'iil tii xsahchik wach, inki taqe.²⁰Eh re' hat taxaaj, re' taq i hat i raj tahqaneel i Jesucristo, re' taq i hat jalal ruq'oral i Dios, re' taq i hat i tinimanik taq ree Dios, suuqb'oq taq ak'ux ruum re' Dios xuq'at chik q'orik chinaah i tinamit Babilonia.²¹Eh jinaj i ánjel xiik' naah i ransil xuchop chaloq jinaj nimlaj ab'aj je' ruwii' ke'b'al, xukut pan palaw, je' wili i xuq'or: Je' wili i naa ak'ulum i hat nimlaj tinamit Babilonia, na' sacharoq awach chi jumpech ma' jaruuj chik naa rilariik awach.²²Eh ma' jaruuj chik naa rib'irjiik awuuk' xilak taq b'eeh i q'ooj arpa, ni xata ruxuljiik i suub', ni xata ruxuljiik i tuun. Ma' naa ta wo' chik rilariik kiwach i aj kamanoom awuuk'. Ma' naa ta chik rib'iirjiik awuuk' i choqik i rub'an i ab'aj ke'b'al.²³Ma' jino'q chik i saqumb'al naa rusihq'iniik awuuk', eh ma' jaruuj chik naa rib'irjiik awuuk' i ninq'ijinik ree kaxáro. Atoob' ta naq ma' k'isiin noq xkinimb'isaj kiwach taqe awaj yakool chi kixilak i tinamit sut i wach ak'al, eh ruuk' taqe warinik, xa a'n kijot'ariik i nimaq taq tinamit, inki.

²⁴Je' re' i naa ak'ulum nimlaj tinamit, ruum awuuk' xchihkik i kikik'eel jalal ruq'oral i Dios, i kikik'eel i rutinamiit i Dios, i kikik'eel chu'nchel i kansamaj taqe chaloq sut i wach ak'al. Re' i loq'inik xb'aan pan taxaaj

¹Chi riij i re', xb'iraj chik taqe kowlaj q'orik xkian cho pan taxaaj, i ruk'ihaal tinamit. Je' wili i xkiq'or:
Re' i QaJaaw Dios, i ruk'ul chi neenqayeew runimaal wach ruum xa re' wo' reh inko'linik, xa re' wo' reh i wilik ruloq'il, eh wilik rajaawriik,²ruum re' qaDios parub'ehel i ruq'at i q'orik, eh ruuk' rukorkiil, xuyeew panti' k'axik i k'oyoom laj ixoq, re' i xyojwik i kina'ojb'al i tinamit sut i wach ak'al ruuk' i ruyiib' wach na'ojb'al. Eh re' i kikanteesjiik i raj kamanoom i Dios xub'an, xq'ajarik wach reh ruum i Dios, inki taqe.³Eh je' wo' chik wili i xkiq'or: Re' QaJaaw Dios, i ruk'ul chi neenqayeew runimaal wach ruum ma' jaruuj chik naa rumayam johtik i rusib'eel i Babilonia, inki taqe.

⁴Eh re' taqe kijib' ru ka'winaq chi nimaq kiwach winaq kuch'ihil i kijib' chi k'achaach xkipachaa' qohoq kiib' wach ak'al chulooq'jiik i Dios, i tzunlik cho paruloq'laj ye'aab'. Re' i QaJaaw Dios, i ruk'ul chi neenqayeew runimaal wach, Je' ta wo' naq re' inki taqe.⁵Eh jinaj i q'orik xb'aan cho ko paruloq'laj ye'aab' i Dios, je' wili i xuq'or: Chayeew taq runimaal wach i qaDios chawunchelaal i hat taq raj kamanoom, eh je' wo' taq i hat i tiyohlinik taq reh, chi nimaq, chi kok' taq inki. Re' runinq'ijiik irukaxaro i je' Rak'uun Tentzun

⁶Eh xb'iraj i ma' k'isa q'orik je' cho kiq'oral ruk'ihaal tinamit, xa je' chik rukab' i choqik i rub'an i nim ha' noq inqajik cho wataq ab'aj, je' rukab' i choqik inki a'n i kahoq, je' wili i xkiq'or:
Re' QaJaaw Dios, i ruk'ul chi neenqayeew runimaal wach ruum re' chik i reh nim rajaawriik xutoq'aa' taaq'anik yu'naak.⁷Je' re' noq, qasuuqb'isaj taq qak'ux chi manlik. Qayeew taq ruloq'il i qaDios, ruum xureq chik ruq'ijil chi naa rub'anam kaxáro i je' Rak'uun Tentzun. Eh re' naa ruk'amam chi rehk'een ruyejaam chik riib',⁸eh xye'arik q'ab' reh chi xutiq'aa' riib' ruuk' holohik laj itz'ihy lino, saqpotz'ik eh inrob'rotik wach, inki taqe. Re' holohik itz'ihy lino rujalwaach i holohik laj na'ojb'al inki a'n i rutinamiit i Dios.

