𐴈𐴝𐴔𐴡𐴥𐴓𐴢16
𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴏𐴞𐴥𐴓𐴝𐴏𐴡𐴌 𐴉𐴟𐴥𐴖𐴝𐴣𐴃𐴞 𐴃𐴞𐴔𐴡𐴥𐴃𐴞 𐴒𐴞𐴦𐴘𐴠𐴥
1𐴎𐴝𐴘𐴃𐴠-𐴎𐴝𐴘𐴃𐴠 𐴂𐴝𐴥𐴀𐴟𐴓𐴢 𐴊𐴝𐴌𐴁𐴞 𐴐𐴡𐴥𐴀𐴌𐴡𐴃𐴢 𐴉𐴡𐴀𐴣𐴙𐴐𐴧𐴠, 𐴁𐴝𐴦𐴊𐴠 𐴓𐴟𐴏𐴞𐴥𐴃𐴝𐴌𐴝 𐴐𐴡𐴥𐴀𐴌 𐴀𐴡𐴃𐴢. 𐴇𐴠𐴥𐴍𐴠 𐴃𐴞𐴔𐴡𐴥𐴃𐴞 𐴕𐴝𐴔𐴡𐴌 𐴀𐴠𐴎𐴧𐴡𐴕 𐴀𐴟𐴔𐴧𐴡𐴃𐴢 𐴀𐴝𐴐𐴧𐴞𐴥𐴓𐴢. 𐴘𐴡𐴥𐴒𐴧𐴗𐴝𐴌 𐴔𐴝𐴦 𐴀𐴡𐴥𐴙𐴓𐴊𐴠 𐴀𐴠𐴎𐴧𐴡𐴕 𐴘𐴡𐴇𐴟𐴥𐴊𐴞 𐴎𐴞𐴁𐴝𐴤 𐴀𐴞𐴔𐴝𐴕𐴊𐴝𐴥𐴌 𐴁𐴡𐴙𐴕𐴧𐴠𐴥, 𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝𐴌 𐴁𐴝𐴉𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴒𐴞𐴌𐴞𐴥𐴑 𐴑𐴡𐴗𐴔.2𐴓𐴟𐴏𐴞𐴥𐴃𐴝𐴌𐴝𐴃𐴢 𐴀𐴠𐴊𐴧𐴠 𐴀𐴞𐴑𐴡𐴥𐴕𐴞𐴘𐴝𐴃𐴢 𐴀𐴝𐴏𐴠𐴤 𐴊𐴠 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴧𐴝𐴙𐴕 𐴊𐴠 𐴘𐴡𐴥𐴒𐴧𐴗𐴝𐴌 𐴕𐴝𐴔 𐴒𐴡𐴙𐴃𐴧𐴡𐴥.3𐴂𐴝𐴥𐴀𐴟𐴓𐴡𐴃𐴧𐴟 𐴘𐴡𐴥𐴒𐴧𐴗𐴝𐴌𐴠 𐴉𐴟𐴥𐴖𐴝𐴣𐴃𐴞 𐴓𐴡𐴘𐴎𐴝𐴘𐴃𐴡𐴥 𐴔𐴡𐴕𐴠𐴈𐴡𐴘𐴧𐴠𐴥, 𐴇𐴠𐴥𐴃𐴡𐴓𐴧𐴝 𐴘𐴡𐴥𐴒𐴧𐴗𐴝𐴌𐴠 𐴇𐴠𐴥𐴍𐴞𐴘𐴝𐴌 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴎𐴡𐴌𐴞𐴘𐴝 𐴀𐴝𐴥𐴎𐴡𐴔𐴞 𐴒𐴡𐴌𐴝𐴥𐴙𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴌 𐴁𐴝𐴉𐴢 𐴒𐴞𐴌𐴞𐴥𐴑 𐴑𐴡𐴗𐴔 𐴊𐴠 𐴇𐴞𐴥𐴘𐴝𐴕 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴎𐴝𐴙𐴕𐴃𐴡.4𐴃𐴝𐴌𐴝𐴥 𐴐𐴡𐴥𐴀𐴌𐴠-𐴐𐴡𐴥𐴀𐴌𐴠 𐴎𐴝𐴘 𐴇𐴡𐴦𐴑𐴧𐴝𐴥𐴕 𐴕𐴞𐴘𐴡𐴔 𐴀𐴟𐴀𐴙𐴕 𐴔𐴝𐴕𐴞 𐴁𐴡𐴓𐴧𐴝 𐴎𐴝𐴕𐴝𐴘𐴊𐴞𐴥𐴓𐴢 𐴎𐴞𐴀𐴕 𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴏𐴝𐴥𐴇𐴝𐴁𐴞 𐴒𐴟𐴥𐴕𐴠 𐴀𐴠𐴊𐴧𐴠 𐴁𐴟𐴎𐴟𐴌𐴒𐴡𐴥 𐴒𐴟𐴥𐴕𐴠 𐴎𐴝𐴌𐴞 𐴒𐴡𐴙𐴅𐴧𐴞𐴥𐴓𐴢.5𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴎𐴡𐴔𐴝𐴥𐴃𐴡𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴀𐴞𐴔𐴝𐴕𐴡𐴃𐴢 