सबोपदेशक4
1तेवी मी पुशो देरती पोर ज्य दिख्यो, काय थोड़ाक माणहा हेऱ्य खाराब वेवार ईथे; मी तान आहवा दिखेल हे, एने ताह कुण दिलासो आपणार नाह! वेला केरावणारान आथाम ताकेत एती, एने ज्या माणहे जा माणहाह वेला केरावतेह, ताह दिलासो आपणार बी कुण नाह सोतो।2केरीन मी ता जीवताला से जा एवी वोर जीवताला हेते, तान गेणती माय मी ता मुरेलाह जा मोर जायेल हेते, जादा हाजो मानुह।3पुण ता दुयूह रेन जुलूम हाजो तो हे, जान एवी वोर पायदा नाह एनो, एने नाह ता खाराब काम दिख्यो, जा दुनिया माय एतेह।4तेवी मी आखा मेहनेतीन काम, एने आखा सफल कामाह दिख्यो जा माणहे तान आहेंल्या हेऱ्या कुयराये केरतेह; ज्य बी कायच कामान नाह एने वाराह देरनेन गेत हे।5फोगो तान आथ जोड़ीन बोह रिथे एने सोतान नुकसान केर लिथे।6जो काय मुठ बोर तुमरी फाय हे, ता माय खुस रेणे हाजो हे; जा हेऱ्य मेहनेत एने वाराह देरनेन गेत हे।7तेवी मी देरती पोर पुशो एक वात दिख्यो, जान काय मतलब नाह सोतो।8एगदो माणुह एखालोच रिथे, एने तान कुण नाह सोतो; तान नाह सोरा हेते, एने नाह बाहख हेते, तीबी तान मेहनेत निवरेत नाह; एने जो काय ता फाय रिथे, ता केरीन केदी संतुष्ट नाह एत; एने नाह तो केदी किथे, “मी कुणीन केरता मेहनेत केरथु, एने मारा जीवणाह हुक नाह जुड़ेत?” ज्य बी कायच कामान नाह एने दुखाम बोरायेल काम हे।9एक माणहाह रेन दुय माणहे हाजा रेतेह, काहाकाय जा कामाम ता मेहनेत केरतेह, ता कामाम ताह हाजो फायदो जुड़ेह।10काहाकाय केदी ताम रेन एक पोड़ जाय, ताहार दिहरो तान हातीह उठाड़ी; पुण तान केरता दुखान वात ज्यी हे जेवी तो एखालो पोड़ी, ताह उठाड़नार कुण दिहरो निह एय।11केदी दुय जाणे एकठास हुवतेह, ताहार ता ताताला रेती, पुण एखालो हुवणार माणुह किहीक तातो एय सिकेह?12केदी एगदो एखालाह आरीव बी सिकेह, पुण दुय तान सामनो केर सेकतेह। जी दोयड़ी तीन हुता केरीन बुणेल हे, ती उतवाली टुट नाह सिकेत।13एकलीदार जुवान गेरीब एणे से बी ओहला डावाला एने फोगा राजाह रेन जुलूम हाजो हे, जा चेतावणी नाह मानते।14एय सिकेह काय तो जुवान जेली माय रेन निकलीन राज पोदा पोर आयेल एय, नाहते एय सिकेह काय तो तान राज माय गेरीबी माय पायदा इनो एय।15मी देरती पोर फिरते आखा जीवताला माणहाह ता दिहरा जुवानान उगे जातालो दिख्यो, जो पेल्लान जागो लेय।16ता आखा माणहान काय सेवोट नाह, एने नाह तान जा न्याह रेन पेल एता; एने जा बाद माय आवती, ता ता से खुस नाय एती, ज्य बी कायच कामान नाह एने वाराह देरनेन गेत हे।
The Word for the World International