⁹Chalik i ánjel xuq'or weh chi je' wili: Chatz'ihb'aaj chi atoob' keh taqe yuuq'imaj chuninq'ijiik irukaxaro i je' Rak'uun Tentzun, inki. Eh xuq'or wo' weh chi je' wili: Re' taqe q'orik wili korik, eh ruq'oral i Dios, inki.

¹⁰Eh re' hin xnuxuk'aa' naq wiib' chulooq'jiik i ánjel, je' wili i xuq'or weh: Maa a'n i je' re', re' la' Dios chaloq'ej, re' hin xa hin wo' raj kamanoom i Dios je' rukab' i hat, je' rukab' taqe aahermano i kiye'em kik'ux chunimjiik i korik i ruq'orom i Jesucristo.
Re' inye'wik rukowiil kik'ux i jalal ruq'oral i Dios, inki. Re' iqlik chi riij i saq riij kawáyu

¹¹Eh tehlik chik i chii' i taxaaj noq xwil, jinaj i saq riij kawáyu xwilow wach ar. Re' iqlik chi riij je' taqe wili i rub'ihnaal: Xti Korik wach ruk'ux, ma' xta chukuj Q'orik ruuk', ruum re' reh parub'ehel i rub'an i taaq'anik, i rub'an i peleto.¹²Eh re' taqe naq'wach xan reprotik chik je' rukab' i rub'an i xaq q'aaq'. K'ih tahs i rukoróna wilik wach naah. Eh jinaj i b'ihnaal tz'ihb'amaj xa re' wo' reh inreqwik chi riij.¹³Re' ruso' muh-amaj pankik', je' wili i rub'ihnaal: tehel wach reh i ruQ'oral i Dios.¹⁴Eh tahqalimaj kuum ruk'ihaal soldado wilkeeb' pan taxaaj, xasaq chik i kiso', holohaq itz'ihy lino ma' xta k'isinoq ruch'uwa'iil wach, eh saq riij kikawayu iqilkeeb' wii'.¹⁵Re' reh jinaj i ch'ihch' k'ul q'as xelik cho panchii', b'amb'al keh i ti' k'axik i nimaq taq tinamit. Je' b'axtoon ch'ihch' i naa ruwihiik pan q'ab' na' chub'an i taaq'anik. Je' rukab' noq inyeq'arik paam i uuva pan yitz'b'al reh. Eh naa ruye'em keh chi uuk'jik i k'ahlaj ha' ruum i rujosq'iil i Dios nim rajaawriik.¹⁶Re' iqlik rij kawáyu, chuwach i ruso' chukorkiil nah rutuuq tz'ihb'amaj i b'ihnaal wili: Reey chikinaah taqe reey, eh Ajaab'ees chikinaah taqe ajaab'ees, inki ruq'or.

¹⁷Eh jinaj i ánjel pa'lik chuwach i q'iij noq xwil. Kow xuk'er cho chii' chi kiyuq'ub'jiik chu'nchel i chikop kirupinik pan taxaaj: Kim taq ayu' chamol taq awiib', k'oloq taq ak'ux aweh i runimaal k'uxumb'al ruyejaam wach i Dios,¹⁸reh chi nee taq inak'ux aweh i kitib'kaal i reey, i kitib'kaal kajaaw i soldado, i kitib'kaal i kowlaj winaq, i kitib'kaal kawáyu, i kitib'kaal kib'ehik chi riij kawáyu, i kitib'kaal i tinamit kib'anik reh i mahk: chi je' ma' awach ta ntaaq'anik keh chi je' minooj taqe pankowlaj kamanik, chi nimaq chi kok' taq, inki.

