Mataio14
Obo to kiwarumiauti dubu Ioane na-garia-rimo
1Iedi tau ro nato Herodi Gariri eputa dubu to irarasorotiti. Nou ro Iesu sapuwo to owera ta-irowidirotiti sekere, kaupoti Iesu nou ro mea se eibimai pua.2Nou simara woko urubia nato gimowapotai, ‘Nedi dubu ro isioidirotiti pupuwo korosa tanaro, Ioane ie obo to kiwarumiauti dubu nouse ie, pamo rido nou ro gorowameai-die. Pupuwo korosa tanaro nou ro noudo isioidiro.’3Ioane kebase na-gopia-rimo, nedi tanaro ro na-gororosioidiro-rimo ibo ie, Herodi ro boso urubia nato gimowapotai Ioane dibura to edea ri. Herodi ro nedi tanaro ro nou ri gosioidiro mabu nou Ioane ro paea se emowapotaidirotiti ibo, ‘Neama orobo keremiro ato kowasiri sabi ie!’ Mabu nou ro simara neama Piripi nou orobo masiro Herodiasi, nou gowasiri. Taie iedi mabu ro noudo ie Herodi ro boso urubia nou ri gimeiriai Ioane orobai ri. Neio ro na-gemotohiti-rimo, taie dibura to aise gibiria-rimo.5Herodi ubi ie Ioane opia ri, kaupoti nou ro edi urubia iaurititi neio tere imatiti. Mabu nedi urubia ro Ioane neio ro Godi ipusu owera dubu to asorotiti-mo.6Taie arua sogomi ta-gororoporeai-rimo iato Herodi koroto saiki ro gowamo, nou soriomu gosioidiro-rimo. Ina Herodiasi edi besere ro nato gomaro, Herodi nou simara woko urubia neio kamade imowai ri. Herodi ro na-giauri nou edi komaro ro, nou auna kamade ro gowati.7Taie iedi besere ro komaro na-goporeai, Herodi ro owera hodo nou aboudo nato gasaubiai-ro, nou ro ibo, ‘Oro etou ubi nakomu ra ma-dapoi-ro, morobise to anama-omia-ri.’8Iedi besere ro Herodi aise gemeserai, koroto mamu aboto nato godoro emowapotai ri. Taie iedi besere ro ubi nakomu Herodi aboto nato gowapotai, nou ro ibo, ‘Mo ubi ie Ioane eputa aboto, kipura ato ba-memowia-rimo.’9Herodi ro na-girorowai nou ubi nakomu, nou abato temeteme se gereredea. Kaupoti nou ubi tato ie woko urubia sosoro gabo ato edi owera hodo ro na-gasaubiai-ro, nou aboudo kasiai. Taie nou ro ata boso koroho dubu aise gemeiriai dibura moto to Ioane aria ri. Iedi besere ro nou ubi ato Ioane nou ro aise garia,11taie Ioane eputa nou ro kipura to aise gowia-ro, iedi besere ro imese gemowou-ro, ina nou ro simara mamu aboto nato gowou-ro.12Ioane kowasoro urubia ro ududu durupi saro to na-girorowai-rimo, taie neio ro na-gowea-rimo, neio ro bobo to aise gedea-rimo. Taie nedi tanaro sirio ro beda sosoro gororosioidiro-rimo, Ioane kowasoro urubia Iesu aboto imese gou-rimo emowauti ri.Iesu ro auna topira gebari ohona to giwarebai
13Iesu ro nedi owera ro na-girorowai Ioane sapuwo to, iato nou pe se gorobai, obo paruo ata sapuwo to imese gabu urubia tato moro to. Urubia ro na-girorowai-rimo Iesu kabu owera, neio sabowa se gimeserai-rimo, sairo gabo gou-rimo Iesu na-gobodoro-rimo.14Iesu obo paruo ata sapuwo to na-gorowateai, nou pe rido na-giraradia, nou ro nato urubia sirio se giwia. Neio nou ro na-giauri, nou abato auna nirimagare kimaragoidiro ro gereredea. Ito etio ro gou-rimo erere temeteme mutu, iedi urubia ro nou ro meana aise giwaititi.15Saiki ta-goriodoi adimo ro gereredea-ro, 12 kowasoro urubia Iesu aboto nato gou-rimo neio ro ibo, ‘Nedi moro ro urubia mutu moro pua, saiki ta-woriodoi, urubia aupi sabowa to kitiodorai modobo ra? Neio ohona simara mani iopu to iato