𐴔𐴡𐴎𐴁𐴟𐴃𐴢 𐴀𐴡𐴥𐴖𐴝𐴃𐴢 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌 𐴊𐴡𐴓𐴢 𐴊𐴞𐴕𐴁𐴡𐴊𐴞𐴕 𐴁𐴝𐴌𐴝𐴤𐴃𐴢 𐴀𐴝𐴐𐴧𐴞𐴥𐴓𐴢.𐴃𐴡𐴌𐴝𐴏𐴡𐴃𐴢 𐴂𐴝𐴥𐴀𐴟𐴓𐴡𐴌 𐴊𐴡𐴌𐴐𐴡𐴥𐴕
6𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴏𐴝𐴥𐴀𐴣𐴃𐴞 𐴀𐴡𐴥𐴑𐴧𐴡𐴓𐴢 𐴉𐴠𐴌𐴒𐴞𐴘𐴝 𐴀𐴠𐴊𐴧𐴠 𐴒𐴝𐴓𐴝𐴃𐴞𐴥𐴘𐴝𐴌 𐴀𐴠𐴓𐴝𐴑𐴝 𐴁𐴝𐴥𐴘 𐴎𐴝𐴦𐴃𐴢 𐴊𐴡𐴙𐴅𐴧𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴂𐴝𐴑-𐴌𐴟𐴀𐴘𐴠 𐴃𐴝𐴌𐴝𐴥𐴌𐴠 𐴀𐴠𐴐𐴞𐴥𐴘𐴝𐴃𐴢 𐴃𐴡𐴁𐴡𐴓𐴞𐴑 𐴕𐴡 𐴒𐴡𐴙𐴃𐴧𐴡𐴥 𐴔𐴝𐴕𐴝𐴥 𐴒𐴡𐴙𐴅𐴧𐴞𐴥𐴓𐴢.7𐴃𐴝𐴌𐴝𐴥 𐴔𐴞𐴏𐴞𐴥𐴘𐴝 𐴀𐴠𐴓𐴝𐴑𐴝𐴌 𐴐𐴞𐴥𐴔𐴝𐴃𐴢 𐴉𐴡𐴀𐴣𐴏𐴞 𐴁𐴝𐴦𐴊𐴠 𐴁𐴞𐴃𐴟𐴥𐴕𐴞𐴘𐴝 𐴎𐴞𐴓𐴝𐴥𐴌 𐴁𐴟𐴥𐴃𐴡𐴌𐴠 𐴎𐴝𐴘 𐴁𐴡𐴓𐴧𐴝 𐴑𐴟𐴐𐴞𐴥𐴐𐴢 𐴒𐴡𐴙𐴅𐴧𐴞𐴥𐴓𐴢, 𐴔𐴡𐴕𐴃𐴡𐴌 𐴀𐴞𐴏𐴝𐴤𐴌 𐴌𐴟𐴀𐴘𐴠 𐴃𐴝𐴌𐴝𐴥𐴌𐴠 𐴎𐴝𐴘𐴃𐴡 𐴕𐴡𐴥 𐴊𐴠.8𐴇𐴠𐴥𐴃𐴡𐴓𐴧𐴝 𐴃𐴝𐴌𐴝𐴥 𐴔𐴞𐴏𐴞𐴥𐴘𐴝 𐴁𐴝𐴥𐴘 𐴎𐴝𐴘 𐴕𐴞𐴏𐴠 𐴃𐴡𐴌𐴝𐴏𐴢 𐴐𐴡𐴥𐴀𐴌𐴡𐴃𐴢 𐴒𐴞𐴦𐴘𐴠𐴥𐴒𐴡𐴘.9𐴇𐴠𐴥𐴍𐴠 𐴂𐴝𐴥𐴀𐴟𐴓𐴠 𐴌𐴝𐴙𐴃𐴧𐴝 𐴀𐴠𐴑𐴧𐴝𐴥𐴕 𐴊𐴡𐴌𐴐𐴡𐴥𐴕𐴡𐴃𐴢 𐴊𐴠𐴑𐴠𐴥𐴌 𐴊𐴠, 𐴔𐴝𐴑𐴠𐴊𐴡𐴥𐴕𐴞𐴘𐴝𐴌 𐴀𐴠𐴥𐴎𐴧𐴡𐴕 𐴔𐴝𐴕𐴟𐴥𐴙𐴐𐴠 𐴃𐴞𐴥𐴘𐴝𐴘𐴧𐴡𐴌𐴠 𐴀𐴞𐴥𐴁𐴝𐴌𐴠 𐴁𐴞𐴐𐴞𐴤 𐴀𐴝𐴌𐴡𐴏𐴢 𐴒𐴡𐴌𐴞𐴥 𐴈𐴡𐴀𐴌 𐴊𐴠, ”𐴔𐴝𐴑𐴠𐴊𐴡𐴥𐴕𐴞𐴘𐴝𐴃𐴢 𐴀𐴝𐴀𐴘𐴧𐴡𐴌𐴠 𐴀𐴝𐴣𐴀𐴌𐴝𐴌𐴠 𐴔𐴡𐴊𐴡𐴃𐴢 𐴒𐴡𐴌𐴡𐴤𐴒𐴝𐴘.“10𐴂𐴝𐴥𐴀𐴟𐴓𐴠 𐴊𐴡𐴌𐴐𐴡𐴥𐴕 𐴕𐴝𐴥𐴕 𐴊𐴠𐴑𐴞𐴥 𐴁𐴝𐴦𐴊𐴠, 𐴀𐴝𐴣𐴀𐴌𐴝 𐴔𐴝𐴑𐴠𐴊𐴡𐴥𐴕𐴞𐴘𐴝𐴃𐴢 𐴎𐴝𐴘 𐴁𐴡𐴓𐴧𐴝 𐴀𐴠𐴥𐴇𐴡𐴕 𐴃𐴡𐴘𐴧𐴝𐴌 𐴀𐴡𐴥𐴘𐴒𐴞𐴘𐴞𐴒𐴡𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴁𐴟𐴎𐴞𐴥 𐴉𐴝𐴙𐴅𐴧𐴞𐴥 𐴊𐴠, 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴝𐴌𐴠 𐴋𐴝𐴙𐴑𐴧𐴠𐴥.𐴉𐴞𐴓𐴞𐴤𐴂𐴧𐴞𐴃𐴢 𐴔𐴝𐴥𐴎𐴠 𐴓𐴞𐴀𐴊𐴞𐴘𐴝𐴘𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤
11𐴇𐴠𐴥𐴃𐴡𐴓𐴧𐴝 𐴀𐴝𐴣𐴀𐴌𐴝 𐴃𐴡𐴌𐴝𐴏𐴡𐴃𐴧𐴟 𐴎𐴝𐴀𐴣𐴏𐴡𐴃𐴢 𐴒𐴡𐴥𐴌𐴞 𐴌𐴟𐴀𐴌𐴟 𐴏𐴝𐴔𐴡𐴃𐴝𐴌𐴝𐴑 𐴋𐴞𐴘𐴝𐴃𐴢 𐴒𐴞𐴀𐴓𐴝𐴔, 𐴀𐴝𐴦𐴌 𐴃𐴝𐴌𐴉𐴡𐴌 𐴊𐴞𐴕 𐴕𐴞𐴘𐴝𐴂𐴟𐴥𐴓𐴞𐴏𐴢 𐴐𐴡𐴥𐴀𐴌 𐴀𐴡𐴃𐴢.12𐴁𐴝𐴦𐴊𐴠 𐴈𐴠𐴥𐴕𐴃𐴟 𐴉𐴞𐴓𐴞𐴤𐴂𐴧𐴞 𐴐𐴡𐴥𐴀𐴌𐴡𐴃𐴢 𐴒𐴞𐴦𐴘𐴞𐴥, 𐴎𐴞𐴘𐴝𐴥𐴕 𐴔𐴝𐴑𐴠𐴊𐴡𐴥𐴕𐴞𐴘𐴝𐴌 𐴔𐴠𐴀𐴕 𐴐𐴡𐴥𐴀𐴌 𐴀𐴝𐴦𐴌 𐴌𐴡𐴔𐴞 𐴀𐴡𐴥𐴑𐴧𐴡𐴓𐴢 𐴃𐴝𐴥𐴑𐴠 𐴊𐴠 𐴎𐴝𐴒𐴝. 𐴀𐴝𐴣𐴀𐴌𐴝 𐴇𐴠𐴥𐴍𐴠 𐴇𐴡𐴦𐴊𐴧𐴞𐴕 𐴃𐴝𐴥𐴙𐴑𐴧𐴞𐴓𐴝𐴔.13𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴀𐴝𐴣𐴀𐴌𐴝 𐴐𐴡𐴥𐴀𐴌𐴡𐴌 𐴒𐴠𐴘𐴍𐴡𐴌 𐴁𐴝𐴀𐴌𐴠 𐴇𐴝𐴥𐴓𐴡𐴌 𐴇𐴝𐴣𐴏𐴝𐴃𐴢 𐴒𐴞𐴦𐴘𐴞𐴥, 𐴄𐴝𐴥𐴀𐴙𐴅𐴧𐴞𐴓𐴝𐴔 𐴊𐴠 𐴇𐴠𐴥𐴍𐴠 𐴊𐴟𐴖𐴝 𐴒𐴡𐴙𐴃𐴧𐴡𐴥 𐴀𐴠𐴑𐴧𐴝𐴥𐴕 𐴎𐴝𐴒𐴝 𐴉𐴝𐴘𐴧𐴟𐴔. 𐴀𐴝𐴣𐴀𐴌𐴝 𐴁𐴡𐴀𐴘𐴧𐴡𐴌𐴠 𐴇𐴡𐴊𐴟𐴥𐴕 𐴁𐴠𐴍𐴞𐴘𐴝𐴥𐴙𐴕 𐴓𐴡𐴥𐴘 𐴈𐴡𐴃𐴝𐴤 𐴈𐴡𐴀𐴘𐴓𐴝𐴔 𐴎𐴠𐴃𐴝𐴌𐴝𐴤 𐴇𐴠𐴥𐴍𐴠 𐴎𐴡𐴔𐴝 𐴀𐴡𐴥𐴘𐴧𐴠.14𐴉𐴟𐴥𐴕𐴠𐴌 𐴊𐴠 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴃𐴟𐴖𐴝𐴃𐴞𐴥𐴌𐴝 𐴐𐴡𐴥𐴀𐴌𐴡𐴌 𐴓𐴞𐴀𐴊𐴞𐴘𐴝 𐴕𐴝𐴔𐴡𐴌 𐴀𐴠𐴒𐴧𐴗𐴝𐴤 𐴔𐴝𐴘𐴝𐴉𐴟𐴖𐴝 𐴀𐴝𐴐𐴧𐴞𐴥𐴓𐴢, 𐴎𐴞𐴁𐴝𐴤𐴘𐴠 𐴁𐴝𐴘𐴡𐴙𐴕𐴧𐴝 𐴌𐴡𐴚𐴡𐴌 𐴇𐴡𐴦𐴌 𐴁𐴠𐴏𐴞𐴃𐴡𐴥. 𐴇𐴞𐴥𐴁𐴝 𐴀𐴝𐴓𐴧𐴝𐴌 𐴀𐴠𐴁𐴝𐴦𐴊𐴡𐴃𐴒𐴝𐴥𐴌 𐴀𐴝𐴐𐴧𐴞𐴥𐴓𐴢. 𐴂𐴝𐴥𐴀𐴟𐴓𐴡𐴌 𐴁𐴡𐴘𐴧𐴝𐴕 𐴊𐴞𐴥𐴘𐴝𐴕 𐴊𐴞𐴥 𐴉𐴟𐴥𐴕𐴞 𐴁𐴡𐴓𐴧𐴝 𐴔𐴝𐴓𐴞𐴑𐴠 𐴇𐴞𐴥𐴁𐴝𐴌 𐴊𐴞𐴓𐴢 𐴑𐴟𐴥𐴓𐴞𐴊𐴞𐴓𐴢.15𐴎𐴠𐴣𐴃𐴧𐴠𐴥 𐴇𐴞𐴥𐴁𐴝𐴘𐴠 𐴀𐴠𐴊𐴧𐴠 𐴇𐴞𐴥𐴁𐴝𐴌 𐴒𐴡𐴥𐴌 𐴄𐴞𐴥𐴘𐴝𐴘𐴠 𐴁𐴝𐴥𐴂𐴄𐴞𐴏𐴔𐴝 𐴓𐴡𐴘𐴧𐴠𐴥, 𐴇𐴞𐴥𐴁𐴝𐴘𐴠 𐴀𐴝𐴣𐴀𐴌𐴝𐴌𐴠 𐴀𐴠𐴀𐴕 𐴈𐴡𐴀𐴘𐴢 𐴕𐴞𐴎𐴡𐴌 𐴒𐴡𐴥𐴌𐴡𐴃𐴢 𐴊𐴝𐴖𐴡𐴃𐴢 𐴊𐴞𐴀𐴓𐴢, ”𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴔𐴝𐴓𐴞𐴑𐴡𐴌 𐴀𐴞𐴔𐴝𐴕𐴊𐴝𐴥𐴌 𐴁𐴡𐴥𐴓𐴞 𐴄𐴝𐴥𐴀𐴌𐴡, 𐴃𐴡𐴥𐴀𐴘𐴓𐴠 𐴀𐴝𐴀𐴘𐴢 𐴀𐴝𐴣𐴀𐴌 𐴒𐴡𐴥𐴌𐴡𐴃𐴢 𐴃𐴝𐴥𐴑𐴡𐴒𐴝𐴘.“ 𐴇𐴠𐴥𐴕𐴊𐴞𐴓𐴧𐴝 𐴈𐴡𐴀𐴘𐴢 𐴇𐴞𐴥𐴁𐴝𐴘𐴠 𐴀𐴝𐴣𐴀𐴌𐴝𐴌𐴠 𐴔𐴡𐴅𐴁𐴟𐴌 𐴒𐴡𐴙𐴅𐴧𐴠𐴥.𐴉𐴞𐴓𐴞𐴤𐴂𐴧𐴞𐴌 𐴎𐴞𐴘𐴡𐴥𐴓𐴡𐴃𐴢 𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴏𐴞𐴥𐴓𐴝𐴏𐴢