¹⁹Eh xwilow chik wach i peet josq'laj chikop, je' wo' taqe i reey wilkeeb' sut i wach ak'al kuch'ihil i ki soldado kimolom kiib' chub'anariik i peleto ruuk' i iqlik chi riij i saq riij kawáyu, je' wo' kuuk' taqe ru soldado.²⁰Eh re' peet josq'laj chikop xchoparik ruch'ihil i rukoj riib' chi q'orol ruq'oral i Dios, re' i xk'uhtanik cho reh i sahchb'al k'uxliis chuwach i chikop re' re'. Eh ruuk' i re' xujot'ib'eej taqe i xkiyeew q'ab' chi xkojarik keh i rehtalil i peet josq'laj chikop, xkiloq'ej i rujalwaach. Eh re' josq'laj chikop ruch'ihil i rukoj riib' chi q'orol ruq'oral i Dios, k'achlik kiwach noq xikutarik pan palaw q'aaq' qoplik ruuk' asufre.²¹Eh re' taqe kik'u'liil i xikanteesjik ruuk' i ch'ihch' k'ul q'as i xelik cho panchii' i iqlik chi riij i saq riij kawáyu. Eh chu'nchel i chikop i kirupinik pan taxaaj xkik'ux i kitib'kaal taqe kamnaq re' re' korehtaal xinujik ruum. Re' lajeeb' siento haab'

¹Eh jinaj chik i ánjel qajik i rub'an cho pan taxaaj noq xwil. Wilik ruuk' i rulawehiil i julkahq, eh jinaj nimlaj karena wilik pan q'ab'.²Eh xuchop i mama' kaq riij aaq', re' i xa wilik wo' cho najtir q'iij, ma' tob'laj winaq, aj yahm i rub'ihnaal. Eh xb'ak'arik chi karena ruum i ánjel reh i lajeeb' siento haab',³xkutarik pan julkahq, ar xtz'aparik naah. Re' ánjel re' re' xukoj rehtalil chi xluhtz'ik naah i jul chi korik, reh chi ma' nee ta chik i rub'an kijot'ariik nimaq taq tinamit i aaq' re' re' korehtaal inik'ik i lajeeb' siento haab', ko ra'j chik naa rutehariik cho k'isinoq re'.

⁴Xwilow kiwach i holohaq ye'aab', ar tzunulkeeb' i xkik'ul kajaawriik chi q'ataj q'orik. Eh xwilow wach i kánjel kit'iosil i xyok'arik kalaq, ruum i runimjiik i ruk'uhb'aal i Dios, re' i xuq'or i Jesucristo. Re' taqe i ma' xkiloq'ej taj i peet josq'laj chikop, i rujalwaach. Eh ma' xkik'ul taj i rehtalil i josq'laj chikop yejal kiwach, ni xata chi kiq'ab'. Eh xik'aach wo' chik cho ruka'peech, eh xkian i taaq'anik ruuk' i Jesucristo chuwach i lajeeb' siento haab'.⁵Re' wili i peet kiwuktiik chaloq i kamnaq chi k'achlik kiwach. Eh re' taqe kamnaq junch'uq ko xik'ik chik i lajeeb' siento haab' noq xik'aach wo' chik cho ruka'peech.⁶Atoob' keh i wilik kisantohiil i naakehtriik i peet wuktik chaloq chi kixilak kamnaq. Re' keh ma' xta naa kuuchjiik ruum i ruka'peech kimik k'amal b'eeh aj tiij la' chik taqe chuwach i Dios, chuwach i Jesucristo. Eh naa kianam i taaq'anik ruuk' i Jesucristo chuwach i lajeeb' siento haab'.

⁷Eh na' i k'oq i lajeeb' siento haab', naa rutehariik chee aj yahm i tz'aplik cho wii'.⁸Eh naa rojiik chi kijot'ariik i nimaq taq tinamit sut i wach ak'al Gog, eh Magog i kib'ihnaal. Eh re' i aj yahm naa wo' rumolom wach i ki soldado i tinamit re' re' reh i peletohinik. Re' ki soldado xiik' naah kik'ihaal je' k'ihaal i saniib' chii' palaw.⁹Re' taqe soldado re' re' xkipuhkaaj kiib' wach ak'al. Eh xkisutej riij i ye'aab' wilkeeb' wii' i santo laj aj nimaneel, je' wo' tinamit q'e' ruk'axam. Eh re' Dios xukut chaloq i q'aaq' pan taxaaj chikinaah i aj ixowaal re' re', eh xuk'at taqe chi jumpech.¹⁰Eh re' aj yahm i xjot'wik keh, xkutarik pan palaw q'aaq' qoplik ruuk' asufre, re' wo' kutuuj wii' i peet josq'laj chikop ruch'ihil i chukul q'orik chi riij i ruq'oral i Dios. Ar naakik'ulum i runimaal ti' k'axik koxcheel chi q'iij chi aq'ab' chi juneliik. Re' q'ataj q'orik xb'aan chupaam i Saqlaj Ye'aab'

