Isaiah45
1Aide RAMPAUBE pa keniak kelube, Cyrus dage ranggai, pe zetle ba Ih ne teu lala,heleuhdung reu peu ngkinglu kerane, hegwangmedung kengking sütlu kerane,nah pe dwaga kikamdung ngkeilu kerane, iciu eh kiriekidung ngkei pwabamlu kerane:2“Ih n dwaga rai mie zie nah lamlwatudung tei nsam dizie;Hetageu kikamdung de Ih tei takcai dizie nah pe hegeutiedung de Ih dang takcai dizie,3nah Ih kemui ga kebam nah hebai kedi mabam pwa ncu peu zie,ciciude nang, Ih RAMPAUBE, Ih n zi teu eh qu kegaibe, Israel Tinggwang lie kecu ci lubui. 4A kilabe Jacob, nah Ih kedet kelu Israel ziemne,Ih n zi qu eh ncu hetwa kepung zi de peu zeu, nah nang acu ci meliede.5Ih au RAMPAUBE lie, nah mi keda gede gah; Ih caile Tinggwang keda gah.Hereu tei kerane Ih n reunet peu zie, nang acu ci meliede;6ciciude tingnaimiak kepet gade, nah naimiak kenlüt gade, minadung Ih gwale hera keda gah lie kecu ci luzie;Ih au RAMPAUBE, nah cika keda gede gah lie.7Ih kebaa de teigai nah kemui de teigai;Ih kezuyi teugwang la nah kensum de teigai la; Ih au RAMPAUBE ma ai pelane tei kegaibe.8Nnui tinggimdung, nreu le de tingrui nghung lo! Peu ting gade kesamsang rui nghung lo.Peu kideube de cide luulu, kelikelu lungh cuhlu kerane,nah kesamsang de si eh lungh cuhlu kerane. Ih, RAMPAUBE, ci kenana de dam gai.9Co mige penuide dam kegaibe de ngngwa kesamlim kera au, pe dade au hangdeu ga kebam lidei li pelane kakga de lidei li kedage nzwa da!Lidei li keteibe dade, ‘Nang daipai tei au no?’ Mede ‘N bata ga au peki bam memi’ de eh keteu lani?10Co mige pe pei dage kerang be au, ‘Nang daipai de nkwet zeu no?’ Mede mipui ge de, ‘Nang daipai ge de nna zeu no?’11Aide RAMPAUBE ne ranggai, Israel Kemci Tinggwang, pecu Dam kegaibe:‘Nang daitei eh Ih a namedung dage daipai teigai ziebi de kecu acu keteu lano? Ih daitei ziebi nang ne acu ranglia zieni?’12‘Ih kideu teigai nah cika mina de dam gai.Ih a ba le tinggimdung teigai, nah hegidung leune de pet kerane Ih aja kaigai.13Samsang kerane Ih Cyrus de kelunggai, nah Ih pe lampuidung tei mzui beu zie.Pa a namdi teigai zie; pa a mina langgi kedime de pe ki riep ga peu mie dizie, nah rangkang nah hetau henim ziemne ma,’” de eh reugwame reu RAMPAUBE ranggai.14Aide RAMPAUBE ne ranggai,“Egyptme ne mahi kelu nah Cush nah Sabeanme maheidung, mina tie kedi kemlangme,n dage teugwang beuzie. Penui ngu zie. Penui n cai sui zie, hegeuria le kangpung eh.Penui n da keumie zie nah penui nggia kie eh rang zie,‘Tinggwang ncu ngngwala kesang, nah pa rünne gwale mi keda gah.’” 15Nang au nkatei ncu hebai teu kela Tinggwang, Israel Tinggwang, Kelikelube.16Penui pelane nggam dizie nah penuide tei hengam teiciak dizie; mamie tei kelame hengam ga tet zie.17Dede Israel de RAMPAUBE ne rilu zie kelunghta kelikelu dele;nang madauge de ngngam di mede tei hengam dai dilak. 18RAMPAUBE aide ranggai, tinggimdung tei kegaibe, kesang Tinggwangkideu dam kegaibe nah tei kegaibe, cide tei ntip nah bam tie kelu tei kegaibe.Pa cide dam gai, kemta ge eh teigai ma, dede peu mide cika lunghlu kerane riemlu:“Ih au RAMPAUBE, nah hera keda kette gah.19Ih heni kembai bam ge gade ngkim eh marang ma;Jacob leuhme dage Ih aide ranggai ma, ‘Kemta gage acu peeilu!’Ih au RAMPAUBE, kesangbe rang kelabe; Ih kemzuibe peu cikegai teila.20Gwang ngkwalu nah gwanglu! Gwang ngkwa kwalu, heleuhdung kakgade nnui pak kelamedung!Penui maci gah, mamiedung tei kecume nah kelibeu gai kelak herabedung dage kekie tei kelame.21Gwang mnalu nah a dage ranglia lo, ci mcilu kebuibe ge teugwanglu! Penuide peu mariem ncütlu.Ndaa gede cide caune keulia no? Caune cide rangno?Ih RAMPAUBE ne meni? Ih rünne gwale Tinggwang keda gah, kemzeu Tinggwang nah Kelikelube; Ih gwale keda migede gah.22A dage nreulu nah kelilu, kideu penli ga kebam leune;kedanemene Ih Tinggwang lu, nah keda gede gah.23Ih akatei a dage sampet la,a kemzeu hezai rang eh, nah cide caili nreu dilak:‘Pelane a dage kwaktung mie zie, mleu pelane sampet zie. 24Penui acu rangzie, “RAMPAUBE da rünne kelikelu nah kengking bam.”’”Caugamme pecu penui rata labi penui pelane nggam dizie.25RAMPAUBE dade Israel leuhme pelane de kelilu zie; penui pe ziemne hegie luzie.
Bridge Connectivity Solutions Pvt. Ltd.