16𐴀𐴠𐴑 𐴊𐴞𐴕 𐴀𐴝𐴣𐴀𐴌𐴝 𐴊𐴟𐴖𐴝𐴌 𐴎𐴝𐴒𐴝𐴃𐴢 𐴎𐴝𐴙𐴌 𐴊𐴠 𐴀𐴡𐴑𐴃𐴡𐴥𐴃𐴢 𐴀𐴠𐴀𐴕 𐴀𐴡𐴥𐴘𐴧𐴠, 𐴀𐴝𐴣𐴀𐴌𐴝𐴌𐴠 𐴀𐴠𐴑 𐴁𐴝𐴣𐴊𐴞𐴘𐴠 𐴓𐴡𐴦𐴃𐴢 𐴉𐴝𐴘𐴧𐴠𐴥 𐴎𐴞𐴁𐴝𐴤𐴌𐴠 𐴀𐴠𐴒𐴧𐴗𐴝𐴤 𐴒𐴡𐴕𐴡𐴃𐴢 𐴁𐴡𐴕𐴝𐴌 𐴅𐴞𐴕𐴠 𐴉𐴝𐴘𐴧𐴠𐴥. 𐴇𐴞𐴥𐴁𐴝𐴘𐴠 𐴀𐴝𐴒𐴟𐴕 𐴈𐴡𐴃𐴝𐴤 𐴈𐴡𐴀𐴘𐴢-𐴈𐴡𐴀𐴘𐴢 𐴕𐴞𐴎𐴡𐴌 𐴒𐴞𐴌𐴡𐴥𐴏𐴢 𐴀𐴡𐴥𐴑𐴧𐴡𐴓𐴡𐴓𐴧𐴝 𐴁𐴞𐴐𐴞𐴤 𐴄𐴞𐴛𐴝-𐴉𐴡𐴘𐴐𐴝𐴤 𐴈𐴝𐴔𐴝𐴘𐴃𐴡𐴥.17𐴇𐴞𐴥𐴁𐴝𐴘𐴠 𐴂𐴝𐴥𐴀𐴟𐴓𐴡𐴌 𐴀𐴠𐴊𐴧𐴠 𐴀𐴝𐴣𐴀𐴌𐴝𐴌 𐴉𐴞𐴏𐴠𐴤-𐴉𐴞𐴏𐴠𐴤 𐴀𐴝𐴀𐴘𐴢 𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠, ”𐴔𐴝𐴕𐴟𐴥𐴙𐴐𐴢 𐴀𐴞𐴃𐴝𐴌𐴝𐴤 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝 𐴃𐴝𐴥𐴓𐴝𐴌 𐴒𐴟𐴓𐴝𐴔, 𐴎𐴠𐴃𐴝𐴌𐴝𐴤 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴕𐴠𐴅𐴝𐴃𐴡𐴌 𐴌𐴝𐴏𐴃𐴝𐴌 𐴈𐴡𐴃𐴝𐴤 𐴁𐴡𐴘𐴧𐴝𐴕 𐴒𐴡𐴌𐴠𐴥𐴌.“18𐴇𐴞𐴥𐴁𐴝𐴘𐴠 𐴇𐴠𐴥𐴕𐴊𐴞𐴓𐴧𐴝 𐴁𐴡𐴀𐴗𐴃𐴢 𐴊𐴞𐴕 𐴉𐴝𐴥𐴕 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢. 𐴀𐴝𐴇𐴠𐴥𐴌𐴞𐴃𐴢 𐴂𐴝𐴥𐴀𐴟𐴓𐴡𐴃𐴧𐴟 𐴁𐴠𐴎𐴝𐴌 𐴓𐴝𐴙𐴒𐴧𐴞𐴥𐴓𐴢, 𐴀𐴝𐴦𐴌 𐴉𐴞𐴥𐴌𐴞 𐴇𐴠𐴥 𐴅𐴞𐴕 𐴕𐴗𐴝𐴥𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴡𐴌𐴠𐴥 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴕𐴝𐴔𐴠 𐴇𐴡𐴥𐴑𐴟𐴔 𐴊𐴞𐴥𐴌, 𐴃𐴟𐴘 𐴀𐴞𐴁𐴝𐴤𐴌 𐴁𐴟𐴥𐴃𐴡𐴃𐴧𐴟 𐴕𐴠𐴦𐴓𐴞𐴎𐴝𐴒𐴡𐴥𐴘.