¹¹Eh jinaj chik i nimlaj ye'aab' xiik' naah saqiil xwilow wach, eh jinaj i tzunlik chupaam. Chuwach i tzunlik ar xsahchik wach i taxaaj je' i wach ak'al ma' x-ilarik ta chik kiwach chi jumpech.¹²Eh xwilow kiwach i kamnaq chi nimaq chi kok' taq pa'alkeeb' i koq chuwach i loq'laj ruye'aab' i Dios. Eh xhe'arik kiwach huuj, xhe'arik wo' wach i huuj jinaj chik, re' ruhujil i juneliik k'acharik. Re' taqe kamnaq re' re' xq'atarik q'orik chikinaah re' q'oreel chib'ih xkian chib'ih i xkiq'or je' rukab' i tz'ihb'amaj chupaam taqe huuj re' re'.¹³Re' palaw xuq'asaj taqe kamnaq wilkeeb' naq chupaam. Re' kimik ruch'ihil i kiye'aab' Camnaq xkiq'asaj i kamnaq wilik naq kuuk'. Eh re' taqe kamnaq re' re' chi kiju'junaal xq'atarik q'orik chikinaah re' q'oreel chib'ih xkian chib'ih xkiq'or.¹⁴Eh re' kimik, ruch'ihil i kiye'aab' kamnaq, xikutarik pan palaw q'aaq'. Re' palaw q'aaq' re' re', re' ruka'peech kimik.¹⁵Eh xikutarik pan palaw q'aaq' noq xwil i ma' xkan taj chi tz'ihb'amaj i kib'ihnaal paruhujil i juneliik k'acharik. Re' ak' Taxaaj eh re' ak' Wachak'al

¹Chi riij i re', xwilow chik wach jinaj i ak' taxaaj, jinaj i ak' wach ak'al, ruum re' peet taxaaj i peet wach ak'al xsahchik kiwach chi jumpech, eh ma' xta wo' chik palaw.²Re' hin i Juan xwilow chik inche wach i Santolaj Tinamit, re' ak' Jerusaleem, qajik i rub'an cho pan taxaaj chuwach i Dios, korjinaq cho chi korik je' rukab' jino'q i q'ahxoq rutiq'aam riib' reh irukaxaro ruuk' i rub'ahiil.³Eh jinaj i kowlaj q'orik xb'aan cho chupaam i loq'laj ye'aab', je' wili xuq'or chaloq: Chab'iraj yu'naak re' chik i Dios patim chi kixilak i tinamit. Re' chik i reh naa rupatiniik kuuk' chi jumpech, eh naa kikahniik chi rutinamiit. Re' Dios naa ruwihiik kuuk', eh re' chik i reh naa kikojom chi ki Dios.⁴Eh re' wo' reh naa rujuxwiik reh chu'nchel i riis naq' kiwach. Eh ma' naa ta chik rilariik wach i kimik, ni xata oq'ik, ni xata ti'kiil k'uxliis. Eh ma' xta chik ti' naa ruk'ulariik chuwach i Dios, ruum chu'nchel i wilik naq cho najtir xsahchik kiwach, inki.

