Banyakolosayi1
1Ingye Polo, nyɨrɨmʉthʉmwa wa Yesʉ Kirisito kw'ɨshasha lya Gongo. Ni ingye hagʉma na Timote mʉgala ethʉ,2thwo thʉbashakɨra imwe bandʉ ba Gongo b'iyinihirwa bo balɨ iKolosayi. Mʉlɨ bagala bethʉ babuyirire, mʉ Yesʉ Kirisito. Mubye n'olʉkogo n'obʉholo byo bɨthoka ewa Gongo Thatha.3Mo bʉlɨ ndambi othunabya thʉlɨ othʉbashabɨra, othʉnasɨma Gongo, Ishe wa Nyinya-kowethʉ Yesʉ Kirisito.4Othʉkola thuthyo, kʉshangwa mothwonvwa nɨabasɨmola ko lwɨkɨrɨtsyo lwenyu mʉ Yesʉ Kirisito na ko mutsiire abɨkɨrɨtsya boshi. 5Ebyo bɨthokene n'omuyinihiro w'ebyo Gongo ababikire mo lʉbʉla. Omuyinihiro oyo, nɨ wo mwonvwaga balɨ abasɨmola bʉshana nawo mwabere mwafʉlɨrwa Engʉlʉ Mbʉya, eKɨnwa ky'ekwenene.6Engʉlʉ Mbʉya eyɨkona malambo na eyɨheka biguma mo kɨhʉgo kyoshi, nga ko yakolaga mo kathi-kathi kenyu ɨthanga ekɨro mwonvwaga balɨ abafʉla omwatsɨ w'olʉkogo lwa Gongo n'ɨmɨnya ko nɨ bya kwenene.7Nɨ Epafʉra mukoli mulikyethu mʉtsɨɨrwa yo wabakangɨrɨtsayabyo. Naye ni mukoli w'iyinihirwa wa Kirisito bʉshana nemwe.8N'ɨye yo wathʉganʉlɨra olwanzo lwenyu olo mwahabawa n'oMʉthɨma Mwerʉ.9Nɨ bʉshana n'ekyo thʉthalɨ othulika erɨbashabɨra, ɨthanga ko kɨro thwonvwaga emyatsɨ enyu. Othʉnashaba Gongo abamɨnyɨse kʉbʉya erishondya lɨwe, ɨtsʉkɨra ko buthegekania n'obwenge bʉwe bo bʉnahanwa n'oMʉthɨma Mwerʉ.10Aho mwagenda omʉyɨwatha nga ko Nyinya-kowethʉ ashashire n'imumoya mo bɨndʉ byoshi. Bʉshana n'ekyo, mwandahika kw'ɨkola bɨbʉya n'ɨmɨnya Gongo yo kʉtsɨbʉ.11Gongo agende abaha kagala mw'ɨtsʉkɨra amaka w'olʉkengerwa lʉwe, bʉshana mutsitsinie ko bʉlɨ kɨndʉ bʉthalʉha nɨmʉlɨ n'olʉmogo.12Mʉgende omʉsɨma Thatha Gongo yo wabahaga maka w'erɨshangɨra ko mwandʉ w'ababuyirire mo kyakakala.13Kʉshangwa mwathʉshabʉla ɨthoka mo maka w'omwitsimya n'ɨthwɨngɨtsya mo bwamɨ bwa Mʉgala ʉwe mʉtsɨɨrwa,14nɨ kw'ɨye ko thwamashabʉlwa ɨthoka mo bɨbɨ na kuthyo ebɨtsɨbʉ byethʉ byamaganyɨrwa. 15Kirisito ni shoshani ya Gongo yo ʉthashʉngɨka. Ɨye nɨ Kambere, mʉkʉlʉ mo byoshi byo bya bʉmbawa. 