“ 𐴇𐴠𐴥𐴃𐴟𐴕𐴡𐴃𐴢 𐴅𐴞𐴕 𐴕𐴗𐴝𐴥 𐴇𐴞𐴥𐴁𐴝𐴌 𐴁𐴟𐴥𐴃𐴡𐴃𐴧𐴟 𐴕𐴠𐴦𐴓𐴞𐴒𐴞𐴘𐴡𐴥𐴘.19𐴔𐴡𐴕𐴃𐴡𐴌 𐴇𐴠𐴥 𐴁𐴝𐴣𐴊𐴞𐴌 𐴒𐴞𐴌𐴡𐴥𐴏𐴢 𐴀𐴡𐴥𐴑𐴧𐴡𐴓𐴠 𐴊𐴠𐴑𐴠𐴥𐴌 𐴊𐴠, 𐴀𐴞𐴥𐴃𐴝𐴌𐴝 𐴄𐴞𐴛𐴝 𐴈𐴝𐴔𐴝𐴘 𐴉𐴝𐴌𐴞𐴁𐴝𐴥𐴌 𐴀𐴝𐴐𐴝𐴤 𐴀𐴝𐴌 𐴕𐴝𐴥𐴘, 𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴏𐴞𐴥𐴓𐴝𐴏𐴡𐴌𐴠 𐴊𐴡𐴥𐴌𐴞 𐴏𐴡𐴔𐴡𐴥𐴕𐴞𐴃𐴢 𐴀𐴝𐴊𐴞𐴑𐴝𐴌𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴄𐴝𐴕𐴞-𐴄𐴝𐴕𐴞 𐴓𐴡𐴘𐴒𐴞𐴘𐴠𐴥.20𐴀𐴞𐴥𐴃𐴝𐴌𐴝 𐴃𐴝𐴌𐴝𐴥𐴌𐴠 𐴌𐴡𐴔𐴞 𐴁𐴞𐴏𐴝𐴌𐴇𐴝𐴌 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴀𐴝𐴕𐴞𐴤 𐴈𐴡𐴀𐴌 𐴊𐴠, ”𐴔𐴝𐴕𐴟𐴥𐴙𐴐𐴢 𐴀𐴞𐴀𐴕𐴠 𐴀𐴝𐴣𐴀𐴌𐴝𐴌 𐴐𐴡𐴥𐴀𐴌𐴡𐴃𐴢 𐴀𐴟𐴥𐴌𐴟𐴏𐴧𐴟𐴓𐴢 𐴉𐴡𐴘𐴊𐴝 𐴒𐴡𐴌𐴠𐴥𐴌; 𐴀𐴞𐴃𐴝𐴌𐴝𐴤 𐴀𐴡𐴥𐴙𐴓𐴊𐴠 𐴘𐴡𐴇𐴟𐴥𐴊𐴞;21𐴀𐴞𐴃𐴝𐴌𐴝𐴤 𐴀𐴠𐴀𐴕 𐴌𐴡𐴏𐴡𐴥𐴔 𐴀𐴡𐴥𐴑𐴧𐴡𐴓𐴢 𐴐𐴞𐴥𐴑𐴝𐴌 𐴎𐴞𐴀𐴕 𐴀𐴝𐴣𐴀𐴌𐴝 𐴌𐴡𐴔𐴞 𐴀𐴡𐴥𐴑𐴧𐴡𐴓𐴡𐴓𐴧𐴝 𐴒𐴡𐴏𐴡𐴥𐴕 𐴘𐴝𐴥 𐴔𐴝𐴕𐴡𐴕 𐴎𐴝𐴘𐴠𐴏𐴢 𐴕𐴡.“22𐴀𐴝𐴖𐴝𐴔 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴏𐴞𐴥𐴓𐴝𐴏𐴡𐴌 𐴇𐴠𐴥𐴓𐴝𐴉𐴢 𐴀𐴞𐴥𐴃𐴝𐴌𐴝𐴌 𐴁𐴡𐴥𐴚𐴡𐴃𐴢 𐴒𐴡𐴥𐴙𐴓𐴧𐴠. 𐴃𐴡𐴥𐴘 𐴁𐴞𐴏𐴝𐴌𐴇𐴝𐴌 𐴒𐴟𐴥𐴕𐴠 𐴇𐴡𐴥𐴑𐴟𐴔 𐴊𐴞𐴥𐴘𐴠 𐴊𐴠, 𐴃𐴝𐴌𐴝𐴥𐴌 𐴒𐴝𐴙𐴌𐴡𐴌 𐴇𐴡𐴦𐴌 𐴉𐴝𐴥𐴍𐴞𐴉𐴠𐴓𐴝𐴘 𐴃𐴝𐴌𐴝𐴥𐴌𐴠 𐴁𐴠𐴃𐴢 𐴔𐴝𐴌𐴞 𐴁𐴡𐴓𐴧𐴝.23𐴀𐴞𐴥𐴃𐴝𐴌𐴝 𐴃𐴝𐴌𐴝𐴥𐴌𐴠 𐴁𐴞𐴐𐴞𐴤𐴒𐴡𐴌𐴞 𐴔𐴝𐴌𐴞 𐴁𐴝𐴦𐴊𐴠 𐴎𐴞𐴘𐴡𐴥𐴓𐴡𐴃𐴢 𐴊𐴞𐴥𐴓𐴢, 𐴀𐴝𐴦𐴌 𐴃𐴝𐴌𐴝𐴥𐴌𐴠 𐴔𐴡𐴎𐴁𐴟𐴃𐴢 𐴒𐴡𐴌𐴞 𐴉𐴝𐴀𐴌𐴝𐴊𐴞 𐴁𐴡𐴓𐴧𐴝 𐴎𐴞𐴘𐴡𐴥𐴓𐴡𐴌 𐴎𐴞𐴔𐴧𐴝𐴊𐴝𐴌𐴡𐴌𐴠 𐴇𐴡𐴥𐴑𐴟𐴔 𐴊𐴞𐴥𐴓𐴢.24𐴃𐴡𐴥𐴘 𐴎𐴞𐴔𐴧𐴝𐴊𐴝𐴌𐴒𐴗𐴝𐴥𐴘𐴠 𐴇𐴠𐴥 𐴇𐴡𐴥𐴑𐴟𐴔 𐴉𐴝𐴘𐴧𐴡𐴌𐴠 𐴃𐴝𐴌𐴝𐴥𐴌𐴠 𐴎𐴞𐴘𐴡𐴥𐴓𐴡𐴌 𐴀𐴠𐴁𐴧𐴠𐴌𐴠 𐴁𐴟𐴥𐴃𐴡𐴌𐴡𐴌 𐴑𐴝𐴔𐴝𐴥𐴌𐴝𐴃𐴢 𐴌𐴝𐴙𐴑𐴧𐴠𐴥, 𐴀𐴝𐴦𐴌 𐴃𐴝𐴌𐴝𐴥𐴌 𐴄𐴠𐴥𐴚 𐴒𐴟𐴕 𐴁𐴠𐴌𐴞𐴥𐴃𐴢 𐴒𐴡𐴥𐴓𐴝𐴘𐴊𐴞𐴘𐴠.25𐴁𐴝𐴦𐴊𐴠 𐴃𐴡𐴑𐴡𐴌𐴞𐴁𐴝𐴕 𐴀𐴝𐴊𐴝𐴤 𐴌𐴝𐴙𐴃𐴧𐴝 𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴏𐴞𐴥𐴓𐴝𐴏𐴢 𐴊𐴟𐴖𐴝 𐴒𐴡𐴌𐴠𐴥𐴌 𐴀𐴠𐴊𐴧𐴠 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴡𐴌 𐴏𐴠𐴀𐴌 𐴒𐴝𐴀𐴌, 𐴀𐴝𐴦𐴌 𐴁𐴝𐴑𐴞 𐴇𐴡𐴊𐴞 𐴀𐴡𐴥𐴑𐴧𐴡𐴓𐴠 𐴇𐴞𐴥𐴀𐴕 𐴉𐴟𐴥𐴕𐴝𐴃𐴢 𐴀𐴝𐴐𐴧𐴞𐴥𐴓𐴢.26𐴀𐴝𐴃𐴞𐴥𐴑𐴧𐴝 𐴇𐴠𐴥𐴍𐴠 𐴀𐴠𐴒𐴧𐴗𐴝𐴤 𐴀𐴠𐴃𐴧𐴡𐴥𐴌 𐴋𐴡𐴣𐴀𐴌 𐴁𐴟𐴥𐴏𐴝𐴓𐴢 𐴀𐴝𐴙𐴐𐴧𐴠𐴥, 𐴎𐴠𐴀𐴕 𐴕𐴞𐴥𐴑𐴞 𐴎𐴞𐴘𐴡𐴥𐴓𐴢-𐴈𐴝𐴥𐴕𐴝𐴌 𐴒𐴟𐴙𐴅𐴧𐴝 𐴀𐴟𐴥𐴊𐴧𐴗𐴝 𐴃𐴡𐴥𐴃𐴧𐴡𐴌𐴝𐴘𐴧𐴠. 𐴇𐴠𐴥𐴃𐴟𐴑𐴧𐴟𐴕𐴡𐴃𐴢 𐴎𐴞𐴘𐴡𐴥𐴓𐴡𐴌 𐴊𐴡𐴌𐴡𐴎𐴝 𐴁𐴠𐴒𐴧𐴟𐴥𐴕 𐴀𐴠𐴊𐴧𐴠 𐴇𐴡𐴊𐴞𐴌 𐴏𐴞𐴥𐴘𐴡𐴓𐴢 𐴓𐴟𐴕 𐴑𐴟𐴥𐴓𐴞𐴒𐴞𐴘𐴡𐴘.27𐴎𐴠𐴣𐴃𐴧𐴠𐴥 𐴎𐴞𐴘𐴡𐴥𐴓𐴡𐴌 𐴎𐴞𐴔𐴧𐴝𐴊𐴝𐴌𐴒𐴗𐴝𐴥 𐴒𐴟𐴥𐴔𐴡𐴃𐴧𐴟 𐴃𐴝𐴥𐴔 𐴉𐴝𐴘𐴧𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴎𐴞𐴘𐴡𐴥𐴓𐴡𐴌 𐴊𐴡𐴌𐴡𐴎𐴝 𐴒𐴟𐴥𐴕 𐴑𐴟𐴥𐴓𐴝 𐴊𐴠𐴙𐴑𐴧𐴠𐴥 𐴌𐴝𐴥𐴌 𐴏𐴟𐴥𐴌𐴞 𐴕𐴠𐴦𐴓𐴝𐴘 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴔𐴝𐴌𐴞𐴉𐴠𐴥𐴓𐴝𐴘𐴃𐴡 𐴏𐴝𐴘𐴧𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴘𐴠 𐴄𐴝𐴥𐴀𐴙𐴅𐴧𐴞𐴓𐴢 𐴊𐴠, 𐴇𐴡𐴊𐴞 𐴀𐴡𐴥𐴑𐴧𐴡𐴓𐴢 𐴊𐴝𐴥𐴘𐴒𐴞𐴘𐴠𐴒𐴡𐴘.28𐴔𐴡𐴕𐴃𐴡𐴌 𐴂𐴝𐴥𐴀𐴟𐴓𐴠 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴀𐴝𐴁𐴝𐴏𐴠 𐴋𐴝𐴥𐴑 𐴔𐴝𐴌𐴞 𐴈𐴡𐴀𐴌 𐴊𐴠, ”𐴕𐴞𐴎𐴡𐴌𐴠𐴥 𐴇𐴡𐴥𐴃𐴞 𐴕𐴡 𐴒𐴡𐴙𐴅𐴧𐴡𐴥; 𐴀𐴝𐴣𐴀𐴌𐴝 𐴁𐴠𐴒𐴧𐴟𐴥𐴕 𐴀𐴠𐴍𐴠𐴥 𐴀𐴝𐴏𐴞𐴤.“29𐴇𐴠𐴥𐴃𐴟𐴕𐴡𐴃𐴢 𐴘𐴡𐴥𐴒𐴧𐴗𐴝𐴘𐴠 𐴁𐴝𐴃𐴧𐴞 𐴔𐴝𐴒𐴝𐴘 𐴊𐴟𐴣𐴌𐴞 𐴁𐴟𐴥𐴃𐴡𐴌𐴠 𐴒𐴞𐴦𐴘𐴠𐴥, 𐴀𐴝𐴦𐴌 𐴇𐴝𐴉𐴞-𐴇𐴝𐴉𐴞 𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴏𐴞𐴥𐴓𐴝𐴏𐴡𐴌 𐴄𐴠𐴥𐴚𐴡𐴌 𐴒𐴟𐴌𐴝𐴃𐴢 𐴉𐴡𐴙𐴅𐴧𐴠𐴥.30𐴁𐴝𐴦𐴊𐴠 𐴘𐴡𐴥𐴒𐴧𐴗𐴝𐴘𐴠 𐴃𐴝𐴌𐴝𐴥𐴌𐴠 𐴁𐴝𐴀𐴌𐴠 𐴀𐴝𐴕𐴞𐴤 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴅𐴞𐴦, 𐴕𐴠𐴅𐴝𐴃𐴢 𐴉𐴝𐴘𐴃𐴠 𐴀𐴝𐴣𐴀𐴃𐴧𐴟 𐴑𐴞𐴦 𐴒𐴡𐴌𐴝𐴥 𐴉𐴡𐴌𐴞𐴁𐴡𐴥؟