⁵Eh re' tzunlik cho paruloq'laj ye'aab' je' wili i xuq'or weh: Chab'iraj re' hin inu-aak'b'isaj chu'nchel i xa chib'ih jariik, inki. Eh xuq'or wo' weh chi je' wili: Chatz'ihb'aaj taqe q'orik wili, ruum re' re' xti korik nimjik iraaj, inki.⁶Eh je' wili i xuq'or weh: Xooj aj eloq wach re'. Re' hin i peet, re' hin i rukuxiik wach, je' rukab' noq wilik i peet letra A, i tz'apaab' wach letra Z. Awach i chiqiij chii', xa chi siih neenuyeew ruhaa' paraasb'al ha', re' inye'wik juneliik k'acharik.⁷Awach i xukuy ik'ik chupaam i ti' k'axik, naa rehchaam chu'nchel i wili chi rukooch. Re' chik i hin neekirukoj chi ruDios eh re' reh nee wo' nukoj chi wak'uun.⁸Eh re' i kiyo'jik, re' i ma' kinimanik taj, re' i xiik' naah yib'kiil wach i kina'ojb'al, re' i kansan kas kichaaq', re' i wilkeeb' pan k'oyomal, re' taqe i aj war, re' i kiloq'inik reh i tiyoox, re' taqe i chukul q'orik, chu'nchel i re' naakikutariik pan palaw q'aaq' qoplik ruuk' asufre. Re' re' i ruka'peech kimik, inki. Re' ak' Jerusaleem

⁹Eh jinaj keh i wuquub' chi ánjel i wilik ju'jun kikulk kuuk' nujinaq taqe wii' i wuquub' chi tz'apaab' wach ti' k'axik, xuq'or weh chi je' wili: kim ayu', neenuk'uhtaaj aweh i naa ruk'amam chi Rehk'een i je' Rak'uun Tentzun, inki.

¹⁰Eh chupaam ilooj xnub'an re' re' xk'uhtjik weh chi xiruk'am johtoq panuxlab'al chinaah jinaj nimlaj yuuq' najt naah. Ar xuk'uhtaaj reje weh i runimaal santo laj tinamit, i ak' Jerusaleem, qajik i rub'an cho pan taxaaj chuwach i Dios.¹¹Eh xan saqumanik chik paam ruum i rusaqumaal chii' wach i Dios. Eh re' rusaqumaal je' rukab' i holohik laj ab'aj, je' rukab' ab'aj, jaspe, xan saqumanik chik paam, je' rukab' i lemow.¹²Re' tinamit re' re' sutimaj riij chi runimaal tz'aq najt naah. Kab'laj i ru puertahiil, eh chi chii' i ju'jun chi puerta, ju'jun i ánjel wilik. Eh chuwach i ju'jun chi puerta re' re', tz'ihb'amaj i kib'ihnaal i kab'laj ch'uq chi tinamit Israel.¹³Ixib' i ru puertahiil wilik parelb'aal q'iij. Eh ixib' ru puertahiil wilik parookb'aal q'iij. Ox ox wo' ru puertahiil wilik k'ultar pantaq rucheel.¹⁴Re' tz'aq sutimaj wii' riij i tinamit kab'laj chi ab'aj ch'iklik wii'. Eh chuwach taqe ab'aj re' re', tz'ihb'amaj i kib'ihnaal i kab'laj chi raj tahqaneel i je' Rak'uun Tentzun.

¹⁵Re' ánjel xq'o'rinik weh ruyohq'eem jinaj rupajb'aal b'olob'ik paam re' ruuk' i oro, pajb'al reh i tinamit, pajb'al reh i tz'aq sutimaj wii' riij, eh pajb'al reh taqe ru puertahiil.¹⁶Re' tinamit kajtz'u'k noq wilik re' runimaal rooq eliik wach ruuk' i runimaal wach. Eh noq xupaj i ánjel i tinamit ruuk' i rupajb'aal, kiib' miil ruuk' kiib' siento kilómetro xooj eloq chuwach. Re' runimaal rooq, re' runajtiil naah ruch'ihil i runimaal wach, xa eliik wach.¹⁷Chi riij i re', re' ánjel xupaj wo' hoq i rutz'aqiil i tinamit kab'laj rukajwinaq b'ara xooj eloq chuwach. Re' pajb'al xukoj, re' ruuk' i rub'ara winaq.¹⁸Re' tz'aq re' re' jaspe ab'aj ruyej-aal. Eh re' paam i tinamit re' ruuk' i holohik oro i okinaq reh je' rukab' i lemow xa nworwotik chik.¹⁹Re' ju'jun chi ch'ikaab' ree tz'aq xa reh reh wach kika'yik i holohaq ab'aj xoyimaj taqe wii': Re' peet ch'ikaab' ree tz'aq ruuk' jaspe re' rukab' ruuk' safíro re' roox ruuk' ágata re' rukaaj ruuk' esmeralda²⁰re' roo' ruuk' ónice, re' ruwaaq ruuk' kornalina, re' ruwuuq ruuk' crisolito, re' ruwahxaaq ruuk' berilo, re' rub'eleej ruuk' topacio re' ru lajeeb' ruuk' crisoprasa, re' rujunlaaj ruuk' jasinto, eh re' rukab'laaj ruuk' amatista.²¹Re' kab'laj chi ru puertahiil i tinamit kab'laj wo' chi perla ab'aj. Eh re' ju'jun chi puerta, ju'jun chi perla i ruyej-aal. Eh re' nimb'eeh panyejaal i tinamit xti xa oro chik je' rukab' i lemow xasaqum chik paam.

