Job22
1Ge Eliphaz Temanmepei keli eh ranggai,2“Mige Tinggwang dwa de pemi kebam ge tei lubui ni? Makecime ge pe ziemne heta teilu bui ni?3Nang petau be tei cu ziemne Ngkiengtube pesui yi lani? Ma gade kemmi ge ni peziemne ncu mmau kera lampui gah cai?4Nang pecu rüt kelane ncu kesiu nah tutiak gage nggwa gai di ni?5N kesia di ham meni? Nang kemau ketei penli ga ni?6N sinabe dade n sampet tei kelu pekie kega ge, nang pe paini keuteudi nah pecu bah kera gede bang beu ma.7Nang leu kelame de dui sak kera pwapeu ma; Nang nzeu kela mede penui puk tei raudi.8Nang, kengkiengme pei ge lie de, kideu gumlu, nang, hetwa kepung me pei ge, cika lungh bamla.9Nang hemipui de mta langgi di; nggianadung de süt tyei nah kenneu ta tei.10Ciziemne, ncu hekwadungne twagwa ciak bam dida nah zette kengngi ne ncu tei keherei bam.11Kemui kebamne nang ma ngau gailak di nah ncu duipui nliem kebam de ne sung bam.12Tinggwang tinggim hutu ga bam meni? Hegi kehu de pie lo, dai hia ge de cehu bi!13Dede nang rang eh, ‘Tinggwang daipai ci no? Pa muiting kecu gade tutiak teilu bui ni?14Hemwa kedi ge ne pecu sung pwa bam, anuide peu ngau melu kerane; Pa tinggim ga tet twagwa la.’15Nang nda tei kela de tei bam zie ni kemaume tet kela ga.16Penuide au peting gwang kemak dwa de jüt teudi, penui pibang au duidiet gene zwa pung teutet dida.17Cipaume Tinggwang de mlai eh, ‘Anui dade mdei lulo’; nah penui rang ‘Ngkiengtube Tinggwang anuide dai teilu bui no?’18Iciude pa penui ki ga ma keyi leu kai pui beula; kemaume lungning gade pa mdei dila.19Mina keyime penuide ngau lwe pesui yi bam nah mina kemzuime nuibamla penui de saja kepeu ngau kelu dau.20Penui rang, ‘Kesangbe de caune anuide renia labi penui kapdi zie, mi ne penui mahei leune rudi la.’21Cu Tinggwang de kesamtei lwe ngngwa yilulo; ciciu lu cai, n da keyibe gwang zie.22Lulu, I kiela, pemui gade ledeu kebeu sam de, hekwa lu pe sam mlung gage.23Nang Ngkiengtube Tinggwang da caili gwang dai cai, ncu pwa peu dai zie, magede nang kemau ketei n ki gade kai mdeidi lucai.24Ngu mabam kelien gidi lo Ophir gu kecak de hereuki tangtsu kak gage kelien gi di lu, 25nah Ngkiengtube Tinggwang de pwa n mabam teilu zie, pemi kehung rangkang geu ncu peu zie.26Iciulu de nang suiyi ngau lu zie Ngkiengtube Tinggwang dade, nang nzu pwa Tinggwang de ngang pie luzie.27Nang ngu kekie peda ge kiegai zie, nah n kekie keli beu zie; nang nsampet tei kelu mneilu zie.28Nang rang kepet leune ga nziemne teicang beu zie, n lampui ga kebaa tau beu zie.29Tinggwang ngang kelame de teu henah dila nah henah kelame de kelibeu la. 30Pa nzuicang kemakme de de keli beu zie; cipaume de n kemci badung ziemne keli beu zie.”
Bridge Connectivity Solutions Pvt. Ltd.