Leia YOSHUA 22

YOSHUA22

Enganda ibiri n'ekicweka okugaruka owaazo seeri ya Yorudani

¹Bwanyima Yoshua yaayeta Abareubeeni n'Abagaadi n'ekicweka ky'oruganda rwa Manaase,²yaabagira ati: Mukozire byona ebi Musa omugaragwa wa MUKAMA yaabaragiire; kandi omuri byona ebi naabaragiire, mukanyorobera.³Ebiro ebi ebingi ebi mumazire, timukahemukaga ahari beene waanyu n'okuhitsya hati, kureka mworobeire ekiragiro eki MUKAMA Ruhanga waanyu yaabaragiire.⁴Mbwenu hati MUKAMA Ruhanga waanyu ahuumwize beene waanyu, nk'oku yaabaraganiise; n'ahabw'ekyo mugarukyeyo, muze omu maka gaanyu omu nsi y'obutaka bwanyu ei Musa omugaragwa wa MUKAMA yaabahaire seeri ya Yorudani.⁵Kwonka muteho omutima munonga kworobera ebiragiro byona ebi Musa omugaragwa wa MUKAMA yaabaragiire, okukunda MUKAMA Ruhanga waanyu, okugyendera omu mihanda ye yoona, okworobera ebiragiro bye, okumuhamiraho, n'okumuheereza n'omutima gwanyu gwona n'amagara gaanyu goona.⁶Atyo Yoshua yaabashabira omugisha, yaaboohereza, baagaruka omu maka gaabo.

⁷Ekicweka kimwe eky'oruganda rwa Manaase Musa akaba yaabahaire obuhunguzi omuri Bashani; kwonka ekindi kicweka kyarwo Yoshua niwe yaabahaire obuhunguzi omuri beene waabo seenu ya Yorudani oburengyerwa-izooba. Kandi Yoshua, ku yaaboohereize kugaruka omu maka gaabo, yaabashabira omugisha,⁸yaabagira ati: Mugarukye omu maka gaanyu, mutware ebintu bingi, n'amatungo maingi munonga, efeeza, ezaabu, emiringa, ebyoma, n'ebijwaro bingi munonga; mubagane na beene waanyu eminyago y'abazigu baanyu.

Enganda ibiri n'ekicweka okukora eitambiro ahari Yorudani; n'abandi okuzigwerwa kubi

⁹Abareubeeni n'Abagaadi n'ekicweka ky'oruganda rwa Manaase baagarukayo, baataana n'Abaisraeli okuruga Shiilo ey'omu nsi ya Kanaani, kuza omu nsi ya Gileadi ei baayekubuuriire, nk'ekigambo kya MUKAMA eki yaagambiire Musa oku kyabaire kiri.¹⁰Ku baahikire omu kyanga ekiri haihi na Yorudani omu nsi ya Kanaani, Abareubeeni n'Abagaadi n'ekicweka ky'oruganda rwa Manaase baakora eitambiro haihi na Yorudani, eitambiro rihango munonga.¹¹Abaisraeli baahurira abarikugira bati: Reeba Abareubeeni n'Abagaadi n'ekicweka ky'oruganda rwa Manaase bakozire eitambiro aha mwatano gw'ensi ya Kanaani, haihi na Yorudani, aha rubaju rw'Abaisraeli.¹²Abaisraeli ku baakihuriire, omutwe gwona gw'Abaisraeli gwayeteeranira Shiilo kuza kubarwanisa.¹³Abaisraeli baatuma Finehaasi mwene Eleazaari omunyamurwa aha Bareubeeni n'Abagaadi n'ekicweka ky'oruganda rwa Manaase omu nsi ya Gileadi.¹⁴Baamutuma n'abakuru ikumi, buri ruganda rwa Israeli omukuru omwe ow'omuryango gwa baishenkurubo, buri omwe omuribo akaba ari omukuru w'omuryango gwa baishenkurubo omu nganda za Israeli.¹⁵Baija omu nsi ya Gileadi, baashangayo Abareubeeni n'Abagaadi n'ekicweka ky'oruganda rwa Manaase, baagamba nabo nibagira bati:¹⁶Ab'eihanga ryona erya MUKAMA baatutuma ngu: Eki kicumuro ki mucumwire ahari Ruhanga wa Israeli mukikoreire ki, okureka kukuratira MUKAMA, mukeekorera eitambiro, mukamugomera?¹⁷Nimugira ngu ekicumuro eki twacumuriire omuri Peori kikatubeera kikye? Timurikumanya na hati ku tutakakyetuuraga, n'obu orufu rwateire eihanga rya MUKAMA?¹⁸Mbwenu ekyo kikaabareeteire okuteishuka, mukareka kukuratira MUKAMA eri izooba? Ekiraabirugyemu ahabw'okugomera MUKAMA eri izooba, nyencakare naija kugirira eihanga ryona ery'Abaisraeli ekiniga kingi.¹⁹Ensi yaanyu ei mwakubwire ku eraabe esiisikaire, mwambukye mwije omu nsi ya MUKAMA, ei eihema rya MUKAMA riri, mutungye obutaka omuriitwe; kwonka mutagomera MUKAMA, kandi naitwe mutatugomera, mukeekorera erindi itambiro, eritari rya MUKAMA Ruhanga waitu.²⁰Timurikumanya Akani mwene Zeera ku yaacumwire akatwara aha byabiikiirwe MUKAMA, eihanga ryona erya Israeli rikahikwaho ekiniga kingi? Kandi ogwo mushaija taracwekyereire wenka ahabw'ekicumuro kye.

