Tingoḏi'i6
1Pasala i'a, ngoi to oḏi'i Doba ma Ngowa 'a woi'i segele ma mulaingi. Ḏua ngoi to 'isene makhluk nga ḏuata gena-ge matengo 'o kanau, “Ino!” Re ma iḏingi ma tero sa'olo detere'e.2Ḏua ngoi to oḏi'i jarana bu-buḏo rimoi. Ma ga-gasa Tai giama 'o gu'u ngami. Re Unanga 'o pake 'o lastari ga'a Ro dawongo sababu Unanga ro 'utungu toma parangi. Nange-ne, Unanga 'o tagi parangi di'a 'o 'utungu ḏi'i.3Gena ḏua, Doba ma Ngowa gena-ge 'a woi'i segele ma nyo-nyoimi romoḏiḏi, kara to 'isene makhluk ma nyo-nyoimi romoḏiḏi gena-ge 'i kanau, “Ino!”4Gena ḏua, jarana ma lelegu 'i supu ḏi'i. Jarana gena-ge 'i ko-kolili. Ma ga-gasa 'o sanga kuasa di'a singi-ngiranga dame toma dungia nena-ne ma dara, la manusia ma'u sengene. Dadi unanga gena-ge sanga samaranga lamo'o ḇotu moi.5Ḏua, Doba ma Ngowa gena-ge 'a woi'i segele ma nyo-nyoimi ro'ange, ngoi to 'isene makhluk ma nyo-nyoimi ro'ange 'i kanau, “Ino!” Ḏua ngoi to oḏi'i 'o jarana ko-kotu'u rimoi. Ma ga-gasa 'o gu'u kilo rimoi.6Re ngoi to 'isene ma tero sa'olo iḏingi toma makhluk rata enanga ma sigolona. Iḏingi gena-ge ma betongo so'o ne: “Gandum ma la-la, ma ijana liter rimoi lai hali ma tero ngowa'a matengo 'ai gaji di'a munara wange moi. Re gandum ma rousu ua, ma ijana liter ro'ange hali ḏi'i ma tero ngowa'a matengo 'ai gaji di'a munara wange moi. Mada'a sijira awa ate-ate zaitun re guḏa 'anggur!”7Ḏua Doba ma Ngowa 'a woi'i segele ma nyo-nyoimi rata. Re ngoi to 'isene makhluk ma nyo-nyoimi rata 'i kanau, “Ino!”8Ngoi to oḏi'i jarana rimoi 'i ḇuta. Ma ga-gasa 'ai lomanga Maut, re to oḏi'i ḏi'i 'O Dungia Maut 'i tu-tuu'u. Enanga gena-ge 'i dawongo kuasa toma dungia balangu moi toma balangu rata, la enanga nga'unu sisengene ngowa'a toma parangi ma dara, toma 'orasa sawini, toma 'orasa bobaku, re haiwani nga-ngabala ya'u 'omo.9Gena ḏua, Doba ma Ngowa 'a woi'i ma segele ma nyo-nyoimi romotoa. Re ngoi to oḏi'i ngowa'a manga nyawa toma jou-jou ma ngi'i ma 'aḏu. Ngowa-ngowa'a 'aḏi sisengene ananga gena-ge sababu ananga sa'olo sakisi cufala ga'a 'aḏi singadolo Ma Jou'ongu Madutu 'ai demo.10Ananga gena-ge 'aḏi maḏigaro'o ya siduga-duga, “Ya Ma Jou'ongu Madutu ga'a kuasa, re 'ofi-'ofi re banari! Ma di'ara sa'olo moju kara Ma Jou'ongu Madutu no sijuruhakimi dungia nena-ne, re No sihukumu ananga ga'a 'aḏi sisengene ngomi?”11Ananga matengo re matengo sanga juba bu-buḏo matengo bela moi. Ḏua ananga sanga soma'a mangomasa ceka'a 'ua moju singadolo ngowa'a 'aḏi sisengene manga ḏagilomu munara re manga ioronongoḏu ngo-ngaku rimoi ma tero sa'olo ananga ḏi'i, kara ma nyo-nyoimi ri ti-tiai.12Gena ḏua, ngoi to oḏi'i Doba ma Ngowa gena-ge 'a woi'i segele ma nyo-nyoimi rarama. Ḏua 'i dadi wusu lai siḏi madutu. Re wangere ma la'o 'i dadi ko-kotu'u ma tero sa'olo ḇa'a kotu'u ma kasara, re ngara 'i dadi ko-kolili ma tero sa'olo ngaunu.13Re mumuḏungu matai eta'a da'u diwanga tala ma tero sa'olo ate ma sowo'o 'i la'ere nyangu matai ḏaḏolo, na'o nga'unu karawiana lai siḏi.14Diwanga 'i iranga ma tero sa'olo ngowa'a matengo 'o lo-lolo kartasi, re kie mo-moini re pulo-pulo ma ngi'i 'i lage.15Ḏua 'olana-'olana dungia, ngowa-ngowa'a la-lamo'o, sordado-sordado ma sae'e, ngowa-ngowa'a rema-enanga re ngowa-ngowa'a rema ḏe-ḏegoro, re ngowa'a lelegu: bae budaka, bae ngowa-ngowa'a bebasa, mo-moini gena-ge 'aḏi magogono toma aḏu'u ma dara re toma maḏi kie ma dalanga.16Toma kie-kie re maḏi-maḏi gena-ge, ananga gena-ge 'aḏi poa'a, “Kie re maḏi 'i damunu re gogono ngomi ra Unanga 'ai momina ga'a 'o tegoro ra Ma 'Olana 'ai ḏe-ḏegoro, re Doba ma Ngowa 'ai borata!17Sababu bahaya ma 'orasa gena-ge ri sapolo. Nange-ne Ma Jou'ongu Madutu re Doba ma Ngowa ya sijumu manga borata, re matengo i'a mai ua nga'unu 'o matahana ra Ananga manga biono!”
The Seed Company