ba-merememade-mo.’16Ina neibi Iesu ro ibo gimowameai-bi, ‘Ina nibi ro kiwarebai beda ra? Modobo pua neio kimeriai.’17Kowasoro urubia ro, ‘Neibi abato 5 dokou koura ro iamo-ibi nakere teibo mutu, taie nouse ie.’18Iesu ro ibo, ‘Neito ma-diwou-birimo!’19Taie neibi ro edi ohona kainai ro imese giwou-birimo Iesu aboto. Nou ro urubia sirio iato gimowapotai sugamuso ato orowomititi ri. Nou ro dokou na-gimidai-ro nakere teibo mutu, toboro to se gawota, taie eso owera iato garo Godi aboto. Nou ro dokou na-gisebuti nakere teibo mutu, kowasoro urubia aboto iato giaiwo, ina neio ro gimoworoho-rimo.20Nedi ohona ro neio ro na-giho-rimo, imese modobo ta-goi-rimo. Neio aboudo edi ohona mapapati ro na-geremeserai-rimo, kowasoro urubia ro 12 gatere nou giodiawado-rimo.21Ohona edi urubia ro giho-rimo dubu kawakawa kioputi ato, imese 5,000. Mamio merebusere mutu ioputi pua.Iesu obo ato gou-ro
22Ohona kiho na-gororoporeai, Iesu ro kowasoro urubia iato gimowapotai kebase iabu ri obo paruo ata sapuwo to. Taie edi topira gebari ro neio aboto ina aise gorowameai-ro neio simara sabowa to itioduti ri.23Urubia kitioduti saro gabo ato, nou imese gioro podo ohu to, nakara moro ato Abera Godi aboto araratoro ri. Adimo duwoduwo na-goi-ro nou nakara moro ato ibose to gomidiro.24Kaupoti iedi tau ro nato kowasoro urubia edi pe to giabu-rimo, duriomoro rudo tau se ta-geremeseruti obo paruo turi damo ia to giabu-birimo. Obo paruo turi ia ato neibi auna gawia ro nato giwaimai-bi ina bukopu gebarigebari aise gireribuwa-rimo. Iedi pe ro nato gosamodorowado.25Wisana saiki ohu ato giwou-ro, Iesu saro rido kowasoro urubia aboto obo ato goroho.26Nou neibi ro aupise gowea-birimo, tere ri auna iamo nato giaiauti-birimo. Neibi ro Iesu mea se eibimai pua, neibi ro ibo, ‘Obodai dubu tou-die!’27Kaupoti Iesu ia neibi aboto owera to simara se gorowapotai-ro. Nou ro ibo, ‘Nou mo ie, nibi tere na ie.’28Pita ro ibo, ‘Abera Naramu, oro ia ato, mo daramairiai-ro oro aboto ou ri.’29Iesu ro ibo, ‘Taie obo ato dou-ro!’Pita pe rido egenabo giraradia, obo ato imese gou Iesu aboto.30Kaupoti Pita ro gawia ra bukopu ra na-giwia-ma, nou iato tere ro gorobai, obo to kororuwo aise garatamuai. Taie nou tere ri Iesu aboto nato giaia-ro, ‘Abera Naramu, mo dapopo-ro!’31Iesu tu na-gotuturai-ro, Pita nou ro obo maumo rido aise geihidiro-ro. Iesu ro nou ibo gemowapotai, ‘Oro kimibiria imese kainai ia ie! Mabu boira oro kimaragoidiro teibo na-iworohuti-ma mo sapuwo to?’32Taie neitiro pe to iedi kiora ro na-giora-rido, iedi gawia gebari ro na-gihuduti-ro bukopu mutu aise geremasiai-rido.33Taie pe ato edi urubia ro gorowomidiro Abera Naramu neibi ro iato gemowabu-birimo. ‘Morobise ie oro Godi ia mere ie!’34Taie neibi obo paruo ata sapuwo to Iesu mutu atu se na-gorowateai-birimo, pe neibi ro Genesareti moro to gairio-birimo.35Iedi sabowa urubia ro Iesu neio ro na-geibimai-rimo, neio ro owera iato gemeirio-rimo arua sabowa urubia aboto. Taie iedi sabowa urubia ro erere temeteme urubia Iesu aboto nato giworoho-rimo.36Neio ro Iesu iato gemediawado-rimo temeteme urubia ro nou obotama gare se emowaseidiro ri, neio meana koititi sapuwo to. Taie imese beda mutu urubia ro na-gemowaseidiro-rimo Iesu obotama gare, neio meana aise goititi-rimo.