“31𐴃𐴝𐴌𐴝𐴥 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴔𐴝𐴓𐴞𐴑 𐴀𐴞𐴏𐴝𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴡𐴤, 𐴃𐴡𐴥𐴘 𐴃𐴟𐴀𐴛 𐴀𐴠𐴊𐴧𐴠 𐴃𐴟𐴣𐴀𐴝𐴥𐴣𐴌 𐴒𐴡𐴥𐴌 𐴄𐴞𐴥𐴘𐴝𐴘𐴠 𐴕𐴠𐴅𐴝𐴃𐴢 𐴉𐴝𐴘𐴁𐴝.“32𐴃𐴝𐴌𐴉𐴡𐴌𐴠 𐴃𐴝𐴌𐴝𐴥 𐴘𐴡𐴥𐴒𐴧𐴗𐴝𐴌𐴠 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴒𐴡𐴥𐴌𐴡𐴌 𐴁𐴠𐴒𐴧𐴟𐴥𐴕𐴡𐴌𐴠 𐴔𐴝𐴓𐴞𐴑𐴡𐴌 𐴑𐴝𐴓𐴝𐴔 𐴉𐴟𐴥𐴕𐴝𐴘𐴧𐴠.33𐴇𐴠𐴥 𐴌𐴝𐴙𐴃𐴡𐴌 𐴇𐴠𐴥 𐴀𐴡𐴑𐴃𐴡𐴥𐴃𐴢 𐴎𐴞𐴘𐴡𐴥𐴓𐴡𐴌 𐴎𐴞𐴔𐴧𐴝𐴊𐴝𐴌𐴒𐴗𐴝𐴥𐴘𐴠 𐴃𐴝𐴌𐴝𐴥𐴌𐴠 𐴓𐴡𐴘𐴎𐴝𐴘 𐴃𐴝𐴌𐴝𐴥𐴌 𐴎𐴡𐴈𐴡𐴥𐴔 𐴀𐴡𐴥𐴑𐴧𐴡𐴓𐴢 𐴊𐴟𐴥𐴘𐴉𐴠𐴓𐴝𐴘𐴧𐴠, 𐴁𐴝𐴦𐴊𐴠 𐴘𐴡𐴥𐴒𐴧𐴗𐴝𐴘𐴠 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴒𐴡𐴥𐴌 𐴄𐴞𐴥𐴘𐴝𐴘𐴠 𐴀𐴠𐴥𐴇𐴡𐴕 𐴁𐴝𐴥𐴂𐴄𐴞𐴏𐴔𐴝 𐴓𐴡𐴘𐴧𐴠𐴥.34𐴃𐴝𐴌𐴉𐴡𐴌𐴠 𐴘𐴡𐴥𐴒𐴧𐴗𐴝𐴘𐴠 𐴃𐴝𐴌𐴝𐴥𐴌𐴠 𐴕𐴞𐴎𐴡𐴌 𐴒𐴡𐴥𐴌𐴡𐴃𐴢 𐴀𐴝𐴕𐴞𐴤 𐴈𐴝𐴥𐴕𐴝 𐴊𐴞𐴦𐴘𐴠𐴥. 𐴀𐴝𐴓𐴧𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴞𐴤 𐴘𐴡𐴥𐴒𐴧𐴗𐴝 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴒𐴡𐴥𐴌 𐴄𐴞𐴥𐴘𐴝 𐴁𐴞𐴐𐴞𐴤 𐴑𐴟𐴥𐴐𐴞 𐴀𐴡𐴥𐴘𐴧𐴠.35𐴃𐴝𐴌𐴉𐴡𐴌 𐴊𐴞𐴕 𐴁𐴞𐴀𐴕𐴧𐴝 𐴀𐴡𐴥𐴘𐴧𐴠 𐴌𐴝𐴥𐴌, 𐴁𐴞𐴏𐴝𐴌𐴇𐴝𐴌 𐴒𐴟𐴥𐴕𐴠 𐴎𐴞𐴘𐴡𐴥𐴓𐴡𐴌 𐴎𐴞𐴔𐴧𐴝𐴊𐴝𐴌𐴡𐴌 𐴇𐴝𐴣𐴏𐴠 𐴉𐴟𐴓𐴞𐴐𐴢 𐴀𐴡𐴥𐴑𐴧𐴡𐴓𐴢 𐴊𐴞𐴉𐴠𐴍𐴝𐴥𐴘 𐴈𐴡𐴀𐴌 𐴊𐴠, ”𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌𐴠 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥 𐴊𐴡.“36𐴇𐴠𐴥𐴃𐴟𐴕𐴡𐴃𐴢 𐴎𐴞𐴘𐴡𐴥𐴓𐴡𐴌 𐴎𐴞𐴔𐴧𐴝𐴊𐴝𐴌𐴒𐴗𐴝𐴥𐴘𐴠 𐴂𐴝𐴥𐴀𐴟𐴓𐴡𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴊𐴟𐴕𐴞𐴥 𐴎𐴡𐴕𐴡𐴌𐴠 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥𐴊𐴞 𐴁𐴡𐴓𐴧𐴝 𐴁𐴞𐴏𐴝𐴌𐴇𐴝𐴌 𐴀𐴡𐴥𐴑𐴧𐴡𐴓𐴠 𐴇𐴡𐴥𐴑𐴟𐴔 𐴊𐴞𐴥𐴘𐴠. 