²²Chupaam i tinamit re' re', ma' xta jino'q rupaat i Dios xwilow wach, ruum ar xa re' chik i QaJaaw Dios i nim rajaawriik ruch'ihil i je' Rak'uun Tentzun jilow rupaat i Dios.²³Re' tinamit ma' koruman ta chik chi reh i rusaqumaal q'iij, ni xata re' rusaqumaal i poh, ruum re' chik i loq'laj rusaqumaal chii' wach i Dios ruch'ihil i je' Rak'uun Tentzun insihq'inik reh.²⁴Eh parusaqumaal i tinamit re' re' naakib'ehik i nimaq taq tinamit i ko'limaj taqe. Eh ar naa kik'amam chaloq i kib'ehomal taqe reey i wilkeeb' sut i wach ak'al.²⁵Re' taqe ru puertahiil i tinamit re' re' ma' naa ta kitz'ahpik chi jumpech, ruum ar ma' naa ta chik rilariik wach i q'equm aq'ab'.²⁶Eh ar naa kik'amam reje runimaal wach i kib'ehomal ruch'ihil i kiloq'il i nimaq taq tinamit.²⁷Eh chupaam i tinamit re' re', ma' naa ta rokiik i ch'uwa' wach, ni xata re' imb'anik reh i re' ma' re', ni xata re' i chukul q'orik. Re' naa kokiik ar xa re' wo' i tz'ihb'amaj i kib'ihnaal chupaam i ruhujil i juneliik k'acharik wilik ruuk' i je' Rak'uun Tentzun.

¹Eh re' ánjel xuk'uhtaaj chik weh jinaj i nim ha' xasaq saq chik wach, re' inye'wik k'acharik, xa lemow xan saqumanik chik paam. Eh ar inaasjik chaloq paruloq'laj ye'aab' i Dios, re' wilik cho wii' i je' Rak'uun Tentzun.²Panyejaal i nimb'eeh ree tinamit re' re' k'ul tar chi chii' i nim ha' ink'ihik i chee' inye'wik k'acharik. Re' chee' re' re' kab'laj pech inwachinik chupaam i haab' i rajlaal poh inwachinik. Re' xaq i chee' inkamanik chi iq'oom b'al keh i nimaq taq tinamit.³Chupaam i tinamit re' re', ma' awach ta chik i naa ruk'ulum i ti' k'axik, ruum ar xa re' chik i loq'laj ruye'aab' i Dios, i ruye'aab' i je' Rak'uun Tentzun naa ruwihiik, eh re' taqe raj kamanoom naa kiloq'inik reh ar.⁴Xti naakilom wach i Dios, eh re' rub'ihnaal yejal kiwach naa ruwihiik.⁵Ar ma' naa ta chik rilariik wach q'equm aq'ab', ma' kota chik ruman chi keh saqumb'al, ni xata re' i rusaqumaal i q'iij. Ruum re' chik i rusaqumaal chii' wach i QaJaaw Dios naa rusihq'iniik keh. Eh ar naa kianam i taaq'anik chi juneliik. Re' Jesucristo ilook' wo' chik ink'ulik

⁶Eh je' wili i xuq'or cho weh i ánjel: Re' taqe q'orik wili xti korik, nimjik iraaj, ruum re' QaJaaw Dios, re' inye'wik cho reh i ruxlab'al pan kánima i jalal ruq'oral, xutaq'aaj wo' chaloq i ruánjel chuk'uhtjiik keh i raj kamanoom i k'isiin ma' nk'ularik, inki.

⁷Re' hin ilook' wo' chik kinchalik ruka'peech inki Jesucristo. Atoob' reh awach i runimaj i q'orooj chi naa ruk'ulariik, re' i tz'ihb'amaj chupaam i huuj wili inki.

