1करिन्थ1
1पौलुसोअहें रोत, जियाहा ख्रिस्त ईसुउ प्रेशित बोणिइलोअ काजे देवे हाद्युहू, आन पाही सोस्थेनेसोअहें रोत-2करिन्थ होयरो मेर्येए देवोअ माअहें, मोन्ज्ये जियांहां पवित्र ओवीइलोअ काजे हाद्येहे, आन ख्रिस्त ईसुमेहें एक ओविइलाआ नाता वाअहीं देवोअ माहें बोण्येहे, आन जो आपाआ प्रभु ईसु ख्रिस्त होय, तियाआ भक्ती धरतीपोअ आखी जागे जें कोअतेहे तियांहां:3देव आपाआ आब्हू आन प्रभु ईसु ख्रिस्त तुमुहूं मेरवानी आन होक आपुहूं जोवे.4ख्रिस्त ईसुमेहें तुमापोअ ओवली देवोअ मेरवानीइं वाखरी आंय तुमाआं वोतीइ कायम देवोअ धन्यवाद कोअहो.5तिये तुमुहूं हारेक गोठीमेहें, आखा गोगीइलामेहें आन आखी बुद्दीमेहें मालदार कोअयेहे.6एताआ काजे के ख्रिस्ताआ साक्शी तुमामेहें खोरी निहींयीही.7तिहीं वाईं तुमामेहें आत्माआं कोड्लाज वरदानोअ कमी कायनाहां, आन तुमू प्रभु ईसु ख्रिस्ताआ प्रगट ओवीइलाआ वाट जोवतेहे.8तोज तुमुहूं आखरी जाआं वातड़े मिके, एताआ काजे तुमू आपाआ प्रभु ईसु ख्रिस्ताआ दिहोमेहें निर्दुस रोत सेकहा.9जिये तियाआ बेटुह्हू ईसु ख्रिस्त, आपाआ प्रभुउ संगतीमेहें तुमुहूं हाद्ये, तो देव खोरु होय.10माआं पाव्हीइला, प्रभु ईसु ख्रिस्ताआ नावम आंय तुमुहूं विनंती कोअहो के, तुमू आखे एकमेकाअरी एक हारका मोनोवाईं टोलवाअहूं जोवे, आन तुमाआं विसमेहें भेदभाव ने जोवे, पोन तुमू एकाज विसारोवाईं मिलीत रोअहूं जोवे.11काहाके माआं पाव्हीइला, ख्लोए कुटूंबाआ माहें माहूं कोयोहो के, तुमामेहें भान्गड़्यी ओवतीही.12माआं कोअलोअ अर्थ एहेलोह होय के, तुमामेहें हर एक जोओं अलग अलग गोठ कोहे, एखू कोहे, “आंय पौलुसोअ होय;” एखू कोहे, “आंय अपुल्लोसोअ होय;” एखू, “आंय केफाआ होय,” आन कोडू “आंय ख्रिस्ताआ होय” कोहे.13केहें ख्रिस्त वाटाइत गोयुहू के? पौलुस तुमाआं वोतीइ क्रुस खांबोपोअ मोयू के? पौलुसोअ नावम तुमाआं बाप्तिस्मा ओवो के?14आंय देवोअ आभार मानोहो के, क्रिसपुस आन गायसोहो सोड़ीत कोडाआ बी बाप्तिस्मा मी नाहां कोअयू.15ताहां, एहें कोडो बी ने कोअहूं जोवे के, माआं नावम तुमाआं बाप्तिस्मा ओवोहो.16आरे होव! स्तिफनासोअ कुटूंबाअ बी बाप्तिस्मा मीज कोअल्यो; याहां सोड़ीत बिहीरा कोडाआ बाप्तिस्मा कोअल्याआ माहूं ओर नाहां आवती.17काहाके ख्रिस्ते माहूं बाप्तिस्मा कोइलोअ काजे नाहां, पोन हाजी बातमी उनाड़े तेहें काजे मोकल्युहू, तो बी मोनव्योंअ बुद्दी वाअहीं नाहां, एहेलोहो ने ओवुहूं जोवे के ख्रिस्ताआ क्रुस खांबोपोऱ्योअ मोत वाया जाय.18काहाके क्रुस खांबोअ संदेश जें आरवाअतेहें तियांआं काजे फोगाय होय, पोन वासाअनाराआं काजे तो देवोअ सेक्ती होय.19काहाके एहेलोह लेख्योहो,“आंय सिहांणाआं सिंहाणाय आरवीत टाकीहीं,आन जाणकारोअ समज काडीत टाकी देहीं.”20सिहांणू कोडू होय? जाणकार कोडू होय? यी दुन्याआं वादावादी कोअनारु का गोयू? केहें दुन्याआं बुद्धीही देवे फोगाय नाहां ठरव्यी के?21काहाके, दुन्या सोताआ बुद्दी वाअहीं देवोहो ने ओलखीत सेकत्ली ओं देवोहो मुंदू ओतू, तिहीं वाअहीं फोगायीइ संदेशो वाअहीं विश्वास कोअनाराअ तारण कोइलोअ देवोहो गोम्यो.22काहाके यहुदी माअहें समत्कारोअ पुरावू होदतेहे, आन ग्रीक माअहें बुद्दी होदतेहे,23पोन आमू तोम क्रुस खांबोपोअ टांगाअला ख्रिस्ताआ परसार कोअताहा, ओ परसार यहुदी माअहोंअ काजे वाटेपोअ अड़सन आन बिगर यहुदी माअहोंअ काजे फोगाय होय.24पोन जियांहां हाद्येहे तियांआं काजे मोन्ज्ये यहुदी आन युनानीइं काजे ख्रिस्त ओ देवोअ ताकत आन ओकल होय.25काहाके जियाहा तुमू देवोअ फोगाय कोत गणतेहे, तों मोनव्योअ ओकले रोत बी जाअखी ओकलेए गोठ आन जियाहा देवोअ कमजोरी समजीइतेहे, ते मोनव्योअ सेक्ती रोत बी जाअखी ताकतवाली गोठ होय.26ताहां ओमे, माआं पाव्हीइला, देवे तुमुहूं हाद्ये तेहेलाम तुमू कोडे ओते तियाआ तेबी विसार कोआ. माअहोंअ नजरेमेहें तुमा मेर्येए थोड़ेज जोएं ओकलवान, ताकतवान आन उसी जातीइ ओते.27पोन देवे ताकतवानोहों लाजवाड़ीलोअ कोअते दुन्यामेऱ्याआ कमजोरोहों निवड़ीत लेदे.28काहाके देवे दुन्यामेहें जें निसी जातीइ, ओलावल्ये एहेलेहें आन जियांआं गणती नेन भरती ने एहेलाहां निवड़्ये, काहाके जें सोताहा ओकलवान समजीइतेहें, तियांहां विणकाम्ये ठरवीत सेके.29एताआ काजे के कोडो बी देवोअ सामने वोडाय ने कोअहूं जोवे.30पोन देवोज वाअहीं तुमू ख्रिस्त ईसुमेहें होय, ख्रिस्ताहा आपाअ काजे ओकल कोत देवे ठरव्यू, मोन्ज्ये तियाज वाअहीं आपू धर्मी बोण्येहे; आपू पवित्र ओवेहे आन आपाआ सुटका ओवीही.31एताआ काजे जेहलोहो वसनोम लेख्योहो के, “जों वोडाय कोए, तों प्रभुमेहें वोडाय कोअहूं जोवे.”
The Word for the World International