𐴃𐴟𐴣𐴀𐴝𐴥𐴌𐴝 𐴘𐴝𐴓𐴝 𐴎𐴝𐴘𐴒𐴡𐴥𐴘 𐴉𐴝𐴌𐴞𐴁𐴝𐴥; 𐴐𐴝𐴥𐴕𐴃𐴞𐴌 𐴏𐴝𐴥𐴀𐴣𐴃𐴠 𐴎𐴡𐴦𐴒𐴡𐴥𐴘.“37𐴔𐴡𐴕𐴃𐴡𐴌 𐴂𐴝𐴥𐴀𐴟𐴓𐴠 𐴉𐴟𐴓𐴞𐴐𐴧𐴟𐴥𐴕𐴡𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝 𐴇𐴡𐴥𐴊𐴟𐴕 𐴌𐴡𐴔𐴞 𐴔𐴝𐴕𐴟𐴥𐴙𐴐𐴢 𐴀𐴡𐴥𐴘 𐴁𐴝𐴦𐴊𐴠 𐴘𐴡 𐴀𐴞𐴥𐴃𐴝𐴌𐴝 𐴀𐴝𐴣𐴀𐴌𐴝𐴌𐴠 𐴁𐴞𐴏𐴝𐴌𐴡𐴃𐴢 𐴕𐴡 𐴃𐴟𐴓𐴞𐴤 𐴁𐴠𐴒𐴧𐴟𐴥𐴕𐴡𐴌 𐴔𐴟𐴀𐴕𐴃𐴟 𐴁𐴠𐴃𐴢 𐴔𐴝𐴌𐴞 𐴎𐴞𐴘𐴡𐴥𐴓𐴡𐴃𐴢 𐴊𐴞𐴥𐴘𐴠, 𐴀𐴝𐴦𐴌 𐴀𐴠𐴇𐴡𐴥𐴕 𐴀𐴞𐴥𐴃𐴝𐴌𐴝 𐴀𐴝𐴣𐴀𐴌𐴝𐴌𐴠 𐴕𐴞𐴎𐴝𐴥𐴔𐴡𐴌 𐴏𐴝𐴥𐴀𐴣𐴃𐴠 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥 𐴊𐴠𐴥𐴌 𐴊𐴠 𐴕𐴞𐴥𐴑𐴞؟ 𐴇𐴠𐴥𐴕𐴊𐴞𐴓𐴧𐴝 𐴁𐴞𐴓𐴑𐴟𐴥𐴓𐴢 𐴀𐴡𐴥𐴘 𐴕𐴡 𐴉𐴝𐴌𐴞𐴁𐴡𐴥; 𐴀𐴞𐴥𐴃𐴝𐴌𐴝 𐴕𐴞𐴎𐴠𐴁𐴝𐴎𐴠 𐴀𐴝𐴀𐴘𐴢 𐴀𐴝𐴣𐴀𐴌𐴝𐴌𐴠 𐴇𐴝𐴥𐴓𐴝𐴏𐴢 𐴒𐴡𐴌𐴡𐴥𐴗𐴑𐴒𐴝𐴘.“38𐴁𐴝𐴦𐴊𐴠 𐴉𐴟𐴓𐴞𐴐𐴧𐴟𐴥𐴕𐴠 𐴈𐴡𐴃𐴝𐴤 𐴇𐴞𐴥𐴀𐴕 𐴁𐴞𐴏𐴝𐴌𐴇𐴝𐴌 𐴒𐴟𐴥𐴕𐴡𐴌𐴠 𐴎𐴝𐴕𐴝𐴘𐴧𐴠𐴥, 𐴀𐴝𐴦𐴌 𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴏𐴞𐴥𐴓𐴝𐴏𐴢 𐴌𐴡𐴔𐴞 𐴔𐴝𐴕𐴟𐴥𐴙𐴐𐴢 𐴊𐴠 𐴉𐴟𐴥𐴕𐴞 𐴀𐴞𐴥𐴃𐴝𐴌𐴝 𐴋𐴡𐴦𐴌𐴝𐴘𐴒𐴞𐴘𐴡𐴥𐴘.39𐴀𐴞𐴥𐴃𐴝𐴌𐴝 𐴀𐴝𐴀𐴘𐴢 𐴃𐴝𐴌𐴝𐴥𐴃𐴧𐴟 𐴔𐴝𐴉𐴢 𐴏𐴝𐴘𐴧𐴠𐴥, 𐴀𐴝𐴦𐴌 𐴃𐴝𐴌𐴝𐴥𐴌𐴠 𐴎𐴞𐴘𐴡𐴥𐴓𐴡𐴌 𐴁𐴝𐴀𐴌𐴠 𐴀𐴝𐴕𐴞𐴤 𐴀𐴝𐴌𐴡𐴏𐴢 𐴒𐴡𐴌𐴠𐴥𐴌 𐴊𐴠, ”𐴔𐴠𐴀𐴌𐴁𐴝𐴕𐴞 𐴒𐴡𐴥𐴌𐴞 𐴐𐴡𐴥𐴀𐴌 𐴒𐴝𐴥𐴕𐴡𐴃𐴧𐴟 𐴎𐴡𐴦𐴒𐴡𐴥𐴘.“40𐴃𐴝𐴌𐴝𐴥 𐴎𐴞𐴘𐴡𐴥𐴓𐴡𐴃𐴧𐴟 𐴇𐴝𐴥𐴓𐴝𐴏𐴢 𐴀𐴡𐴥𐴘 𐴁𐴝𐴦𐴊𐴠 𐴓𐴞𐴀𐴊𐴞𐴘𐴝𐴌 𐴒𐴡𐴥𐴌𐴡𐴃𐴢 𐴒𐴞𐴦𐴘𐴠𐴥; 𐴇𐴠𐴥𐴍𐴠 𐴃𐴝𐴌𐴝𐴥 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴊𐴡𐴓𐴝 𐴀𐴡𐴥𐴘𐴧𐴠, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴇𐴞𐴥𐴔𐴧𐴡𐴃𐴢 𐴊𐴞𐴥𐴘𐴠. 𐴃𐴝𐴌𐴉𐴡𐴌𐴠 𐴃𐴝𐴌𐴝𐴥 𐴈𐴠𐴥𐴕𐴃𐴟 𐴒𐴞𐴦𐴘𐴠𐴥𐴒𐴡𐴘.The Word for the World International