⁸Re' hin i Juan, hin xinib'irinik, xinilwik reh chu'nchel i wili. Eh b'iram-oq wilom-oq chik, xnuxuk'aa' naq chik wiib' chulooq'jiik i ánjel i xk'uhtanik weh chu'nchel i wili.⁹Eh re' reh je' wili xuq'or weh: Ma a'n i je' re', re' la' Dios chaloq'ej. Re' hin xa hin wo' raj kamanoom i Dios, je' rukab' i hat, je' rukab' taqe aahermano i kijalwik ruq'oral i Dios, je' rukab' i kinimanik reh i tz'ihb'amaj chupaam i huuj wili, inki.

¹⁰Eh xuq'or wo' chik weh chi je' wili: Maapoy i q'orooj chi naa ruk'ulariik re' tz'ihb'amaj chupaam i huuj wili, ruum ilook' inooj eloq wach.¹¹Awach imb'anik ree mahk, chub'an parumahk. Awach i ch'uwa' wach, chub'an chi ch'uwa' wach. Awach i atoob' wach ruk'ux, marukanaa' chik rub'aan i otob'il. Awach i wilik rusantohiil, marukanaa' chik i santohiil, inki ánjel.

¹²Chab'iraj: Re' hin ilook' wo' chik kinchalik ruka'peech inki Jesucristo. Naa nuk'amam chaloq i kitojb'aal i ju'jun re' q'oreel chib'ih xkian chib'ih i xkiq'or.¹³Re' hin i peet, re' hin i rukuxiik wach, je' rukab' noq wilik i peet letra A, i tz'apaab' wach letra Z. Xa wilkiin wo' cho pampeet, eh xa wilkiin wo' pantz'apaab' wach, inki Jesucristo.

¹⁴Atoob' keh inkitz'aj i kiso' ruum naa ruye'ariik keh i ruwachuj i chee' inye'wik k'acharik. Eh naa wo' kokiik i koq chi chii' taqe ru puertahiil i tinamit, ak' Jerusaleem.¹⁵Eh re' taqe i je' kikab' i tz'i' ma' naa ta kik'ulariik cho ar, je' wo' taqe aj war, taqe k'acharik inki a'n pan k'oyomal, taqe kansan kas kichaaq', taqe i kiloq'inik tiyoox, taqe i chukul q'orik, taqe i jot'ool.

¹⁶Re' hin, i Jesucristo, xnutaq'aaj reje nuánjel chuq'orariik rukorkiil taqe wili keh i ju'jun ch'uq chi aj nimaneel. Re' hin, re' ruuk' chaloq i riih rumaam i reey David. Eh re' hin je' naa hin ch'umiil ihqen q'iij xa ntziqtzotik chik, inki.¹⁷Kim inki Santolaj Uxlab'al, ruch'ihil i rehk'een noq wilik i je' Rak'uun Tentzun. Eh awach i rib'iraj, kim inko'q. Eh awach i chiqiij chii', wila' raaj, xa chi siih chaloq ruk'ej ree i ha' inye'wik juneliik k'acharik.

¹⁸Re' hin i Juan noq k'ahchi' nuq'orom keh chu'nchel i ki-ib'irinik reh i q'orooj chi naa ruk'ulariik re' tz'ihb'amaj chupaam i huuj wili: Wila' awach xtiqwik naah chib'ih ruq'or, re' Dios naa rutiqwiik naah taqe ti' k'axik chinaah tz'ihb'amaj chupaam i huuj wili.¹⁹Eh wila' awach xtoqwik rooq i q'orooj chi naa ruk'ulariik re' tz'ihb'amaj chupaam i huuj wili, ma' naa ta ruye'ariik reh ruum i Dios i ruwachuj i chee' inye'wik juneliik k'acharik. Eh ni xata naa rokiik chupaam i Santolaj tinamit, re' i q'orooj chupaam i huuj wili.

²⁰Re' inq'orik rukorkiil taqe wili i ruq'or chi je' wili: Hoo'. Re' hin ilook' wo' chik kinchalik ruka'peech, inki.
Je' ta wo' naq re', QaJaaw Jesucristo. Kim.

²¹Re' ta naq i QaJaaw Jesucristo nee ruyeew rotob'il taq cha naah chawunchelaal. Je' ta naq re'.

Bible Society in Guatemala

https://app.library.bible/content/695aa4b9f902778f