Josua3
1Auai rau murpa awr rü hanow Josua hai Israeluüa maten Sittim hownia lawt büah khai, now Jawrdan aw ria re-e kowkowi büah khai. Amatni dow pown Jawrdan aw dowi mowr nakowi uowi büah khai.2Now sum ni kung kowi dow aluchowuüa mih tangbung khup rah maten kowi kowkrawi kowi khai. Now krawi tek pe mih, “CHAKRAMANG enni kowh Thurai sangbowk laitawm tawkpla uamowuüa kawtla mih enni khi khe enni matia kowh uowi rah hownia amatni kung kowi enni nakawikrawi kown.4Nami tiama iawng katpaw enni uang mang dowi tak chekhai. Naiawng rakowi uamowuüa mih narik tüng enni tiama kownkow narik mang kown. Tawkchedow sangbowk laitawm tawkpla re-e enni naia tatawn kown nadowi. Nami sangbowk laitawm tawkpla hownia alak 2,000 muk ngia enni nauowi kown takla,” pakhai.5Nami kung kowi Josua tek pe maru kawmuüa mih, “Tharau dow enni pungmadawng kowi awdara lup ahuma CHAKRAMANG nachang kown. Naiawng rakowi enni matia mih tachim tasai büa diah,” pakhai.6Nami kung kowi Josua tek pe uamowuüa mih, “Enni mih sangbowk laitawm tawkpla kawtla now maru kawmuüa pur kowi Jawrdan aw rik pown büa diah,” pakhai. Nahanow uamowuüa dow sangbowk laitawm tawkpla kawtla now maru kawmuüa pur kowi rik mang khai.7Nakhowk khe CHAKRAMANG tek pe Josua mih, “Ani hownia bowt now Israeluüa maten tut-e lang kri mih aluchow ang nachang en kown. Nahanow amatni dow Mosi tut-e ang tawi uowila reng iawng en tut-e paw ang tawi uowila en reng pami natuk büah kown.8Now sangbowk laitawm tawkpla kawt mih uamowuüa kowi en napeah ana kown mih, ‘Enni mih Jawrdan aw pang re-e kowtowm khowk now tui kowi iowng büa diah,’ pape diah,” pakhai.9Nami kung kowi Josua tek pe Israeluüa mih, “Mami re-e uang büa diah. Now CHAKRAMANG enni kowh Thurai tekah mih laiklow sünta büa diah.10Masing Thurai dow enni tut-e uowi reng pami hai aia dow Kananuüa, Hituüa, Hivuüa, Perizuüa, Girgasuüa, Amawruüa hai Jebusuüa kowi enni hownia naprütta kown mih maiawng enni natuk kown.11Palusama kowi kowh CHAKRAMANG kowh sangbowk laitawm tawkpla uamowuüa nakawtla now narik pown Jawrdan aw kown. Jawrdan aw tui kowi amatni kowchawp hown krowksang takling nurlur mih tui nauang taklu bowk kown, now talowng phunglung mih tui maten tap iawng naiowng hüah kown,” pakhai.14Naiawng rakowi maru kawmuüa dow napown Jawrdan aw kownkow lut tangbung büah khai bowt, now sangbowk laitawm tawkpla kawt mih uamowuüa rik mang khai.15Nami khin dow luprak kua khin chekhai. Luprak kua khin dow Jawrdan aw tui atekma chekhai. Nachenganchepaw sangbowk laitawm tawkpla kawt mih uamowuüa kowchawp Jawrdan aw tui hown krowksang hawr dawilawi mih tui dow uang taklu khai. Now nami tui dow uamowuüa khawk chawpra hownia Zarethan marow re-e kowh Adam marow ria mowr tui süng awr pün khai. Naiawng rakowi khawk chawpra hownia Sata Kowng mowr tui hawr dowi chekhai. Nahanow Jeriko marow re-e nami Jawrdan aw Israeluüa haipown khai.17Israeluüa maten nowng pown Jawrdan aw dowi mowr dow CHAKRAMANG kowh sangbowk laitawm tawkpla kawt mih uamowuüa mih tui takra kowi kowh bawn kangma mih kowi iowng büa khai. Now Israeluüa maten dow bawn kangma mih iawng haipown büah khai.
The Seed Company