Okwetonganira kw'enganda ezo

²¹Abareubeeni n'Abagaadi n'ekicweka ky'oruganda rwa Manaase baagarukamu nibagambira abakuru b'enganda za Israeli bati:²²MUKAMA Ruhanga Nyamuhanga! MUKAMA Ruhanga Nyamuhanga niwe arikukimanya, kandi n'Abaisraeli baryakimanya. Ku turaabe twakikozire ahabw'obugomi nari ahabw'okucumura ahari MUKAMA, eri izooba tutakira!²³Ku turaabe twayekoreire eitambiro ngu tuteishukye, turekye kukuratira MUKAMA, nari ngu tutambireho ebitambo ebyokize, nari empongano z'eby'okurya, nari ez'okusiima ahabw'obusingye, MUKAMA wenka abe niwe yaabitutura;²⁴kureka tukikozire twine eki tukikoreire, ngu omu biro ebiriija abaana baanyu bataribuuza abaitu bati: Mwine kakwate ki na MUKAMA Ruhanga wa Israeli?²⁵Timurikumanya ngu MUKAMA akataho Yorudani kuba omwatano gwaitu naimwe, imwe Abareubeeni n'Abagaadi? Timwine mugabo ahari MUKAMA. N'ahabw'ekyo abaana baanyu baryazibira abaitu kutiina MUKAMA.²⁶Nikyo kyatureeteire kugira tuti: Ka twekorere eitambiro, eritari ry'okutambiraho ebitambo ebyokize nari ebindi bitambo;²⁷kureka ribe eky'okuhamya ahagati yaitu naimwe, na baijukuru baitu abaritukurata, ku turi abantu abakora omurimo gwa MUKAMA nitutambira ebitambo ebyokize omu maisho ge n'ebindi bitambo n'empongano z'okusiima ahabw'obusingye, abaana baanyu nyentsya batarigira abaitu omu biro ebiriija bati: Timwine mugabo ahari MUKAMA.²⁸Nikyo twagiriire tuti: Ku baritugira batyo, nari baagira kwo baijukuru baitu omu biro ebiriija, itwe turyabagarukamu tuti: Reeba eitambiro eri tukozire, eririkushushana n'eitambiro eri baatatenkuriitwe baakozire, eritari ry'ebitambo ebyokize nari ebindi bitambo, kureka ery'okuhamya ahagati yaitu naimwe.²⁹Nikikabure itwe okugomera MUKAMA eri izooba, tukateishuka, tukareka kumukuratira, tukeekorera eitambiro ry'okwokyezaho ebitambo, nari ery'okuhongyeraho empongano z'eby'okurya, nari ebindi bitambo, ritari itambiro rya MUKAMA Ruhanga waitu eriri omu maisho g'eihema rye.

Ezo nganda okugarukana n'Abaisraeli

³⁰Finehaasi omunyamurwa n'abakuru b'eihanga, nibo bakuru b'emiryango y'Abaisraeli abu yaabaire aine, ku baahuriire ebigambo by'Abareubeeni n'Abagaadi n'Abamanaase, baashemererwa munonga.³¹Kandi Finehaasi mwene Eleazaari omunyamurwa yaagambira Abareubeeni n'Abagaadi n'Abamanaase ati: Mbwenu eri izooba nibwo twamanya ku MUKAMA ari omuriitwe, ahakuba timurakozire kicumuro eki ahari MUKAMA; mbwenu mwakiza Abaisraeli okutaitwa mukono gwa MUKAMA.³²Bwanyima Finehaasi mwene Eleazaari omunyamurwa n'abakuru baaruga omu nsi ya Gileadi; ei baashangire Abareubeeni n'Abagaadi, baagaruka omu nsi ya Kanaani aha Baisraeli, baabagambira ebyabaireho.³³Ekyo kyashemeza Abaisraeli, baahimbisa Ruhanga, tibaagaruka kugamba by'okurwanisa Abareubeeni n'Abagaadi, n'okucwekyereza ensi ei batwiremu.³⁴Kandi eryo itambiro Abareubeeni n'Abagaadi baaryeta Edi; amakuru gaakyo, ngu eky'okuhamya ahagati yaitu naimwe ku MUKAMA ari Ruhanga.

Bible Society of Uganda

https://app.library.bible/content/9bf4c154bb6029f7