Joel2
1Zion ga telui kwa gai, nah a kemci lamlwatu gade makwa tei mra gaibeu! Hangdeu ga lungh kebam pelane de peu hing eh mbeu gai, kedanemene RAMPAUBE tingbazie gwang la dida; kesang, nna dida. 2Cide mui nah misuikesia tingba ge zie, hemwa mau nah muiting kecu tingba ge. Lamlwatudung ga kemui zang kedi nzwa, mi kekiee ge nah kengkieng minadung, madau ge de cinzwa kemak, nah madau de cinzwa dai lak, ceheu kekiee ge cai de.3Mi ne pedwa gade tyei nggah di au da, nah pecai ga miheu heu bam dida. Hangdeu cide pedwa gade au Eden gurie nzwa hezuyi, dede pecai gade au teimsia kedi hetaideu ge. Kesang, magede cika de pak di gai lak.4Penuide ngau kegai dau hekwendung nzwa, nah penui hereu kwendung nzwa pakla.5Penui lamlwatudung reuga nsau hang gai ge, penui hekwen bagidung kwa nzwa di, tsehei kekibe heu kecu nzwa pet, mina kedi ge hereu tei kera mtei kelu de nzwa.6Penui kebam dau minadung de keheu di nah penui zu de hamhui di.7Penui kengkieng reugwame nzwa pak la; penui reugwame nzwa tangdeu nra la; penui tet la nah penui pikiet ket ga nsamram eh, nah lampui gade penui tet tei nli di lama.8Mede hang gege dede keda lam nia gai di lama; penui penuikatei lampui ga tet la; penui hereu net reu dung gade tet lubui dede penui pikiet maudi lama.9Penui namdi ga gwaketang lüt, penui namdi tangdeu ga pak, penui kidung ga nra hang, penui keregamedung nzwa hebakidung gade lüt.10Kideube penui dwa gade ncui di, ting mbeu di, tingnaimiak nah hekei muidi, nah hegidung baa si tadi. 11RAMPAUBE pe reugwame dwa gade pe kwa ncuh gai, pe reugwamedung kiee zu kedine; kedanemene pe sam kemzai, maadung de ngkieng. Kedanemene RAMPAUBE tingba au di nah ngaukehing tingba. Cauge cikade ringlu lai?12RAMPAUBE rang ndugai “Dede cude,” “Nnui mlung pelane teu ada gwanglu. Mmwang, hap nah heei eh.”13Nnui mlung teurak di nnui pai ni katei rünne mene, nah RAMPAUBE nnui Tinggwang da cailigwang lu. Kedanemene pa au pezai yi nah ngaugia le puilu, pa au perata mneu la nah pe samkak kainzeu la, nah pa saja peu kera zette lama.14Cau ne ci? Pa nreu gwang nnui da ngaugia bam lubui, nah pecai ga samlam kai nzeu lu, ciu mapeu nah sak kera mapeu RAMPAUBE nnui Tinggwang ziemne?15Zion gade telui kwa gailo, kemci mmwang kera qulu, nah kemci hemaa ge qulu. 16Mina dung de qulu, kemci hekwa kera ziemne qulu. Hecingmedung de hekwa lu, henamedung de hekwa lu nah ngienadung de. Lakciubepeidung de pe kibungdung gade mpet maisia nah lakciube pui de hemeu ketei bam gade mpet maisia.17Peu cingkumedung, RAMPAUBE kilamedung de recabam penai kimuiki kak ga haplu. Peu penuide kielu, “N minadung de ngaunggia gailo, RAMPAUBO, nah n magumdung de peu keu henui tei di helo, heleuhdung ne mneu nah kii di melu kerane. Daitei penui heleuhdung kakga ‘Penui Tinggwang daiga lano?’” de eh ranglai.18Pecai RAMPAUBE pe leuhme ziemne pelung nei di nah pe minadung de ngaunggia di.19RAMPAUBE pesam keli nah pe minadung da rang, “Pielo, Ih nnuide ciu lang beu zie, zau keheci, nah maca. Nnui cidung le mnung dizie, nah peu ge heleuh kedadung nnuide nneu si lak.20Ih tingtünle de kegwang reugwamedung de nnui dade keu mdei di beu zie, nah penuide Ih deucang nah mi lung kemak deu ga teu gai dizie, penui dwa le tingnaimiak kepetle jaaidi ga, nah pecai maa de tingnaimiak kenlüt jaaidi ga. Penui tim nnam cuh dizie, nah cipau rim nnam kesia de cuh dizie.”Kesang, Rampaube ma kedidung tei gai da.21Ngngi di so, O hangdeu, nsuiyi nah renga lu, kedanemene RAMPAUBE au makedi tei zielu.22Ngngi di so, nnui luh kaunedung, hetaideu ga tsehei deu dung pwak cuh luzie, tsingbangdung petsi kei zie, nah nzüttsi bang nah kubetsi bangdung kepui ngau lubui.23Nnui sui yilu, O Zion namedung, nah nnui sui yilu RAMPAUBE nnui Tinggwang gade. Pa nnui de herei tingrui petau ge peu da, nda nzwa pa nnuide herei tingrui nah heriak tingrui de pwapeu zie.24Hecaipung ga tsiu le pui dizie, nah zau keheci nah macadung le pebung pui nlim dizie.25“Ih nnuide tangriemdung ne nnui mei tyei nggah kedidung de peu caili dai beuzie, nsau kela tangriem, nah matei msia kela tangriem nah ma dang kela tangriem, Ih ne reugwame kedi nnui kakga lang kegai de.26Nang kekieege tyei nah pui nlim luzie, nah RAMPAUBE nnui Tinggwang zi twa zie, nnui kakga mimakecang bata tei kegaibe de, nah madau de a minadung de kengngam gage kaidai dilak.27Nang cilu zie Ih Israel me kakga la lie kecu, nah Ih RAMPAUBE nnui Tinggwang, nah keda gah lie kecu, nah madau gede a minadung de kengngam gage kaidai dilak.28Aipaucai ainzwa gwang zie, Ih mina pumteih leune ga a Rabe rui gai zie, nah nnui napeidung nah nnui napuidung caiha rangzie. Nnui mina hangkiame hemang mmi zie, nnui rehangme ma rengei ngau zie. 29Kilamepei nah kilamepei dung da dede, cipau tingdau Ih a Rabe rui gai zie.30Ih tingkam nah kideu ga miswakega tei lia zie, hejai, mi, nah mika gu heciadung. 31Tingnaimiak mui nlüt dizie nah hekei hejai nzwa dizie, RAMPAUBE tingba kedi nah kengngi de kegwang dwa.32Ciu eh RAMPAUBE dade kengha kie kelube de kelibeu zie. Mount Zion nah Jerusalem ga midung ge mbai luzie kecune, RAMPAUBE kerang de nzwa, nah ring kelume kak de RAMPAUBE ne qu kelume.
Bridge Connectivity Solutions Pvt. Ltd.