16Kʉshangwa nɨ kw'ɨmʉtsʉkɨra, ko Gongo abʉmbaga ebyoshi mo lʉbʉla na mo kɨhʉgo, ebyo bɨnashʉngɨka na byo bɨthalɨ ebɨnashʉngɨka. Bubye bwamɨ kʉtse bʉkʉlʉ, kʉtse buthegeki kʉtse maka. Gongo mwabʉmba ebyoshi kw'ɨtsʉkɨra Kirisito na bʉshana naye.17Kirisito abyagaho embere w'ebɨndʉ byoshi, na nɨ kw'ɨye kw'ebɨndʉ byoshi bithondekire.18Kirisito nɨ muthwe w'omʉbɨrɨ, n'omʉbɨrɨ oyo ni aKanisa. Ɨye nɨ ndangɨro, Kambere mo baholi, bʉshana abye mʉmbere mo byoshi.19Kʉshangwa Gongo mwashʉnga kʉbʉya ɨye woshi abye mʉ Mʉgala.20Na kw'ɨtsʉkɨra Kirisito, Gongo mwashondya ihindania abandʉ boshi hagʉma naye. Nɨ kw'ɨtsʉkɨra omʉsasɨ wa Mʉgala ow'asheshekaga komʉsalaba mwaletha obʉholo ko bandʉ boshi, ibye ko kɨhʉgo, kʉtse mo lʉbʉla.21Nemwe kera ndɨ mwabyaga hale na Gongo, na mwabyaga nzigu sɨwe bʉshana n'ebɨbɨ mwagenda omʉganɨtsya n'ɨkola.22Hewethuwe lɨno, Gongo mwabahindania n'ɨye yo wene ɨtsʉkɨra olʉholo lwa Mʉgala mo mʉbɨrɨ, bʉshana mʉshʉngɨke bandʉ babuyirire embere sɨwe, bʉtsɨra bʉlema na bʉbɨ boshi-boshi.23Hewethuwe bɨtholere nɨmwayɨtsɨnga ibya n'olwɨkɨrɨtsyo. Mushike na mubye ko mʉsɨngɨ ow'ashikire, muthamikaga omuyinihiro enyu ɨthanga ho mʉkonvwɨra Engʉlʉ Mbʉya, eyo yafʉlɨrwa ebɨhangɨkwa byoshi hano ishi. Nangye Polo monyayɨrwamo mukoli w'eNgʉlʉ Mbʉya eyo.24Na lɨno nyɨmogere amalɨgo wo nyɨrɨ nawo bʉshana nemwe. Mw'ɨtsʉkɨra eryagalwa lyaye, enyɨbereretsya amalɨgo ow'ashakaga ko mʉbɨrɨ wa Kirisito, n'omʉbɨrɨ ʉwe nɨ aKanisa.25Nangye nyabere mukoli w'eKanisa ɨkwamana n'omʉlɨmo wo Gongo anyɨhaga bʉshana nemwe. Omʉlɨmo oyo, nɨerɨfʉla eKɨnwa kya Gongo mo kwenene.26Ekɨnwa ekyo nɨ olʉfʉmɨ lwa bishawa ɨthanga kera. Hewethuwe lɨno, amabishuliralo ko bandʉ bʉwe babuyirire.27Kʉshangwa Gongo mwashondya ibishula obushoki n'olʉkengerwa by'olʉfʉmɨ olo ko bandʉ b'ebɨhanda. N'ebyoshi ebyo binegenire bɨthɨ: Kirisito alɨ emwishi senyu, nɨ ɨye yo ʉbaha muyinihiro ko muwithe mʉhango ko lʉkengerwa lwa Gongo.28Aho othʉkangɨrɨtsya abandʉ bo Kirisito. Othʉhana n'ɨkangɨrɨtsya bʉlɨ mʉndʉ mo buthegekania boshi, bʉshana n'ɨyɨra bʉlɨ mʉndʉ mo mwɨkɨrɨtsya na mʉthʉnganene mo bʉgʉma hagʉma na Kirisito.29Na bʉshana n'ekyo, enyɨkola n'ɨyɨlwako mo kagala ko kathoka mu Kirisito. N'akagala ako, akakola n'amaka mw'ingye.
The Seed Company